Short Tsongkhapa Guru Yoga—Tibetan

Practices › Guru Yoga | བོད་ཀྱི་བླ་མ།འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས། | བོད་ཀྱི་བླ་མ།རྗེ་ཙོང་ཁ་པ།

English | བོད་ཡིག

འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

Je Tsongkhapa Lobzang Drakpa

Further information:
Download this text:

༄༅། །རྗེ་བཙུན་ཐམས་ཅད་མཁྱེན་པའི་བླ་རྣལ་ཉུང་ངུ་བཞུགས་སོ།  །

 

ན་མོ་མཉྫུ་ཤྲཱི་མཱ་ཏི་བྷ་དྲ་ཀཱིརྟི་ཡེ།

བླ་མའི་རྣལ་འབྱོར་ཉུང་ངུའི་ཚུལ་དུ་ཉམས་སུ་བླང་བར་འདོད་པས།  གནས་ཁང་ཕྱག་དར་དང་རྒྱན་གྱིས་བཀོད།  མཆོད་པ་གཡོ་བ་མེད་པར་བཤམས།  བདེ་བའི་སྟན་ལ་རླུང་རྣལ་དུ་དབབ།  ངེས་འབྱུང་གི་བློ་དང་བྱང་ཆུབ་ཀྱི་སེམས་ལ་ཡུན་རིང་དུ་བློ་བཞག་ནས།  སངས་རྒྱས་ཆོས་ཚོགས་ཀྱི་སྐྱབས་སེམས་དང་ཚད་མེད་བཞི་བསྒོམ།

 

