འཆི་མེད་འཕགས་མའི་སྒྲུབ་མཆོད་སྐབས་ཀྱི་ཟུར་རྒྱན་ཉུང་ངུ་།
༄༅། །འཆི་མེད་འཕགས་མའི་སྒྲུབ་མཆོད་སྐབས་ཀྱི་ཟུར་རྒྱན་ཉུང་ངུ་བཞུགས་སོ། །
ན་མོ་གུ་རུ་ཏཱ་རཱ་ཙིནྡྷ་ཙཀྲ་ཡ།
དེ་ལ་འཆི་མེད་འཕགས་མའི་སྒྲུབ་མཆོད་སྐབས་སུ་ལྷ་སྟ་གོན་དང་། བུམ་པ་སྟ་གོན་གཉིས་ལས་
དང་པོ་ཐོག་མར། བཀྲ་ཤིས་བྱིན་ཆགས་དག་པའི་གནས་སུ་བྱང་བགྲོད་ཡར་ངོའི་ཚེས་བརྒྱད་ལྟ་བུའི་དུས་བཟང་པོར། དམ་ཚིག་གི་བྲིས་སྐུ་སོགས་རྟེན་དང་རྒྱན་གྱི་ཡོ་བྱད་དུ་མས་སྤྲས་པའི་གུང་དུ། བདག་བསྐྱེད་མཆོད་པ་ཆུ་གཉིས་ཉེར་སྤྱོད། སྨན་གཏོར་རཀྟ་རྣམས་ཇི་ལྟར་བདེ་བར་བཤམ།
སྟེགས་བུ་ཁེབས་ལྡན་གྱི་དབུས་སུ་རིན་པོ་ཆེའི་མཎྜལ་དྲིའི་ཐིག་ལེ་བཀོད་པ་ལ་མེ་ཏོག་གམ་འབྲུ་དཀར་གྱི་ཚོམ་བུ་དབུས་སུ་ཆེ་བ་གཅིག །ཕྱོགས་བཞིར་དེ་ལས་དམའ་བ་བཞི། དེ་རྒྱབ་ཆུང་བ་བཞི་བཅས་གཙོ་འཁོར་དགུ་བཀོད། མདུན་རྒྱབ་གང་བདེར་སྨན་རཀ་གཏོར་གསུམ་དང་། ཆུ་གཉིས་ཉེར་སྤྱོད་གཡོན་བསྐོར་དུ་བཤམ། སྔོན་འགྲོ་དཀར་གཏོར་དང་། གཞན་ཡང་ཉེར་མཁོའི་ཡོ་བྱད་རྣམས་ཚོགས་པར་བྱའོ། །
དེ་ནས་ཐོག་མར་ཚིག་བདུན་གསོལ་འདེབས་དང་བརྒྱུད་འདེབས་སྔོན་དུ་འགྲོ་བའི་སྐྱབས་སེམས་ནས་བརྩམས་བདག་བསྐྱེད་རྒྱུན་གྱི་རྣལ་འབྱོར་ལྟར་བྱས་ལ། བཟླས་པ་རྣམས་ཇི་ལྟར་འགྲུབ་པར་བྱ། དེ་ནས་དཀར་གཏོར་གསེར་སྐྱེམས་བཤམས་ལ། བསང་སྦྱང་བྱིན་བརླབས་མགྲོན་དྲངས་ཤིང་སྔགས་བཟླས་སྤྱི་ལྟར་བྱས་ལ།
གང་དག་འདིར་གནས་ལྷ་དང་ཀླུ། །
གནོད་སྦྱིན་སྲིན་པོའམ་གཞན་དག་ལ། །
དཀྱིལ་འཁོར་དོན་དུ་ས་ཕྱོགས་འདི། །
བདག་ཞུ་ཁྱེད་ཀྱིས་སྩལ་དུ་གསོལ། །
གང་དག་འདིར་གནས་སོགས་ཀྱིས་ཕྲིན་ལས་བཅོལ་བ་ནི་ས་སློང་གི་དོན་ཡང་ཚང་ངོ་། །
