The Crystal Stairway—Tibetan

Practices › Aspiration PrayersCopper-Coloured Mountain | བོད་ཀྱི་བླ་མ།ཁང་སར་བསྟན་པའི་དབང་ཕྱུག

English | བོད་ཡིག

ཁང་སར་བསྟན་པའི་དབང་ཕྱུག

The Copper-Coloured Mountain of Glory

Further Information:
Download this text:

༄༅། །ལྷོ་ནུབ་ཟངས་མདོག་དཔལ་རིར་བགྲོད་པའི་སྨོན་ལམ་ཤེལ་གྱི་ཐེམ་སྐས་ཞེས་བྱ་བ་བཞུགས་སོ། །

 

ཨོཾ་ཨཱ༔ཧཱུྃ་བཛྲ་མ་ཧཱ་གུ་རུ་སརྦ་སིདྡྷི་ཧཱུྃ༔

 

རང་རིག་ཀ་དག་ཀློང་ཆེན་ཆོས་སྐུའི་དབྱིངས། །

རང་གདངས་མ་འགགས་ཆུ་ཟླའི་རོལ་གར་བཞིན། །

སྤྲུལ་སྐུའི་ཞིང་ཁམས་དག་ཉམས་སྣང་བའི་ཆ། །

ཟངས་མདོག་དཔལ་གྱི་རི་བོར་སྐྱེ་བར་ཤོག །

 

བྷོ་ཊའི་ཡུལ་ལྗོངས་འདི་ཡི་ལྷོ་ནུབ་ཕྱོགས། །

གནས་ཆེན་རྡོ་རྗེ་གདན་གྱི་ནུབ་བྱང་མཚམས། །

རྔ་ཡབ་གླིང་ཕྲན་སྲིན་ཡུལ་ལང་ཀའི་གླིང་། །

ཟངས་མདོག་དཔལ་གྱི་རི་བོར་སྐྱེ་བར་ཤོག །

 

སྔོན་ཚེ་རྒྱལ་ཀུན་རྟ་ཕག་སྐུར་བཞེངས་ནས། །

རུ་ཏྲའི་རྫས་བརྒྱད་གནས་སུ་བསྒྱུར་བའི་ཚེ། །

ཙིཏྟ་ཨོ་རྒྱན་དཔལ་རིར་བྱིན་གྱིས་བརླབས། །

ཟངས་མདོག་དཔལ་གྱི་རི་བོར་སྐྱེ་བར་ཤོག །

 

གནས་ཀྱི་ཆགས་ཚུལ་དཔའ་བོའི་སྙིང་གི་དབྱིབས། །

རྩ་བ་ཀླུ་ཡུལ་སྐེད་པ་མཁའ་འགྲོའི་གནས། །

རྩེ་མོ་གཟུགས་ཁམས་ལྷ་ཡི་ཡུལ་དུ་བསྙེགས། །

ཟངས་མདོག་དཔལ་གྱི་རི་བོར་སྐྱེ་བར་ཤོག །

 

ཕྱོགས་བཞི་མཚམས་བརྒྱད་འཇའ་ཚོན་འོད་ཕུང་འཁྲིགས། །

ལྷ་ཀླུ་མི་ཡིས་རོལ་མོའི་སྒྲ་དབྱངས་སྒྲོག །

རིན་ཆེན་སྣ་ལྔའི་མེ་ཏོག་ཆར་ཆེན་འབེབས། །

རི་དེ་མཐོང་བ་ཙམ་གྱིས་འཁྲུལ་སྣང་ཞིག །

ཟངས་མདོག་དཔལ་གྱི་རི་བོར་སྐྱེ་བར་ཤོག །

 

ཡེ་ཤེས་ལྔ་ལས་གྲུབ་པའི་གཞལ་མེད་ཁང་། །

ཤར་ཕྱོགས་ཤེལ་དཀར་ལྷོ་ཕྱོགས་བཻཌཱ་རྱ། །

ནུབ་ཕྱོགས་རྭ་ག་བྱང་ཕྱོགས་ཨིནྡྲའི་མདོག །

ཕྱི་ནང་ཁོར་ཡུག་དབང་གཞུའི་དྲ་བས་འཁྱུད། །

ཟངས་མདོག་དཔལ་གྱི་རི་བོར་སྐྱེ་བར་ཤོག །

 

