The Sixteen Elders—Tibetan

Sixteen Arhats | Sādhanas | Buddha Prayers | Tibetan Mastersའཇམ་དབྱངས་མཁྱེན་བརྩེའི་དབང་པོ།

English | བོད་ཡིག

འཇམ་དབྱངས་མཁྱེན་བརྩེའི་དབང་པོ།

Buddha and the 16 Arhats

Further Information:

༄༅།  །གནས་བརྟན་ཕྱག་མཆོད་དང་འབྲེལ་བར་ཆོ་ག་མདོར་བསྡུས་བྱ་ཚུལ་བཞུགས་སོ། །

ཨོཾ་སྭ་སྟི།

པཎ་ཆེན་ཤཱཀྱ་ཤྲཱིས་མཛད་པར་གྲགས་པའི་གནས་བརྟན་ཕྱག་མཆོད་དང་འབྲེལ་བར་ཆོ་ག་མདོར་བསྡུས་ཙམ་བྱ་ཚུལ་གྱི་ངག་འདོན་ནི།

སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །

བྱང་ཆུབ་བར་དུ་བདག་ནི་སྐྱབས་སུ་མཆི། །

བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །

འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །

ལན་གསུམ་གྱིས་སྐྱབས་སེམས་བྱ།

སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག

སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག

སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག

ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམ་ཚད་མེད་པ་ལ་གནས་པར་གྱུར་ཅིག

སྐྱབས་གནས་དཀོན་མཆོག་གསུམ་གྱི་བདེན་པ་དང༌། །

རྒྱལ་བ་སྲས་བཅས་རྣམས་ཀྱི་བྱིན་རླབས་དང༌། །

ཚོགས་གཉིས་མངའ་ཐང་ཆོས་དབྱིངས་དག་སྟོབས་ཀྱིས། །

སྣོད་བཅུད་བདེ་ཅན་ཞིང་གི་བཀོད་པའི་དབུས། །

ཡིད་འཕྲོག་ནོར་བུའི་གཞལ་མེད་ཁང་ཆེན་པོར། །

རིན་ཆེན་སེང་ཁྲི་པད་ཟླའི་གདན་མཆོག་དང༌། །

དངོས་བཤམས་གཟུངས་རིག་མོས་སྟོབས་ཀྱིས་སྤྲུལ་པའི། །

མཆོད་སྤྲིན་རྒྱ་མཚོས་གང་ཞིང་སྤྱོད་གྱུར་ཅིག །

ན་མོ་རཏྣ་ཏྲ་ཡཱ་ཡ། ན་མོ་བྷ་ག་ཝ་ཏེ། བཛྲ་སཱ་ར་པྲ་མརྡྷ་ནེ། ཏ་ཐཱ་ག་ཏ་ཡ། ཨརྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ཨོཾ་བཛྲེ་བཛྲེ་མཧཱ་བཛྲེ། མཧཱ་ཏེ་ཛྭ་བཛྲེ། མཧཱ་བིདྱཱ་བཛྲེ། མཧཱ་བོ་དྷི་ཙིཏྟ་བཛྲེ། མཧཱ་བོ་དྷི་མཎྚོ་པ་སཾ་ཀྲ་མ་ཎ་བཛྲེ། སརྦ་ཀརྨ་ཨ་ཝ་ར་ཎ་བི་ཤྭ་དྷ་ན་བཛྲེ་སྭཱཧཱ།