དེ་ནས་ལས་གཞུང་ལྟར་བྱིན་བརླབ། ཚོམ་བུ་ལས་སྔགས་ཀྱིས་བསང་།
ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ།
ཨོཾ་སྭཱ་བྷཱ་ཝ་ཤུདྡྷཿསརྦ་དྷརྨ་སྭཱ་བྷཱ་ཝ་ཤུདྡྷོ྅་ཧཾ། ས་སྦྱང་།
སྟོང་པའི་ངང་ལས་མདུན་གྱི་རྟེན༔
འབྱུང་ལྔ་ཡུམ་གྱི་མཁའ་ཀློང་དུ༔
ནོར་བུ་ཆུ་ཤེལ་སོགས
ཕྲིན་ལས་ལྟར་དམ་ཚིག་པ་བསྐྱེད། ཡེ་ཤེས་པ་བསྟིམ། ཕྱག་མཆོད་བསྟོད་པའི་བར་དཀྱུས་ལྟར་བཏང་།
རྡོར་དྲིལ་དང་སྤོས་ཐོགས། པུས་བཙུག་ཐལ་མོ་སྦྱར་ལ།
ཨོཾ༔ སངས་རྒྱས་ཐམས་ཅད་སྐྱེད་པའི་ཡུམ༔
འཆི་མེད་སྒྲོལ་མའི་ལྷ་ཚོགས་རྣམས༔
སྔོན་གྱི་ཐུགས་དམ་ཆེན་པོ་ཡིས༔
བདག་ལ་དགོངས་པར་མཛད་དུ་གསོལ༔
རིག་པ་འཛིན་པ་བདག་གིས་ནི༔
ཡོ་བྱད་རྣམ་པ་ཐམས་ཅད་པས༔
བདེ་བའི་ལོངས་སྤྱོད་རབ་སྦྱར་ཏེ༔
ལྷ་རྣམས་ཡོངས་སུ་མཆོད་པ་དང་༔
སྣོད་ལྡན་རྣམས་ལ་ཕན་གདགས་ཕྱིར༔
སྔགས་ཀྱི་ཆོ་གའི་ཐབས་ཆེན་པོས༔
སྙིང་པོའི་དཀྱིལ་འཁོར་བསྒྲུབ་པ་དང་༔
རང་གཞན་དོན་ཀུན་བགྱིད་འཚལ་ན༔
ཡེ་ཤེས་སྙིང་རྗེ་ཆེན་པོ་ཡིས༔
བཟོད་པར་མཛད་དེ་གནང་ནས་ཀྱང་༔
སྣོད་བཅུད་འཆི་མེད་སྒྲོལ་མ་ཡི༔
རྡོ་རྗེ་གསུམ་དང་དབྱེར་མེད་པར༔
བྱིན་གྱིས་བརླབ་པར་མཛད་དུ་གསོལ༔
ཅེས་གསོལ་བ་བཏབ། ཅེས་གསོལ་བས་ལྷ་ཚོགས་རྣམས་དགྱེས་པ་ཆེན་པོས། རིག་པ་འཛིན་པ་ཁྱོད་ཀྱིས་དཀྱིལ་འཁོར་གྱི་ལས་ཅི་ལྟར་འོས་པ་གྱིས་ཤིག་ཅེས་བཀའི་གནང་བ་སྩལ་ནས་སྒྲུབ་པའི་ས་གཞི་ལ་ཐིམ་པས་ཡེ་ཤེས་ཀྱི་གཟི་བྱིན་ལྷག་པར་འབར་བར་གྱུར། ཅེས་དམིགས་ལ་མཎྜལ་ཚོམ་བུ་བཅས་བསྡུ།
གཉིས་པ་ནི་རིན་ཆེན་བུམ་པ་དྲིའི་ཆབ་དང་ཉེར་ལྔའི་བཅུད་ལྡན་གཉིས་ཁ་རྒྱན་མགུལ་ཆིངས་བཅས་པ་བཀོད་ནས། མཆོད་པ་རྣམས་སྔར་ལྟར་གསར་དུ་བཤམ་པའམ་ཁ་གསོ། དུང་ཞལ་གཟུངས་ཐག་འདུ་བྱས་ལ།