རིན་ཆེན་དུ་མས་གྲུབ་པའི་རྩིག་པ་དང༌། །

འདོད་སྣམ་ཕ་གུ་དབང་གཞུའི་དྲྭ་བ་རིས། །

དྲ་ཕྱེད་མདའ་ཡབ་སྒོ་བཞིར་རྟ་བབས་མཛེས། །

རིན་ཆེན་གདུགས་ཏོག་ཆོས་འཁོར་མཛེས་པས་བརྒྱན། །

ཟངས་མདོག་དཔལ་གྱི་རི་བོར་སྐྱེ་བར་ཤོག །

 

ཁོར་ཡུག་ཀུན་ཏུ་དཔག་བསམ་ལྗོན་ཤིང་དང༌། །

བདུད་རྩིའི་ཁྲུས་རྫིང་ནེའུ་གསིང་སྐྱེད་ཚལ་དབུས། །

སྤྲུལ་བའི་རི་སྐྱེས་མཛེས་པའི་སྤུ་སྡུག་དང༌། །

མགྲིན་བཟང་གཉིས་སྐྱེས་ཚོགས་ཀྱིས་ཆོས་སྒྲ་སྒྲོག །

ཟངས་མདོག་དཔལ་གྱི་རི་བོར་སྐྱེ་བར་ཤོག །

 

གཞལ་ཡས་ཆེན་པོའི་དབུས་ཀྱི་ལྟེ་བ་ལ། །

རིན་ཆེན་ཟུར་བརྒྱད་པདྨ་ཉི་ཟླའི་སྟེང་། །

རྒྱལ་ཀུན་འདུས་ཞལ་མཚོ་སྐྱེས་རྡོ་རྗེ་ཡིས། །

གསང་ཆེན་རྡོ་རྗེ་ཐེག་པའི་ཆོས་འཁོར་སྐོར། །

ཟངས་མདོག་དཔལ་གྱི་རི་བོར་སྐྱེ་བར་ཤོག །

 

གཡས་གྲལ་གཡོན་གྲལ་མཐའ་སྐོར་གྲལ་རྣམས་སུ། །

རྒྱ་བོད་རིག་འཛིན་མཁས་པ་པཎྜི་ཏ། །

གྲུབ་ཆེན་བརྒྱད་བཅུ་རྗེ་འབངས་ཉི་ཤུ་ལྔ། །

རྣམ་འགྱུར་མ་ངེས་རྡོ་རྗེའི་གར་སྟབས་སྒྱུར། །

ཟངས་མདོག་དཔལ་གྱི་རི་བོར་སྐྱེ་བར་ཤོག །

 

ཕྱོགས་མཚམས་ཀུན་ཏུ་རྒྱུད་སྡེ་བཞི་དྲུག་གི །

ཡི་དམ་ལྷ་དང་དཔའ་བོ་མཁའ་འགྲོའི་ཚོགས། །

མཛེས་པའི་གར་སྟབས་སྙན་པའི་བརྡ་གླུ་འུར། །

བདེ་སྟོང་ཉམས་ཀྱིས་མྱོས་པའི་ཕཊ་ཕེམ་སྒྲོག །

ཟངས་མདོག་དཔལ་གྱི་རི་བོར་སྐྱེ་བར་ཤོག །

 

ཕྱི་ཡི་ཁྱམས་དང་གྲུ་ཆད་སྒོ་བཞི་རུ། །

དཔལ་མགོན་བདུན་བཅུ་དབང་ཕྱུག་ཉེར་བརྒྱད་དང༌། །

བཀའ་སྲུང་དམ་ཅན་སྐར་ཚོགས་བཀྲ་བ་བཞིན། །

ཕྱི་ནང་གསང་བའི་བར་ཆད་སེལ་བར་མཛད། །

ཟངས་མདོག་དཔལ་གྱི་རི་བོར་སྐྱེ་བར་ཤོག །

 