མཆོད་པའི་སྤྲིན་གྱི་སྔགས་ལན་གསུམ་རོལ་མོ་བཅས་བྱ།

སྤོས་བཏུལ་ཞིང་གདངས་དང་བཅས།

ལག་མཐིལ་ལྟར་མཉམ་རིན་ཆེན་གྱིས་སྤྲས་པ། །

ལྗོན་ཤིང་ཆུ་མཚོས་བརྒྱན་པའི་ས་གཞིའི་དབུས། །

རིན་ཆེན་ལས་གྲུབ་གྲུ་བཞི་སྒོ་བཞི་པ། །

པདྨ་ཉི་ཟླས་བརྒྱན་པའི་གདན་སྟེང་དུ། །

ཐུགས་རྗེས་རྩོད་པའི་དུས་ཀྱི་གདུལ་བྱ་རྣམས། །

རྣམ་གྲོལ་ལམ་ལ་འགོད་མཛད་འགྲོ་བའི་མགོན། །

ཐུབ་པ་མཆོག་དང་གནས་བརྟན་ཆེན་པོ་རྣམས། །

འཁོར་དང་བཅས་པ་གནས་འདིར་གཤེགས་སུ་གསོལ། །

 

ཕྱོགས་བཅུའི་རྒྱལ་བ་སྲས་བཅས་ཐམས་ཅད་དང་། །

ཤེས་རབ་མེ་འབར་ཉོན་མོངས་མཚོ་སྐེམ་ཞིང་།  །

རྣམ་གྲོལ་བསོད་ནམས་ཞིང་དུ་བཀའ་སྡོད་པའི། །

ཕྱོགས་བཅུའི་ཉན་ཐོས་དགེ་འདུན་བཞུགས་སོ་འཚལ། །

ཡོན་སྦྱོར་མཆོད་པའི་གནས་སུ་སྤྱན་འདྲེན་ན། །

འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །

འགྲོ་བའི་མགོན་པོ་ཤཱཀྱ་སེང་གེ་ཡིས། །

སངས་རྒྱས་བསྟན་པ་གང་གི་ཕྱག་ཏུ་བཞག །

གསུང་རབ་རིན་ཆེན་སྒྲོམ་གྱི་ཁ་འབྱེད་པའི། །

ཆོས་སྐྱོང་དགྲ་བཅོམ་ཆེན་པོ་བཞུགས་སོ་འཚལ། །

དམ་ཆོས་སྤེལ་བའི་སླད་དུ་སྤྱན་འདྲེན་ན། །

འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །

 

