Daily Dükyi Shechen—Tibetan

Sādhanas | Tibetan Mastersའཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

English | བོད་ཡིག

འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

The Great Demon-Slayer

Further Information:
Download this text:

༄༅། །ཐུགས་སྒྲུབ་བདུད་ཀྱི་གཤེད་ཆེན་གྱི་ཡང་གསང་སྤྲོས་མེད་རྒྱུན་ཁྱེར་བཞུགས།

ན་མོ་གུ་རུ།

འདི་ཉིད་ཀྱི་དབང་ཐོབ་པས་ཡང་གསང་རྒྱུན་གྱི་རྣལ་འབྱོར་ལ།

སྔོན་འགྲོ་སྐྱབས་སེམས་ནི།

ན་མོ། བླ་མ་མཆོག་གསུམ་ཡི་དམ་ལྷར། །

གུས་པས་སྐྱབས་མཆི་མཁའ་མཉམ་འགྲོ། །

བླ་མེད་བྱང་ཆུབ་མྱུར་ཐོབ་ཕྱིར། །

བདུད་ཀྱི་གཤེད་ཆེན་བསྒོམ་པར་བགྱི། །

ལན་གསུམ།

དངོས་གཞི་བསྒོམ་བཟླས་ནི།

ཧཱུྃ༔ ཆོས་ཀུན་ཀ་དག་དེ་བཞིན་ཉིད༔

སྙིང་རྗེ་ཁྲོས་པར་ཀུན་ཏུ་སྣང་༔

རྒྱུ་ཡི་ཏིང་འཛིན་ཧཱུྃ་དམར་པོ༔

རང་བྱུང་རང་གསལ་ལྷུག་པར་ཤར༔

དེ་ལས་འཕྲོས་པའི་འོད་ཟེར་གྱིས༔

སྣོད་བཅུད་དངོས་འཛིན་དབྱིངས་སུ་སྦྱངས༔

འབྱུང་བ་རིམ་བརྩེགས་ཡུམ་ལྔའི་ཀློང་༔

ཕྱི་སྣོད་དག་པ་ཨེ་ཡི་དབྱིངས༔

དུར་ཁྲོད་འབར་བའི་ཕོ་བྲང་ཆེར༔

གནམ་ལྕགས་ཙཀྲ་རྩིབས་བཅུའི་དབུས༔

པད་ཉི་དྲེགས་པའི་གདན་གྱི་སྟེང་༔

ནང་བཅུད་དག་པ་ཧེ་རུ་ཀ༔

དཔལ་ཆེན་བདུད་འདུལ་བདུད་ཀྱི་གཤེད༔

ཧཱུྃ་ལས་སྐུར་བསྐྱེད་གཉུག་མའི་ལྷ༔

ཡོངས་གྱུར་བཛྲ་ཀུ་མཱ་ར༔

མཐིང་ནག་ཞལ་གསུམ་ཕྱག་དྲུག་པ༔

གཡས་དཀར་གཡོན་དམར་དབུས་ཞལ་མཐིང་༔

གཡས་གཉིས་རྡོ་རྗེ་རྩེ་དགུ་ལྔ༔

གཡོན་གཉིས་མེ་དཔུང་ཁ་ཊྭཱྃ་ག༔

ཐ་མ་རི་རབ་ཕུར་བུ་བསྒྲིལ༔

དཔལ་དང་དུར་ཁྲོད་ཆས་ཀྱིས་བརྒྱན༔

འཁོར་ལོ་རྒྱས་འདེབས་ཡུམ་དང་སྦྱོར༔

ཞབས་བཞི་དོར་སྟབས་མེ་དཔུང་དབུས༔

གར་གྱི་ཉམས་དགུས་རྣམ་པར་རོལ། །

གནས་ལྔར་སྲས་མཆོག་རིགས་ལྔ་དང་༔

ཚིགས་མཚམས་ཁྲོ་བཅུ་ཕྲ་ཐབས་བཅས་ཁྲོ་རྒྱལ་འཁོར་བཅས་གསལ༔

སྐུ་ལས་འབར་བའི་འོད་ཀྱི་ཀློང་༔

སེང་གདོང་རིགས་ལྔའི་སྤྲིན་ཕུང་སྤྲོ༔

འཁོར་ལའི་རྩིབས་ཀྱི་ཕྱོགས་མཚམས་ལ༔

དཔལ་ཆེན་སྒྲུབ་སྡེ་བརྒྱད་ཀྱི་ལྷ༔

སྟེང་དུ་རྡོ་རྗེ་ནམ་མཁའ་ལྡིང་༔

