འཇིགས་པ་ལས་སྐྱབས་འཚོལ་བ།
༄༅། །འཇིགས་པ་ལས་སྐྱབས་འཚོལ་བ།
བླ་མ་རྡོ་རྗེ་འཛིན་པ་ནི། །
ཁམས་གསུམ་འཁོར་བའི་གཉེན་གཅིག་པུ། །
འགྲོ་བ་སྐྱབས་མེད་རྣམས་ཀྱི་སྐྱབས། །
ཐར་པའི་ལམ་སྐས་ཆེན་པོ་སྟེ། །
མ་རིག་སེལ་བའི་སྒྲོན་མེ་ལ། །
མུན་པའི་ཚོགས་བདག་སྐྱབས་སུ་མཆི། །
འཁོར་བ་འདམ་གྱི་མཚོ་ནང་དུ། །
བྱིང་བ་སྐྱབས་མེད་བདག་ལ་སྐྱོབས། །
དུག་གསུམ་མེ་ཡི་གདུང་བ་ལ། །
རང་བྱུང་རླབས་ཀྱིས་བསིལ་བར་མཛོད། །
མ་རིག་འཁྲུལ་པས་སྒྲིབ་པ་ཡི། །
གདོས་བཅས་ལུས་ངག་ཡིད་རྣམས་ཀུན། །
རང་དེངས་འོད་ཀྱི་རང་བཞིན་དུ། །
ལྷག་མེད་མྱ་ངན་འདའ་ཐོབ་མཛོད། །
བླ་མ་རྒྱལ་བ་འགྲོ་བའི་མགོན། །
འགྲོ་བ་སྐྱོབ་པའི་དོན་བརྩོན་པ། །
སྟོབས་ཆེན་འཇིགས་པ་ཀུན་སེལ་ལ། །
དེ་རིང་ཉིད་ནས་སྐྱབས་སུ་མཆི། །
དེ་ཡི་ཐུགས་སུ་ཆུད་པའི་ཆོས། །
འཁོར་བའི་འཇིགས་པ་སེལ་བ་དང༌། །
བྱང་ཆུབ་སེམས་དཔའི་ཚོགས་ལའང༌། །
དེ་བཞིན་ཡང་དག་སྐྱབས་སུ་མཆི། །
བདག་ནི་འཇིགས་པས་རྣམ་སྐྲག་ནས། །
ཀུན་ཏུ་བཟང་ལ་བདག་ཉིད་འབུལ། །
འཇམ་པའི་དབྱངས་ལའང་བདག་ཉིད་ཀྱིས། །
བདག་གི་ལུས་འདི་དབུལ་བར་བགྱི། །
ཐུགས་རྗེའི་སྤྱོད་པ་མ་འཁྲུལ་བ། །
སྤྱན་རས་གཟིགས་མགོན་དེ་ལ་ཡང༌། །
ཉམ་ཐག་ང་རོས་འོ་དོད་འབོད། །
སྡིག་ལྡན་བདག་ལ་བསྐྱབ་དུ་གསོལ། །
འཕགས་པ་ནམ་མཁའི་སྙིང་པོ་དང༌། །
ས་ཡི་སྙིང་པོ་དག་དང་ནི། །
ཐུགས་རྗེ་ཆེ་མགོན་ཐམས་ཅད་ལ། །
སྐྱབས་འཚོལ་སྙིང་ནས་འོ་དོད་འབོད། །
གང་ཞིག་མཐོང་ནས་གཤིན་རྗེ་ཡི། །
ཕོ་ཉ་ལ་སོགས་སྡང་བ་རྣམས། །
སྐྲག་ནས་ཕྱོགས་བཞིར་འབྱེར་བྱེད་པ། །
རྡོ་རྗེ་ཅན་ལ་སྐྱབས་སུ་མཆི། །
སྔོན་ཆད་ཁྱེད་ཀྱི་བཀའ་ལས་འདས། །
ད་ནི་འཇིགས་པ་ཆེར་མཐོང་ནས། །
ཁྱེད་ལ་སྐྱབས་སུ་མཆི་ལགས་ཀྱི། །
འཇིགས་པ་མྱུར་དུ་བསལ་དུ་གསོལ། །