བསང་
ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ།
སྦྱང་།
ཨོཾ་སྭཱ་བྷཱ་ཝ་ཤུདྡྷཿསརྦ་དྷརྨ་སྭཱ་བྷཱ་ཝ་ཤུདྡྷོ྅་ཧཾ།
སྟོང་པའི་ངང་ལས་པད་ཟླའི་སྟེང་༔
ཁ་དོག་ལྔ་ལྡན་ཡི་གེ་བྷྲཱུྃ༔
ཡོངས་གྱུར་ཕྱི་ནི་རིན་པོ་ཆེའི༔
རང་བཞིན་བུམ་པ་བཟང་པོ་ཆེ༔
མཚན་ཉིད་ཡོངས་རྫོགས་འོད་དུ་འབར༔
ནང་ནི་ལྷ་ཚོགས་བཞུགས་པའི་གནས༔
རིན་ཆེན་གཞལ་མེད་ཁང་ཆེན་པོར༔
དབུས་སུ་པདྨ་འདབ་བཞིའི་སྟེང་༔
སོགས་ཕྲིན་ལས་ལྟར་དམ་ཚིག་པ་བསྐྱེད། ཡེ་ཤེས་པ་སྤྱན་འདྲེན་བཞུགས་གསོལ་ཕྱག་མཆོད་བསྟོད་པའི་བར་བཏང་།
བུམ་ནང་འཕགས་མའི་ཐུགས་ཀ་རུ༔
ཡེ་ཤེས་སེམས་དཔའ་ཚེ་དཔག་མེད༔
དཀར་གསལ་མཉམ་གཞག་ཚེ་བུམ་འཛིན༔
དར་དང་རིན་ཆེན་རྒྱན་གྱིས་མཛེས༔
རྡོ་རྗེའི་སྐྱིལ་ཀྲུང་པད་ཟླར་བཞུགས༔
འོད་དང་འོད་ཟེར་འཕྲོ་བ་ཡི༔
ཐུགས་དབུས་ཆུ་སྐྱེས་ཉི་ཟླའི་དབུས༔
ཏཱཾ་མཐར་སྔགས་ཀྱི་ཕྲེང་བས་བསྐོར༔
བཟླས་པས་ཐུགས་དམ་རྒྱུད་བསྐུལ་ཏེ༔
འོད་ཀྱི་སྣང་བ་མཐའ་ཡས་པ༔
གཙུག་ཏོར་ནོར་བུའི་རྩེ་ནས་འཐོན༔
དེ་ལས་འཕགས་མ་རྣམ་པར་རྒྱལ༔
ཆུ་ཤེལ་མདོག་ཅན་ཕྱག་གཡས་ཀྱིས༔
སྐྱབས་སྦྱིན་ཕྱག་རྒྱས་ལྕགས་ཀྱུ་དང༔
གཡོན་པས་མཆོག་སྦྱིན་ཚེ་བུམ་བསྣམས༔
འོད་དང་འོད་ཟེར་དང་བཅས་པ༔
གྲངས་མེད་ཉི་ཟེར་རྡུལ་ལྟར་འཕྲོས༔
རང་གི་ཐུགས་ནས་སྔགས་ཀྱི་ཕྲེང་༔
རྡོ་རྗེའི་གཟུངས་ཐག་ལས་བརྒྱུད་དེ༔
བུམ་ལྷའི་ཐུགས་དམ་རྒྱུད་བསྐུལ་བས༔
བདེ་སྟོང་རོལ་པའི་འོད་ཟེར་སྤྲིན༔
མཁའ་ཁྱབ་ཀུན་ཏུ་སྣང་བ་ཡིས༔
འཕགས་མཆོད་འགྲོ་བའི་དོན་ཀུན་བསྒྲུབས༔
ཚུར་འདུས་ཐུགས་ཀྱི་དྭངས་བར་འཁྱིལ༔
སྐུ་དང་སྔགས་ལས་བདུད་རྩིའི་རྒྱུན༔
དཔག་མེད་བྱུང་ནས་བུམ་པའི་བཅུད༔
དངོས་གྲུབ་ཀུན་གྱི་སྙིང་པོར་གྱུར༔
