བོད་བརྒྱུད་ནང་བསྟན་གསུང་རབ་སྒྲ་བསྒྱུར་ཁང་།
ISSN 2753-4812
ISSN 2753-4812

ཀློང་སྙིང་སྔོན་འགྲོའི་ཟིན་ཐོ་ཉུང་ངུ་།

English | བོད་ཡིག

༄༅། །ཀློང་སྙིང་སྔོན་འགྲོའི་ཟིན་ཐོ་ཉུང་ངུ་བཞུགས།

སྐྱབས་ཡུལ་སྐབས་དག་པའི་ཞིང་ཁམས་བཻ་ཌཱུརྱ་ཡི་ས་གཞིའི་དབུས་དཔག་བསམ་ཤིང་སྡོང་ཡལ་ག་ལྔ་པ་གསལ་བའི་དབུས་མར་སེང་ཁྲིའི་པད་ཟླའི་སྟེང་ཨོ་རྒྱན་རྡོ་རྗེ་འཆང་སྤྱི་བོར་བརྒྱུད་པའི་བླ་མ་ཐོ་བརྩེགས། མདུན་དུ་སྟོན་པ་ཤཱཀྱའི་རྒྱལ་པོ་ཆགས་བྲལ་སྤྲུལ་སྐུ། གཡས་སུ་ཉེ་སྲས་བརྒྱད་སོགས། རྒྱབ་ཏུ་ཆོས་དཀོན་མཆོག་གླེགས་བམ་པུསྟིའི་རྣམ་པ་ཅན། གཡོན་དུ་མཆོག་ཟུང་སོགས་ཉན་རང་གི་དགེ་འདུན། ཤིང་གི་རྩ་བར་རང་དང་མདུན་དུ་རང་ལ་གནོད་པར་བྱེད་པའི་དགྲ་གདོན་བགེགས་སོགས་གཡས་གཡོན་ཚེ་འདིའི་ཕ་མ། རྒྱབ་ཏུ་གཉེན་འཁོར། མཐའ་སྐོར་རིགས་དྲུག་གི་སེམས་ཅན་ཐམས་ཅད་འཁོད་དེ་སྒོ་གསུམ་འདུན་པ་གཅིག་པས་སྐྱབས་ཡུལ་གྱི་ཡོན་ཏན་དྲན་ཞིང་། དད་མོས་རྐང་ཚུགས་པས་སྐྱབས་འགྲོའི་ཚིག་བརྗོད་དེ། དེ་ཡང་སྤྱི་ལྟར་ན་བླ་མ་ཉིད་སངས་རྒྱས་ཆོས་དགེ་འདུན་ཏེ་དཀོན་མཆོག་གསུམ་པོ་དངོས་ཡིན་ལ། ཡིན་ཚུལ་ཇི་ལྟར་ན། སྐུ་དགེ་འདུན། གསུང་དམ་ཆོས། ཐུགས་སངས་རྒྱས་ཡིན་པས་སོ། །ནང་ལྟར་ན་བདེ་བར་གཤེགས་པ་བསམ་ཡས་རབ་འབྱམས་རྒྱ་མཚོའི་ཚོགས་ཐམས་ཅད་ཀྱང་རྩ་བ་གསུམ་དུ་མ་འདུས་པ་མེད་པས་བྱིན་རླབས་ཀྱི་རྩ་བ་བླ་མ་ནི་ཁྱབ་བདག་དཔལ་ལྡན་རིགས་འདུས་རྡོ་རྗེ་འཆང་ཆེན་པོ་ཉིད་དང་། དངོས་གྲུབ་ཀྱི་རྩ་བ་ཡི་དམ་ཡང་བླ་མ་ཉིད་ཡིན་ཏེ། གདན་གསུམ་ཚང་བའི་དཀྱིལ་འཁོར་དུ་གདོད་ནས་ལྷུན་གྱིས་གྲུབ་པ་དང་། ཕྲིན་ལས་རྩ་བ་མཁའ་འགྲོ་ཆོས་སྐྱོང་ཐམས་ཅད་ནི་དཔལ་ལྡན་བླ་མའི་གསང་གསུམ་ཕྲིན་ལས་ཐུགས་རྗེའི་རོལ་རྩལ་ལས་ཉི་མ་དང་ཟེར་བཞིན་འདུ་འབྲལ་མེད་པར་རང་སྣང་བའོ། །གསང་བ་ལྟར་ན་རང་ལུས་རྡོ་རྗེ་ཕུང་པོའི་རྩ་ཡེ་ནས་དག་བ་སྤྲུལ་སྐུ། རླུང་ཡེ་དག་ལོངས་སྐུ། ཐིག་ལེ་ཡེ་དག་ཆོས་སྐུ་སྟེ་དག་པ་སྐུ་གསུམ་རང་བཞིན་དེ་ཡང་མཐར་གཏུགས་ན་ཤེས་རིག་མ་བཅོས་གཉུག་མ་བྱང་ཆུབ་ཀྱི་སེམས་ཀྱི་ངོ་བོ་ཀ་དག་རང་བཞིན་གྱི་གཏིང་གསལ་སྟོང་པ་ཆེན་པོ་ཆོས་སྐུ་གཞིར་གནས་ཀྱི་ཡེ་ཤེས་དང་། རང་བཞིན་ལྷུན་གྲུབ་སྐུ་དང་ཡེ་ཤེས་ཀྱི་གདངས་ནང་གསལ་ཐིམ་ལ་མ་རྨུགས་པར་བཞུགས་པ་ལོངས་སྐུ་གཞིར་གནས་ཀྱི་ཡེ་ཤེས་དང་། ཐུགས་རྗེ་རིགས་པའི་རྩལ་འཁོར་འདས་བརྟན་གཡོ་ཀུན་ཁྱབ་ཅི་ཡང་འཕྲོ་ཞིང་ཅིར་ཡང་སྣང་བ་རྒྱ་ཆད་ཕྱོགས་ལྷུང་ཐམས་ཅད་དང་བྲལ་བ་ཐུགས་རྗེ་སྤྲུལ་སྐུ་གཞིར་གནས་ཀྱི་ཡེ་ཤེས་ཏེ་དེ་གསུམ་ཀའང་མིང་གི་རྣམ་པར་དབྱེ་བ་ཙམ་ལས་དོན་ལ་སྐུ་གསུམ་དབྱེར་མེད་བློ་བྲལ་བསམ་གྱི་མི་ཁྱབ་པའི་གནས་ལུགས་རྒྱུ་རྐྱེན་བྱ་རྩོལ་ལས་འདས་པའི་རིག་པ་སྐུ་གསུམ་གྱི་དཀྱིལ་འཁོར་ཆེན་པོ་རང་ཆས་སུ་བཞུགས་པ་དེ་ནི་མཚོན་བྱ་དོན་གྱི་བླ་མ་ཨོ་རྒྱན་རྡོ་རྗེ་འཆང་ཆེན་པོ་དངོས་ཡིན་པས་དེ་ཉིད་རང་ངོ་ཤེས་པའི་སྒོ་ནས་དང་དེའི་གདང་རྩལ་ཕྱིར་ཤར་བ་མཚོན་བྱེད་དཔེ་ཡི་བླ་མ་དམིགས་བཅས་ཀྱི་སྐྱབས་ཀྱི་ཡུལ་རྣམས་ལ་བྱང་ཆུབ་སྙིང་པོའི་མཐར་ཐུག་གི་བར་དུ་སྐྱབས་གནས་གཞན་དུ་མི་བཙལ་བའི་ངེས་ཤེས་བརྟན་པོས་སྐྱབས་སུ་མཆིའོ་ཞེས་བྱ་ཚིག་སྟོན་པའོ། །ཁྲིད་ཡིག་གཞན་དུ་མཐར་ཐུན་བསྡུ་ཚེ་སླར་མོས་གུས་དུང་པ་བྱས་པའི་རྐྱེན་གྱིས་ཡུལ་ལྷ་ཚོགས་རྣམས་ཀྱི་སྐུ་ལས་འོད་ཟེར་དཔག་ཏུ་མེད་པ་འཕྲོས། རང་གཞན་སེམས་ཅན་ཐམས་ཅད་ལ་ཕོག་པས་ཚེ་བསོད་དཔལ་འབྱོར་རྒྱས། ནད་གདོན་སྡིག་སྒྲིབ་ཞི་ཞིང་ཐམས་ཅད་འོད་ཀྱི་རྣམ་པར་གྱུར་ནས་སྐྱབས་ཡུལ་རྣམས་ལ་ཐིམ། སྐྱབས་ཡུལ་རྣམས་ཀྱང་འོད་དུ་ཞུ་ནས་དབུས་ཀྱི་བླ་མ་སྐྱབས་ཡུལ་ཀུན་འདུས་ལ་ཐིམ། བླ་མ་དེ་ཡང་ཆོས་སྐུ་སྤྲོས་མེད་ཀྱི་ངང་ལ་བསྟིམ་པ་ནི་ཀུན་རྫོབ་ཀྱི་རྣམ་པ། དེའི་ངང་དུ་བཅས་བཅོས་མི་བྱེད་པར་རང་བབས་སུ་ལྷོད་དེ་རྣམ་རྟོག་གི་འཕྲོ་འདུ་དང་བྲལ་བར་ཅི་གནས་སུ་བཞག་པ་ནི། དོན་དམ་ཡོངས་ཤེས་ཀྱི་སྐྱབས་འགྲོའོ། །མཐར་སྐྱབས་ཡུལ་ལས་འོད་ཟེར་རང་གཞན་རྣམས་ལ་ཕོག་སྡིག་སྒྲིབ་བྱང་། སྐྱབས་ཡུལ་རྣམས་ཀྱི་བྱིན་རླབས་རྒྱུད་ལ་འཇུག་པར་བསམ་ལ་དམིགས་མེད་དུ་བཞག།

