Marpa Guru Yoga—Tibetan

Practices › Guru Yoga | བོད་ཀྱི་བླ་མ།འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས། | བོད་ཀྱི་བླ་མ།མར་པ་ཆོས་ཀྱི་བློ་གྲོས།

English | བོད་ཡིག

འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

མར་པ་ཆོས་ཀྱི་བློ་གྲོས།

Further information:
Download this text:

༄༅། །མངའ་བདག་མར་པ་ལོ་ཙཱའི་བླ་མའི་རྣལ་འབྱོར་བཞུགས་སོ། །

 

ཨཿ རང་སྣང་དག་པ་འོག་མིན་ཞིང་། །

བཀོད་པ་ལྷུན་རྫོགས་མདུན་མཁའ་རུ། །

སེང་ཁྲི་པད་ཉི་ཟླ་བའི་སྟེང་། །

རྩ་བའི་བླ་མ་ལྷོ་བྲག་པ།།

མར་སྟོན་ཆོས་ཀྱི་བློ་གྲོས་ནི། །

དམར་སྨུག་ཁྲོ་ཉམས་ཕྱག་གཉིས་ཀྱི། །

པུས་སྟེང་ས་གནོན་དགེ་བསྙེན་ཆས། །

སྤྱན་གཉིས་ལྟ་སྟངས་ཧུར་བག་གཟིགས། །

ཞབས་ཟུང་རྡོ་རྗེའི་སྐྱིལ་ཀྲུང་བཞུགས། །

སྐུ་ལ་རྒྱུད་སྡེའི་དཀྱིལ་འཁོར་རྫོགས། །

གནས་གསུམ་ཡིག་འབྲུ་གསུམ་གྱིས་མཚན། །

འོད་འཕྲོས་ཡེ་ཤེས་སྤྱན་དྲངས་གྱུར།

ཡན་ལག་བདུན་པ་རྒྱས་བསྡུས་ཅི་རིགས་དང་། མཎྜལ་ཡང་ཕུལ།

དཔལ་དགྱེས་མཛད་རྡོ་རྗེ་སྤྲུལ་པའི་སྐུ། །

རྗེ་མར་པ་ཆོས་ཀྱི་བློ་གྲོས་ལ། །

ཡིད་རྩེ་གཅིག་གུས་པས་གསོལ་བ་འདེབས། །

མཆོག་ཐུན་མོང་དངོས་གྲུབ་སྩལ་དུ་གསོལ། །

ཡེ་ཤེས་རྡོ་རྗེའི་བྱིན་ཆེན་ཕོབ། །

རང་སེམས་གཉུག་མ་རྟོགས་པར་བྱིན་གྱིས་རློབས། །

ཅེས་དང་།

སྙིང་སྟོབས་ཆེན་པོས་འཕགས་ཡུལ་ལན་མང་བགྲོད། །

ཤེས་རབ་ཆེན་པོས་ཆོས་ཀུན་ཐུགས་སུ་ཆུད། །

བརྩོན་འགྲུས་ཆེན་པོས་སྒྲུབ་པའི་རྒྱལ་མཚན་བཙུག །

ལོ་ཙཱ་ཆེན་པོའི་ཞབས་ལ་གསོལ་བ་འདེབས། །

ཞེས་པས་གསོལ་བ་བཏབ།

ཨོཾ་ཨཱཿགུ་རུ་དྷརྨ་མ་ཏི་སརྦ་སིདྡྷི་ཕ་ལ་ཧཱུྃ།

ཞེས་པའི་མཚན་སྔགས་ཅི་ནུས་སུ་བཟླ།

མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་སངས་རྒྱས་རིན་པོ་ཆེ་ལ་གསོལ་བ་འདེབས་སོ། །

དེ་བཞིན་དུ་སྦྱར་ཏེ།

བླ་མ་ཀུན་ཁྱབ་ཆོས་ཀྱི་སྐུ་ལ་གསོལ་བ་འདེབས་སོ། །

བླ་མ་བདེ་ཆེན་ལོངས་སྤྱོད་རྫོགས་པའི་སྐུ་ལ་གསོལ་བ་འདེབས་སོ། །

བླ་མ་ཐུགས་རྗེ་སྤྲུལ་པའི་སྐུ་ལ་གསོལ་བ་འདེབས་སོ། །

ཞེས་ཡང་ཡང་བྱས་མཐར།

བདག་དང་སེམས་ཅན་ཐམས་ཅད་ཀྱི་བློ་ཆོས་སུ་འགྲོ་བར་བྱིན་གྱིས་བརླབ་ཏུ་གསོལ།

ཆོས་ལམ་དུ་འགྲོ་བར་བྱིན་གྱིས་བརླབ་ཏུ་གསོལ།

ལམ་འཁྲུལ་པ་སེལ་བར་བྱིན་གྱིས་བརླབ་ཏུ་གསོལ།

འཁྲུལ་པ་ཡེ་ཤེས་སུ་འཆར་བར་བྱིན་གྱིས་བརླབ་ཏུ་གསོལ།

 

བླ་མའི་གནས་གསུམ་འབྲུ་གསུམ་ལས། །

འོད་ཟེར་སྐུ་དང་སྔགས་ཕྲེང་དང་། །

ཕྱག་མཚན་དཔག་ཏུ་མེད་པ་འཕྲོས། །

རིམ་དང་ཅིག་ཅར་ཐིམ་པ་ལས། །

སྒྲིབ་དག་དབང་དང་དངོས་གྲུབ་ཐོབ། །

བླ་མ་འོད་ཞུ་རང་ལ་ཐིམ། །

དུས་གསུམ་རྟོག་པས་མ་བསླད་པའི། །

རང་རིག་གཉུག་མ་ཕྱག་རྒྱ་ཆེར། །

མ་བཅོས་རང་བབས་ངང་དུ་བཞག །

ཐུན་ལས་ལྡང་བ་ན།

སྐྱེ་བ་ཀུན་ཏུ་ཡང་དག་བླ་མ་དང་།

འབྲལ་མེད་ཆོས་ཀྱི་དཔལ་ལ་ལོངས་སྤྱོད་ནས། །

ས་དང་ལམ་གྱི་ཡོན་ཏན་རབ་རྫོགས་ཏེ། །

རྡོ་རྗེ་འཆང་གི་གོ་འཕང་མྱུར་ཐོབ་ཤོག །

སོགས་ཀྱི་བསྔོ་སྨོན་བྱའོ། །

 

ཅེས་པའང་དད་ལྡན་བླ་མ་མཆོག་ལྡན་ནས་ལྷ་རྫས་དང་དངུལ་དཀར་གྱི་དོང་རྩེ་བཅས་བསྐུལ་ངོར་ཆོས་ཀྱི་བློ་གྲོས་པས་ལྷོ་བྲག་སྲས་མཁར་སྤྲུལ་པའི་ལྷ་ཁང་གི་འདབ་རོལ་སྐྱེད་མོས་ཚལ་དུ་བྲིས་པ་མངྒ་ལཾ།། །།

 

This website uses cookies to collect anonymous usage statistics and enhance the user experience.
Decline
Accept