ཡར་ལྷ་ཤམ་པོའི་བསང་།
༄༅། །ཡར་ལྷ་ཤམ་པོའི་བསང་བཞུགས།
ཀྱེ། དབུས་གཙང་རུ་བཞིའི་ཡུལ་ལྷ་ཆེ། །
ས་བརྒྱད་སེམས་དཔའ་དཀར་ཕྱོགས་སྐྱོང་། །
གཞི་བདག་ཡོངས་ཀྱི་སྡེ་དཔོན་ཆེ། །
མཆོད་བསྟོད་དྲེགས་པའི་དཀྱིལ་འཁོར་དུ། །
དབང་ཐོབ་དམ་གནོས་དྲེགས་པའི་རྗེ། །
ཤམ་པོ་ཡབ་ཡུམ་སྲས་འཁོར་དང་། །
བཀའ་ཉན་སྤྲུལ་པའི་དམག་ཚོགས་བཅས། །
འདིར་གཤེགས་བསང་དང་གསེར་སྐྱེམས་དང་། །
དཀོར་ཆ་སྣ་ཚོགས་མཆོད་པ་བཞེས། །
ཉམས་པ་སངས་ལ་འཐིབས་པ་དྭངས། །
མི་མཐུན་གནོད་པའི་རྐྱེན་ཀུན་སྲུངས། །
མཐུན་པའི་དངོས་གྲུབ་བདག་ལ་སྩོལ། །
ཆོས་འཁོར་གཙུག་ལག་དབེན་གནས་སྐྱོངས། །
བསྟན་པ་བསྟན་འཛིན་དར་ཞིང་རྒྱས། །
འཇིག་རྟེན་བདེ་ཞིང་སྐྱིད་པ་དང་། །
བཅོལ་བའི་ལས་རྣམས་བསྒྲུབ་ཏུ་གསོལ། །
བསྟན་ལ་གནོད་པའི་ཡིད་བསྲུབས་ཚོགས། །
ཐལ་བའི་རྡུལ་བཞིན་རློགས་པ་དང་། །
རྒྱ་འདྲེ་འགོང་པོའི་རྒྱུ་ལམ་ཆོད། །
བསྟན་པའི་སྦྱིན་བདག་དབུ་འཕང་མཐོ། །
ཕྱོགས་ལས་རྣམ་རྒྱལ་ཕྲིན་ལས་མཛོད། །
ཀི་བསྭོ་ཆའོ་ལྷ་རྒྱལ་ལོ། །
བཀྲ་ཤིས་སྲིད་ཞིའི་དཔལ་འབྱོར་ཀུན། །
ཆུ་བོའི་རྒྱུན་བཞིན་འདུ་བར་མཛོད། །
ཅེས་ཕྱེ་མར་གསེར་སྐྱེམས་མཆོད་དོ། །
ཅེས་པའང་མེ་སྤྲེལ་སྣྲོན་ཟླའི་ཚེས་ཉེར་གསུམ་ལ་ལྕགས་རྩི་གྲི་གུའི་ཉེ་འགྲམ་ལྷ་ཆེན་པོ་ཡར་ལྷ་ཤམ་པོའི་མདུན་སྟ་རྩ་ཆུ་མིག་གི་ནེའུ་ཐང་དུ་ཆོས་ཀྱི་བློ་གྲོས་པས་བྲིས་པ་དགེའོ།། །།