དེ་སྟེང་ངེས་པ་ལྔ་ལྡན་ལོང་སྐུའི་ཞིང༌། །

འཇིག་རྟེན་དབང་ཕྱུག་ཚོམ་བུའི་འཁོར་གྱིས་བསྐོར། །

ཀུན་ཀྱང་ལྟོ་སྟོང་རུས་པའི་འཁོར་ལོ་སོགས། །

བཅུ་གསུམ་མཛེས་པའི་བརྒྱན་གྱིས་ཉེ་བར་བརྒྱན། །

ཟངས་མདོག་དཔལ་གྱི་རི་བོར་སྐྱེ་བར་ཤོག །

 

དེ་སྟེང་མཐའ་བྲལ་དག་པ་ཆོས་སྐུའི་ཞིང་། །

རང་རིག་སྐྱེ་མེད་ཀུན་ཏུ་བཟང་པོ་ལ། །

རང་རྩལ་འགག་མེད་འཁོར་གྱི་རྣམ་རོལ་ཤར། །

འཁོར་གསུམ་རྣམ་པར་དག་པའི་ཆོས་འཁོར་སྐོར། །

ཟངས་མདོག་དཔལ་གྱི་རི་བོར་སྐྱེ་བར་ཤོག །

 

སྒོ་བཞིར་ཡུལ་འཁོར་སྲུང་དང་འཕགས་སྐྱེས་པོ། །

མིག་མི་བཟང་དང་རྣམ་ཐོས་སྲས་བཞི་དང་། །

བཀའ་སྡོད་ལྷ་སྲིན་སྡེ་བརྒྱད་དམག་དཔུང་བཅས། །

བདུད་སྡེའི་གཡུལ་ལས་རྒྱལ་བའི་རྒྱལ་རྔ་རྡུང༌། །

ཟངས་མདོག་དཔལ་གྱི་རི་བོར་སྐྱེ་བར་ཤོག །

 

ཞིང་དེར་དྲན་པ་ཙམ་གྱིས་སྡུག་བསྔལ་སེལ། །

མོས་པའི་བུ་ལ་བྱིན་རླབས་འཇུག་ཅེས་གསུངས། །

བདག་ཅག་ཉ་མོ་བྱེ་ཚན་ལྷུང་འདྲ་རྣམས། །

ཐུགས་རྗེ་གང་གཱའི་རླབས་ཀྱིས་མ་གཏོང་ཞིག །

 

མ་ཧཱ་གུ་རུའི་ཐུགས་རྗེའི་བསིལ་ཟེར་གྱིས། །

མཐའ་དབུས་ཀུན་དང་ཁྱད་པར་གངས་ཅན་གྱི། །

སྲིད་པའི་ཚ་གདུང་གཟིར་བའི་འགྲོ་བ་ཀུན། །

སྐྱོབས་པར་ཞལ་བཞེས་གནང་བ་མི་དགོས་སམ། །

 

དེང་དུས་མཚོན་གྱི་བསྐལ་བའི་མར་གཤམ་འདིར། །

འགྲོ་ཀུན་སྡིག་པའི་ལས་ལ་བག་མེད་སྤྱོད། །

ནད་དང་དམག་འཁྲུག་མུ་གེས་རྟག་ཏུ་མནར། །

སྐྱེ་འགྲོའི་བདེ་སྐྱིད་རླུང་གསེབ་མར་མེ་བཞིན། །

 

བསྟན་དང་བསྟན་འཛིན་བར་ཆད་རྐྱེན་གྱིས་བཅོམ། །

དཀར་ཕྱོགས་ལྷ་སྲུང་ཡུལ་ལྷའི་ནུས་མཐུ་ཟད། །

ནག་ཕྱོགས་འདྲེ་སྲིན་གདུག་པའི་དཔུང་ཤུགས་རྒྱས། །

ཀྱེ་མ་མ་ཧཱ་གུ་རུའི་ཐུགས་རྗེས་གཟིགས། །

 