ཅེས་པས་ཏིང་འཛིན་གསལ་བཏབ། གཟུངས་ཐག་བླངས་ལ་གཙོ་བོ་གསུམ་དང་ཚེ་ཤམ་ཅན་རྣམས་སུམ་བརྒྱ་རེ་ལས་མི་ཉུང་བ་དང་། ལས་བཞི་བརྒྱ་རྩ་རེ། སྒོ་བཞི་ཉེར་གཅིག་རེ་ལས་མི་ཉུང་བ་བཟླ། མཐར།
ཨོཾ་ཨཱཿཧཱུྃ༔
ཞེས་དུང་ཞལ་གྱི་ཆུ་མཆོད་ཡོན་ཏུ་ཕུལ་བས།
ལྷ་ཚོགས་བདེ་བ་ཆེན་པོའི་ངོ་བོར་འོད་དུ་ཞུ་བས་འཆི་མེད་ཚེ་དང་ཡེ་ཤེས་ཀྱི་དངོས་གྲུབ་སྟེར་བའི་རྡོ་རྗེ་བདུད་རྩིའི་ཆུ་རྒྱུན་དུ་གྱུར།
ཅེས་མོས།
ལས་བུམ་ནང་དུ་པད་ཉིའི་སྟེང་༔
པདྨ་རྟ་མགྲིན་སྐུ་མདོག་དམར༔
ཕྱག་གཉིས་པདྨ་དྲིལ་བུ་འཛིན༔
དུར་ཁྲོད་ཆས་རྫོགས་དོར་སྟབས་བཞུགས༔
སྐུ་ལས་རྡོ་རྗེའི་བདུད་རྩིའི་རྒྱུན༔
བབས་པས་བུམ་པ་གང་བར་བསམ༔
ཨོཾ་ཧྲཱིཿཔདྨཱནྟ་ཀྲི་ཏ་སརྦ་བིགྷྣཱན་ཧ་ན་ཧ་ན་ཧཱུྃ་ཕཊ༔
ཅེས་བརྒྱ་རྩ་བརྒྱད་བཟླ།
དཔལ་ཁྲོ་བོའི་རྒྱལ་པོ་རྟ་མགྲིན་གྱིས་དབང་བསྐུར་གྱི་བྱ་བ་མ་གྲུབ་ཀྱི་བར་དུ་བར་གཅོད་ཀྱི་བགེགས་ཐམས་ཅད་བཟློག་པའི་ཕྲིན་ལས་མཛད་དུ་གསོལ།
ཅེས་ལས་བཅོལ་ནས་བཞག །སྐུ་རྟེན་ཙཀླི་དབུ་རྒྱན་རྡོར་དྲིལ་བདུད་རྩི་སོགས་དབང་རྫས་རྣམས་ཀྱང་སྐབས་འདི་རུ་ཚོགས་པར་བྱས་ལ།
དབང་རྫས་རྣམས་ངོ་བོ་རྣམ་པར་དག་པ་ཆོས་ཀྱི་དབྱིངས་རང་བཞིན་ཡེ་ཤེས་ཀྱི་སྣང་བ་ཅིར་ཡང་འཆར་བའི་བྱིན་རླབས་དང་དངོས་གྲུབ་འབྱུང་བའི་དབྱིག་ཏུ་གྱུར་པར་
མོས་པ་རྣམས་ནི་སྟ་གོན་གྱི་བྱ་བའོ། །
དངོས་གཞིའི་སྒྲུབ་མཆོད་སྐབས་ཛབ྄་ཁང་དབྱེ་བ་ནི།
བྷྲཱུྃ་བི་ཤྭ་བི་ཤུདྡྷེ། ཏཱྃ་ཧྲཱིཿབྷྲཱུྃ༔ ཏཱྃ་བྷྲཱུྃ་ཧྲཱིཿཧཱུྃ། ཛ་ཧཱུྃ་བྃ་ཧོ༔ ཕཊ་ཛཿ
ཞེས་བདག་བསྐྱེད་ཀྱི་དཀྱིལ་འཁོར་ལས་མདུན་རྟེན་གྱི་གོ་ས་མར་མེ་གཅིག་ལས་གཉིས་མཆེད་ཀྱི་ཚུལ་གྱིས་རྟེན་དང་བརྟེན་པའི་དཀྱིལ་འཁོར་ཕྱེས་ཏེ་མེ་རི་འདབས་འབྱོར་ཙམ་དུ་བཞུགས་པར་བསྒོམ་ལ་བཟླས་པར་བྱའོ།། །།
