Single Mind Kīla Heart-Practice—Tibetan

Deities › Vajrakīlaya | Practices › Sādhanas | བོད་ཀྱི་བླ་མ།མཁན་ཆེན་འཇིགས་མེད་ཕུན་ཚོགས།

English | བོད་ཡིག

མཁན་ཆེན་འཇིགས་མེད་ཕུན་ཚོགས།

Two-armed Vajrakīlaya

༄༅། །ཕུར་པ་མགུལ་ཁུག་མའི་ཆ་ཤས་ཐུགས་དམ་ཐུགས་ཀྱི་ཕུར་གཅིག་བཞུགས་སོ།།

 

ན་མོ་གུ་རུ་དྷེ་ཝ་ཌཱཀྐི་ཡེ།

འདིར་སྐལ་བ་དང་ལྡན་པའི་གང་ཟག་ལ། དང་པོ་དབང་བསྐུར་བ་ནི། དཔལ་ཆེན་པོའི་སྐུའམ་གཏོར་མའམ་རྟེན་ཕུར་གང་རུང་ལྷ་བསྐྱེད་པ་སྔོན་དུ་འགྲོ་བས་སློབ་མས་གསོལ་བ་གདབ་པ་ནི།

ཀྱེ༔ ཐབས་ཀྱི་སྤྱོད་པའི་འགྲོ་དོན་དུ། །

བྱམས་དང་སྙིང་རྗེས་གང་འདུལ་བ། །

སངས་རྒྱས་ཕྲིན་ལས་རྫོགས་མཛད་ཕྱིར། །

བྱིན་རླབས་དབང་བསྐུར་བསྩལ་དུ་གསོལ། །

ཞེས་ལན་གསུམ་གསོལ་བ་བཏབ་པས། བླ་མས་ལན་དུ།

སྙིང་རྗེས་བསྒྲལ་བའི་དམ་ཚིག་ནི། །

བསད་ཅིང་མནན་པ་མ་ཡིན་ཏེ། །

ཕུང་པོ་རྡོ་རྗེར་གཏམས་བྱའི་ཕྱིར། །

སྐལ་ལྡན་ཁྱོད་ཉིད་སྨིན་པར་བྱ། །

དེ་ནས་སློབ་མས་དམ་ཚིག་གཟུང་བ་ནི།

རང་རིག་ལྷ་ལ་སྐྱབས་སུ་མཆི། །

འགྲོ་ཀུན་སྒྲོལ་བར་སེམས་བསྐྱེད་དོ། །

དཔལ་ཆེན་སྒྲུབ་པའི་དམ་ཚིག་རྣམས། །

སྲོག་གི་ཕྱིར་ཡང་མི་གཏོང་ངོ་། །

ས་མ་ཡ་ན་ར་ཀན།

ཞེས་བརྗོད། སློབ་མ་རྡོ་རྗེ་གཞོན་ནུའི་སྐུར་བསྐྱེད་ལ། འདི་སྐད་དུ།

ཧཱུྃཿ སྲིད་པའི་ཕུར་བུ་བསྒྲུབ་པ་དང་། །

དབང་དང་དངོས་གྲུབ་བླང་བའི་ཕྱིར། །

ཡེ་ཤེས་ཁྲོ་བོ་གཤེགས་སུ་གསོལ། །

ཡེ་ཤེས་ཁྲོ་བོ་གཤེགས་ནས་ཀྱང་། །

རྟགས་དང་མཚན་མ་བསྟན་པ་དང་། །

ཀཱི་ལ་ཡ་ཡི་བྱིན་ཕོབ་ཅིག །

ༀ་བཛྲ་ཀཱི་ལི་ཀཱི་ལ་ཡ་ས་པཱ་རི་ཝཱ་ར་བཛྲ་ས་མ་ཡ་ཛ་ཛ་ཨ་བེ་ཤ་ཡ་ཕེཾ་ཕེཾ། ཏིཥྛ་བཛྲ།

ཞེས་རྡོ་རྗེ་དངོས་སམ་ཕྱག་རྒྱ་སྤྱི་བོར་བཞག་ནས། དབང་བསྐུར་དངོས་ནི།

ཧཱུྃཿ མཚན་མ་རྫས་ཀྱི་ཕུར་བུ་ལ་བརྟེན་ནས། །

བསྐྱེད་རིམ་ལྷ་ཡི་ཕུར་བུ་གསལ་དག་བརྟན། །

རྫོགས་རིམ་བྱང་སེམས་ཕུར་བུར་རང་དབང་འབྱོར། །

རིག་པའི་ཕུར་བུས་འཁོར་འདས་སྟོང་སྲོག་བཅད། །

དཔལ་ཆེན་སྐུ་གསུང་ཐུགས་ཀྱི་དབང་ཐོབ་ཤོག །

ༀ་བཛྲ་ཀཱི་ལི་ཀཱི་ལ་ཡ་ཀཱ་ཡ་ཝཀྐཱ་ཙིཏྟཱ་སརྦ་ཨ་བྷི་ཥཉྩ་ཧཱུྃ།

ཤིས་བརྗོད་སྨོན་ལམ་སྤྱི་ལྟར་བྱ། །

དབང་འདི་ཐོབ་པ་ཙམ་གྱིས་ཀྱང་། །བར་ཆད་བདུད་ཀྱི་གཡུལ་ལས་རྒྱལ། །འདོད་པའི་དོན་རྣམས་མྱུར་འགྱུབ་འགྱུར། །ས་མ་ཡ།། །།