སེམས་བསྐྱེད་ནི།

ཕ་མས་གཙོར་བྱས་མཁའ་ཁྱབ་ཀྱི་སེམས་ཅན་དམིགས་ཡུལ་ཏུ་བྱས་ཏེ་གཞན་ཕན་ལྷག་པའི་བསམ་པ་བཟང་པོ་སྙིང་རྗེའི་རྩ་བ་ཅན་རྒྱུད་ལ་བསྐྱེད་ནས་སེམས་གཉིས་བསྐྱེད་པའི་ཚིག་གི་དོན་ནི། ཧོཿཞེས་བྱང་ཆུབ་ཀྱི་སེམས་ཆེན་པོ་ལ་ངོ་མཚར་བའི་ཚིག་གིས་དྲངས་ཏེ། འགྲོ་རྒྱུད་ཀུན་གཞི་མ་རིག་པ་དང་མཚུངས་ལྡན་ལ་བག་ཆགས་སྣ་ཚོགས་བལྟར་མི་མངོན་པའི་ཚུལ་དུ་བཞག་པས་གནས་དོན་ལུས་གསུམ་གྱི་སྣང་བ་དག་དང་མ་དག་གི་སྲིད་ཞིའི་དངོས་པོ་ཅིར་ཡང་སྣང་བ་དེ་ཐམས་ཅད་ཆུ་ནང་གི་ཟླ་བ་དང་། མེ་ལོང་གི་གཟུགས་བརྙན་ལྟར་མེད་བཞིན་དུ་རྣམ་པར་སྣང་རུང་དོན་རང་གི་མཚན་ཉིད་མི་རྟག་ཅིང་འདུས་བྱས་སྐད་ཅིག་མའི་རང་བཞིན་འཁྲུལ་པ་བརྫུན་པའི་སྣང་ཆ་རིས༵་སུ་བྲིས་པ་སྒྱུ་མ་ལྟ་བུའི་ཆོས་རྣམས་ཀྱི༵་རང་གཟུགས་ལ་བདེན་པར་ཞེན་པས་སྲིད་པ་གསུམ་དུ་ཡང་ནས་ཡང་དུ་མགལ་མེ་ལྟར་འཁོར་བ་བར་མ་ཆད་ཅིང་རླུང་སེམས་རྣམ་ཤེས་གསུམ་མི་འབྲལ་གཅིག་ནས་གཅིག་ཏུ་ལུ་གུ་རྒྱུད་དུ་གནས་རིས་མཐོ་དམན་སོགས་ལས་ཀྱི་རླུང་གི་བདས་སྟེ་ངེས་མེད་དུ་འཁྱམས་པའི་ཡིད་ཅན་གྱི་འགྲོ་བ་རྣམས་ཆོས་དབྱིངས་དེ་བཞིན་ཉིད་རིག་སྟོང་ཟུང་འཇུག་ཆེན་པོའི་རང་ཞལ་མ་མཇལ་ཞིང་རྟོག་པས་སྒྲིབ་པ་མཐའ་ཀླས་པ་ཐམས་ཅད། སོ་སོར་རང་གི་རིག་པའི་ཡེ་ཤེས་ཀྱི་སྤྱོད་ཡུལ་དུ་གྱུར་པའི་གཉུག་མ་འོད་གསལ་ཆེན་པོའི་དབྱིངས་སུ་ཐོག་མ་མེད་པའི་དུས་ནས་སྲིད་པར་འཕྱན་ཞིང་དུབ་པ་རྣམས་ངལ་གསོ་བའི་ཕྱིར་དུ་སྐྱེས་བུ་ཆེན་པོའི་བློས་བཏང་སྙོམས་སོགས་ཚད་མེད་པ་བཞི་དང་འབྲེལ་བའི་ངང་ནས་ཤེས་རབ་ཀྱི་རྫོགས་བྱང་དང་། སྙིང་རྗེས་གཞན་དོན་ལ་དམིགས་པ་སྟེ་དོན་གཉིས་དང་ལྡན་པའི་བྱང་ཆུབ་མཆོག་ཏུ་སེམས་བསྐྱེད་དོ་ཞེས་རྫོགས་ཚིག་བསྟན་པས་སེམས་དང་སེམས་བྱུང་ལྷག་མ་མ་ལུས་པ་བསྐྱེད་པའི་དོན་ཏོ། །སྐྱབས་སེམས་སྦྲེལ་ན། སྐྱབས་ཡུལ་བསྡུ་བསྟིམ་སོགས་ཁྲིད་ཡིག་དཀྱུས་ལྟར་དང་། སྐྱབས་སེམས་ཐུན་སོ་སོར་བཅད་ན་སྐྱབས་འགྲོ་ལ་སྐྱབས་ཡུལ་བསྡུ་ཚུལ་ཁྲིད་ཡིག་དཀྱུས་ལྟར་དང་། སེམས་བསྐྱེད་སྐབས་སྐྱབས་ཡུལ་རང་ལ་བསྟིམ་པ་ཡིན་ཅེས་མཁྱེན་བརྩེའི་གསུང་ཟིན་བྲིས་མཆན་ལས་བྱུང་བས་དེ་ལྟར་བྱའོ། །

