Siṃhamukhā Fulfilment Practice—Tibetan
༄༅། །འཕྲོག་བྱེད་ཞལ་ཅན་མའི་ཕྲིན་ལས་ཀྱི་བྱང་བུའི་ཡན་ལག་ཏུ་ཐུགས་དམ་བསྐང་བ་སྦྲེལ་བ།
བསྐང་རྫས་བྱིན་རླབས་སྔོན་འགྲོས།
རང་ཉིད་སྐད་ཅིག་གིས་བདུད་འདུལ་དྲག་མོ་གཟི་བྱིན་བསྐལ་མེ་ལྟར་འབར་ཞིང་། །
སེང་སྐད་ཀྱི་ང་རོས་ཁམས་གསུམ་ཟིལ་གྱིས་གནོན་པའི་སྐུར་གྱུར། ཅེས་དང་།
ཨོཾ་བཛྲ་ཨ་མྲྀ་ཏ་སོགས། འདི་ཡང་འཇིགས་མེད་པས་བྲིས།། །།
ཧཱུྃ། རྒྱལ་བའི་ཡུམ་གྱུར་བཛྲ་ཝཱ་རཱ་ཧཱི། །
བདུད་དཔུང་འདུལ་ཕྱིར་འབར་བའི་སྐུར་བསྟན་ནས། །
བདག་མེད་སེངྒེའི་ང་རོ་བཞད་པ་མོ། །
དཀྱིལ་འཁོར་དབང་ཕྱུག་ཆེན་མོའི་ཐུགས་དམ་བསྐང་། །
དེ་ཡི་རྡོ་རྗེ་སྐྱེ་མཆེད་སྒྱུ་མའི་འཕྲུལ། །
བདེ་སྟོང་འདོད་དགུར་སྒྱུར་བའི་ཞལ་བརྙན་ཅན། །
གཟུང་འཛིན་འཁྲུལ་པ་ལས་བྱུང་བདུད་ཀྱི་དགྲ། །
ཕྲ་མེན་རྡོ་རྗེ་མུ་དྲུག་ཐུགས་དམ་བསྐང་། །
གནས་ཡུལ་དུར་ཁྲོད་སྤྲུལ་པའི་ཞིང་རྣམས་སུ། །
གང་འདུལ་དེར་སྣང་སྒྱུ་མའི་རོལ་པ་ཡིས། །
གསང་ཆེན་སྙིང་པོའི་ཆོས་མཛོད་ལེགས་སྐྱོང་བ། །
མཁའ་འགྲོ་གིང་ཆེན་རྣམས་ཀྱི་ཐུགས་དམ་བསྐང། །
གཞན་ཡང་ལྷན་སྐྱེས་གཉུག་མའི་ཕག་མོ་ཉིད། །
མི་འདྲའི་རྣམ་འགྱུར་བསམ་ཡས་གཟུགས་བཟུང་སྟེ། །
སྒྲུབ་པའི་རེ་སྐོང་དངོས་གྲུབ་སྩོལ་མཛད་པའི། །
རྩ་གསུམ་སྲུང་མར་བཅས་རྣམས་ཐུགས་དམ་བསྐང་། །
ཁམས་གསུམ་ཕྱི་ནང་སྣང་བའི་འཁོར་ལོ་ཀུན། །
གཟོད་ནས་འོད་གསལ་དབྱིངས་ལས་མ་གཡོས་ཕྱིར། །
ཀུན་ཀྱང་རྡོ་རྗེ་ཁྲོས་མའི་དཀྱིལ་འཁོར་དུ། །
མཉམ་རྫོགས་དག་པ་རབ་འབྱམས་ཐུགས་དམ་བསྐང་། །
ཕྱི་ལྟར་ལྷ་རྫས་ཉེར་སྤྱོད་མཆོད་པ་དང་། །
ནང་ལྟར་ཞིང་ཆེན་ལས་བྱུང་མེ་ཏོག་སོགས། །
ཐུན་མོང་ལྷ་དང་མི་ཡི་འདོད་ཡོན་སྤྲིན།
ཁྱད་པར་བདེ་ཆེན་རིག་མའི་ལོངས་སྤྱོད་དང་། །
རྩ་བརྒྱད་ཡན་ལག་སྟོང་སྦྱར་སྨན་མཆོག་དང་། །
གཏོར་མའི་དམ་ཚིག་རྡོ་རྗེའི་བཟའ་བ་དང་། །
དམར་གྱི་ཆུ་གཏེར་རྦ་ཀློང་གཡོ་བ་སོགས། །
རྣལ་འབྱོར་སྣང་བ་བདེ་བར་ཤར་བ་ལས། །
སྣང་གྲགས་མ་ལུས་ཀུན་བཟང་འབྱོར་ཚོགས་སུ། །
གསལ་འབར་ཡིད་བཞིན་སྤྲིན་གྱིས་ཐུགས་དམ་བསྐང་། །
རང་སྣང་རིས་མེད་ཆེན་པོར་ཐུགས་དམ་བསྐང་། །
དུས་གསུམ་རྒྱུན་གྱི་འཁོར་ལོར་ཐུགས་དམ་བསྐང་། །
ཐུགས་དམ་བསྐངས་གྱུར་ཉམས་ཆག་ཚངས་པར་མཛོད། །
དབང་བསྐུར་བྱིན་རློབས་རྡོ་རྗེའི་ཡེ་ཤེས་སྩོལ། །
བྱད་ཕུར་ནད་གདོན་དུས་མིན་འཆི་བ་ཀུན། །
ཐོགས་མེད་རྡོ་རྗེ་གྲི་གུག་འབར་བས་ཆོད། །
བདུད་བཞིའི་ཁྲག་ཆེན་བཏུང་བའི་བཅུད་ལེན་གྱིས། །
ཚེ་བསོད་ཡེ་ཤེས་གཟི་བྱིན་རྒྱས་པར་མཛོད། །
མཐར་ཐུག་རྡུལ་བྲལ་ནམ་མཁའི་སྐུ་ཐོབ་ནས། །
རོལ་པའི་སེང་སྐད་སྲིད་ཞི་འགེངས་པར་ཤོག །
ཅེས་པའང་སྨྱུག་འཛིན་པ་ཙནྡྲ་བྷ་དྲའི་ངོར་བསྟན་ཉིས་བྲིས།། །།