ཐུབ་པའི་བཀའ་བསྒོས་བསྟན་པའི་རྒྱལ་མཚན་འཛིན། །

ཡན་ལག་འབྱུང་དང་མ་ཕམ་ནགས་ན་གནས། །

དུས་ལྡན་རྡོ་རྗེ་མོའི་བུ་བཟང་པོ་དང༌། །

གསེར་བེའུ་བྷ་ར་དྷྭ་ཛ་གསེར་ཅན་མཆོག །

འཕགས་པ་བ་ཀུ་ལ་དང་སྒྲ་གཅན་འཛིན། །

ལམ་ཕྲན་བྷ་ར་དྷྭ་ཛ་བསོད་སྙོམས་ལེན། །

ལམ་བསྟན་ཀླུའི་སྡེ་སྦེད་བྱེད་མི་ཕྱེད་པ། །

དགྲ་བཅོམ་གནས་བརྟན་ཆེན་པོ་དེ་དག་ནི། །

བསོད་ནམས་རིན་ཆེན་གླིང་དུ་སྤྱན་འདྲེན་གྱིས། །

འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །

སྤང་དང་ཡེ་ཤེས་ཕུན་ཐོགས་སངས་རྒྱས་ཀྱང་། །

གདུལ་བྱའི་དབང་གིས་ཉན་ཐོས་ཚུལ་འཛིན་པ། །

ཁྱད་པར་ཅན་གྱི་ཕྲིན་ལས་ཆོས་སྐྱོང་བའི། །

གནས་བརྟན་བཅུ་དྲུག་འདིར་བྱོན་གདན་ལ་བཞུགས། །

བདེ་གཤེགས་བཀའ་ལུང་གཙོར་མཛད་བསྟན་པ་སྲུང་། །

རང་དོན་དོར་ནས་འཁོར་བའི་ནག་ཚལ་དུ། །

གཞན་དོན་ལྷུར་མཛད་གནས་བརྟན་བཅུ་དྲུག་པོ། །

དམ་བཅས་ཐུགས་རྗེའི་དབང་གིས་གནས་འདིར་གཤེགས། །

དགེ་བསྙེན་སྐྱབས་གསོལ་བདེན་པའི་ཚིག་བརྟན་པ། །

དཀོན་མཆོག་གསུམ་གྱི་ཞབས་འབྲིང་མཆིས་སོ་འཚལ། །

བསོད་ནམས་རིན་ཆེན་ཞིང་དུ་སྤྱན་འདྲེན་གྱིས། །

འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །

རོལ་མོ་བཅས་སྤྱན་དྲང་།

ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །

དུས་གསུམ་གཤེགས་པ་མི་ཡི་སེང་གེ་ཀུན། །

བདག་གིས་མ་ལུས་དེ་དག་ཐམས་ཅད་ལ། །

ལུས་དང་ངག་ཡིད་དང་བས་ཕྱག་བགྱིའོ། །

བཟང་པོ་སྤྱོད་པའི་སྨོན་ལམ་སྟོབས་དག་གིས། །

རྒྱལ་བ་ཐམས་ཅད་ཡིད་ཀྱིས་མངོན་སུམ་དུ། །

ཞིང་གི་རྡུལ་སྙེད་ལུས་རབ་བཏུད་པ་ཡིས། །

རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །

རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །

སངས་རྒྱས་སྲས་ཀྱི་དབུས་ན་བཞུགས་པ་དག །

དེ་ལྟར་ཆོས་ཀྱི་དབྱིངས་རྣམས་མ་ལུས་པ། །

ཐམས་ཅད་རྒྱལ་བ་དག་གིས་གང་བར་མོས། །

དེ་དག་བསྔགས་པ་མི་ཟད་རྒྱ་མཚོ་རྣམས། །

དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །

རྒྱལ་བ་ཀུན་གྱི་ཡོན་ཏན་རབ་བརྗོད་ཅིང་། །

བདེ་བར་གཤེགས་པ་ཐམས་ཅད་བདག་གིས་བསྟོད། །

 

མཚུངས་མེད་བལྟ་བས་མི་ངོམས་ཤིང༌། །

གསེར་གྱི་མདོག་ཅན་མཛེས་པའི་སྐུ། །

ཞལ་གཅིག་ཕྱག་གཉིས་སྐྱིལ་ཀྲུང་བཞུགས། །

ས་གནོན་མཉམ་བཞག་མཛད་ཕྱག་འཚལ། །

བླ་མའི་སྐུ་ཚེ་བརྟན་པ་དང༌། །

བསྟན་པ་རྒྱས་པར་བྱིན་གྱིས་རློབས། །

 

གངས་རི་ཆེན་པོ་ཏི་སེ་ལ། །

འཕགས་པ་གནས་བརྟན་ཡན་ལག་འབྱུང༌། །

དགྲ་བཅོམ་སྟོང་དང་སུམ་བརྒྱས་བསྐོར། །

སྤོས་ཕོར་རྔ་ཡབ་འཛིན་ཕྱག་འཚལ། །

བླ་མའི་སྐུ་ཚེ་བརྟན་པ་དང༌། །

བསྟན་པ་རྒྱས་པར་བྱིན་གྱིས་རློབས། །

 

དྲང་སྲོང་རི་ཡི་ཤེལ་ནགས་ན། །

འཕགས་པ་གནས་བརྟན་མི་ཕམ་པ། །

དགྲ་བཅོམ་བརྒྱ་ཕྲག་གཅིག་གིས་བསྐོར། །

ཕྱག་གཉིས་མཉམ་བཞག་མཛད་ཕྱག་འཚལ། །

བླ་མའི་སྐུ་ཚེ་བརྟན་པ་དང༌། །

བསྟན་པ་རྒྱས་པར་བྱིན་གྱིས་རློབས། །

 