འོག་ཏུ་རྒྱུད་གསུམ་དྲེགས་པའི་སྡེ༔

ཀུན་ཀྱང་རང་རང་ཚོམ་བུར་བཅས༔

སྣང་སྲིད་དཔལ་གྱི་ཕྱག་རྒྱར་རྫོགས༔

ཙིཏྟ་མཆོང་གུར་སྨུག་པའི་དབུས༔

ཉི་སྟེང་ཧཱུྃ་མཐར་སྔགས་ཕྲེང་འཁོར༔

བཟླས་པ་སྔགས་ཀྱི་མེ་འོད་ནི༔

རྡོ་རྗེ་མཚོན་ཆའི་ཆར་དུ་འཕྲོས༔

སྡེ་བརྒྱད་འབྱུང་པོ་དམ་ལ་གཟིར༔

བར་ཆད་བདུད་ཚོགས་དབྱིངས་སུ་བསྒྲལ༔

འཁོར་འདས་དྭངས་བཅུད་བདག་ལ་ཐིམ༔

སྲིད་ཞིའི་སྤྱི་དཔལ་ཆེན་པོར་གྱུར།

ཨོྃ་ཨཱཿཧཱུྃ་བཛྲ་གུ་རུ་པདྨ་ཀཱི་ལི་ཀཱི་ལ་ཡ་སརྦ་བིགྷྣཱན་བྃ་ཧཱུྃ་ཕཊ྄༔

ཅེས་རྩ་སྔགས་ཅི་ནུས་བཟླ།

སྲུང་བ་ནི།

འཁོར་ལོའི་རྩིབས་རྩེའི་མེ་རླུང་ལས༔

མཚོན་ཆ་སྣ་ལྔའི་སྤྲིན་ཕུང་འཕྲོས༔

སྟེང་འོག་ཕྱོགས་མཚམས་ཐམས་ཅད་ཀུན༔

གཞོམ་མེད་སྲུང་བའི་གུར་དུ་འཁྲིགས༔

ཁྲོ་བོ་འཆོལ་བའི་ཚོགས་ཀྱིས་གཏམས༔

ཡེ་ཤེས་དྲུག་གི་དབྱིངས་སུ་རྫོགས༔

རྩ་སྔགས་མཐར།

བུདྡྷ་བཛྲ་རཏྣ་པདྨ་ཀརྨ་ཀཱི་ལི་ཀཱི་ལ་ཡ་དཱི་པྟ་ཙཀྲ་ཛྙཱ་ན་རཀྵ་རཀྵ་བྷྲཱུྃ༔

ཞེས་བཏགས་པ་ཅུང་ཟད་བཟླས་ལ་བསྲུང་བྱ་སྲུང་བྱེད་ཐམས་ཅད་རིག་སྟོང་དབྱེར་མེད་ཀ་དག་ཆེན་པོའི་ངང་དུ་བཞག་གོ །རྗེས་ཐུན་ལས་ལྡང་བ་ན། དབྱངས་གསལ་ཡེ་དྷར་ཡིག་བརྒྱ་རྣམས་ཀྱིས་སྔགས་ཀྱི་ལྷག་ཆད་བསྐང་ལ།

ཧཱུྃ༔ ལྷར་སྣང་འོད་གསལ་དབྱིངས་སུ་ཐིམ༔

ཕཊ྄༔ སླར་ཡང་རང་ཉིད་ལྷ་སྐུར་ལྡང་༔

ཨོྃ་ཨཱཿཧཱུྃ་གིས་གནས་གསུམ་བསྲུང༌།

དགེ་འདིས་མཐའ་ཡས་སེམས་ཅན་ཀུན། །

མི་གནས་མྱ་ངན་འདས་ཐོབ་ཅིང༌། །

རིག་འཛིན་བླ་མའི་ཐུགས་རྗེ་ཡིས། །

ཕྱོགས་དུས་ཀུན་དུ་བཀྲ་ཤིས་ཤོག །

ཅེས་རང་གཞན་གྱི་དོན་དུ་ཉམས་སུ་བླངས་བདེའི་ཆེད་ཆོས་གྱི་བློ་གྲོས་པས་འདོན་བདེར་བྲིས་པ་དགེའོ།། །།

 

Vajrayāna Buddhism places restrictions on the reading and practice of certain texts, which are intended only for those who have received the requisite empowerments, transmissions and instructions.

If you are unsure as to whether you are entitled to read or practice a particular text please consult a qualified lineage-holder.

OK