རྡོར་སེམས་སྒོམ་བཟླས་ནི།

ལམ་གྱི་འགལ་རྐྱེན་དུ་གྱུར་པ་ཚེ་རབས་ཐོག་མེད་ནས་བསགས་པའི་བཅས་དང་རང་བཞིན་གྱི་སྡིག་སྒྲིབ་ཉེས་ལྟུང་ཉམས་ཆག་དྲན་པ་དང་མ་དྲན་པ་ཐམས་ཅད་སྦྱོང་བའི་བློས་ཨཿཞེས་སྐྱེ་མེད་ཀྱི་ཡི་གེ་བརྗོད་པས་སྐྱེ་བའི་དབྱིངས་ལས་བླ་མ་ལོངས་སྐུ་དཔལ་ལྡན་རྡོ་རྗེ་སེམས་དཔའི་གསང་བ་གསུམ་གྱི་ཆོ་འཕྲུལ་འབྱུང་བར་སྒོ་དབྱེ་བ་སྟེ། དེ་ཡང་། བདག་ཉིད་རྣམ་སྨིན་ཤ་ཁྲག་གི་ལུས་ཐ་མལ་དུ་གནས་པའི་སྤྱི་བོའི་གཙུག་ཚངས་བུག་གི་སྟེང་དུ་རྡོ་རྗེ་སེམས་དཔའི་གདན་པད་དཀར་འདབ་བརྒྱད་ཀྱི་སྡོང་བུ་སོར་བཞི་ཙམ་ཟུག་པའི་ལྟེ་བར་ཟེའུ་འབྲུ་དང་མཉམ་པའི་ཟླ་དཀྱིལ་ཉ་གང་བའི་སྟེང་དུ་ཧཱུྃ་དཀར་པོ་ཡོངས་སུ་གྱུར་པ་ལས་སྐད་ཅིག་གིས་བླ་མ་རྡོ་རྗེ་སེམས་དཔལ་སྐུ་མདོག་དཀར་གསལ་ནོར་བུ་ཆུ་ཤེལ་ལྟར་བཀྲག་ཅིང་འཚེར་བ་ལོངས་སྤྱོད་རྫོགས་སྐུའི་རྒྱན་ཆས་བཅུ་གསུམ་གྱིས་སྤྲས་ཤིང་ཞི་ཚུལ་དགུ་དང་ལྡན་པའི་སྐུ་ཕྱག་གཉིས་ཀྱི་གཡས་རྡོ་རྗེ་ཐུགས་ཀ་དང་། གཡོན་དྲིལ་བུ་དཀུར་བརྟེན་པ་རང་འོད་ཀྱི་ཡུམ་རྡོ་རྗེ་སྙེམས་མ་དཀར་མོ་གྲི་ཐོད་འཛིན་པ་ལ་འཁྲིལ་ཞིང་མཉམ་པར་སྦྱོར་བ། ཡབ་རྡོ་རྗེ་དང་། ཡུམ་པད་མོའི་སྐྱིལ་ཀྲུང་གིས་བཞུགས་པར་གསལ་བ་ལ་གདུང་ཤུགས་དྲག་པོས་བླ་མ་རྡོ་རྗེ་སེམས་དཔའ་ཡབ་ཡུམ་ཁྱེད་ལ་བདག་གཞན་འཁོར་བ་ངན་སོང་གི་འཇིགས་པ་ལས་བསྐྱབ་ཏུ་གསོལ། སྡིག་པ་དང་སྒྲིབ་པ་ཐམས་ཅད་སྦྱང་དུ་གསོལ་སྙམ་པ་ནི་རྟེན་གྱི་སྟོབས། སྔར་བྱས་ཀྱི་སྡིག་ལྟུང་ལ་གནོང་ཞིང་འགྱོད་པའི་སེམས་དྲག་པོ་སྙིང་རླུང་འཁྲུག་པ་ཙམ་དུ་བྱས་ཏེ་ངག་གིས་མཐོལ་བ་ནི་རྣམ་པར་སུན་འབྱིན་གྱི་སྟོབས་དང་། སྒོ་གསུམ་ཕྲུག་གཅིག་སྒྲིམ་ནས་སྡིག་པ་དང་དམ་ཚིག་ཆག་ཉམས་ཐམས་ཅད་བཤགས་པའི་ཡིད་ཀྱིས་གཉེན་པོ་བསྟེན་པ་ནི་གཉེན་པོ་ཀུན་དུ་སྤྱོད་པ་དང་། དེང་ཕྱིན་ཆད་སྲོག་ལ་བབ་ཀྱང་སྡིག་པའི་ལས་མི་བྱེད་སྙམ་པས་སྒོ་གསུམ་མི་དགེ་བ་ལས་རིང་དུ་སྡོམ་པའི་སྤོང་སེམས་ཁྱད་པར་ཅན་ནི་སོར་ཆུད་པའི་སྟོབས་ཏེ་གནད་བཞི་པོ་དེ་དང་ལྡན་པས་སྐབས་འདིར་ཐབས་ཁྱད་པར་ཅན་སྒྲིབ་སྦྱོང་ཐུགས་རྗེའི་ཆུ་རྒྱུན་གྱི་དམིགས་པ་ནི་བླ་མ་རྡོ་རྗེ་སེམས་དཔའ་ཁྱོད་ཀྱི་ཐུགས་ཀར་ཟླ་བའི་དཀྱིལ་འཁོར་ཉ་རྒྱས་པ་དྭངས་ཤིང་གསལ་བའི་སྟེང་དུ་ཧཱུྃ་དཀར་པོ་དང་དེ་ཡི་མཐའ་མར་ཡི་གེ་བརྒྱ་པའི་སྔགས་ཀྱི་ཕྲེང་བ་མུ་ཏིག་གི་རྡོག་མ་ལྟར་དཀར་ཧྲམ་མེ་གཡས་བསྐོར་དུ་ཡོད་པ་ཤིན་ཏུ་གསལ་བ་དེ་རྣམས་ཀྱང་བེམ་པོ་ལྟ་བུ་མིན། ཞི་ཁྲོ་རིགས་བརྒྱའི་ས་བོན་ཡིན་པས་ལྷ་སྔགས་དབྱེར་མེད་ཡེ་ཤེས་ཀྱི་སྲོག་དང་ལྡན་པ་སྒོམ་པར་བྱ་ཞིང་དམིགས་པ་གསལ་ན་སྔགས་ཕྲེང་འཁོར་གཅིག་དམིགས་པ་མ་བྱང་ན་སྦྲུལ་འཁྱིལ་དུ་བཀོད་ཀྱང་རུང་ཞིང་ཡིག་བརྒྱ་གསོལ་འདེབས་ཀྱི་ཚུལ་དུ་བཟླས་པའི་སྔགས་ཀྱི་རང་སྒྲས་སྤྱི་བོའི་བླ་མའི་ཐུགས་རྒྱུད་བསྐུལ་བས་ཐུགས་ཀའི་ཟླ་བ་སྔགས་ཕྲེང་ལས་བདུད་རྩིའི་རྒྱུན་དཀར་ལ་དམར་བའི་མདངས་ཅན་དཔག་ཏུ་མེད་པ་བབས་པ་དང་ལྷན་ཅིག་ཡབ་ཡུམ་བདེ་བ་ཆེན་པོའི་རྗེས་ཆགས་ཀྱི་རོལ་པས་རྡོ་རྗེ་དང་པདྨ་མཉམ་པར་