གུ་རུ་བདེ་བ་ཆེན་པོའི་རྣལ་འབྱོར་རྒྱུན་ཁྱེར།
༄༅། །གུ་རུ་བདེ་བ་ཆེན་པོའི་རྣལ་འབྱོར་རྒྱུན་ཁྱེར་བཞུགས།
ན་མོ།
སྐྱབས་གནས་ཀུན་འདུས་དྲིན་ཆེན་བླ་མ་ལ། །
སྙིང་ནས་སྐྱབས་མཆི་བྱང་ཆུབ་སེམས་མཆོག་བསྐྱེད། །
ལན་གསུམ།
ཨ། རང་ཉིད་གཞི་གྱུར་དབང་ཆེན་རྟ་མཆོག་དཔལ། །
གྲི་གུག་ཐོད་འཛིན་ཕག་མོ་ཡུམ་དང་འཁྲིལ། །
རུས་པའི་རྒྱན་ལྡན་དུར་ཁྲོད་ཆས་ཀུན་རྫོགས། །
བདེ་དྲོད་མེ་དཔུང་འཁྲིགས་པའི་ཀློང་དུ་རོལ། །
རང་གི་སྙིང་གར་ཙིཏྟ་རིན་པོ་ཆེ། །
པདྨ་འདབ་བརྒྱད་ཅུང་ཟད་ཁ་བྱེའི་ནང་། །
ཟླ་བའི་སྟེང་དུ་རང་རིག་བདེ་བར་གཤེགས། །
གུ་རུ་བདེ་བ་ཆེན་པོ་དཀར་དམར་མདངས། །
མཛེས་པའི་ཉམས་ལྡན་ཁྲོ་འཛུམ་བརྗིད་ཆགས་པ། །
གསང་གོས་ཕོད་ཀ་ཆོས་གོས་རིན་ཆེན་བརྒྱན། །
པད་ཞྭ་བེར་སྨུག་ལྷུབ་གསོལ་སྐྱིལ་ཀྲུང་བཞུགས། །
མཉམ་གཞག་སྟེང་ན་ཐོད་པ་འོད་འབར་ནང་། །
བདེ་གཤེགས་ཀུན་གྱི་བྱང་སེམས་འདུས་པ་ཡི། །
བདེ་བ་ཆེན་པོ་ཡི་གེ་བྃ་དུ་གསལ། །
བྃ་ལས་བདུད་རྩིའི་རྒྱུན་བབས་ཐོད་པ་གང་། །
འཕྱུར་ཞིང་ལུད་པས་སྙིང་གི་ནང་གང་བས། །
བདེ་བ་ཆེན་པོ་རྡོ་རྗེའི་སྲོག་འགྲུབ་གྱུར། །
ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ།
ཞེས་བཟླ།
ཐུན་མཐར།
གུ་རུ་དགྱེས་པ་ཆེན་པོས་འོད་དུ་ཞུ། །
རང་སེམས་དབྱེར་མེད་ལྷན་སྐྱེས་ཆོས་སྐུར་གནས། །
ཞེས་མཉམ་པར་བཞག །རྗེས་བསྔོ་སྨོན་གྱིས་མཚམས་སྦྱར་ཏེ་སྤྱོད་ལམ་ལ་འཇུག་གོ །
ཞེས་པའང་རྣམ་པར་དགེ་བའི་རྣམ་དཔྱོད་ཅན་གུ་རུ་ནོར་བུའི་ཐུགས་དམ་ཉམས་བཞེས་སུ་འཇིགས་བྲལ་ཡེ་ཤེས་རྡོ་རྗེས་བྲིས་པ་དགེ། །།