མཇུག་དངོས་གྲུབ་ལེན་པའི་བཟླས་དམིགས་ནི།
བྷྲཱུཾ་བི་ཤྭ་བི་ཤུདྡྷེ་ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་མཎྜ་ལ་ཕཊ་ཛཿ
ཞེས་ཛབ྄་ཁང་ཕྱེ་བ་སྔོན་དུ་འགྲོ་བས།
རང་གི་ཐུགས་ཀ་ནས་འོད་ཟེར་དམར་པོ་འཕྲོས།
དཀྱིལ་འཁོར་གྱི་ལྷ་ཚོགས་རྣམས་ཀྱི་ཐུགས་རྒྱུད་བསྐུལ།
དེ་ལས་འོད་ཟེར་བསམ་གྱིས་མི་ཁྱབ་པ་འཕྲོས།
འཁོར་འདས་ཀྱི་དྭངས་བཅུད་ཐམས་ཅད་བསྡུས་ཏེ་དཀྱིལ་འཁོར་པའི་ཐུགས་ཀར་ཐིམ།
དངོས་གྲུབ་སྩོལ་བ་ལ་མངོན་དུ་ཕྱོགས་པས་ཡེ་ཤེས་ཀྱི་གཟི་བྱིན་འབར་བཞིན་བཞུགས་པར་གྱུར།
ཨོཾ་ཏཱ་རེ་ཏུཏྟཱ་རེ་ཏུ་རེ་ཧྲཱིཿ བྷྲཱུྃ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ༔ ཨོཾ་ཨཱཿཧཱུྃ་སྭཱ་ཧཱ༔ མཱུྃ་ལཱྃ་མཱྃ་པཱྃ་ཏཱྃ༔ སརྦ་ཏ་ཐཱ་ག་ཏ་ཨཱ་ཡུརྫྙཱ་ན་མ་ཧཱ་པུཎྱེ་ཏིཥྛ་ཨོཾ༔ ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་སརྦ་སིདྡྷི་ཕ་ལ་ཧོ༔
ཅི་ནུས་སུ་བཟླའོ། །
དངོས་གྲུབ་བསྐུལ་བ་བསྡུ་ན་རང་གཞུང་ལྟར་ལ། ཅུང་ཟད་རྒྱས་པར་སྤྲོ་ན་ཡོངས་རྫོགས་འཆི་མེད་སྙིང་ཐིག་ལས་འབྱུང་བ་འདིས་ཀྱང་བསྐུལ་ཏེ།
ཧྲཱིཿ རང་བྱུང་འོད་སྣང་ཕྱོགས་བཅུའི་དཀྱིལ་འཁོར་ཁྱབ༔
མི་འགྱུར་ཚེ་ཡི་དངོས་གྲུབ་མ་ལུས་བསྡུས༔
བདུད་རྩིའི་རང་བཞིན་དངོས་གྲུབ་རྫས་ལ་ཐིམ༔
ཡེ་ཤེས་བསོད་ནམས་ཚེ་ཡི་རྒྱ་མཚོར་འཁྱིལ༔
ཧྲཱིཿ འཆི་མེད་རྡོ་རྗེའི་དཀྱིལ་འཁོར་མ་ལུས་པ༔
གཞན་དུ་མི་བཞུགས་རང་གི་དབྱིངས་སུ་གསལ༔
མ་རིག་འཁོར་བའི་མུན་ཁྲོད་ལས་གྲོལ་ཏེ༔
དག་པ་ཡེ་ཤེས་སྒོ་ཆེན་རང་སར་བྱེ༔
ཆོས་ཉིད་དག་པའི་སྐྱ་རེངས་དང་པོར་ཤར༔
ཉམས་སྣང་གོང་དུ་འཕེལ་བའི་ནམ་ཡང་ལངས༔