སྦྱོར་བའི་སྦྱོར་མཚམས་ནས་བདུད་རྩི་བྱང་ཆུབ་སེམས་ཀྱི་ཆུ་རྒྱུན་ག་བུར་གྱི་རྡུལ་ལྟར་འཛག་པ་གདན་པདྨའི་ཡུ་བ་ལས་འཁྲིལ་ཏེ་ཚངས་བུག་ནས་བབས་པ་ཡིས་བདག་དང་སེམས་ཅན་ཐམས་ཅད་ཆོས་ཅན་སོ་སོར་སྣང་བ་ཙམ་ལས་ཆོས་ཉིད་ཀྱི་ངང་དུ་རོ་གཅིག་ཅིང་དབྱེར་མེད་པས་སྡིག་སྦྱོང་གི་སྒོ་འདིས་རང་གི་ཆོས་ཅན་དང་ཆོས་ཉིད་ལ་གནད་དུ་བསྣུན་པས་གཞན་ལའང་ཕན་པར་འགྱུར་བ་ནི་གཞན་དོན་དུ་རང་གི་སེམས་བྱང་ཆུབ་དམ་པར་བསྐྱེད་བས་གཞན་ལའང་ཕན་བར་འགྱུར་བ་བཞིན་ནོ། །དེས་ན་བདག་དང་ཁམས་གསུམ་གྱི་རྒྱུ་ཀུན་འབྱུང་ལས་ཀྱི་སྒྲིབ་པ་དང་། ཉོན་མོངས་དང་ཤེས་བྱའི་སྒྲིབ་པ་དེས་བསྐྱེད་པའི་འབྲས་བུ་སྡུག་བསྔལ་གྱི་རྣམ་པ་སྣ་ཚོགས་པ་དང་། རང་གི་ཉེར་ལེན་གྱི་ཕུང་པོ་དང་དབང་ཤེས་འཁྲུལ་རྟོག་ཀྱིས་བསྐྱེད་པའི་ནད་བཞི་བརྒྱ་རྩ་བཞི་དང་། བགེགས་རིགས་སྟོང་ཕྲག་བརྒྱད་ཅུ། གདོན་རིགས་སུམ་བརྒྱ་དྲུག་ཅུ། རང་བཞིན་ཀྱི་ཁ་ན་མ་ཐོ་བ་དང་། སྡོམ་པ་གསུམ་གྱི་བཅས་འགལ་གྱི་སྡིག་པ་མི་དགེ་བ་བག་ཉལ་དང་བཅས་པ་མདོར་ན་ཡང་དག་པའི་གནས་ལུགས་ལ་སྒྲིབ་རྩའི་ཉེས་པ་དང་ལྟུང་བའི་ཚོགས་ཅི་མཆིས་པ་ཐམས་ཅད་ཕྲ་མོ་ཙམ་ཡང་མ་ལུས་པར་ལྷག་མེད་བྱང་ཞིང་ཐུགས་རྗེ་ཆེན་པོའི་བདུད་རྩིའི་ཆུ་རྒྱུན་གྱིས་རྩ་བ་ནས་དག་ཅིང་དྲི་མ་མེད་པར་བྱིན་གྱིས་བརླབ་ཏུ་གསོལ་སྙམ་པས་ཡིག་བརྒྱ་བཟླའོ། །འདིའི་སྐབས་སྡིག་སྒྲིབ་མར་སྦྱོང་ཞིང་། བདེ་ཆེན་དགའ་བཞིའི་ཡེ་ཤེས་བསྐྱེད་ཅིང་དབང་བཞིའི་དམིགས་པ་ནི་ཁྲིད་ཡིག་ལྟར་རོ། །ཡིག་བརྒྱའི་སྔགས་དོན་ནི། རྡོ་རྗེ་སེམས་དཔའ་དམ་ཚིག་རྗེས་སུ་སྐྱོངས། །རྡོ་རྗེ་སེམས་དཔའ་ཉིད་ཀྱིས་ཉེ་བར་གནས་པར་མཛོད། །བདག་ལ་བརྟན་པར་མཛད་དུ་གསོལ། །བདག་ལ་ཤིན་ཏུ་དགྱེས་པར་མཛོད། །བདག་ལ་རྗེས་སུ་ཆགས་པར་མཛོད། །བདག་ལ་ཤིན་ཏུ་དགྱེས་པར་མཛོད། །བདག་ལ་དངོས་གྲུབ་ཐམས་ཅད་སྩོལ། །ལས་ཀུན་ལ་ཡང་བདག་གི་ནི། །སེམས་ལ་དགེ་ལེགས་སུ་ནི་མཛོད། རྡོ་རྗེ་དེ་བཞིན་གཤེགས་པ་ཐམས་ཅད་བདག་གྲོལ། །རྡོ་རྗེ་ཉིད་དུ་མཛོད། །དམ་ཚིག་སེམས་དཔའ་ཆེན་པོ་ཨཱཿ ཞེས་པའི་དོན་ཡིན་ནོ། །རྗེས་སུ་བཤགས་སྡོམ་བྱ་བ་བདག༷་ནི༷་མི༷་ཤེས༷་སོགས་ཀྱི་ཚིག་དོན་ནི་གོ་སླའོ། །མཐར་སྡིག་སྒྲིབ་དག་པའི་གནང་བ་བྱིན་ནས་རྡོ་རྗེ་སེམས་དཔའ་ཡབ་ཡུམ་འོད་དུ་ཞུ་རང་ལ་ཐིམ་པ་དང་། རང་ཉིད་རྡོ་རྗེ་སེམས་དཔའི་སྐུར་ལམ་གྱི་གསལ་བའི་ཐུགས་ཀར་ཟླ་དཀྱིལ་སྟེང་རང་རིག་པ་ཧཱུྃ་དཀར་པོའི་མཐར་སྔགས་ཕྲེང་ཁ་དོག་དཀར་པོ་གཡས་བསྐོར་དུ་འཁོད་པ་ལས་འོད་ཟེར་དཀར་པོ་སྤྲོ་བསྡུས་བདག་དོན་དང་། གཞན་དོན་གྱི་དམིགས་བཟླས་ཁྲིད་ཡིག་ནས་འབྱུང་བ་ལྟར་བྱའོ། །དེ་རྣམས་ནི་བསྐྱེད་རིམ་ལ་བརྟེན་པའི་སྒྲིབ་སྦྱོང་དང་། དོན་དམ་རྫོགས་རིམ་མཚན་མེད་ལ་བརྟེན་པའི་སྒྲིབ་སྦྱོང་ནི་བཤགས་བྱ་བཤགས་བྱེད་བཤགས་ཡུལ་ཐམས་ཅད་ལས་འདས་ཤིང་། སྣོད་བཅུད་རིགས་ལྔ་རྟེན་དང་བརྟེན་པར་བཅས་ཐམས་ཅད་རང་ལ་བསྡུ་རང་ཡང་འོད་གསལ་གཉུག་མ་རྣམ་པར་མི་རྟོག་པའི་དབྱིངས་སུ་བསྡུས་རིག་སྟོང་དོན་གྱི་རྡོ་རྗེ་སེམས་དཔའི་རང་ཞལ་བསྐྱང་ངོ་། །