ལོ་མ་བདུན་པའི་རི་ཕུག་ན། །

འཕགས་པ་གནས་བརྟན་ནགས་ན་གནས། །

དགྲ་བཅོམ་སྟོང་དང་བཞི་བརྒྱས་བསྐོར། །

སྡིག་མཛུབ་རྔ་ཡབ་འཛིན་ཕྱག་འཚལ། །

བླ་མའི་སྐུ་ཚེ་བརྟན་པ་དང༌། །

བསྟན་པ་རྒྱས་པར་བྱིན་གྱིས་རློབས། །

 

འཛམ་བུ་གླིང་གི་ཟངས་གླིང་ན། །

འཕགས་པ་གནས་བརྟན་དུས་ལྡན་ནི། །

དགྲ་བཅོམ་སྟོང་དང་ཆིག་བརྒྱས་བསྐོར། །

གསེར་གྱི་རྣ་ཀོར་འཛིན་ཕྱག་འཚལ། །

བླ་མའི་སྐུ་ཚེ་བརྟན་པ་དང༌། །

བསྟན་པ་རྒྱས་པར་བྱིན་གྱིས་རློབས། །

 

སིངྒ་ལ་ཡི་གླིང་ན་ནི། །

གནས་བརྟན་རྡོ་རྗེ་མོ་ཡི་བུ། །

དགྲ་བཅོམ་ཆེན་པོ་སྟོང་གིས་བསྐོར། །

སྡིག་མཛུབ་རྔ་ཡབ་འཛིན་ཕྱག་འཚལ། །

བླ་མའི་སྐུ་ཚེ་བརྟན་པ་དང༌། །

བསྟན་པ་རྒྱས་པར་བྱིན་གྱིས་རློབས། །

 

ཆུ་བོ་ཡ་མུ་ན་གླིང་ན། །

འཕགས་པ་གནས་བརྟན་བཟང་པོ་ནི། །

དགྲ་བཅོམ་སྟོང་དང་ཉིས་བརྒྱས་བསྐོར། །

ཆོས་འཆད་མཉམ་བཞག་མཛད་ཕྱག་འཚལ། །

བླ་མའི་སྐུ་ཚེ་བརྟན་པ་དང༌། །

བསྟན་པ་རྒྱས་པར་བྱིན་གྱིས་རློབས། །

 

གནས་མཆོག་ཁ་ཆེའི་ཡུལ་ན་ནི། །

འཕགས་པ་གནས་བརྟན་གསེར་བེའུ། །

དགྲ་བཅོམ་ཆེན་པོ་ལྔ་བརྒྱས་བསྐོར། །

རིན་ཆེན་ཞགས་པ་འཛིན་ཕྱག་འཚལ། །

བླ་མའི་སྐུ་ཚེ་བརྟན་པ་དང༌། །

བསྟན་པ་རྒྱས་པར་བྱིན་གྱིས་རློབས། །

 

ནུབ་ཀྱི་བ་ལང་སྤྱོད་ན་ནི། །

བྷ་ར་དྷྭ་ཛ་གསེར་ཅན་ལ། །

དགྲ་བཅོམ་ཆེན་པོ་བདུན་བརྒྱས་བསྐོར། །

ཕྱག་གཉིས་མཉམ་བཞག་མཛད་ཕྱག་འཚལ། །

བླ་མའི་སྐུ་ཚེ་བརྟན་པ་དང༌། །

བསྟན་པ་རྒྱས་པར་བྱིན་གྱིས་རློབས། །

 

བྱང་གི་སྒྲ་མི་སྙན་ན་ནི། །

འཕགས་པའི་གནས་བརྟན་བ་ཀུ་ལ། །

དགྲ་བཅོམ་ཆེན་པོ་དགུ་བརྒྱས་བསྐོར། །

ཕྱག་གཉིས་ནེའུ་ལེ་འཛིན་ཕྱག་འཚལ། །

བླ་མའི་སྐུ་ཚེ་བརྟན་པ་དང༌། །

བསྟན་པ་རྒྱས་པར་བྱིན་གྱིས་རློབས། །

 

