Gyüluk Phurba Empowerment Extracts—Tibetan
༄༅། །བཅོམ་ལྡན་འདས་རྡོ་རྗེ་ཕུར་པ་རྒྱུད་ལུགས་ལས་དབང་ཆོག་དངོས་གྲུབ་རྒྱ་མཚོའི་འཇུག་ངོགས་ཞེས་བྱ་བ་བཞུགས། །
བླ་མ་རྡོ་རྗེ་འཛིན་སོགས་དང་། །
མཁའ་འགྲོའི་ཚོགས་རྣམས་དགོངས་སུ་གསོལ། །
ཨཱོཾ་ཨཱཿཧཱུྃ། ཆོས་སྐུ་མཁའ་འདྲ་གཟུགས་སྐུ་འཇའ་ལྟར་སྣང་། །
གསང་སྔགས་སྒྲ་སྙན་ལྟ་བུར་སྒྲ་བསྒྲགས་ཤིང་། །
ཁྲོ་བོ་ཁྲོ་མོའི་ཚུལ་གྱིས་གདུག་པ་འདུལ། །
བླ་མེད་དཀོན་མཆོག་གསུམ་ལ་སྐྱབས་སུ་མཆི། །
བདག་གིས་བྱང་ཆུབ་སེམས་མཆོག་ནི། །
མ་ལུས་པ་ནི་བསྐྱེད་པར་བགྱི། །
ངན་སོང་གསུམ་ལས་མ་གྲོལ་བ། །
ལྷ་མི་གཉིས་སུ་དགྲོལ་བར་བགྱི། །
མ་བསྒྲལ་པ་ཡི་ལྷ་མི་རྣམས། །
བྱང་ཆུབ་ས་ལ་བསྒྲལ་བར་བགྱི། །
དབུགས་མ་ཕྱུང་བའི་བྱང་ཆུབ་སེམས། །
ས་བརྒྱད་པ་ལ་དབུགས་དབྱུང་ཞིང་། །
སེམས་ཅན་མྱ་ངན་འདས་པའི་མཐའ། །
རྡོ་རྗེ་འཆང་ལ་རབ་ཏུ་དགོད། །
ཨོཾ་ཨཱཿབཛྲ་སཏྭ་ཧཱུྃ།
ཨོཾ་ཨཱཿབཛྲ་སཏྭ་ཧཱུྃ།
སྟོང་གསུམ་སྟོང་གི་འཇིག་རྟེན་ན། །
འགྲོ་བ་རིགས་དྲུག་སེམས་ཅན་རྣམས། །
དུག་ལྔ་ཉོན་མོངས་ཚར་གཅད་ཕྱིར། །
རིགས་ལྔ་ཁྲག་འཐུང་ཉིད་དུ་བརྗོད། །
ཨཱཿ འགྲོ་བ་རིགས་ལྔར་གསལ་བ་འདི། །
རྟོག་འཇོམས་ཡེ་ཤེས་ལྔའི་རང་བཞིན། །
ཡེ་ནས་སྐྱེ་མེད་ཆོས་སྐུ་ལ། །
སྣང་བ་འཁྲུལ་པ་སྙིང་རེ་རྗེ། །
བཛྲ། ཐམས་ཅད་རྡོ་རྗེའི་རང་བཞིན་ཏེ། །
ཅིས་ཀྱང་མི་ཆོད་མི་ཤིགས་ཤིང་། །
སྐྱེ་འགག་མེད་པ་རྡོ་རྗེའི་ངང་། །
དེ་བཞིན་ཉིད་དུ་རྣམ་པར་དག །
སཿ དབྱིངས་ལ་ངོ་བོ་མ་གྲུབ་ཀྱང་། །
སྣང་བ་ཙམ་དུ་ཁྲག་འཐུང་སྐུ། །
དུག་ལྔ་རྩད་ནས་གཅད་པའི་ཕྱིར། །
རིགས་ལྔའི་ཁྲོ་བོ་རྣམ་པར་དག །
ཏྭ། རིགས་ལྔ་ཁྲོ་བོར་བསྒྲུབ་པ་ལ། །
སྙིང་རྗེ་སེམས་ཅན་ལ་བསྐྱེད་ནས། །
ཐར་པར་འདོད་པའི་བསམ་པ་ཡིས། །
དམ་ཚིག་ལྔ་པོ་གཟུང་བར་བགྱི། །
ཧཱུཾ། ཐམས་ཅད་མཁྱེན་པ་བཅོམ་ལྡན་འདས། །
རིགས་ལྔ་འདུས་པའི་ཁྲོ་རྒྱལ་གཙོ། །
རྡོ་རྗེ་གཞོན་དུ་ཁྲོས་པའི་དཔལ། །
སྐལ་ལྡན་རྣམས་ཀྱིས་ཐོབ་པར་ཤོག
ཨཱོཾ་སརྦ་ཡོ་ག་ཙིཏྟ་ཨུཏྤ་ཏ་ཡ་མཱི།
འཇོམས་བྱེད་ཆེན་པོའི་དཀྱིལ་འཁོར་དུ། །
སྐུ་གསུང་ཐུགས་ཀྱི་རྡོ་རྗེ་ཆེ། །
རྣམ་རྟོག་འཇོམས་ཕྱིར་ཡེ་ཤེས་གསལ། །
སངས་རྒྱས་བདག་ལ་དབང་ལྡན་ཤོག །
ཧཱུྃ། སངས་རྒྱས་ཀུན་གྱི་འགྲུབ་པའི་གཞི། །
བླ་མེད་རྡོ་རྗེའི་དམ་ཚིག་སྟེ། །
དམ་ཚིག་འདི་ནི་གཟུང་བར་བགྱི། །
བླ་མ་རྡོ་རྗེ་སློབ་དཔོན་དང་། །
དཀོན་མཆོག་མཁའ་འགྲོ་མ་ཡང་གཟུང་། །
ཕྱག་རྒྱ་སྔགས་རྣམས་རྒྱུན་མི་གཅད། །
ཡང་དག་ལམ་དུ་ཞུགས་ལ་བྱམས། །
གསང་བ་ཆེན་པོ་སྨྲ་མི་བྱ། །
འདི་ནི་རྩ་བ་ལྔ་རྣམས་གཟུང་། །
བསྒྲུབ་དང་བསྲུང་བའི་དམ་ཚིག་མཆོག །
ཞེ་སྡང་གཏི་མུག་ཆགས་ང་རྒྱལ། །
དཀར་དམར་ལྗང་སེར་མཐིང་གའི་མདོག །
དག་པའི་སྣོད་བཅུད་མི་དོར་རོ། །
ཡན་ལག་བཅུ་ཡི་དམ་ཚིག་མདོ། །
བདག་གིས་བརྟན་པོར་གཟུང་བར་བགྱི། །
ནམ་དུ་ཡང་ནི་མི་སྤང་ངོ་།
གཙོ་བོས་ཇི་ལྟར་བཀའ་བསྩལ་པ། །
དེ་དག་ཐམས་ཅད་བདག་གིས་བགྱི། །
ཁྱེད་ལ་བདག་ཀྱང་ཡོངས་སུ་འབུལ། །
སློབ་མར་བཟུང་ནས་སྤྱད་དུ་གསོལ། །
