Guru Yoga—Tibetan

Guru Yoga | Tibetan MastersJamyang Loter Wangpo

English | བོད་ཡིག

Jamyang Loter Wangpo

Jamyang Loter Wangpo

Further Information:
Download this text:

༄༅། །བླ་མའི་རྣལ་འབྱོར་བཞུགས།

 

བདག་གི་སྤྱི་བོར་པད་ཟླའི་སྟེང་། །

འཇམ་དབྱངས་བློ་གཏེར་དབང་པོ་ནི། །

དཀར་དམར་མདངས་ལྡན་སྐུ་ཤ་རྒྱས། །

ཕྱག་གཉིས་གླེག་བམ་བགྲངས་ཕྲེང་འཛིན། །

ཆོས་གོས་རྣམ་གསུམ་པཎ་ཞུ་གསོལ། །

གནས་གསུམ་འབྲུ་གསུམ་འོད་ཟེར་གྱིས། །

མཆོག་གསུམ་སྤྱན་དྲངས་དབྱེར་མེད་ཐིམ། །

སྐྱབས་གནས་ཀུན་འདུས་ངོ་བོར་འགྱུར། །

ཡན་ལག་བདུན་པའི་ཚོགས་བསགས་བྱ། །

བླ་མའི་གསོལ་འདེབ་ཅི་ནུས་གདོན། །

ཐུགས་སྲོག་དྷཱིཿ་མཐར་སྔགས་ཀྱིས་བསྐོར། །

འོད་འཕྲོས་དོན་གཉིས་མྱུར་འགྲུབ་གྱུར། །

ཨོཾ་ཨཱཿགུ་རུ་མཉྫུ་གྷོ་ཥ་དྷཱིཿནིདྷི་ནྡྲ་ཡ་ཧཱུྃ །

ཞེས་བརྒྱ་སྟོང་བཟླས་པའི་མཐར།

བླ་མའི་གནས་གསུམ་འབྲུ་གསུམ་ལས། །

འོད་ཟེར་དཀར་དམར་མཐིང་གསུམ་པོ། །

རིམ་དང་གཅིག་ཆར་རང་གནས་ཐིམ། །

དབང་བཞི་ཐོབ་ཅིང་སྒྲིབ་བཞི་དག །

སྐུ་བཞིའི་ས་བོན་རྒྱུད་ལ་བཞག །

སླར་ཡང་གསོལ་བ་བཏབ་པའི་མཐུས། །

བླ་མ་ཚང་བུག་སྒོ་ནས་བྱོན། །

སྙིང་གའི་པདྨོ་རྒྱས་པར་བཞུགས། །

ཐོས་པ་རྒྱ་མཚོའི་མཆོད་ཡོན་ཀུན་ནས་འཁྱིལ། །

ཡོན་ཏན་མེ་ཏོག་ཚུལ་ཁྲིམས་བདུག་སྤོས་སྤྲིན། །

ཤེས་རབ་སྒྲོན་མེ་དད་པའི་སྤོས་ཆུའི་མཚོ། །

ཏིང་འཛིན་བདུད་རྩིའི་ཞས་ཟས་དམ་པ་དང༌། །

བསྟོད་དབྱངས་སྙན་པའི་སིལ་སྙན་སྒྲ་འབྱིན་ཞིང༌། །

ཀུན་ནས་སྙིང་བརྩེ་རྣམ་དཔྱོད་སྤོབས་པ་ཡིས། །

གདུགས་དང་བ་དན་རྒྱལ་མཚན་བསྒྲེང་བ་ཡིས། །

བདག་ལུས་གཞལ་མེད་ཁང་མཛེས་རབ་བརྒྱན་ནས། །

སྙིང་གི་ཆུ་སྐྱེས་ཐིག་ལེའི་ཟླ་རྒྱས་ལ། །

བརྟན་པར་བཞུགས་པའི་ཆོས་རྗེ་མཆོད་བགྱིད་ཅིང༌། །

ངེས་པར་འདུན་པའི་ཡིད་ཀྱིས་གསོལ་འདེབས་ཀྱིས། །

འགྲོ་བའི་བླ་མ་རྟག་ཏུ་མཉེས་གྱར་ཅིག །

བསྔོ་སྨོན་བྱའོ།།

ཞེས་པའང་མཁར་མདོ་གྲྭ་ཚང་ངག་དབང་རབ་རྒྱས་ཀྱིས་བསྐུལ་ངོར། ༧བློ་གཏེར་དབང་པོས་སྤེལ་བ་དགེ་ལེགས་འཕེལ། །མངྒ་ལཾ།། །།