རིག་པ་ཚད་ལ་ཕེབས་པའི་ཉི་མ་ཤར༔
རྣམ་རྟོག་འཆི་བདག་མུན་པ་ཀུན་ཟད་ནས༔
ཡེ་ཤེས་སྣང་བ་འཕེལ་བའི་གྲངས་རྫོགས་པས༔
ད་ལྟ་ཉིད་དུ་དངོས་གྲུབ་སྩལ་དུ་གསོལ༔
ད་ནི་ནང་དབྱིངས་ཆེན་པོར་དབྱེར་མེད་པར༔
ཆོས་དབྱིངས་ཀུན་བཟང་རྒྱལ་ས་ཆེན་པོར་འཇུག༔
སྐུ་ལྔ་ལྷུན་གྱིས་གྲུབ་པའི་དབང་ཆེན་སྐུར༔
ཡོན་ཏན་མི་ཟད་རྒྱན་གྱི་དངོས་གྲུབ་སྩོལ༔
རིས་མེད་རྒྱལ་བའི་ཕྲིན་ལས་ཀུན་ལ་ཁྱབ༔
རྒྱུན་ཆད་མེད་པའི་འགྲོ་དོན་ལྷུན་གྱིས་གྲུབ༔
དེ་ནས་རང་གཞུང་གི་བསྐུལ་ཚིག་ལ་འཇུག་གོ །
མར་མེའི་སྨོན་ལམ་སྤྱི་ལྟར་རམ། འཆི་མེད་སྙིང་ཐིག་ལས་འབྱུང་བ་ལྟར་བྱས་ཀྱང་འབྲེལ་ཆེ་སྟེ།
ཧཱུྃ༔ ངོ་བོ་རང་བཞིན་ཐུགས་རྗེའི་དཀྱིལ་འཁོར་དུ༔
ཚེ་མཐའ་ཡས་དངོས་བླ་མས་དབུ་བཟུང་ནས༔
ལུ་གུ་རྒྱུད་དུ་འབྲེལ་བའི་མཆེད་ལྕམ་རྣམས༔
མི་འབྲལ་འགྲོགས་པའི་ཏིང་འཛིན་རྩེ་གཅིག་གིས༔
སྣང་གསལ་མར་མེ་འདི་ཡིས་མཚོན་ནས་ཀྱང་༔
ཡེ་ཤེས་སྒྲོན་མེ་སྟོང་རྩ་ཤར་བའི་མཐུས༔
མ་རིག་མུན་པའི་ནང་དུ་མི་འཁྱམས་ཤིང་༔
འཆི་བདག་གཅན་གཟན་གདུག་པའི་སྐད་མི་ཐོས༔
ཉོན་མོངས་དུག་ལྔ་ལྡང་བ་ཀུན་སོལ་ལ༔
འཁོར་བ་སྐྱེ་འཆིའི་འཕྲང་ལ་འགྲིམ་གྲབ་ཚེ༔
ཡེ་ཤེས་སྒྲོན་མེ་ཐུགས་རྗེ་དེར་མ་ཆུང་༔
ཚེ་ལམ་པདྨ་ཅན་གྱིས་སྣ་ཁྲིད་ནས༔
འཆི་མེད་འཕགས་མའི་ཚོགས་ཀྱིས་ཚེ་སྩོལ་ལ༔
ཚེ་བདག་ཡབ་ཡུམ་རྣམས་ཀྱིས་སྲོག་བརྟན་ཅིག༔
དབང་ཆེན་རྟ་མགྲིན་རྒྱལ་པོས་བར་ཆད་སོལ༔
མགྱོགས་མ་མཆོད་པའི་ལྷ་མོས་མཐའ་ནས་སྐྱོངས༔
འོད་གསལ་སྣང་བཞི་རིམ་པར་བགྲོད་ནས་ཀྱང་༔
འཆི་མེད་རྡོ་རྗེའི་སྐུ་རུ་འགྲུབ་པར་ཤོག༔
ཅེས་སྨོན་ལམ་གདབ་བོ། །
དེ་ལྟར་སྒྲུབ་མཆོད་ཉེར་མཁོའི་ཟུར་རྒྱན་ཆོས་ཀྱི་བློ་གྲོས་པས་དཀྱུས་གཅིག་ཏུ་བསྡེབས་པའོ།། །།