མཎྜལ་ནི།

ཚོགས་ཞིང་སྐྱབས་ཡུལ་ལྟར་གསལ་བཏབ། དམིགས་རྣམ་ཞིབ་བཅའ་ཁྲིད་ཡིག་ནས་འབྱུང་བ་ལྟར་ལ། ངག་འདོན་གྱི་གོ་དོན་ནི། ཨོཾ་ཨཱཿཧཱུྃ༔ ཞེས་སྐུ་གསུམ་གྱི་ས་བོན་གྱིས་དྲངས་ཏེ། དེ་ལ་དང་པོ་མཛོད་ལས། གླིང་བཞི་དང་ནི་ཉི་ཟླ་དང་། །རི་རབ་དང་ནི་འདོད་ལྷ་དང་། །ཚངས་པའི་འཇིག་རྟེན་སྟོང་ལ་ནི། །སྟོང་ནི་སྤྱི་ཕུད་ཡིན་པར་བརྗོད། །དེ་སྟོང་ལ་ནི་སྟོང་གཉིས་པ། །བར་མའི་འཇིག་རྟེན་ཁམས་ཞེས་བྱ། །དེ་སྟོང་ལ་ནི་སྟོང་གསུམ་པ། །མཉམ་དུ་འཇིག་ཅིང་འབྱུང་བར་འགྱུར། །ཞེས་པ་ལྟར་སྟོང་གསུམ་འཇིག་རྟེན་གྱི་ཁམས་དེ་འདྲ་བ་བྱེ་བ་ཕྲག་བརྒྱའི་ཞིང་རྣམས་སུ་འཁོར་ལོ་ནོར་བུ་བཙུན་མོ་སོགས་རྒྱལ་སྲིད་རིན་པོ་ཆེ་སྣ་བདུན་དང་གཞན་ཡང་ལྷ་དང་མི་ཡི་དཔལ་དང་འབྱོར་པ་ཕུན་སུམ་ཚོགས་པ་ཇི་སྙེད་ཡོད་པས་ཕྱུར་བུར་གཏམ༷ས་ཤིང་། དེ་ཙམ་དུ་མ་ཟད་བདག་གིས་གཅེས་པར་བཟུང་བའི་ལུས་དང་། བདག་གིར་བཟུང་བའི་ལོངས་སྤྱོད་ཁྱད་པར་རང་གང་ལ་ཆགས་པའི་དངོས་པོ། དགྲ་གཉེན་བར་མའི་འགྲོ་བ་དང་བཅས་པ་རྣམས་ངོ་བོ་དེ་དང་དེ་ཡིན་པ་ལ་རྣམ་པ་ཁྱད་པར་འཕགས་པ་སྤྲུལ་ནས་ཡོངས་སུ་འབུལ་གྱིས། དེ་ཡི་མཐུ་ལ་བརྟེན་ནས་འབྲས་བུ་ཆོས་ཀྱི་འཁོར་ལོས་བསྒྱུར་བ་ཆེན་པོའི་རྒྱལ་སྲིད་ཏེ་ཆོས་ཀྱི་སྐུ་ཐོབ་པར་ཤོག། །དབུས་དང་ཕྱོགས་བཞི་མཚམས་བཞི་ཏེ་དགུ་མཆན། ཅིག་ཅེས་གསོལ་འདེབས་སྨོན་ལམ་དུ་བྱ་བ་དང་། གཉིས་པ་འོག་མིན་བདེ་ཆེན་སོགས་ཀྱི་དོན་ནི། མཚན་རྟོག་གི་འོག་ཏུ་མ་གྱུར་པས་འོག་མིན་དང་། སྡུག་བསྔལ་རྒྱུ་འབྲས་ཀྱི་མིང་ཙམ་ཡང་མི་གྲགས་པས་བདེ་བ་ཆེན་པོ་ལོངས་སྤྱོད་ཡོངས་རྫོགས་ཟུང་འཇུག་ཁ་སྦྱོར་ཡེ་ཤེས་བདུད་རྩི་ཆེན་པོའི་རོས་རྟག་པར་ཡོངས་སུ་གང་ཞིང་། མི་ཟད་རྒྱན་གྱི་འཁོར་ལོའི་ཡོན་ཏན་གྱི་སྤྲིན་སྟུག་པོའམ་འཐིབ་པོར་བཀོད་པའི་ཞིང་གནས་དུས་སྟོན་འཁོར་ཆོས་ཏེ་ངེས་པ་ལྔ་ལྡན་རྟག་པ་རྒྱུན་གྱི་འཁོར་ལོ་ཆེན་པོར་མངའ་དབང་འབྱོར་བ་ཡེ་ཤེས་ལྔ་ཕྱག་རྒྱའི་གཟུགས་སུ་ཤར་བ་རྒྱལ་བ་རིགས་ལྔ་འཁོར་རིགས་ཆུང་གི་སེམས་དཔའ་སེམས་མའི་ཚོགས་དང་བཅས་པའི་ཚོམ་བུ་བསམ་ཡས་སྒྱུ་འཕྲུལ་དྲྭ་བར་སྤྲོ་ཞིང་། དུས་གསུམ་རྒྱུན་ཆད་མེད་པར་རྡོ་རྗེའི་དབང་ཡུལ་དགྱེས་པ་བསྐྱེད་པའི་འདོད་ཡོན་གྱི་ལྷ་མོ་གཟུགས་རྡོ་རྗེ་མ་སོགས། ཕྱི་ནང་གསང་བའི་རིག་མ་རྣམས་བཅུ་དྲུག་བདེ་བའི་གར་བསྒྱུར་ཞིང་ལྷ་མོ་འཇོ་སྒེག་དང་ལྡན་པ་རྣམས་ཀྱི་ཕྱག་ན་མཆོད་པའི་སྤྲིན་ཕུང་བསམ་ཡས་མུ་མཐའ་མེད་པར་ཕུལ་བས་ལོངས་སྐུའི་ཞིང་ལ་རྟེན་དང་བརྟེན་པར་བཅས་པ་ལོངས་སྤྱོད་པར་ཤོག། དབུས་དང་ཕྱོགས་བཞི་སྟེ་ལྔ། མཆན། ཅིག་ཅེས་པའོ། །གསུམ་པ་སྣང་སྲིད་སོགས་ཀྱི་དོན་ནི། སྣང་བ་སྣོད་དང་། སྲིད་པ་བཅུད་ཏེ་གཟོད་ནས་རྣམ་པར་དག་པ་སྐྱེ་འཆི་འཕོ་འགྱུར་ལས་འདས་པའི་གཞོན་ནུ་སྐུ་གསུམ་གྱི་བུམ་པ་ནང་དབྱིངས་འོད་གསལ་ཆེན་པོ་ཐིམ་ལ་མ་རྨུགས་པའི་སྐུ་ཡེ་ཤེས་དང་། འོད་སོགས་ཟག་མེད་ཀྱི་ཡོན་ཏན་རྒྱ་མཚོར་ལྷུན་གྱིས་གྲུབ་པ་ལས་ནམ་ཡང་གཡོ་བ་མེད་པའི་བདག་ཉིད་ཆེན་པོའི་ཐུགས་རྗེའི་གདངས་ཕྱི་གསལ་དུ་ཤར་བས་གོ་མ་འགགས་པ་དེ་ཉིད་འཁོར་འདས་ཀུན་ལ་ཁྱབ་ཅིང་འཕྲོ་བས་ཅིར་སྣང་ཐམས་ཅད་ཆོས་ཉིད་ལ་ཆོས་ཉིད་ཐིམ་པར་རོལ་པས་སྐུ་དང་ཞིང་ཁམས་ཡེ་ཤེས་ཀྱི་རྒྱན་བསམ་བརྗོད་ལས་འདས་པ་རང་སྣང་བ་སྟེ། དེ་ཡང་མ་དག་པའི་དངོས་པོ་བཙལ་ཡང་མི་རྙེད་པའི་ཆོས་དབྱིངས་བརྡལ་ཁྱབ་ཆེན་པོ་སྐུ་དང་ཐིག་ལེ་བསམ་གྱིས་མི་ཁྱབ་པའི་རྣམ་པར་བརྒྱན་པ་ཐམས་ཅད་ལ་ཡིད་དཔྱོད་མཚན་འཛིན་གྱི་སྤྲོས་པའི་རྣམ་པ་ཡོངས་སུ་དག་པ། རྒྱ་ཆད་ཕྱོགས་ལྷུང་བྲལ་བར་བཀོད་དེ་ཕུལ་བས་རང་སྣང་ཆོས་སྐུའི་ཞིང་ཁམས་ལ་ལོངས་སྤྱོད་པར་ཤོག་ཅིག། ཚོམ་བུ་གཅིག མཆན། ཅེས་པའོ། །དེ་ལྟར་ཁོངས་སུ་ཆུད་པས་ཕུལ་བས་སྒྲིབ་དག་ཚོགས་རྫོགས། སྐུ་གསུམ་གྱི་གོ་འཕང་ཐོབ་པའོ། །