 

༈ གཉིས་པ་སྒྲུབ་ཐབས་ཀྱི་རིམ་པ་ནི།

སྟོང་པའི་ངང་ལས་རང་ཉིད་སྐད་ཅིག་གིས། །

དཔལ་ཆེན་རྡོ་རྗེ་གཞོན་ནུ་ཁྲོ་བོའི་རྒྱལ། །

མཐིང་ནག་ཞལ་གཅིག་ཕྱག་གཉིས་ཕུར་བུ་འདྲིལ། །

དཔལ་དང་དུར་ཁྲོད་རོལ་པའི་ཆས་ཀྱིས་བརྒྱན། །

པདྨ་ཉི་ཟླ་རུ་ཏྲ་ཕོ་མོའི་སྟེང་། །

ཞབས་གཉིས་གྱད་ཀྱི་འདོར་སྟབས་ཚུལ་དུ་བཞུགས། །

ཡེ་ཤེས་མེ་དཔུང་འབར་བའི་ཀློང་ན་གསལ། །

སྣང་བ་ཐམས་ཅད་ལྷ་ཡི་དལ། །

སྒྲ་གྲགས་སྔགས་ཀྱི་རོལ་པར་ཤར། །

དྲན་རྟོག་འོད་གསལ་ཆོས་ཉིད་ངང་། །

མ་ཡེངས་འཛིན་མེད་སྔགས་འདི་བཟླ། །

ༀ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔

བརྒྱ་སྟོང་ཁྲི་འབུམ་རྟགས་སྦྱར་བཟླ། །ཐལ་འབྱིན་བཞི་པོ་མཐར་ཕྱིན་ནས། །རིགས་ཀྱི་གཙོ་དང་དབྱེར་མེད་འགྱུར། །ས་མཱ་ཡ།། །།

 

༈ གསུམ་པ་ཚོགས་ཀྱི་རིམ་པ་ནི།

ཧཱུྃཿ ཆོས་ཉིད་དབྱིངས་ཀྱི་ཀ་པ་ལར། །

འཁོར་འདས་ཆོས་ཀུན་ཚོགས་སུ་བཤམས། །

རཾ་ཡཾ་ཁཾ་གིས་བསྲེགས་གཏོང་བཀྲུས། །

ༀ་ཨཱཿཧཱུྃ་གིས་སྦྱངས་སྤེལ་བསྒྱུར། །

རཾ་ཡཾ་ཁཾ་ༀ་ཨཱཿཧཱུྃ།

ཚོགས་ཀྱི་མཚོད་པ་ནི།

ཧཱུྃཿབླ་མེད་མཆོག་གི་མཆོད་པ་དམ་པ་ནི། །

ཡེ་ཤེས་ལྔ་ཡི་འོད་ཟེར་རྣམ་པར་སྤྲོ། །

འདོད་པའི་ཡོན་ཏན་ལྔ་ཡིས་རབ་བརྒྱན་པ། །

དམ་ཚིག་བཞིན་དུ་ཅི་བདེར་བཞེས་སུ་གསོལ། །

མ་ཧཱ་ག་ན་ཙཀྲ་པུ་ཛ་ཁཱ་ཧི།

ཚོགས་ལ་རོལ་ཞིང་གླུ་གར་བྱ།

རྗེས་སུ་ལྷག་མ་བསྔོ་བ་ནི།

ཧཱུྃཿ བྲན་དང་བཀའ་ཉན་ཕོ་ཉའི་ཚོགས། །

ལྷག་མའི་གཏོར་མ་འདི་བཞེས་ལ། །

སྒྲུབ་པའི་འགལ་རྐྱེན་བསལ་བ་དང་། །

མཐུན་རྐྱེན་ཡིད་བཞིན་སྒྲུབ་པར་མཛོད། །

ཅེས་བསྔོའོ། །

རང་བྱུང་པདྨ་རྒྱལ་པོ་ངས། །བྷི་ཏོ་ཏ་མའི་རྒྱུད་ཀུན་ཀྱི། །སྙིང་པོ་མཐར་ཐུག་འདི་ཁོ་ན། །ཛི་ན་མི་ཏྲ་ཁྲོད་ལ་གཏད། །ཡལ་བར་མ་དོར་ཉམས་སུ་ལོངས། །ཕྱིས་འབྱུང་དུས་ཀྱི་ཐ་མ་ལ། །ཁྱོད་ཀྱི་སྤྲུལ་པའི་སྐྱེས་བུ་དང་། །འཕྲད་ནས་བསྟན་པ་སྐྱོང་བར་འགྱུར། །ས་མཱ་ཡཿ

 

ཞེས་བལ་ཡུལ་ཡང་ལེ་ཤོད་ཀྱི་ཡང་དབེན་ཨ་སུ་ར་ཡི་བྲག་ཕུག་ཏུ་པདྨ་དབང་ཆེན་དགྱེས་པའི་རྡོ་རྗེས་སྔོན་གནས་རྗེས་དྲན་གྱིས་སྨྲས་པ་འཕགས་ཡུལ་གྱི་དགེ་སློང་གང་གིས་ཡི་གེར་འདུ་བྱས་པའོ། །

 

Vajrayāna Buddhism places restrictions on the reading and practice of certain texts, which are intended only for those who have received the requisite empowerments, transmissions and instructions.

If you are unsure as to whether you are entitled to read or practice a particular text please consult a qualified lineage-holder.

OK
This website uses cookies to collect anonymous usage statistics and enhance the user experience.
Decline
Accept