སངས་རྒྱས་གཉིས་པ་སོགས་ཤོ་ལོ་ཀ་ཉེར་གཉིས་པ།

༄༅། །སངས་རྒྱས་གཉིས་པ་སོགས་ཤོ་ལོ་ཀ་ཉེར་གཉིས་པ།

སངས་རྒྱས་གཉིས་པ། །རྔ་ཡབ་གླིང་པ། །གང་དང་མི་གཉིས། །ཀུན་མཁྱེན་ཡབ་སྲས། །སྙིང་གི་དབུས་ན། །འདུ་འབྲལ་མེད་དོ། །རང་རེ་ཀུན་མཁྱེན། །ཆེན་པོའི་རྗེས་འཇུག །འཁོར་བར་ཞེན་པ། །ལོག་པའི་ངེས་འབྱུང་། །གཞན་ཕན་དོན་དུ། །གཉེར་བའི་བྱང་སེམས། །བླ་མ་སངས་རྒྱས། །དངོས་སུ་མཐོང་བའི། །དད་དང་མོས་གུས། །ཡང་ཡང་བྱས་ན། །བྱིན་རྒྱུན་སྙིང་གི །དབུས་སུ་འཕོ་འོང་། །རྡོ་ རྗེའི་མཆེད་པོ། །བདག་ལ་གསོན་དང་། །གང་གིས་རྣལ་མ། །བསྒོམ་པའི་ཚེ་ན། །བྱིང་དང་རྨུགས་པའི། །དབང་དུ་སོང་ན། །ཅི་ཙམ་བསྒོམ་ཡང་། །ངལ་བ་དོན་མེད། །བྱིང་བ་དྭངས་བའི། །དྭངས་ཆ་ཐོན་ན། །ཡུལ་མེད་སངས་བའི། །ཡེ་ཤེས་ངང་ལ། །མི་གཡོ་རྒྱ་མཚོ། །ལྟ་བུར་གནས་ལགས། །རྨུགས་པ་སངས་བའི། །གསལ་ཆ་ཐོན་ན། །གསལ་ལ་རྟོག་མེད། །ཉི་མའི་དཀྱིལ་འཁོར། །ལྟ་བུའི་ངང་ལ། །གནས་པ་ཡིན་ལགས། །སྟོང་ཆ་དག་པའི། །རྗེན་ཆ་ཐོན་ན། །བྱ་རྩོལ་བྲལ་བ། །ནམ་མཁར་དྭངས་པའི། །དཀྱིལ་འཁོར་ལྟ་བུའི། །ངང་ལ་གནས་ལགས། །གསུམ་དུ་དབྱེ་ཡང་། །ཐ་མི་དད་ཅིང་། །དུས་གསུམ་དུས་མེད། །ཆོས་ཉིད་འཁོར་ལོ། །ཐུན་མཚམས་རིས་མེད། །ཉམས་ལེན་མ་ཤེས། །དྭངས་གསལ་རྗེན་པ། །རྗེན་འདེད་གྱིས་དང་། །གཟུང་འཛིན་ལས་རླུང་། །ཉི་ཁྲི་ཆིག་སྟོང་། །དབུ་མར་ཞུགས་པ། །དཀའ་མོར་མི་འདུག །ཨ་ཝ་དྷུ་ཏིའི། །མདུད་རྒྱ་གྲོལ་ན། །གང་ལྟར་བསྒོམས་ཀྱང་། །དེ་ཡིས་མི་འཆིང་། །ཀ་དག་རིག་པ། །དེ་ལ་ལོས་ཟེར། །འཁྲུལ་སྣང་གཞི་ལ། །ཐིམ་པའི་ལག་རྗེས། །ཆོས་ཀྱི་འཁོར་ལོའི། །རྩ་མདུད་གྲོལ་ཚེ། །ལོངས་ སྤྱོད་འཁོར་ལོའི། །རྫ་རྔ་རྡུངས་ཤོག །ཐོད་རྒལ་བསྒོམས་པས། །ཚེ་འདི་ཉིད་ལ། །སྣང་ཆ་ལོངས་སྤྱོད། །རྫོགས་སྐུར་གྲོལ་འོང་། །རགས་ལུས་རྡུལ་ཕྲན། །དེངས་བ་ཨ་ཏི། །རྫོགས་པ་ཆེན་པོའི། །ཁྱད་ཆོས་ཡིན་ལགས། །དྲན་པ་རྣམ་གྲངས། །མང་དུ་ཡོད་ཀྱང་། །ཚོགས་བརྒྱད་བློ་དང་། །བྲལ་བའི་ཚེ་ན། །མིང་ལ་གཉུག་མའི། །དྲན་པ་ཐོག་ཅིག །ཆོས་གྲོགས་དམ་པ། །ཡོན་ཏན་རྒྱ་མཚོས། །འདི་ལྟར་དགོས་ཞེས། །ཡང་ཡང་བསྐུལ་ནས། །སྙོམ་ལས་མཁན་གྱིས། །མིག་འཕྲུལ་ལྟ་བུར། །གང་ཤར་ཐོལ་བྱུང་། །མྱུར་དུ་བྲིས་སོ། །