Khyenrab Chökyi Özer Long-Life Prayer—Tibetan

༄༅། །ཆོས་སྨྲ་བའི་བཤེས་གཉེན་མཁན་ཆེན་མཁྱེན་རབ་འོད་ཟེར་ལ་ཞབས་བརྟན་དུ་གསོལ་བ་བདེན་ཚིག་གྲུབ་པའི་དབྱངས་སྙན་ཞེས་བྱ་བ་བཞུགས་སོ།    །

ཨོཾ་སྭསྟི།

འཇམ་དབྱངས་བླ་མའི་བྱིན་རླབས་ཐུགས་རྗེའི་གཏེར།    །

སྙིགས་དུས་བསྟན་འགྲོའི་མགོན་དུ་འཕོས་པ་ལས།    །

ངོ་མཚར་སྐྱེས་ཆེན་བརྒྱུད་མར་བྱོན་པ་ཡི།    །

བཀྲ་ཤིས་སྣང་བས་རྟག་ཏུ་ཤིས་གྱུར་ཅིག  །

མཁྱེན་རབ་དག་ཅིང་གཙང་བའི་ཨ་དརྴར།    །

ཕྱི་ནང་ཆོས་ཚུལ་འབུམ་ཕྲག་གཟུགས་བརྙན་འཆར།    །

སྐལ་བཟང་འགྲོ་ལ་ལེགས་པའི་ལམ་སྟོན་པ།    །

བྱམས་པ་ཆོས་ཀྱི་འོད་ཟེར་ཞབས་བརྟན་གསོལ།    །

མདོ་སྔགས་ཐུན་མོང་ཐུན་མིན་ཐེག་པ་རྣམས།    །

ཀུན་མཁྱེན་བསྟན་པའི་ཉི་མའི་བཞེད་སྲོལ་བཞིན།    །

མ་འདྲེས་ཇི་བཞིན་འཆད་ལ་བསྙེངས་བྲལ་བ།    །

ཟླ་གྲགས་གཉིས་པ་ཡུན་དུ་འཚོ་གཞེས་གསོལ།    །

ས་སྐྱའི་འཇམ་མགོན་བརྒྱུད་པར་བཅས་པ་ཡི།    །

བཞེད་གཞུང་བློ་གྲོས་ཤེ་མོང་བཙན་པོའི་མཐུས།    །

ལུང་རིགས་བློ་ཡི་ཡོལ་གོར་འདེགས་བཟོད་པ།    །

སྨྲ་བའི་དབང་ཕྱུག་ཆེན་པོ་འཚོ་གཞེས་གསོལ།    །

ཕྱི་རུ་རྣམ་དག་ཁྲིམས་ཀྱི་རྒྱུད་བསྡོམས་ཤིང་།    །

ནང་དུ་བྱང་ཆུབ་སེམས་ལ་ཐུགས་རྒྱུད་འབྱོངས།    །

གསང་བ་བསྐྱེད་རྫོགས་གྲུབ་པའི་བརྟུལ་ཞུགས་འཆང་།    །

སུམ་ལྡན་རྡོ་རྗེ་འཛིན་པ་འཚོ་གཞེས་གསོལ།    །

ཆོས་སྨྲ་འཇིག་རྟེན་གསུམ་གྱི་རྒྱན་ཡིན་ཏེ།    །

ཇི་སྲིད་གནས་བར་འགྲོ་བའི་སྒྲོན་མེར་གྱུར།    །

དེ་སྲིད་སྐུ་ལ་བསྙེལ་བ་མི་མངའ་བར།    །

མདོ་སྔགས་ཆོས་ཀྱི་རྔ་ཆེན་སྒྲོགས་གྱུར་ཅིག  །

ཅེས་པའང་སྙིགས་མའི་དུས་འདིར་རིས་སུ་མེད་པའི་ཆོས་ཀྱི་མཛོད་འཛིན་ཅིང་།  ཁྱད་པར་རྗེ་བཙུན་ས་སྐྱ་པའི་བརྒྱུད་འཛིན་སྨྲ་མཁས་ཀུན་གྱི་གཙུག་གི་ནོར་བུར་གྱུར་པ་མཁྱེན་རབ་ཆོས་ཀྱི་འོད་ཟེར་ཞབས་བརྟན་འདིའང་།  དབོན་སྟོད་ལྷུན་པོ་རྩེའི་སློབ་གྲྭ་ནས་གང་གི་ཞལ་སློབ་རྣམས་ཀྱིས་བཀྲ་ཤིས་པའི་ལྷ་རྫས་རིན་གཉིས་འཁོར་ལོ་མི་ཟད་ལྔའི་གྲངས་ལྡན་དང་བཅས་པའི་གསུང་གི་བསྐུལ་ངོར་དགེ་སྦྱོང་གི་རྟགས་ཙམ་འཛིན་པ་འཇམ་དབྱངས་ཆོས་ཀྱི་བློ་གྲོས་པས་བྲིས་པ་དོན་དང་ལྡན་པར་གྱུར་ཅིག  །སརྦ་དཱ་མངྒ་ལཾ།།    །།