Advice for Jamyang Losal—Tibetan

༄༅། །འཇམ་དབྱངས་བློ་གསལ་ལ་གདམས་པ།

ཨ་ཧོ།
བུ་ཆོས་ཀུན་སེམས་ཀྱི་སྣང་བ་ཡིན། །
ན་ཚ་བདེ་སྡུག་རྣམ་རྟོག་ཡིན། །
རྣམ་རྟོག་གཞི་རྩ་བཅད་གྱུར་ན། །
སྐྱེ་འགགས་གནས་བྲལ་འགྲོ་འོང་མེད། །
སེམས་ཉིད་གསལ་རིག་སྟོང་པ་གསུམ། །
ཟུང་འཇུག་དེ་བླ་མ་ཡི་དམ་ཡིན། །
དེ་རང་ངོ་ཤེས་པའི་ལྟ་བ་ལ། །
འཛིན་པའི་སྒྲོག་གིས་མ་འཆིངས་ཤིག།
སྤྲོས་བྲལ་གྱི་ལྟ་བ་དེའི་ངང་ནས། །
བསྐྱེད་རྫོགས་སོགས་རྩལ་གདངས་ཅི་ཤར་ཡང་། །
འགགས་མེད་ཀྱི་བསྒོམ་པ་ནན་ཏན་མཛོད། །
གེགས་སེལ་དང་བོགས་འདོན་གྱི་རྒྱལ་པོ་ནི། །
ལམ་ཟབ་བླ་མའི་རྣལ་འབྱོར་ཡིན། །
མོས་གུས་ཀྱིས་གནད་དུ་བསྣུན་པར་གཅེས།

ཞེས་པའང་ཐུགས་སྲས་མཁན་རིན་པོ་ཆེ་འཇམ་དབྱངས་བློ་གསལ་ལ་གདོམས་པའོ།། །།