ཀུ་སཱ་ལིའི་ཚོགས་བསགས།

ནང་ཀུ་སཱ་ལིའི་ཚོགས་བསགས་ལ་སྐྱབས་འོག་ལ་མགྲོན་འོག་མ་རྣམས་གསལ་བཏབ་ལ་ངག་འདོན་ནི། ཕཊ༔ ལུས་གཅེས་འཛིན་སོགས་ཏེ། ཕ་ནི་ཐབས་ཀྱི་ཡི་གེས་གཟུང་རྟོག་གཅོད་པ་དང་། ཊ་ནི་ཤེས་རབ་ཀྱི་ཡི་གེ་འཛིན་རྟོག་གཅོད་པས་ཕཊ་བརྗོད་པ་དང་རིག་པ་གཏད་མེད་དུ་བཏང་ནས། ཟག་བཅས་སྡུག་བསྔལ་གྱི་བདེན་པས་བསྡུས་པའི་ལུས་གཟུགས་ཕུང་འདི་ལ་ཐོག་མེད་ནས་ང་བདག་གཅེས་འཛིན་གྱི་འགོང་པོས་དམ་དུ་བཟུང་བ་དེ་ཤིགས་སེ་བོར་བས་འདོད་ཡོན་གྱི་བདེ་དགའ་ལ་གཡེངས་བ་ལྷ་ཡི་བུའི་བདུད་དབྱིངས་སུ་བཅོམ་ནས། རང་གི་སེམས་ཉིད་རིག་པ་སྤྱི་བོ་ཚངས་པའི་བུ་ག་སྒོ་ནས་ནམ་མཁའི་དབྱིངས་ལ་འོད་ཀྱི་གོང་བུས་ཐོན་པ་དེ་ཉིད་གདོད་ནས་འཆི་མ་མྱོང་བའི་ཆོས་ཉིད་ཀྱི་འཆི་བདག་གི་བདུད་བཅོམ་ཞིང་རིག་པ་འོད་ཀྱི་གོང་བུ་དེ་ཉིད་ཁྲོས་མ་ནག་མོའི་སྐུར་གྱུར་པའི་ཕྱག་གཡས་ཀྱིས་ཉོན་མོངས་དང་ཉོན་མོངས་ཅན་མ་ཡིན་པའི་ཀུན་ཏུ་རྨོངས་པའི་བདུད་ཐམས་ཅད་རྩད་ནས་འཇོམས་པའི་རྡོ་རྗེས་ཡུ་བ་བྱས་པའི་ཟངས་ཀྱི་གྲི་གུག་ལྕགས་བསྲེགས་ཀྱི་མདོག་ལྟ་བུས་འབྱུང་བཞི་འཚོགས་པའི་རྣམ་སྨིན་གཟུག྄༷ས་ཀྱི་ཕུང་པོའི་བདུད་བཅོམ་ཏེ། ཕུང་པོའི་ཐོད་པ་ཧར་གྱིས་བྲེག་ནས་ཕྱག་གཡོན་པས་ལས་བྱེད་པའི་ཚུལ་གྱི་བྷནྡྷ་ཐོགས་ནས་སྐུ་གསུམ་གྱི་དོན་མཚོན་པའི་མི་མགོའི་སྒྱེད་བུ་སྐམ་རློན་རྙིང་གསུམ་གྱི་སྟེང་དུ་ཀ་པཱ་ལ་བཞག་ནས། སྣོད་དེ་ཡང་སྟོང་གསུམ་གྱི་ཁྱོན་དང་མཉམ་པའི་ནང་དུ་སྟོང་གསུམ་འཇིག་རྟེན་གྱི་ཁམས་ཐམས་ཅད་ཡོངས་སུ་གང་བའི་བམ་རོ་ཆེ་ཞིང་བརྗིད་ལ་ཚོ་ཞིང་སྣུམ་པ་དེ་ཉིད་གྲི་གུག་གི་རྩེས་ལིང་གི་བླངས་ནས་ཐོད་པའི་ནང་དུ་འཇོག་ནས་འོག་ནས་གཏུམ་མོ་ཤེས་རབ་ཀྱི་རང་བཞིན་ཨ་ཐུང་ཤད་ཀྱི་རྣམ་པ་ཅན་དང་། སྟེང་གི་ནམ་མཁར་ཐབས་མཆོག་བྱང་སེམས་ཧེ་རུ་ཀ་འདུས་པའི་ངོ་བོ་ནཱ་ད་སུམ་འཁྱོགས་ཅན་གྱི་ཧྃ་ཡིག་གིས་བམ་རོ་དེ་ཉིད་ཤ་ལྔ་བདུད་རྩི་ལྔ་ཡེ་ཤེས་ལྔ་ཡི་ངོ་བོར་བཞུས་ནས་རྣམ་པ་ཟག་པ་མེད་པའི་བདུད་རྩི་དཀར་ལ་དམར་བའི་མདངས་ཅན་ཁ་དོག་དྲི་རོ་ཕུན་སུམ་ཚོགས་པར་གྱུར་པ་ཡིག་འབྲུ་གསུམ་གྱི་ནུས་པས་སྦྱངས་སྤེལ་བསྒྱུར་བ་སྟེ། ཨོཾ་གྱི་སྣོད་བཅུད་ཀྱི་མ་དག་པ་རླངས་པ་སྔོ་དམར་གྱི་རྣམ་པས་ཕྱིར་ཐོན་ནས་སྦྱངས། ཨཱཿཡིས་ཟད་མི་ཤེས་པར་སྤེལ། ཧཱུྃ་གིས་ཡེ་ཤེས་ཀྱི་བདུད་རྩི་ལ་རྣམ་པ་འདོད་ཡོན་གྱི་ལོངས་སྤྱོད་ནམ་མཁའ་མཛོད་དུ་སྤྲུལ་ནས་གང་གི་མྱོང་བ་དང་དྲི་ཚོར་བ་ཙམ་གྱིས་བདེ་ཆེན་གྱི་ཡེ་ཤེས་རྒྱུད་ལ་བསྐྱེད་པའི་ནུས་པ་ཅན་དུ་བསྒྱུར་ལ་འབྲུ་གསུམ་བཟླས་པར་བྱའོ། །དེ་ནས་རང་གི་ཐུགས་ཀ་ནས་ལས་བྱེད་ཀྱི་ལྷ་མོ་སྐུ་མདོག་དཀར་མོ་ཕྱག་ན་ཐོད་པ་ཐོགས་པ་སྤྲོས་ནས་བདུད་རྩི་བཅུས་ནས་ཕུལ་བར་མོས་ལ། ཕཊ༔ ཡར་མཆོད་ཡུལ་སོགས་ཏེ། ཡར་ལ་མཆོད་པའི་ཡུལ་དཀོན་མཆོག་སྲི་ཞུའི་མགྲོན་ལ་རྩ་བ་གསུམ་དང་། སངས་རྒྱས་བྱང་སེམས་ཉན་རང་སོགས་དང་། མགོན་པོ་ཡོན་ཏན་གྱི་མགྲོན་རྒྱུད་གསུམ་གྱི་དམ་ཅན་ཆོས་སྐྱོང་སྲུང་མ་ནོར་ལྷ་གཏེར་བདག་དཀར་ཕྱོགས་སྐྱོང་བའི་ཚོགས་རྣམས་ཀྱི་ཐུགས་ཀྱི་དམ་ཚིག་ཉམས་ཆགས་བཤགས་ཤིང་དགྱེས་པར་བསྐང་བའམ། ཡང་ན་ཐུགས་ལ་བཞེད་པའི་དམ་ཚིག་རྡོ་རྗེ་བདུད་རྩིའི་རྫས་མཆོག་འདིས་བསྐང་བས་ཚོགས་གཉིས་རྫོགས་ནས་མཆོག་གི་དངོས་གྲུབ་ཟུང་འཇུག་གི་གོ་འཕང་དང་། ཐུན་མོངས་ལས་བཞི་དང་གྲུབ་པ་བརྒྱད་ཀྱི་དངོས་གྲུབ་ཐོབ་ཅིང་། མར་ལ་སྦྱིན་པས་རིགས་དྲུག་འཁོར་བར་འཁྱམས་པ་སྙིང་རྗེའི་ཡུལ་དུ་གྱུར་པའི་མགྲོན་ཐམས་ཅད་མཉེས་ཤིང་ཚིམ་ནས་ཚེ་རབས་སྔོན་གྱི་བུ་ལོན་ལན་ཆགས་ཤ་ཁོན་ཐམས་ཅད་བྱང་བ་དང་། ཁྱད་པར་དུ་རང་ལ་གནོད་པར་བྱེད་པ་བགེགས་རིགས་ལན་ཆགས་ཀྱི་མགྲོན་རྣམས་རང་རང་ལ་དགོས་པའི་ཤ་ཁྲག་སོགས་ཀྱིས་ཚིམས་པས་རེ་བ་ཡོངས་སུ་བསྐང་བས་ནད་གདོན་དང་གློ་བུར་གྱི་ཕྱི་ནང་གསང་བའི་བར་ཆད་དམིགས་མེད་ཆོས་ཀྱི་དབྱིངས་སུ་ཞི་བ་དང་། དེ་ལྟར་མཆོད་སྦྱིན་རྒྱ་ཆེན་བགྱིས་པས་སྔོན་གྱི་ལས་སྲབ་ཅིང་འཕྲལ་བྱུང་གི་རྐྱེན྄༷་ངན་པ་ཐམས་ཅད་དང་བདག་མེད་པ་ལ་བདག་ཏུ་ལྟ་བའི་ངར་འཛིན་གྱི་འདྲེ་ཆེན་བདག་མེད་ཡུམ་ཆེན་ཤེས་རབ་ཕ་རོལ་ཕྱིན་མའི་མཚོན་རྣོན་པོས་དུམ་བུར་གཏུབ་ཅིང་རྡོ་རྗེ་ལྟ་བུའི་ཏིང་ངེ་འཛིན་གྱི་ཐོ་བས་རྡུལ་ཕྲན་སྟོང་དུ་བརླག་པའི་མཐར་ལུས་སེམས་འཁྲུལ་བའི་ཁང་བུ་གཏིབས་ནས་མཆོད་བྱ་དང་མཆོད་བར་བྱེད་པ་པོ་མཆོད་ཡུལ་མ་ལུས་པ་ཀུན་ཀྱང་མ་འཁྲུལ་གཤིས་ཀྱི་གནས་ལུགས་རང་གྲོལ་རྫོགས་པ་ཆེན་པོར་ཡེ་ཇི་བཞིན་པའི་ཀློང་ཡངས་ཆེན་པོར་སོ་མ་མ་བཅོས་སྤྲོ་བསྡུ་བྲལ་བར་བཞག་ནས་ཡུམ་ཆེན་སྐྱེ་མེད་ཀྱི་ཡི་གེ་ཨཿཡི་ཕྱིར་མི་ལྡོག་པར་རྒྱས་བཏབ་པའོ། །