པྲི་ཡང་ཀུ་ཡི་གླིང་ན་ནི། །

འཕགས་པའི་གནས་བརྟན་སྒྲ་གཅན་འཛིན། །

དགྲ་བཅོམ་སྟོང་དང་ཆིག་བརྒྱས་བསྐོར། །

རིན་ཆེན་པྲོག་ཞུ་འཛིན་ཕྱག་འཚལ། །

བླ་མའི་སྐུ་ཚེ་བརྟན་པ་དང༌། །

བསྟན་པ་རྒྱས་པར་བྱིན་གྱིས་རློབས། །

 

བྱ་རྒོད་ཕུང་པོའི་རི་བོ་ལ། །

འཕགས་པའི་གནས་བརྟན་ལམ་ཕྲན་བསྟན། །

དགྲ་བཅོམ་སྟོང་དང་དྲུག་བརྒྱས་བསྐོར། །

ཕྱག་གཉིས་མཉམ་བཞག་མཛད་ཕྱག་འཚལ། །

བླ་མའི་སྐུ་ཚེ་བརྟན་པ་དང༌། །

བསྟན་པ་རྒྱས་པར་བྱིན་གྱིས་རློབས། །

 

ཤར་གྱི་ལུས་འཕགས་གླིང་ན་ནི། །

བྷ་ར་དྷྭ་ཛ་བསོད་སྙོམས་ལེན། །

དགྲ་བཅོམ་སྟོང་ཕྲག་གཅིག་གིས་བསྐོར། །

གླེགས་བམ་ལྷུང་བཟེད་འཛིན་ཕྱག་འཚལ། །

བླ་མའི་སྐུ་ཚེ་བརྟན་པ་དང༌། །

བསྟན་པ་རྒྱས་པར་བྱིན་གྱིས་རློབས། །

 

ལྷ་གནས་སུམ་བཅུ་རྩ་གསུམ་ན། །

འཕགས་པའི་གནས་བརྟན་ལམ་བསྟན་ནི། །

དགྲ་བཅོམ་ཆེན་པོ་དགུ་བརྒྱས་བསྐོར། །

ཆོས་འཆད་གླེགས་བམ་འཛིན་ཕྱག་འཚལ། །

བླ་མའི་སྐུ་ཚེ་བརྟན་པ་དང༌། །

བསྟན་པ་རྒྱས་པར་བྱིན་གྱིས་རློབས། །

 

རི་ཡི་རྒྱལ་པོ་ངོས་ཡངས་ལ། །

འཕགས་པའི་གནས་བརྟན་ཀླུ་ཡི་སྡེ། །

དགྲ་བཅོམ་སྟོང་དང་ཉིས་བརྒྱས་བསྐོར། །

བུམ་པ་མཁར་བསིལ་འཛིན་ཕྱག་འཚལ། །

བླ་མའི་སྐུ་ཚེ་བརྟན་པ་དང༌། །

བསྟན་པ་རྒྱས་པར་བྱིན་གྱིས་རློབས། །

 

རི་ཡི་རྒྱལ་པོ་བི་ཧུ་ལར། །

འཕགས་པའི་གནས་བརྟན་སྦེད་བྱེད་ནི། །

དགྲ་བཅོམ་སྟོང་དང་བཞི་བརྒྱས་བསྐོར། །

ཕྱག་གཉིས་གླེགས་བམ་འཛིན་ཕྱག་འཚལ། །

བླ་མའི་སྐུ་ཚེ་བརྟན་པ་དང༌། །

བསྟན་པ་རྒྱས་པར་བྱིན་གྱིས་རློབས། །

 

