Gampopa Guru Yoga—Tibetan

Practices › Guru Yoga | Tibetan MastersJokyab Pema Trinlé Nyingpo | Tibetan Mastersསྒམ་པོ་པ་བསོད་ནམས་རིན་ཆེན།

English | བོད་ཡིག

Jokyab Pema Trinlé Nyingpo

སྒམ་པོ་པ་བསོད་ནམས་རིན་ཆེན།

Further Information:
Download this text:

༄༅།།རྗེ་དྭགས་པོའི་བླ་མའི་རྣལ་འབྱོར་ནོར་བུའི་ཐིག་ལེ་ཞེས་བྱ་བ།

 

དབུས་སུ་དྭགས་པོ་ལྷ་ཡི་རྗེ།   །

མཉམ་མེད་སྒོམ་པོ་པ་ཆེན་པོ།   །

དགེ་སློང་བསོད་ནམས་རིན་ཆེན་ཆེ།   །

རྡོ་རྗེ་འཛིན་པ་འཛམ་གླིང་གྲགས།   །

དཀར་དམར་མདངས་ལྡན་གཟི་བྱིན་ལྡན།    །

བག་དྲོ་ཅུང་ཟད་བསྒྲེས་པའི་ཚུལ།    །

ཟག་མེད་ཏིང་འཛིན་ཉམས་བརྒྱ་འབར།    །

རབ་བྱུང་ཆ་ལུགས་སྒོམ་ཞྭ་བཞེས།    །

མཉམ་བཞག་སྟེང་དུ་ལྷུང་བཟེད་འཛིན།   །

འབྲུ་བཅུད་ནོར་བུའི་བཀང་བ་འཛིན།   །

 

སྣང་སྟོང་དགྱེས་སྐུ་ལམ་མེར་བཞུགས།   །

མཚན་དཔེའི་ཞི་འཛུམ་ཡ་ལ་ལ།   །

 

གྲགས་སྟོང་ཆོས་སྒྲ་ལྷང་ངེ་བ།  །

རྡོ་རྗེའི་གསུང་དབྱངས་འུ་རུ་རུ།  །

 

རིག་སྟོང་དགོངས་པ་ལྷན་ནེ་བ།   །

སྣང་སེམས་གཉིས་མེད་ཟང་ཐལ་ལེ།  །

 

མཐོང་བས་འཇིག་རྟེན་སྣང་བ་འགགས།  །

གསུང་ཐོས་འཁྲུལ་སྣང་ཧྲུལ་པོར་གཏོང་།   །

དྲན་པས་བདེ་ཆེན་ཡེ་ཤེས་བསྐྱེད།  །

 

འོད་ལྔའི་འཇའ་ཟེར་ཐིག་ལེ་དཀྲིགས།  །

 

ཤར་དུ་དཔལ་ལྡན་དུས་གསུམ་མཁྱེན།   །

དུས་གསུམ་མཁྱེན་པ་ཆགས་ཐོགས་བྲལ།   །

 

ལྷོ་རུ་ཁམས་པ་རྡོ་རྗེ་རྒྱལ།   །

དེ་བཞིན་གཤེགས་པའི་མཛད་སྤྱོད་འཆང་།   །

 

ནུབ་ཏུ་འབའ་རོམ་དར་མ་དབང་།   །

འཇིག་རྟེན་གསུམ་ན་འགྲན་ཟླ་བྲལ།   །

 

བྱང་དུ་རྒྱལ་བ་ཞང་ཚལ་པ།  །

གྲུབ་པའི་བརྟུལ་ཞུགས་བསམ་མི་ཁྱབ།   །

 

གཡས་སུ་དབོན་སྒོམ་ཚུལ་ཁྲིམས་སྙིང་།   །

གཡོན་དུ་སྒོམ་པ་ཤེར་རྒྱལ་བ།   །

 

