Bright Lamp of Definitive Meaning—Tibetan

Practices › Guru Yoga | བོད་ཀྱི་བླ་མ།འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

English | བོད་ཡིག

འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

༄༅། །བླ་མའི་རྣལ་འབྱོར་ངེས་དོན་གསལ་སྒྲོན་བཞུགས་སོ།  །

 

རང་རིག་ཆོས་སྐུའི་བླ་མ་ནི།  །
མཚོན་པ་གཟུགས་ཀྱི་སྐུར་ཤར་བ།  །
དཔལ་ལྡན་རྩ་བའི་བླ་མ་ཉིད།  །
རྒྱུན་དུ་ལམ་བྱེད་རྣལ་འབྱོར་དབྱེ།  །

དེ་ལ་སྔོན་དངོས་རྗེས་གསུམ་གྱི།  །

དང་པོ་སྐྱབས་འགྲོ་སེམས་བསྐྱེད་བྱ།

ཨཿ ཡེ་ནས་གྲོལ་བ་རང་རིག་པ།  །

ཆོས་ཀྱི་སྐུ་ལ་སྐྱབས་སུ་མཆི།  །

བཏང་བཞག་བྲལ་བའི་བྱང་ཆུབ་སེམས།  །

རང་ངོ་ཤེས་པས་སེམས་བསྐྱེད་དོ།  །

དངོས་གཞི་ལ།

ཨཿ ཆོས་ཀུན་ཀ་དག་སྟོང་ཆེན་མཁར།  །

ལྷུན་གྲུབ་འོད་ལྔ་འཁྲིགས་པའི་དབུས།  །

སེང་ཁྲི་པད་ཟླ་ཉི་མའི་སྟེང་།  །

རྩ་བའི་བླ་མ་ཧེ་རུ་ཀཿ

རྣལ་འབྱོར་སྤྱོད་པའི་ཆ་བྱད་ཅན།  །

སྐུ་མདོག་དམར་སྨུག་ཁྲོ་ཆགས་ཉམས།  །

རྡོ་རྗེ་དང་ནི་དྲིལ་བུ་བསྣམས།  །

བདེ་ཆེན་ཌཱ་ཀི་དཀར་དམར་མདངས།  །

གྲི་ཐོད་འཛིན་དང་མཉམ་སྦྱོར་བའི།  །

གནས་གསུམ་ཡིག་འབྲུ་གསུམ་གྱིས་མཚན།  །

དམ་ཡེ་གཉིས་མེད་ཆེན་པོར་བཞུགས།  །

 

ཨཿ སྲིད་གསུམ་བླ་མའི་རོལ་པ་ལ།  །

དག་མཉམ་ལྟ་བའི་ཕྱག་གིས་འདུད།  །

ཅིར་སྣང་མཆོད་པའི་རྒྱན་དུ་ཤར།  །

སྡིག་ལྟུང་སྐྱེ་མེད་ངང་དུ་བཤགས།  །

མ་བྱས་དགེ་ལ་རྗེས་ཡི་རང་།  །

ལྷུན་གྲུབ་ཆེན་པོའི་ཆོས་འཁོར་བསྐོར།  །

འཕོ་འགྱུར་མེད་པར་བཞུགས་གསོལ་འདེབས།  །

དགེ་ཚོགས་གཞོན་ནུ་བུམ་སྐུར་བསྔོ།

སྤྲོ་ན་མཎྜལ་མཆོད་པ་འབུལ།

ཆེ་མཆོག་རིག་འཛིན་གྲུབ་པ་ཆེ།  །

འཕོ་ཆེན་བི་མ་ལ་མི་ཏྲ།  །

དགེ་བའི་བཤེས་ཀྱི་གཟུགས་བསྒྱུར་བ།  །

མཁྱེན་བརྩེའི་དབང་པོར་གསོལ་བ་འདེབས།  །

ཕྲིན་ལས་རྣམ་བཞི་ལྷུན་གྱིས་གྲུབ།  །

མཁྱེན་ནུས་བརྩེ་བའི་རྩལ་ཆེན་རྫོགས།  །

རིག་འཛིན་གྲུབ་པའི་དཔའ་བོ་ཆེ།  །

ཡེ་ཤེས་རྡོ་རྗེར་གསོལ་བ་འདེབས།  །

ཨོཾ་ཨཱཿགུ་རུ་པདྨ་ཛྙཱ་ན་བཛྲ་སརྦ་སིདྡྷི་ཧཱུྃ།

ཞེས་པའི་མཚན་སྔགས་གསོལ་འདེབས་བྱ།

གནས་གསུམ་རྡོ་རྗེའི་འབྲུ་གསུམ་ལས།  །

སྐུ་དང་སྔགས་ཕྲེང་ཕྱག་མཚན་ཚོགས།  །

འོད་ཟེར་བདུད་རྩིའི་རྒྱུན་དང་བཅས།  །

སྐར་མདའ་འཕྲོས་བཞིན་གནས་གསུམ་དུ།  །

རིམ་དང་ཅིག་ཆར་ཐིམ་པ་ཡིས།  །

སྒྲིབ་དག་དབང་དང་དངོས་གྲུབ་ཐོབ།  །

མཐར་ནི་དགྱེས་པ་ཆེན་པོ་ཡིས།  །

རང་གི་ཚངས་བུག་ནས་བརྒྱུད་དེ།  །

སྙིང་དབུས་འོད་ཀྱི་གུར་ཁང་དུ།  །

འབྲལ་མེད་བཞུགས་པའི་ཐུགས་དབུས་སུ།  །

ཙིཏྟ་འོད་ཀྱི་གོང་བུའི་ནང་།  །

ཀུན་བཟང་ཡབ་ཡུམ་རྒྱན་མེད་ཀྱི།  །

ཐུགས་ཀར་ཨཱཿཡིག་མཐིང་གསལ་ལ།  །

རིག་པ་གཏད་དེ་ཐུགས་ཡིད་བསྲེ།  །

བློ་བྲལ་དགོངས་པའི་ངང་དུ་བཞག  །

རྗེས་ལ་དགེ་བསྔོ་སྨོན་ལམ་ནི།

སྣོད་བཅུད་སྣང་གྲགས་དྲན་རྟོག་ཀུན།  །

དཔལ་ལྡན་བླ་མའི་རོལ་པར་བལྟ།  །

དགེ་འདིས་མཐའ་ཀླས་འགྲོ་བ་རྣམས།  །

བླ་མའི་ངོ་བོར་བྱང་ཆུབ་ཤོག  །

 

ཅེས་པའང་དད་དམ་དགེ་བའི་བློ་མངའ་ཤེས་རབ་མཐར་ཕྱིན་གྱིས་ལྷ་རྫས་རིན་གཉིས་འཁོར་ལོ་དབང་བཅུའི་གྲངས་ལྡན་བཅས་ནན་ཏན་ཆེན་པོས་བསྐུལ་ངོར་ཆོས་ཀྱི་བློ་གྲོས་པས་བྲིས་པ་འདིས་ཀྱང་རང་རིག་སྐུ་གསུམ་མངོན་དུ་བྱེད་པའི་རྒྱུར་གྱུར་ཅིག  །

 

This website uses cookies to collect anonymous usage statistics and enhance the user experience.
Decline
Accept