ཆར་རླུང་དྲག་པོས་བསྐྱོད་པའི་མཚོ་ཆེན་ལྟར། །

ཕྱི་ནང་རྒྱལ་ཁབ་རྩོད་ཅིང་འཁྲུགས་དུས་འདིར། །

བོད་འབངས་ཤོག་སྐྱ་རླུང་གིས་བསྐྱོད་འདྲ་ལ། །

གུ་རུ་ཉིད་ཀྱིས་ནམ་ཡང་དབུགས་དབྱུང་མཛོད། །

 

འགྲོ་ཀུན་བདེ་སྐྱིད་འཕྲོག་པའི་འདྲེ་བགེགས་ཚོགས། །

བཀའ་དམ་རྡོ་རྗེའི་ཕྱག་རྒྱ་སྤྱི་བོར་ཕོབས། །

གདུལ་དཀའ་ཐ་མའི་བདུད་ཀྱིས་སྡེ་དཔུང་རྣམས། །

མཐུ་སྟོབས་ནུས་པས་མིང་གི་ལྷག་མར་མཛོད། །

 

ཁྱེད་ཀྱི་གསང་གསུམ་བདུད་རྩིའི་གྲུ་ཆར་གྱིས། །

འགྲོ་བའི་སྒོ་གསུམ་སྡིག་ལྟུང་སྦྱང་དུ་གསོལ། །

མཁྱེན་བརྩེ་ནུས་པའི་ཐུགས་རྗེའི་འོད་ཟེར་གྱིས། །

སྐྱེ་འགྲོའི་མ་རིག་མུན་པ་སེལ་བར་མཛོད། །

 

རང་སྣང་རྣམ་དག་ཟངས་མདོག་དཔལ་རིའི་ཞིང་། །

རང་བྱུང་རིག་པ་གུ་རུ་མཚོ་སྐྱེས་རྗེ། །

རང་ཤར་རང་གྲོལ་གཉུག་མའི་ལམ་བགྲོད་ནས། །

དོན་གྱི་བླ་མའི་རང་ཞལ་མཇལ་བར་ཤོག །

 

ལམ་སྣ་མ་ཟིན་བེམ་རིག་བྲལ་བའི་ཚེ། །

དཔའ་བོ་ཌཀྐིའི་ཚོགས་ཀྱིས་ལམ་བསྟན་ནས། །

འཇའ་འོད་ཟེར་ཐིག་རོལ་མོའི་སྒྲ་དང་བཅས། །

དག་པ་སྤྲུལ་སྐུའི་ཞིང་དེར་ཁྲིད་དུ་གསོལ། །

 

མདོར་ན་མཁའ་ཁྱབ་སེམས་ཅན་ཇི་སྙེད་ཀུན། །

གཏན་དང་འཕྲལ་གྱི་ཉེར་འཚེའི་དཔུང་ལས་རྒྱལ། །

རྗེ་བཙུན་ཆེན་པོའི་འཁོར་གྱི་ཐོག་མ་རུ། །

སྐྱེས་ནས་སྐུ་བཞིའི་དཔལ་ལ་སྤྱོད་པར་ཤོག །

 

ཅེས་པའང་འཁྲུལ་བ་རྒྱ་འབྱམས་ཀྱི་འཕྲུལ་འཁོར་གྱི་གཟེབ་ཏུ་འཕྱན་པའི་སྙོམས་ལས་པ་པད་ཡག་དབོན་སྤྲུལ་གྱི་སྐྱེ་མིང་འཛིན་པ་ནས་རང་གཞན་ལ་ཕན་སེམས་ཀྱིས་མཁའ་འགྲོ་ཞལ་དཀར་མའི་གནས་ཀྱི་རི་ཞོལ་ནས་གང་དྲན་ཤར་མར་བྲིས་པ་དགེའོ། །དགེའོ། །དགེའོ། །