Daily Yamāntaka Practice—Tibetan
༄༅། །འཇམ་དཔལ་གཤིན་རྗེའི་རྒྱུན་ཁྱེར་བཞུགས།
སྐྱབས་སེམས་སྔོན་དུ་འགྲོ་བས།
ཨྱཻ། ཨེ་ཉིད་སྟོང་པ་ཆོས་འབྱུང་སྟེ། །
མ་སྐྱེས་འགགས་པ་མེད་པ་ལས། །
རང་བཞིན་གནས་པ་དྲན་པར་བྱ། །
ཨཻ་ཡི་ཕོ་བྲང་ཆེན་པོའི་ནང་། །
རྒྱུ་དང་རྐྱེན་ལས་མ་བསྐྱེད་པར། །
ཀླུ་གཉན་ས་བདག་རུ་ཏྲ་དང་། །
མ་ཧེ་ཉི་ཟླ་པདྨའི་སྟེང་། །
རིག་པ་ཆུ་ལས་ཉ་འཕར་ཚུལ། །
འཇམ་དཔལ་ཕྱག་རྒྱ་ཟིལ་གྱིས་གནོན། །
དབུ་གསུམ་ཕྱག་དྲུག་ཞབས་བཞི་བསྒྲད། །
གཡས་དཀར་གཡོན་དམར་དབུས་མཐིང་ཞལ། །
འཁོར་ལོ་རལ་གྲི་རྡོ་རྗེ་གཡས། །
བེ་ཅོན་གཏུན་ཤིང་སྡིག་མཛུབ་གཡོན། །
རིགས་ལྔའི་ཁྲོ་བོས་དབུ་ལ་བརྒྱན། །
དཔལ་གྱི་ཆས་རྫོགས་དུར་ཁྲོད་བརྒྱན། །
ཡུམ་ནི་གཉིས་མེད་ཆོས་ཀྱི་དབྱིངས། །
མཐིང་ནག་ཙིཏྟ་བྷན་དམར་སྟོབས། །
སྤྲུལ་པ་རྒྱན་གྱི་ལྷ་བརྒྱད་དང་། །
ཡེ་ཤེས་ཁྲོ་བོ་བཅུ་རྣམས་རྫོགས། །
སྤྲུལ་པའི་ཁྲོ་ཚོགས་དཔག་མེད་དང་། །
རྡོ་རྗེའི་ཚྭ་ཚྭ་རབ་ཏུ་འཕྲོ། །
སྣང་ལ་རང་བཞིན་མེད་པར་བསྒོམ། །
ཐུགས་ཀར་ཉི་སྟེང་ཧཱུྃ་གི་མཐར། །
སྔགས་ཀྱི་ཕྲེང་བས་བསྐོར་བ་ལས། །
འོད་ཟེར་སྤྲོ་བསྡུས་དོན་གཉིས་བྱས། །
སྣང་སྲིད་ཐམས་ཅད་དཔལ་ཆེན་པོའི། །
ལྷ་སྔགས་དབྱེར་མེད་དགོངས་པར་ཤར། །
ཨོཾ་ཨཱ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྫ་ཧཱུྃ་ཕཊ༔
ཞེས་སྤྱི་བསྙེན་བཟླའོ། །
ཐུན་མཐར།
ལྷར་སྣང་འོད་གསལ་དབྱིངས་སུ་ཐིམ། །
སླར་ཡང་ཟིལ་གནོན་སྐུ་རུ་ལྡང་། །
བཛྲ་ཀཱ་ཝཱ་ཙི་རཀྵ་ཧཾ༔
དགེ་བ་འདི་ཡིས་མྱུར་དུ་བདག །
འཇམ་དཔལ་ཁྲོ་བོ་འགྲུབ་གྱུར་ནས། །
འགྲོ་བ་གཅིག་ཀྱང་མ་ལུས་པ། །
དེ་ཡི་ས་ལ་འགོད་པར་ཤོག །
སོགས་བསྔོ་སྨོན་བྱའོ། །
ཞེས་པའང་ཆོས་ཀྱི་བློ་གྲོས་པས་བྲིས་པའོ། །། །