བླ་མའི་རྣལ་འབྱོར་ནི།

དྭངས་འདོད་ཡིད་ཆེས་ཀྱི་དད་པས་མོས་གུས་ཤུགས་དྲག་པོར་བསྐྱེད་དེ་ངག་འདོན་ནི། ཨེ་མ་ཧོཿརང་སྣང་ལྷུན་གྲུབ་སོགས་ཀྱི་བསྟན་ཏེ། དེ་ཡང་ཨེ་མ་ཧོ་ནི་ངོ་མཚར་བའི་ཚིག། གང་ལ་ངོ་མཚར་ན་རང་སྣང་དག་པའི་ཞིང་རྟེན་དང་བརྟེན་པར་བཅས་པ་ལ་མ་ཧཱ་གུ་རུས་ཉིད་ཀྱི་ཉིད་ལ་ཆེད་དུ་བརྗོད་པའི་སྒོ་ནས་གླེང་བ་སྟེ་རྒྱུད་ཀྱི་གླེང་གཞི་ལྟ་བུའོ། །དེ་ཡང་གདུལ་བྱ་གཞན་རྒྱུད་ཀྱིས་མ་བསྡུས་པའི་རང་རིག་པ་ཆོས་སྐུའི་ཚུལ་ལས་རང་སྣང་བ་སྟེ་དག་པ་གཞི་ཡི་བཞུགས་ཚུལ་ལ་ཞིང་ཁམས་གང་སྐུ་དང་ཡེ་ཤེས་འོད་སོགས་མཚན་མ་དང་བྲལ་བ་ལྷུན་གྲུབ་ཏུ་བཞུགས་པ་ལམ་དུས་འདིར་མངོན་དུ་བྱེད་པས་འབྲས་བུ་གཞི་ལ་སྨིན་ནས་གྲོལ་གཞི་མངོན་དུ་གྱུར་པའི་ཐབས་ཀྱི་མཐར་ཐུག་པ་ནི་བླ་མའི་རྣལ་འབྱོར་ཏེ། ཕྱི་སྣོད་ནང་བཅུད་ཐམས་ཅད་ཀྱང་རིག་པ་ཡེ་ནས་དག་པ་ཆེན་པོར་གཅིག་པས་རིག་པ་ཆོས་ཀྱི་དབྱིངས་ཀྱིས་གར་ཁྱབ་འོག་མིན་པདྨ་འོད་ཀྱི་གཞལ་མེད་ཁང་རབ་ཏུ་འབྱམས་ཀླས་པའི་ཞིང་ཁམས་ཀྱི་རྒྱན་དང་བཀོད་པ་སོགས་བརྡའ་དོན་རྟགས་གསུམ་རབ་ཏུ་རྫོགས་པའི་དབུས་སུ་རང་ཉིད་ཀྱི་གཞི་ལུས་ཐ་མལ་དུ་མི་དམིགས་པ་སྐད་ཅིག་དྲན་རྫོགས་ཀྱི་ཚུལ་དུ་རྗེ་བཙུན་རྡོ་རྗེ་རྣལ་འབྱོར་མ་ཐིག་ལེ་ཉག་གཅིག་མཚོན་པའི་ཞལ་གཅིག། བདེན་པ་གཉིས་མཚོན་པའི་ཕྱག་གཉིས། འགྲོ་ལ་རྗེས་སུ་ཆགས་པའི་བརྡར་སྐུ་མདོག་དམར་གསལ། བདུད་བཞི་རྩད་ནས་གཅོད་པའི་གྲི་གུག་ཕྱར་ཞིང་། གཡོན་ཁམས་གསུམ་དབྱིངས་སུ་བསྒྲལ་བའི་དུང་ཆེན་ཁྲག་གི་བཀང་བ་ཐུགས་ཀར་བསྣམས་པ་སྲིད་ཞིའི་མཐའ་གཉིས་ལ་མི་གནས་པའི་བརྡར་ཞབས་གཡས་བརྐྱང་གཡོན་ཅུང་ཟད་བསྐུམ་པའི་དོར་སྟབས་ཀྱི་སྐུ་གསུམ་མཚོན་པའི་སྤྱན་གསུམ་ནམ་མཁའ་ལ་བླ་མ་བཞུགས་པའི་ཐུགས་ཀར་རིངས་པར་ཏེ་ཅེར་རེ་གཟིགས་པ་བསྒོམ་ཞིང་། དེ་ལྟར་གསལ་བའི་སྤྱི་བོའི་ཐད་ཀྱི་ནམ་མཁར་པདྨ་འདབ་མ་འབུམ་ཕྲག་ཡངས་པར་བརྡལ་བ་ཁུ་རྡུལ་གནས་སུ་དག་པའི་བརྡར་ཉི་ཟླའི་གདན་གྱི་སྟེང་དུ་སྐྱབས་གནས་ཐམས་ཅད་འདུས་པའི་ངོ་བོ་རང་གི་དྲིན་ཆེན་རྩ་བའི་བླ་མ་དེ་ནི་རྣམ་པ་ཨོ་རྒྱན་ཆེན་པོར་ཁྲིད་ཡིག་གི་དཀྱུས་ནས་འབྱུང་བ་ལྟར་བསྒོམ་ཞིང་། ཚིག་དོན་ནི་མཁྱེན་སླ་བས་ཞིབ་ཏུ་མ་སྤྲོས་ལ། འཁོར་གྱི་རྩ་བ་གསུམ་གྱི་ཚོགས་རྣམས་ཀྱང་མ་ཧཱ་གུ་རུའི་ཐུགས་རྗེ་རིག་སྟོང་ཡེ་ཤེས་ཆེན་པོའི་ཆོ་འཕྲུལ་ལས་ཤར་བ་མ་གཏོགས། རྒྱུད་ཐ་དད་དུ་བཞུགས་པ་མིན་པར་ཤེས་དགོས་པ་ནི་གནད་དམ་པའོ། །སྐྱབས་ཡུལ་ཐམས་ཅད་ཀྱང་སྐྱབས་གནས་ཀུན་འདུས་སུ་ཤེས་པས་ཅི་མཛད་འགྲོ་བ་འདུལ་བའི་ཐབས་མཁས་ཀྱི་ཕྲིན་ལས་སུ་སྣང་བ་བྱས་པ་གཟོ་བའི་བཀའ་དྲིན་དྲན་པ། བློ་སྣ་མོས་གུས་ཀྱི་འཕྲོག་པས་གདུང་ཤུགས་དྲག་པོས་རིག་པ་བསྒྱུར་ནུས་པ་ཡང་ཡང་མི་བརྗེད་པར་དྲན་པས་ཐ་མལ་གྱི་སྣང་བ་འགོག་ནུས་པ་མཁྱེན་བརྩེའི་ཡེ་ཤེས་ཚད་མེད་པའི་བདག་ཉིད་ཅན་དུ་ཡང་ཡང་ཡིད་ལ་དྲན་ཏེ་མོས་གུས་ཁོ་ནར་བྱ་བ་ཤིན་ཏུ་གཅེས་སོ། །དམ་ཚིག་པ་ལ་ཡེ་ཤེས་པ་སྤྱན་དྲངས་ནས་བསྟིམ་པ། ཡན་ལག་བདུན་པ་འབུལ་བ། དད་མོས་དྲག་པོས་གསོལ་བ་འདེབས་པ་སོགས་ཀྱང་ཡི་གེས་དོགས་ཏེ་འདིར་མ་སྨོས་སོ། །དབང་བླང་བའི་སྐབས། རྡོ་རྗེ་གསུམ་གྱི་ཡི་གེ་ནི། བླ་མ་དང་པོར། བསྐྱེད་པ་དང་རང་ཆས་སུ་ཡོད་པར་བསྒོམ་དགོས་པ་ཡིན་ལ། རྒྱ་བོད་ཀྱི་ཡིག་གཟུགས་གང་ལྟར་གསལ་ཀྱང་རུང་འོད་ཟེར་བདུད་རྩིའི་རང་བཞིན་ཅན་དུ་བསམ་དགོས་ཤིང་། ལུས་ཀྱི་ལས་དང་རྩ་ཡི་སྒྲིབ་པ་ཞེས་པ་ནི་ལུས་ཀྱི་སྒོ་ནས་བསགས་པའི་སྡིག་པ་མི་དགེ་བའི་རིགས་མཐའ་དག་དང་། འཁྲུལ་པས་བསྡུས་པའི་འབྱུང་བའི་སྙིགས་མ་ཐམས་ཅད་དང་། རྩ་སྟོང་ཕྲག་བདུན་ཅུ་རྩ་གཉིས་སོགས་མ་དག་པའི་རྩ་ཐམས་ཅད་སྦྱང་བྱ་ཡིན་ལ། རྣམ་སྨིན་རིག་འཛིན་ཞེས་པ་ནི་སེམས་ཆོས་ཉིད་དུ་སྨིན་ཀྱང་ལུས་རྣམ་སྨིན་གྱི་ཕུང་པོའི་རྒྱ་མ་རལ་བའི་རྟེན་ཅན་ལ་རྣམ་སྨིན་རིག་འཛིན་ཞེས་བརྗོད་པ་ཡིན། ངག་གི་ལས་དང་རླུང་གི་སྒྲིབ་པ་ཞེས་སོགས་ནི། ངག་གིས་བསགས་པའི་མི་དགེ་བ་དང་སྒྲ་ཚིག་བརྗོད་པ་ཐམས་ཅད་དང་རྩ་བ་དང་ཡན་ལག་གི་རླུང་བཅུ་སོགས་འཕོ་འགྱུར་དང་བཅས་པའི་ཐ་མལ་གྱི་རླུང་ཐམས་ཅད་སྦྱང་བྱ་དང་། ཚེ་དབང་རིག་འཛིན་ནི་སྐྱེ་འཆི་མེད་པ་རྡོ་རྗེའི་སྐུ་ཐོབ་པ་ལ་ཚེ་དབང་རིག་འཛིན་ཅེས་པའོ། །ཡིད་ཀྱི་ལས་དང་ཐིག་ལེ་སྒྲིབ་པ་ཅེས་པའང་། ཡིད་ཀྱི་མི་དགེ་བ་དང་ལུས་དང་མ་ལ་བརྟེན་པའི་ཁམས་ཕྲ་རག་ཐམས་ཅད་སྦྱང་བྱ་དང་། ཙཎྜ་ལཱི་ནི་གཏུམ་མོ་ཨ་ཐུང་གི་མིང་ཡིན། ཕྱག་རྒྱའི་རིག་འཛིན་ནི་ལུས་འདོད་གཟུགས་ཀྱི་ལྷ་ལྟ་བུའི་འོད་ལུས་ཡི་དམ་གྱི་ལྷའི་རྣམ་པ་ཅན་བསྒོམ་ལམ་ས་དགུ་གང་རུང་ལ་གནས་པའོ། །ཀུན་གཞིའི་ལས་དང་ཤེས་བྱའི་སྒྲིབ་པ་ཞེས་པ་ནི། ཀུན་གཞི་རྟོག་མེད་ཀྱི་ཆོས་ཁམས་ལ་བཞག་པའི་སྒྲིབ་པའི་བག་ཆགས་ཐམས་ཅད་དང་། ཁྱད་པར་དུ་ཡང་ཁུ་རྡུལ་སེམས་གསུམ་གྱིས་སྒྲིབ་པའི་དྲི་མ་ཐམས་ཅད་དང་། བསྐྱེད་རིམ་གྱི་གྱ་ནོམ་ལྷར་ཞེན་དང་རྫོགས་རིམ་གྱི་བདེ་གསལ་མི་རྟོག་པའི་ཉམས་ཀྱི་ཞེན་པ་སོགས་མཚན་འཛིན་ཕྲ་རག་ཐམས་ཅད་ཤེས་བྱའི་སྒྲིབ་པ་ཡིན་པས་དེ་རྣམས་སྦྱང་བྱ་ཡིན་ལ། ལྷུན་གྲུབ་རིག་འཛིན་ནི་ས་བཅུའི་རྒྱུན་མཐའ་དང་མཐར་ཐུག་སངས་རྒྱས་ཀྱི་ས་ཁོ་ན་ལ་འཇོག་པའོ། །བླ་མའི་ཐུགས་ཀར་སྤར་ནས་ཐུགས་ཡིད་བསྲེ་བ་སོགས་ནི་ཁྲིད་ཡིག་དང་ངག་འདོན་གྱི་གོ་དོན་ཤིན་ཏུ་གསལ་བས་ཤེས་པར་སླའོ། །ཐུན་ལས་ལྡང་བ་ན། གཞི་ལུས་ཞིང་ཁམས་དང་བཅས་པ་གསལ་ནས་ཁྱེར་སོ་གསུམ་དང་མི་འབྲལ་ཞིང་སྤྱོད་ལམ་ཐམས་ཅད་བླ་མའི་སྣང་བ་དང་བསྲེས་ནས་རྩལ་སྦྱོང་བས་ལམ་ལ་བོག་ཐོན་ཞིང་གེགས་ཐམས་ཅད་རང་གྲོལ་དུ་འགྱུར་བ་ནི་ཉེ་ལམ་ཟབ་མོ་འདི་ཡི་ཁྱད་ཆོས་ལགས་སོ། །ཅེས་པའང་ནོར་སྤྱི་ལ་མཁན་ཆུང་གཡུ་ཐོག་སེངྒེའི་བཞེད་སྐོང་དུ་ཆོས་ཀྱི་བློ་གྲོས་པས་སོ།། །།

འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

Longchen Nyingtik Field of Merit

This website uses cookies to collect anonymous usage statistics and enhance the user experience.
Decline
Accept