སྣོད་བཅུད་ཐམས་ཅད་རང་བཞིན་དག་པའི་ངང་།  །

མདུན་གྱི་ནམ་མཁར་མཆོད་སྤྲིན་རྒྱ་མཚོའི་དབུས།  །

རིན་ཆེན་སེང་ཁྲི་པད་ཟླའི་གདན་སྟེང་དུ།  །

ཆོས་ཀྱི་རྒྱལ་པོ་ཀུན་མཁྱེན་བློ་བཟང་གྲགས།  །

སྲས་དང་སློབ་མར་བཅས་པའི་ཚོགས་ཐམས་ཅད།  །

དགའ་ལྡན་ཡིད་དགའ་ཆོས་འཛིན་གཞལ་ཡས་ནས།  །

རྫུ་འཕྲུལ་ཆེན་པོའི་སྟོབས་ཀྱིས་མངོན་པར་གཤེགས།  །

གསང་གསུམ་གཟི་བརྗིད་མཚུངས་མེད་དཔལ་དུ་འབར།  །

དགྱེས་བཞིན་བྱིན་གྱིས་རློབས་ཕྱིར་བཞུགས་སུ་གསོལ།  །

བདག་ལུས་ཞིང་རྡུལ་མཉམ་པར་རབ་སྤྲུལ་ནས།  །

སྒོ་གསུམ་རབ་གུས་དད་པས་ཕྱག་འཚལ་ལོ།  །

དངོས་བཤམས་གཟུངས་རིག་མོས་སྟོབས་ཀྱིས་སྤྲུལ་བའི།  །

མཆོད་ཚོགས་ཀུན་འབུལ་སྡིག་ལྟུང་ཐམས་ཅད་བཤགས།  །

དགེ་ལ་ཡི་རང་ཆོས་འཁོར་བསྐོར་བར་བསྐུལ།  །

མྱ་ངན་མི་འདའ་བཞུགས་པར་གསོལ་བ་འདེབས།  །

འདིས་མཚོན་དགེ་བ་བྱང་ཆུབ་ཆེན་པོར་བསྔོ།  །

བདག་གཞན་ལུས་དང་ལོངས་སྤྱོད་དགེ་ཚོགས་རྣམས།  །

ཀུན་བཟང་རྣམ་རོལ་མཎྜལ་མཆོད་པའི་སྤྲིན།  །

རབ་འབྱམས་ནམ་མཁའི་མཐར་ཐུག་བཀང་སྟེ་འབུལ།  །

ཚོགས་རྫོགས་སྒྲིབ་བྱང་སྐུ་གཉིས་ཐོབ་པར་ཤོག  །

དམིགས་མེད་བརྩེ་བའི་གཏེར་ཆེན་སྤྱན་རས་གཟིགས།  །

དྲི་མེད་མཁྱེན་པའི་དབང་པོ་འཇམ་པའི་དབྱངས།  །

བདུད་དཔུང་མ་ལུས་འཇོམས་མཛད་གསང་བའི་བདག  །

གངས་ཅན་མཁས་པའི་གཙུག་རྒྱན་ཙོང་ཁ་པ།  །

བློ་བཟང་གྲགས་པའི་ཞབས་ལ་གསོལ་བ་འདེབས།  །

རྟག་ཏུ་བདག་ལ་བྱིན་གྱིས་བརླབ་ཏུ་གསོལ།  །

བདག་རྒྱུད་ཆོས་དང་འདྲེས་པར་བྱིན་གྱིས་རློབས།  །

སྲིད་ལས་ངེས་འབྱུང་སྐྱེ་བར་བྱིན་གྱིས་རློབས།  །

ཚུལ་ཁྲིམས་ཡོངས་སུ་དག་པར་བྱིན་གྱིས་རློབས།  །

སེམས་ཅན་ཕ་མར་ཤེས་པར་བྱིན་གྱིས་རློབས།  །

བྱམས་དང་སྙིང་རྗེ་སྐྱེ་བར་བྱིན་གྱིས་རློབས།  །

བདག་གཞན་བརྗེ་བར་ནུས་པར་བྱིན་གྱིས་རློབས།  །

བདག་བས་གཞན་གཅེས་འབྱོང་བར་བྱིན་གྱིས་རློབས།  །

བྱང་ཆུབ་སེམས་མཆོག་སྐྱེ་བར་བྱིན་གྱིས་རློབས།  །

ཡང་དག་ལྟ་བ་རྟོགས་པར་བྱིན་གྱིས་རློབས།  །

གཞན་ཕན་མཐའ་ཡས་འབྱུང་བར་བྱིན་གྱིས་རློབས།  །

བདུད་སྡེའི་དཔུང་ཚོགས་གཞོམ་པར་བྱིན་གྱིས་རློབས།  །

སངས་རྒྱས་བསྟན་པ་རྒྱས་པར་བྱིན་གྱིས་རློབས།  །

བླ་མའི་སྐུ་གསུང་ཐུགས་ལས་སྐུ་སྔགས་དང་།  །

ཕྱག་མཚན་འཕྲོས་པས་རང་གི་གནས་གསུམ་ཐིམ།  །

དབང་དང་བྱིན་རླབས་དངོས་གྲུབ་ཐོབ་པར་བསམ།  །

འཁོར་རྣམས་འོད་ཞུ་རྗེ་བཙུན་བླ་མར་ཐིམ།  །

བླ་མ་དགྱེས་བཞིན་རང་གི་ཚངས་བུག་ནས།  །

སྙིང་དབུས་པད་དཀར་བཞད་པའི་ཟེའུ་འབྲུ།  །

ཟླ་བའི་སྟེང་ན་དགྱེས་བཞིན་བཞུགས་པར་གྱུར།  །

ཐུགས་ཀར་འཇམ་དཔལ་དཀར་པོ་ནི།  །

རལ་གྲི་གླེགས་བམ་འཛིན་པ་ཡི།  །

ཐུགས་དབུས་དྷཱིཿཡིག་གསེར་མདོག་ལ།  །

སེམས་གཏད་ཨ་ར་པ་ཙ་བཟླ།  །

ཐུན་མཐར་དགེ་བསྔོ་ཤིས་བརྗོད་བྱ།  །

 

ཅེས་པའང་ས་ཁྱི་ལོའི་སྣྲོན་ཟླའི་ཚེས་དགུ་ལ་ཡིད་ངོར་འཆར་བཞིན་འཇམ་དཔལ་དགའ་བའི་གོ་ཆས་བྲིས་པའོ།  །སརྦ་དཱ་མངྒ་ལཾ།  བྷ་ཝནྟུ།  ཤུ་བྷཾ།།    །།

 

This website uses cookies to collect anonymous usage statistics and enhance the user experience.
Decline
Accept