Advice for Jamyang Losal Zangpo—Tibetan

Literary Genres › Advice | Literary Genres › Songs and Poems | བོད་ཀྱི་བླ་མ།འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

English | བོད་ཡིག

འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

༄༅། །འཇམ་དབྱངས་བློ་གསལ་བཟང་པོ་ལ་གདམས་པ།

ཀྱེ་ཧོ།
བུ་རྟག་པར་བླ་མ་དྲན་པ་དང་། །
ཅིར་སྣང་བླ་མར་ཤེས་པ་ཡི། །
མོས་གུས་ལམ་གྱི་སྲོག་འཁར་ལ། །
ཕ་རྒན་ས་སྐྱ་པ་ཆེན་པོའི། །
རྟོགས་པའི་ཡེ་ཤེས་རྒྱུད་ལ་འཕོ། །
ལུས་ནི་ལྷ་རུ་སྒོམ་པ་དང་། །
ངག་ནི་བཟླས་པ་ལམ་དུ་ཁྱེར། །
དྲན་རྟོག་ཡེ་ཤེས་ཆེན་པོའི་ངང་། །
ནམ་ཡང་འདའ་བ་མེད་པར་མཛོད། །
མདོར་ན་མང་དུ་སྨྲས་པས་ཅི་བྱ་སྟེ། །
རང་སེམས་འདུལ་ཞིང་རང་རྒྱུད་ཆོས་དང་བསྲེ། །
ཆོས་ཀྱི་སྙིང་པོ་ཀུན་རྫོབ་དོན་དམ་གྱི། །
བྱང་ཆུབ་སེམས་གཉིས་བསྒོམ་ལ་ནན་ཏན་བྱ། །

ཞེས་པ་འདི་ནི་རང་སློབ་འཇམ་དབྱངས་བློ་གསལ་བཟང་པོའི་ཆེད་ཆོས་ཀྱི་བློ་གྲོས་པས་སོ།། །།