རི་ཡི་རྒྱལ་པོ་གངས་ཅན་ལ། །

འཕགས་པའི་གནས་བརྟན་མི་ཕྱེད་པ། །

དགྲ་བཅོམ་སྟོང་ཕྲག་གཅིག་གིས་བསྐོར། །

བྱང་ཆུབ་མཆོད་རྟེན་འཛིན་ཕྱག་འཚལ། །

བླ་མའི་སྐུ་ཚེ་བརྟན་པ་དང༌། །

བསྟན་པ་རྒྱས་པར་བྱིན་གྱིས་རློབས། །

 

འཕགས་པའི་དགེ་བསྙེན་དྷརྨཱ་ཏ། །

རལ་པ་ཐོད་བཅིངས་གླེགས་བམ་ཁུར། །

སྣང་མཐའ་མདུན་གྱི་མཁའ་ལ་གཟིགས། །

རྔ་ཡབ་བུམ་པ་འཛིན་ཕྱག་འཚལ། །

བླ་མའི་སྐུ་ཚེ་བརྟན་པ་དང༌། །

བསྟན་པ་རྒྱས་པར་བྱིན་གྱིས་རློབས། །

 

བརྩོན་པས་གོ་བགོས་མཐུ་སྟོབས་ལྡན། །

སངས་རྒྱས་བསྟན་པ་ལེགས་བསྲུང་བ། །

ཤར་ལྷོ་ནུབ་བྱང་ཕྱོགས་བཞི་ཡི། །

རྒྱལ་ཆེན་བཞི་ལ་ཕྱག་འཚལ་ལོ། །

བླ་མའི་སྐུ་ཚེ་བརྟན་པ་དང༌། །

བསྟན་པ་རྒྱས་པར་བྱིན་གྱིས་རློབས། །

མེ་ཏོག་དམ་པ་ཕྲེང་བ་དམ་པ་དང་། །

སིལ་སྙན་རྣམས་དང་བྱུག་པ་གདུགས་མཆོག་དང་། །

མར་མེ་མཆོག་དང་བདུག་སྤོས་དམ་པ་ཡིས། །

རྒྱལ་བ་དེ་དག་ལ་ནི་མཆོད་པར་བགྱི། །

 

ན་བཟའ་དམ་པ་རྣམས་དང་དྲི་མཆོག་དང་། །

ཕྱེ་མ་ཕུར་མ་རི་རབ་མཉམ་པ་དང་། །

བཀོད་པ་ཁྱད་པར་འཕགས་པའི་མཆོག་ཀུན་གྱིས། །

རྒྱལ་བ་དེ་དག་ལ་ནི་མཆོད་པར་བགྱི། །

 

མཆོད་པ་གང་རྣམས་བླ་མེད་རྒྱ་ཆེ་བ། །

དེ་དག་རྒྱལ་བ་ཐམས་ཅད་ལ་ཡང་མོས། །

བཟང་པོ་སྤྱོད་ལ་དད་པའི་སྟོབས་དག་གིས། །

རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །

ན་མོ་རཏྣ་ཏྲ་ཡཱ་ཡ། ན་མོ་བྷ་ག་ཝ་ཏེ། བཛྲ་སཱ་ར་པྲ་མརྡྷ་ནེ། ཏ་ཐཱ་ག་ཏ་ཡ། ཨརྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ཨོཾ་བཛྲེ་བཛྲེ་མཧཱ་བཛྲེ། མཧཱ་ཏེ་ཛྭ་བཛྲེ། མཧཱ་བིདྱཱ་བཛྲེ། མཧཱ་བོ་དྷི་ཙིཏྟ་བཛྲེ། མཧཱ་བོ་དྷི་མཎྚོ་པ་སཾ་ཀྲ་མ་ཎ་བཛྲེ། སརྦ་ཀརྨ་ཨ་ཝ་ར་ཎ་བི་ཤྭ་དྷ་ན་བཛྲེ་སྭཱཧཱ།

