Prayer to Guru Dewa Chenpo—Tibetan
Deities › Guru Padmasambhava › Guru Dewa Chenpo | Practices › Prayers › Guru Rinpoche Prayers | བོད་ཀྱི་བླ་མ། › འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།
Guru of Great Bliss (Guru Dewa Chenpo)
Courtesy of Himalayan Art Resources
Further information:
༄༅། །གུ་རུ་བདེ་བ་ཆེན་པོ་ལ་གསོལ་འདེབས་འཁྲུལ་སྣང་ཀུན་སེལ་ཞེས་བྱ་བ་བཞུགས་སོ། །
ཨེ་མ་ཧོ།
ངོ་བོ་བློ་འདས་འོད་གསལ་ཆོས་ཀྱི་སྐུ། །
རང་བཞིན་མ་འགགས་གསལ་སྣང་ལོངས་སྤྱོད་རྫོགས། །
ཐུགས་རྗེའི་རིག་རྩལ་གང་འདུལ་སྤྲུལ་པའི་སྐུ། །
སྐུ་གསུམ་དབྱེར་མེད་བླ་མ་པདྨ་འབྱུང་། །
དཀྱིལ་འཁོར་རྒྱ་མཚོའི་ཁྱབ་བདག་བདེ་བ་ཆེ། །
མ་ཧཱ་གུ་རུ་པདྨ་སཾ་བྷ་ཝར། །
གསོལ་བ་འདེབས་སོ་བྱིན་རླབས་དབང་བསྐུར་སྩོལ། །
འཆི་མེད་རྡོ་རྗེའི་སྐུ་བརྙེས་མཚོ་སྐྱེས་རྗེ། །
སྐུ་ལྔ་མཚན་བརྒྱད་རྣམ་འཕྲུལ་བཅུ་གཉིས་སོགས། །
བསམ་ཡས་ཞི་དང་ཁྲོ་བོའི་རོལ་གར་སྟོན། །
གནས་གསུམ་མཁའ་འགྲོ་རྒྱ་མཚོའི་མིང་པོ་ཆེ། །
བདག་གི་སྐྱབས་གཅིག་གུ་རུ་པདྨ་རྗེ། །
བུ་ཡི་གདུང་དབྱངས་ཉམས་ཐག་འདིར་གཟིགས་ལ། །
ཐུགས་རྗེས་གཟིགས་ཤིག་ཨོ་རྒྱན་རིན་པོ་ཆེ། །
བོད་འབངས་སྐྱོབས་པའི་གཉེན་གཅིག་ཁྱོད་ཉིད་ལ། །
ཁྱོད་ཀྱི་ཐུགས་རྗེས་ཡལ་བར་འདོར་བཟོད་དམ། །
འབྱུང་བ་གཡོ་འཁྲུགས་ནད་མཚོན་མུ་གེ་སོགས། །
སྡུག་བསྔལ་དུ་མས་འགྲོ་རྣམས་མནར་ལ་གཟིགས། །
བདུད་རིགས་འབྱུང་པོའི་ཆུ་གཏེར་རབ་འཁྲུགས་པས། །
བསྟན་འཛིན་སྐྱེས་བུ་རྣམས་ནི་ཞིང་གཞན་གཤེགས། །
ལུང་རྟོགས་བཤད་སྒྲུབ་བསྟན་པ་མར་ལ་འགྲིབ། །
ལྷ་མིན་ཆར་སྤྲིན་ནག་པོ་མཁའ་ལ་གཏིབ། །
ལོག་རྟོག་ལྕེ་འཁྱུག་སྡིག་པའི་ན་བུན་འཐིབ། །
ལྟ་ངན་འབྲུག་སྒྲ་སྒྲོགས་ཤིང་ལས་ངན་གྱི། །
ཐོག་སེར་འབེབས་པས་བསྟན་འགྲོའི་བདེ་སྐྱིད་བཅོམ། །
འདི་འདྲའི་དུས་ན་གུ་རུའི་ཐུགས་རྗེ་ཡི། །
འཐོར་རླུང་དྲག་པོས་བདུད་ཀྱི་ཆུ་འཛིན་གཏོར། །
ཀ་དག་ཆོས་སྐུའི་མཁའ་དབྱིངས་ཡངས་པོའི་རྫོགས། །
བཤད་སྒྲུབ་ཉི་ཟླ་ཟུང་གཅིག་སྣང་བར་མཛོད། །
བསྟན་དང་བསྟན་འཛིན་དབུ་འཕང་མཐོ་བ་དང་། །
ཕྱོགས་ལས་རྣམ་པར་རྒྱལ་བའི་དངོས་གྲུབ་སྩོལ། །
བུ་ཡི་སྐྱབས་གནས་གུ་རུ་རིན་པོ་ཆེར། །
རྩེ་གཅིག་མོས་གུས་གདུང་བས་གསོལ་འདེབས་ན། །
ཕ་ཡི་ཐུགས་རྗེའི་ཕྱག་གིས་མ་བཏང་ཀྱེ། །
བྱིན་རློབས་དབང་བསྐུར་མཆོག་ཐུན་དངོས་གྲུབ་སྩོལ། །
ཉམས་རྟོགས་རིག་པའི་རྩལ་ཆེན་སྤར་བ་དང་། །
གུ་རུ་རྗེ་དང་རྣམ་དབྱེར་མེད་པར་ཤོག །
འདི་ནས་ཚེ་འཕོས་རྔ་ཡབ་དཔལ་གྱི་རིར། །
པདྨ་འོད་ཀྱི་ཕོ་བྲང་ཆེན་པོ་དེར། །
རིག་འཛིན་མཁའ་འགྲོའི་ཚོགས་དང་དགྱེས་རྒུར་སྤྱོད། །
ལྷན་ཅིག་ཐེག་ཆེན་ཆོས་ལ་སྤྱོད་པ་དང་། །
ཚོམ་བུ་གཅིག་ཏུ་མངོན་པར་བྱང་ཆུབ་ཤོག །
ཅེས་པའང་ས་འབྲུག་ཟླ་ཚེས་ལ་ཆོས་ཀྱི་བློ་གྲོས་པས་པདྨ་ཤེལ་ཕུག་གི་གུ་རུ་བདེ་བ་ཆེན་པོའི་སྣང་བརྙན་ཡེ་ཤེས་པ་མངོན་སུམ་བཞུགས་པའི་མདུན་རྩེ་གཅིག་གསོལ་བ་བཏབ་པ་འདིས་ཀྱང་ཨོ་རྒྱན་ཆོས་ཀྱི་རྒྱལ་པོས་ཚེ་རབས་ཀུན་ཏུ་རྗེས་སུ་འཛིན་པའི་རྒྱུར་གྱུར་ཅིག །སརྦ་མངྒ་ལཾ། ཤུ་བྷཾ།། །།
