Young Lady Wu—Tibetan

༄༅། །བོས་ཚང་གི་བུ་མོ།

མེན་རྒྱས་ཁམས་ཀྱི་དུས་ཤིག་ལ། རུས་བོས་ཅན་གྱི་བུ་མོ་ཞིག་སྐྱེ་བའི་སྐབས་སུ་ཞབས་གཉིས་རྡོ་རྗེ་སྐྱིལ་ཀྲུང་མཛད་བཞིན་འཁྲུངས། ཆུང་ནས་དམ་པའི་ལྷ་ཆོས་ལ་དད་པ་ཆེ། ཕ་མ་ལ་བྱམས། གཤིས་རྒྱུད་དྲང་། ཤེས་རབ་ཆེ། ལང་ཚོ་དར་ལ་བབས་སྐབས། ཕ་མ་སོགས་ཀྱིས་མོ་ལ་གཉེན་གྲོགས་བཙལ་ཀྱང་མོས་འཇིག་རྟེན་འཁོར་བ་ལ་ཞེན་པ་ལོག་པས་ཁྱིམ་ཐབ་མ་བཟུང་། མོ་རང་གི་ཨ་ཇོ་དང་ནུ་བོ་གཉིས་ཀྱིས་ཡི་གེ་སློབ་སྐབས། མོ་རང་གིས་ཡི་གེ་ཟུར་ནས་ཚེགས་མེད་པར་ཤེས་སོང་། དེ་ནས་བཟུང་མོས་ཉིན་བཞིན་དམ་པའི་ཆོས་ཁ་འདོན་བྱས། དོན་ཡང་ཕལ་ཆེར་བ་ཤེས། རྒྱུན་དུ་སངས་རྒྱས་ལ་གུས་ཕྱག་འཚལ། ནུབ་ཅིག་རྨི་ལམ་དུ་ལྷ་ཞིག་གིས་མོ་ལ་སྤྱན་རས་གཟིགས་ཀྱི་གཟུངས་སྔགས་བསླབ་པ་རྨིས། དེ་ནས་བཟུང་གཟུངས་སྔགས་དེ་མང་དུ་བཏོན། རྗེས་སུ་གཟུངས་སྔགས་དེ་བཏོན་ནས་ནད་པ་ལ་སྨན་བཅོས་བྱེད་སྐབས། བཅོས་དཀའ་བའི་ནད་ཀུན་སེལ་ནུས་པ་ཞིག་བྱུང་། ཡང་ནུབ་ཅིག་རྨི་ལམ་དུ་སྔོན་གནས་རྗེས་དྲན་གྱི་མངོན་ཤེས་ཐོབ། མོ་རང་གིས་མོ་སྔོན་སུང་རྒྱལ་རབས་སྐབས་ཀྱི་ཆོས་སྒྲུབ་མཁན་ཞིག་ཡིན་པ་གོ། མ་ཟད་ཚེ་འདི་ལ་ཕ་མ་གཉིས་ཀྱི་དྲིན་ལན་འཇལ་བའི་ཆེད་དུ་འོང་བ་ཡང་གསལ་པོ་ཤེས། མོ་ལོ་ཉེར་གསུམ་གྱི་དུས་སུ་འཕགས་པའི་ས་ཐོབ། དེ་ནས་རིང་བོར་མ་ཐོག་པར་ཚེ་ལས་འདས། མས་མོའི་སྐྲ་ལས་བྱེད་སྐབས་དྲི་ཞིམ་ཞིག་འཐུལ་བཞིན་ཡོད་པ་ཚོར། དེ་ནས་རིམ་གྱིས་ཁྱིམ་གང་བ་དང་ར་བ་གང་། དེ་ནས་ཡུལ་ཁམས་དེ་ཡང་དྲི་ཞིམ་དེས་ཁྱབ་པ་གྱུར། ལོ་བཞི་སོང་རྗེས་མོའི་ཕུང་པོ་དེ་མེ་ལ་བསྲེགས། མོའི་དབུ་ཐོད་དེ་མེས་མ་ཚིག་པ་མ་ཟད་གཡང་ཊི་འདྲ་བའི་སྲ་ལ་འོད་དང་བཅས་པར་འགྱུར་འདུག་པས་མི་ཀུན་གྱིས་ཡ་མཚན་སྐྱེས་ནས་དད་པར་གྱུར། མོའི་དབུ་ཐོད་དེ་ཡིས་མཆོད་རྟེན་ཞིག་ཀྱང་བཞེངས་སོ།། །།མཁན་མོ་ཟླ་བ་སྒྲོལ་མས་རྒྱ་ནག་གི་ཡི་གེ་ལས་བོད་ཡིག་ཏུ་བསྒྱུར།