ལྕེ་བཙུན་སེངྒེ་དབང་ཕྱུག་གི་ཞལ་ཆེམས།

༄༅། །ལྕེ་བཙུན་སེངྒེ་དབང་ཕྱུག་གི་ཞལ་ཆེམས།

ཨེ་མ་སྨྱོན་པ་སེང་དབང་ང་༔

ལས་ཀྱི་རླུང་ཟད་ཡེ་ཤེས་རྒྱས༔

མ་རིག་སྒོ་ལྔའི་སྦུབས་ལས་གྲོལ༔

རང་རིག་འོད་གསལ་སྦུབས་སུ་བཞུགས༔

སྒོ་གསུམ་གྱི་འཁྲུལ་པ་ཞིག་ཙ་ན༔

འཁྲུལ་གཞི་ཐམས་ཅད་ཡ་རེ་ཆ༔

འཁྲུལ་སྣང་གི་མདུད་པ་ཆོད་ཙ་ན༔

སེམས་འཛིན་ཟེར་བ་ཐང་རེ་ཆད༔

འཁྲུལ་པ་ཡེ་ཤེས་སུ་ཤར་ཙ་ན༔

དག་སྣང་ཐམས་ཅད་བསླུ་བའི་ཆོས༔

ཐམས་ཅད་དབྱིངས་སུ་ཐིམ་ཙ་ན༔

ཅི་ཡང་མ་ཡིན་ཅིར་ཡང་འཆར༔

ཨེ་མ་ཨེ་མ་དམ་པའི་སྐུ་དྲིན་ལགས༔

ཨེ་མ་འདའ་ཀའི་ཚིག་འདི་སྙིང་པོའི་དོན༔

སྙིང་ཕྱུང་ལག་མཐིལ་བཞག་པ་འདི་ལས་མེད༔

ཚིག་གི་ཐ་མ་དུས་མཐར་སྣང་བར་ཤོག༔

ཟག་པ་རང་ཟད་འབྱུང་བ་རང་སར་དེངས༔

དྲན་པ་རང་གྲོལ་ཟང་ཐལ་འོད་ཀྱི་ལུས༔

སེང་གེ་དབང་ཕྱུག་ཉིད་དང་མཉམ་པར་ཤོག༔