Yearning for Mountain Solitude—Tibetan
Practices › Retreat & Solitude | Literary Genres › Advice | བོད་ཀྱི་བླ་མ། › དཔལ་སྤྲུལ་རིན་པོ་ཆེ།
Dza Patrul Rinpoche
From the murals of Shechen Monastery. Used with permission of Rabjam Rinpoche.
Further information:
༄༅། །འདུ་འཛི་སྤངས་ནས་དབེན་པར་བསྐུལ་བའི་གདམས་པ།
འཇིགས་རྟེན་འཁྲུལ་སྣང་འཁོར་བ་ཡི་གྲོང་ན། །
ཟིན་དུས་མེད་པའི་བྱ་བྱེད་ཀྱི་རྣམ་གྲངས། །
དགོས་འབྲས་མེད་པའི་མགོ་བསྐོར་འདི་མཐོང་ནས། །
ཨ་བུའི་སེམས་པ་དབེན་རི་ལ་ཤོར་སོང་། །
ཡུལ་དགོན་འབྲེལ་པའི་དགེ་འདུན་གྱི་སྡེ་ན། །
སྙིང་པོ་མེད་པའི་རྣམ་གཡེང་གི་འདུ་ལོང་། །
བྱ་བྱེད་བྲེལ་དོའི་ལས་ཀ་འདི་མཐོང་ནས། །
ཨ་བུའི་སེམས་པ་དབེན་རི་ལ་ཤོར་སོང་། །
སུ་ལ་བལྟས་ཀྱང་འཆི་ལ་ནི་ཁད་ཁད། །
གང་ལ་བསམ་ཀྱང་འཆི་མེད་ཀྱི་རྟག་རྩིས། །
ཡི་མུག་སྐྱེ་བའི་ཤོམ་ར་འདི་མཐོང་ནས། །
ཨ་བུའི་སེམས་པ་དབེན་རི་ལ་ཤོར་སོང་། །
སུ་དང་འགྲོགས་ཀྱང་ཆགས་སྡང་གི་སྣོན་མ། །
གང་དང་འབྲེལ་ཀྱང་གཡོ་སྒྱུ་ཡི་མགོ་བསྐོར། །
དགེ་རྐྱེན་མེད་པའི་གྲོགས་མང་འདི་མཐོང་ནས། །
ཨ་བུའི་སེམས་པ་དབེན་རི་ལ་ཤོར་སོང་། །
ཉོན་མོངས་དགྲ་འདིའི་ཁམས་གསུམ་ཀུན་བསླུས་བསླུས། །
རྣམ་གཡེངས་འཁོར་ལོ་རིགས་དྲུག་འདིས་བསྐོར་བསྐོར། །
སྡུག་བསྔལ་བསྐྱེད་པའི་ལས་ཐབས་འདི་མཐོང་ནས། །
ཨ་བུའི་སེམས་པ་དབེན་རི་ལ་ཤོར་སོང་། །
བསླུ་མེད་མགོན་པོ་བླ་མ་དང་དཀོན་མཆོག །
དབེན་པར་སླེབ་ནས་དབེན་གནས་སུ་སྲན་ཚུག །
གནས་ལ་བརྟེན་ནས་ལུས་དབེན་དང་ངག་དབེན། །
དེ་ལ་བརྟེན་ནས་སེམས་དབེན་ཀྱང་སྐྱེ་པའི། །
དབེན་རི་ཟིན་པའི་བྱིན་རླབས་ཤིག་གནང་ཤོག། །།