འདོད་ཆགས་ཞེ་སྡང་གཏི་མུག་དབང་གིས་ནི། །

ལུས་དང་ངག་དང་དེ་བཞིན་ཡིད་ཀྱིས་ཀྱང་། །

སྡིག་པ་བདག་གིས་བགྱིས་པ་ཅི་མཆིས་པ། །

དེ་དག་ཐམས་ཅད་བདག་གིས་སོ་སོར་བཤགས། །

ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །

རང་རྒྱལ་རྣམས་དང་སློབ་དང་མི་སློབ་དང་། །

འགྲོ་བ་ཀུན་གྱི་བསོད་ནམས་གང་ལ་ཡང་། །

དེ་དག་ཀུན་གྱི་རྗེས་སུ་བདག་ཡི་རང་། །

གང་རྣམས་ཕྱོགས་བཅུའི་འཇིག་རྟེན་སྒྲོན་མ་རྣམས། །

བྱང་ཆུབ་རིམ་པར་སངས་རྒྱས་མ་ཆགས་བརྙེས། །

མགོན་པོ་དེ་དག་བདག་གིས་ཐམས་ཅད་ལ། །

འཁོར་ལོ་བླ་ན་མེད་པར་བསྐོར་བར་བསྐུལ། །

མྱ་ངན་འདའ་སྟོན་གང་བཞེད་དེ་དག་ལ། །

འགྲོ་བ་ཀུན་ལ་ཕན་ཞིང་བདེ་བའི་ཕྱིར། །

བསྐལ་པ་ཞིང་གི་རྡུལ་སྙེད་བཞུགས་པར་ཡང་། །

བདག་གིས་ཐལ་མོ་རབ་སྦྱར་གསོལ་བར་བགྱི། །

ཕྱག་འཚལ་བ་དང་མཆོད་ཅིང་བཤགས་པ་དང་། །

རྗེས་སུ་ཡི་རང་བསྐུལ་ཞིང་གསོལ་བ་ཡི། །

དགེ་བ་ཅུང་ཟད་བདག་གིས་ཅི་བསགས་པ། །

ཐམས་ཅད་བདག་གིས་བྱང་ཆུབ་ཕྱིར་བསྔོའོ། །

ཐུབ་དབང་འཁོར་བཅས་ཀྱི་མཚན་ནས་བོས་ཏེ་ཐུགས་དམ་བསྐུལ་བར་གྱུར།

ཏདྱ་ཐཱ། ཨོཾ་མུ་ནེ་མུ་ནེ་མ་ཧཱ་མུ་ན་ཡེ་སྭ་ཧཱ།

ཞེས་བརྒྱ་རྩ་སོགས་ཅི་ནུས་བཟླས་མཐར།

སངས་རྒྱས་སྤྲུལ་པ་དགྲ་བཅོམ་འཕགས་པའི་ཚོགས། །

འགྲོ་བའི་དོན་དུ་བསྟན་པ་སྐྱོང་མཛད་པ། །

དཀོན་མཆོག་གསུམ་དངོས་གནས་བརྟན་བཅུ་དྲུག་གིས། །

བསྟན་པ་ཡུན་རིང་གནས་པར་བྱིན་གྱིས་རློབས། །

ཐུགས་རྗེའི་བདག་ཉིད་གནས་བརྟན་བཅུ་དྲུག་གི །

འཁོར་ཚོགས་སྲིད་མཚོ་ལས་བརྒལ་ཉོན་མོངས་མེད། །

ཁྲི་དང་དྲུག་སྟོང་བཞི་བརྒྱའི་ཚོགས་རྣམས་ཀྱིས། །

བསྟན་པ་ཡུན་རིང་གནས་པར་བྱིན་གྱིས་རློབས། །

སེམས་ཅན་ཀུན་གྱི་བསོད་གྱུར་དགྲ་བཅོམ་པ། །

རིགས་དང་ཞབས་ལྡན་སྐྱེ་རྒུའི་སྦྱིན་གནས་ཆེ། །

འཕགས་པའི་གང་ཟག་ཆེན་པོ་ཁྱེད་རྣམས་ཀྱིས། །

བསྟན་པ་ཡུན་རིང་གནས་པར་བྱིན་གྱིས་རློབས། །

 

