Rays of Moonlight—Tibetan

Confession | Tibetan Mastersབློ་བཟང་ཆོས་ཀྱི་རྒྱལ་མཚན།

English | བོད་ཡིག

བློ་བཟང་ཆོས་ཀྱི་རྒྱལ་མཚན།

བློ་བཟང་ཆོས་ཀྱི་རྒྱལ་མཚན།

Further Information:

༄༅། །སྡིག་མུན་སེལ་བྱེད་ཟླ་བའི་འོད་ཟེར་ཞེས་བྱ་བ་བཞུགས། །

ན་མོ་གུ་རུ་ཤཱཀྱ་མུ་ན་ཡེ།

དུས་གསུམ་ཕྱོགས་བཅུར་བཞུགས་པ་ཡི། །

སངས་རྒྱས་སྲས་དང་བཅས་རྣམས་ལ། །

བྱང་ཆུབ་སྙིང་པོར་མཆིས་ཀྱི་བར། །

གུས་པས་སྐྱབས་སུ་མཆི་བར་བགྱི། །

 

བསླུ་མེད་སྐྱབས་ཀྱི་མཆོག་རྣམས་ལ། །

ཐལ་མོ་སྦྱར་ཏེ་གསོལ་བ་ནི། །

ཚེ་རབས་འདི་འམ་གཞན་དག་ཏུ། །

ཉོན་མོངས་དུག་གསུམ་དབང་གྱུར་པས། །

ལུས་དང་ངག་དང་ཡིད་སྒོ་ནས། །

མཚམས་མེད་ལྔ་དང་ཉེ་བ་ལྔ། །

མི་དགེའི་ལམ་བཅུ་བགྱིས་པ་རྣམས། །

བསམ་པ་ཐག་པས་མགོན་ལ་བཤགས། །

 

དཀོན་མཆོག་གསུམ་དང་བླ་མ་དང། །

ཕ་མ་སོགས་དང་གཞན་དག་ལའང། །

གནོད་ཅིང་འཚེ་བ་ཅི་བགྱིས་པ། །

ཐམས་ཅད་སྙིང་ནས་བཤགས་པར་བགྱི། །

 

འཇིགས་རུང་དམྱལ་བ་ཡི་དྭགས་དང། །

དུད་འགྲོ་མཐའ་འཁོབ་ཀླ་ཀློ་དང། །

གླེན་ལྐུགས་ལོག་ལྟ་ཅན་སོགས་སུ། །

སྐྱེ་འགྱུར་ལས་ངན་མ་ལུས་བཤགས། །

 

ནོར་དང་ལང་ཚོ་སྟོབས་སོགས་ཀྱི། །

ང་རྒྱལ་དྲེགས་པས་གཞན་དག་ལ། །

བརྙས་ཤིང་རྣམ་པར་འཚེ་བྱས་པ། །

ཐམས་ཅད་ཀྱང་ནི་བཤགས་པར་བགྱི། །

 

མདོར་ན་མངོན་མཐོ་ངེས་ལེགས་དང། །

ཀུན་མཁྱེན་ཡང་དག་འགྲུབ་པའི་གེགས། །

མི་ཤེས་དབང་གིས་བསགས་པ་རྣམས། །

ཤིན་ཏུ་འགྱོད་པའི་སེམས་ཀྱིས་བཤགས། །

 

བཅས་པ་དང་ནི་རང་བཞིན་གྱི། །

ཁ་ན་མ་ཐོ་སྡིག་པའི་ལས། །

བགྱིས་དང་བགྱིད་བསྩལ་ཡི་རང་བ། །

ཅི་མཆིས་ཡོངས་སུ་བཤགས་པར་བགྱི། །

 

ཐུགས་རྗེ་ཆེ་ལྡན་རྒྱལ་རྣམས་དང། །

རྒྱལ་སྲས་བདག་ཉིད་ཆེ་རྣམས་ཀྱིས། །

སྡིག་ལྡན་བདག་ལ་བརྩེར་དགོངས་ལ། །

ཉེས་ཀུན་དག་པར་མཛད་དུ་གསོལ། །

 

སྔོན་ཆད་མི་དགེ་བགྱིས་པ་ལ། །

དུག་འཐུངས་བཞིན་དུ་འགྱོད་སེམས་ཀྱིས། །

སླན་ཆད་སྲོག་གི་ཕྱིར་ཡང་ནི། །

སྐད་ཅིག་ཙམ་ཡང་མི་བགྱིད་དོ། །

 

དེ་ལྟར་བཤགས་ཤིང་བསྡམས་པ་ཡི། །

བསོད་ནམས་བདག་གིས་ཅི་ཐོབ་པ། །

དེས་ནི་བདག་དང་འགྲོ་བ་ཀུན། །

མྱུར་དུ་བྱང་ཆུབ་ཐོབ་གྱུར་ཅིག །

 

ཅེས། སྡིག་མུན་སེལ་བྱེད་ཟླ་བའི་འོད་ཟེར་ཞེས་བྱ་བ་འདི་ཡང། ནང་སོ་བཀྲ་ཤིས་རབ་བརྟན་གྱིས། ནན་གྱིས་བསྐུལ་བ་ལ་བརྟེན་ནས། དགེ་སློང་བློ་བཟང་ཆོས་ཀྱི་རྒྱལ་མཚན་གྱིས་ཐོགས་མེད་དུ་བགྱིས་པ་དགེ་ལེགས་འཕེལ་བར་གྱུར་ཅིག་ཡི་གེ་པ་ནི་དགེ་ཚུལ་བློ་བཟང་དབང་རྒྱལ་ལོ།། །།

 

• Download this text: EPUB MOBI PDF