Lament to Lerab Lingpa—Tibetan

Songs and Poems | Tibetan Mastersའཇམ་དབྱངས་མཁྱེན་བརྩེ་ཆོས་ཀྱི་བློ་གྲོས། | Tibetan MastersTertön Sogyal

English | བོད་ཡིག

འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

Tertön Sogyal Lerab Lingpa

Further Information:

༄༅། །གདུང་དབྱངས་ཐུགས་རྗེས་འཛིན་བཞུགས།

ཨ་ཧོ།
མཁྱེན་བརྩེ་ནུས་པའི་གཏེར་མཛོད། །
ལས་རབ་གླིང་པ་མཁྱེན་ནོ། །
འོད་གསལ་ཀློང་ནས་གཟིགས་ཤིག །
རྟག་ཏུ་ཁྱེད་ཀྱིས་བྱིན་རློབས། །
རྔ་ཡབ་དཔལ་རིའི་ཕོ་བྲང་། །
མ་ཧཱ་གུ་རུའི་བཞུགས་གྲལ། །
དྷ་ཀིའི་ཚོགས་དང་ལྷན་ཅིག །
དགྱེས་དགུར་སྤྱོད་པ་དགའ་འོ། །
པདྨས་བོད་འབངས་སྐྱོབས་པར། །
མངག་པའི་ཕོ་ཉ་མཆོག་ཉིད། །
བོད་འབངས་ཤུལ་དུ་བཞག་ནས། །
པདྨ་འོད་དུ་གཤེགས་སམ། །
བདག་ཅག་ཁྱེད་ཀྱི་ཐུགས་རྗེས། །
ཤུལ་དུ་འདོར་བར་བཟོད་དམ། །
བསྐལ་ངན་དུས་ཀྱི་རྒུད་པ། །
རྒྱུན་མི་ཆད་པས་མནར་ཚེ། །
ཁྱོད་ཉིད་ཞི་བར་གཞོལ་ན། །
དམ་བཅའ་ཉམས་པ་འགྱུར་ཏེ། །
ཟབ་རྒྱས་གཏེར་གྱི་རྒུད་པ། །
འགྲོ་དོན་མཁའ་ཁྱབ་འབྱུང་བར། །
ད་སླད་ཅི་ཚུགས་བྱེད་དམ། །
མ་རིག་མུན་སེལ་སྒྲོན་མེ། །
པདྨས་མཆོག་བསྟན་རྒྱས་མཛད། །
མཚུངས་བྲལ་གཏེར་ཆེན་དྲ་པ། །
ཕ་གཅིག་རིན་ཆེན་གཙུག་ནོར། །
བུ་ཡི་གདུང་དབྱངས་འདི་ལ། །
དགོངས་ནས་མཁས་གྲུབ་གཉིས་ལྡན། །
མཆོག་གི་སྤྲུལ་སྐུར་བཞེངས་ནས། །
ལས་འཕྲོ་གཏེར་གྱི་བསྟན་པ། །
ས་གསུམ་ཁྱབ་པར་མཛོད་ཅིག །
བོད་ཁམས་གདུག་པའི་ཚ་ངར། །
ལྷག་མེད་ཞི་ནས་བདེ་སྐྱིད། །
ཡར་ཟླའི་དཔལ་ལ་འགྲན་ཞིང་། །
རྒྱལ་བསྟན་སྤྱི་དང་ཁྱད་པར། །
སྔ་འགྱུར་བསྟན་པ་རྒྱས་མཛོད། །
ཕྲིན་ལས་རྣམ་བཞི་ཐོགས་མེད། །
གང་འབྲེལ་ཐར་པའི་སར་བཀྲི། །
མཆོག་གི་དངོས་གྲུབ་སྟེར་བས། །
སྤྲུལ་པ་དུས་གསུམ་བཀྲ་ཤིས། །
བཀྲ་ཤིས་ཡུན་དུ་གནས་ཤོག །

ཅེས་པའང་མི་ཕྱེད་དད་པའི་བློས་ཐོལ་བྱུང་དུ་འཇམ་དབྱངས་བློ་གྲོས་རྒྱ་མཚོས་གསོལ་བ་བཏབ་པའོ།། །།

• Download this text: EPUB MOBI PDF