བདག་གི་དགེ་བའི་རྩ་བ་འདི་ཡི་མཐུས། །

ཕན་བདེའི་འབྱུང་གནས་བསྟན་པ་འཕེལ་གྱུར་ཅིག །

སྡུག་བསྔལ་ཀུན་འབྱུང་མ་ལུས་རབ་སྤངས་ནས། །

སྲིད་པའི་རྒྱ་མཚོ་མྱུར་དུ་སྐེམས་པར་ཤོག །

བསོད་ནམས་རྒྱ་མཚོ་ཡོངས་སུ་རྫོགས་གྱུར་ཅིག །

ཡེ་ཤེས་རྒྱ་མཚོ་རྣམ་པར་དག་གྱུར་ཅིག །

སྨོན་ལམ་རྒྱ་མཚོ་མ་ལུས་ཀུན་རྫོགས་ནས། །

ལུས་ཅན་ཀུན་ལས་ཁྱད་པར་འཕགས་པར་ཤོག །

 

ཚོགས་གཉིས་མཐར་ཕྱིན་དུས་གསུམ་རྒྱལ་བ་ཡི། །

འཕྲིན་ལས་བསྒྲུབ་ཅིང་ཡོན་ཏན་རྣམ་དབྱེ་མེད། །

སྐལ་པ་མཉམ་པའི་གདུལ་བྱ་སྨིན་མཛད་པའི། །

མཉམ་མེད་བླ་མ་མཆོག་གི་བཀྲ་ཤིས་ཤོག །

དུས་གསུམ་རྒྱལ་བ་རྒྱལ་སྲས་ཐུགས་རྗེ་ཡིས། །

ཉན་ཐོས་ཚུལ་བཟུང་སྲིད་པ་ཇི་སྲིད་པར། །

བསྟན་པ་སྐྱོང་ཞིང་འགྲོ་བའི་དོན་མཛད་པ། །

གནས་བརྟན་ཆེན་པོ་རྣམས་ཀྱི་བཀྲ་ཤིས་ཤོག །

ཟབ་ཅིང་རྒྱ་ཆེའི་གཟིགས་པ་པོ། །

ཡུལ་འཁོར་སྲུང་དང་འཕགས་སྐྱེ་པོ། །

སྤྱན་མི་བཟང་དང་ནམ་ཐོས་སྲས། །

རྒྱལ་ཆེན་བཞི་ཡི་བཀྲ་ཤིས་ཤོག །

ཕན་བདེ་འབྱུང་བའི་གནས་གཅིག་པོ། །

བསྟན་པ་ཡུན་རིང་གནས་པ་དང་། །

བསྟན་འཛིན་སྐྱེས་བུ་དམ་པ་རྣམས། །

སྐུ་ཚེའི་རྒྱལ་མཚན་བརྟན་གྱུར་ཅིག །

སྟོན་པ་འཇིག་རྟེན་ཁམས་སུ་བྱོན་པ་དང་། །

བསྟན་པའི་ཉི་འོད་བཞིན་དུ་གསལ་བ་དང་། །

བསྟན་འཛིན་བུ་སློབ་དགེ་འདུན་མཐུན་པ་ཡིས། །

བསྟན་པ་ཡུན་རིང་གནས་པའི་བཀྲ་ཤིས་ཤོག །

ཅེས་སོགས་ཀྱི་བཀྲ་ཤིས་ཅི་རིགས་བརྗོད་མཐར་རོལ་མོ་བྱའོ།།

ཞེས་པའང་མཉྫུ་གྷོ་ཥས་བྲིས་པ་དགེ།། །།སརྦ་མངྒ་ལཾ།།

 

• Download this text: EPUB MOBI PDF