ཕྱི་རོལ་ཕྱོགས་དང་ཕྱོགས་མཚམས་ལ།   །

ཐུགས་སྲས་ཉེ་བའི་བུ་ཆེན་བཞི།  །

ཞབས་ཏོག་བསྒྲུབ་པའི་སློབ་མ་བཞི།   །

ཤྭ་སྒོམ་ཡེ་ཤེས་རྡོ་རྗེ་སོགས།  །

བུ་སློབ་གྲུབ་ཆེན་མང་པོས་བསྐོར།   །

དག་པའི་འཁོར་ཚོགས་ལྔ་བརྒྱ་དང་།   །

མ་དག་འཁོར་ཚོགས་ལྔ་བརྒྱ་རྣམས།   །

 

ལ་ལས་ཕྱག་བསྐོར་གསོལ་བ་འདེབས།   །

ལ་ལས་ཚོགས་བསགས་སྒྲིབ་སྦྱངས་མཛད།   །

ལ་ལས་མདོ་རྒྱུད་འཆད་ཉན་མཛད།   ༼།མདོ་ཏིང་འཛིན་རྒྱལ་པོ།  བཀའ་གདམས་གཞུང་དྲུག  སྐྱེས་བུ་གསུམ་གྱི་ལམ་རིམ།  རྒྱུད་བླ་མ།  བདེ་དགྱེས་གསང་གསུམ་རྣམས་སོ།  མཆན།༽

ལ་ལས་ལྷ་ཡི་བསྐྱེད་རིམ་བསྒོམ།   །

ལ་ལས་སྔགས་ཀྱི་བཟླས་པ་མཛད།  །

ལ་ལས་ཐབས་ལམ་ཆོས་དྲུག་བསྒོམ།  །

ལ་ལས་གྲོལ་ལམ་ཕྱག་ཆེན་བསྒོམ།   །

ཕལ་ཆེར་རི་ལ་འདག་སྦྱར་མཛད།   །

ལ་ལ་བྱ་ལྟར་མཁའ་ལ་ལྡིང་།   །

ལ་ལ་ཆུ་ལ་ཉ་ལྟར་འཕྱོ།   །

ལ་ལ་རི་བྲག་ཟང་ཐལ་རྒྱུ།   །

ལ་ལ་ལྷན་སྐྱེས་ཆེན་པོར་འབྱམས།   །

ལ་ལས་སྤྲུལ་བསྒྱུར་སྣ་ཚོགས་སྟོན།   །

ལ་ལར་ཟག་མེད་མངོན་ཤེས་འཆར།   །

 

སྟེང་དུ་བཞེད་པ་རྡོ་རྗེ་ལ།   །

གྲུབ་ཐོབ་རྒྱ་མཚོའི་སྤྲིན་ཕུང་འཕྲོ།  །

བར་དུ་འཁོར་ལོ་སྡོམ་པ་ལ།   །

འཁོར་ལོ་གསུམ་གྱི་ཆར་སྤྲིན་འཁྲིགས།   །

འོག་ཏུ་མ་མགོན་ལྕམ་དྲལ་ལ།   །

མཁའ་འགྲོ་ཆོས་སྐྱོང་བུ་ཡུག་འཚུབས།  །

ཨོཾ་ཨཱཿམ་ཧཱ་གུ་རུ་པུཎྱེ་རཏྣ་སིདྡྷི་ཧཱུཾ།

 

ཞེས་པ་འདི་དྭགས་ལྷ་སྒམ་པོར་གསེང་ལམ་བླ་སྒྲུབ་ཚོགས་བརྒྱ་བགྱིས་སྐབས་ལམ་ཙམ་དང་།   །དེ་ནས་ཡུན་རིང་སོང་སྐབས་ཕྱིས་སུ་པདྨ་ཕྲིན་ལས་སྙིང་པོའམ་ཀརྨ་ཕྲིན་ལས་རྒྱ་མཚོས་རྗེ་སྒམ་པོ་པའི་དུས་གསུམ་རྣམ་ཐར་ལ་ཡིད་ལ་བྱས་ཏེ་དད་པས་སྦྱར་བའོ། །