Prayer to Ngorchen Kunga Zangpo—Tibetan

༄༅། །ངོར་ཆེན་ཀུན་དགའ་བཟང་པོའི་གསོལ་འདེབས།

ན་མོ་གུ་རུ་ཨཱ་ནནྡ་བྷ་དྲཱ་ཡ།

ཀུན་མཁྱེན་ཀུན་ཏུ་དགེ་བའི་ཕྲིན་ལས་ཅན།    །

ཀུན་གཟིགས་རྫོགས་སངས་རྒྱས་ཀྱི་ལུང་བསྟན་བརྙེས།    །

ཀུན་དགའ་སྙིང་པོའི་རིང་ལུགས་ཉིན་མོར་བྱེད།    །

ཀུན་བཟང་རྡོ་རྗེ་འཆང་ལ་གསོལ་བ་འདེབས།    །

མདོ་རྒྱུད་རྒྱ་མཚོའི་གཏེར་མཛོད་ཆགས་ཐོགས་བྲལ།    །

རབ་འབྱམས་ཤེས་བྱ་ཀུན་གཟིགས་སྨྲ་བའི་སེང་།    །

སྙིང་རྗེའི་དབང་ཕྱུག་ཕྱག་ན་པད་དཀར་འཆང་།    །

གསང་འཛིན་ལག་ན་རྡོ་རྗེར་གསོལ་བ་འདེབས།    །

འཁྲུལ་པའི་དྲི་བྲལ་བློ་གྲོས་མི་ཟད་པས།    །

ཐེག་ཆེན་ཆོས་ཀྱི་སྒྲ་དབྱངས་རྟག་ཏུ་སྒྲོགས།    །

རྒྱུད་སྡེ་རྣམ་བཞིའི་ཆུ་ཀླུང་ཆེན་པོ་འདྲེན།    །

སྐལ་ལྡན་སྨིན་གྲོལ་མཛད་ལ་གསོལ་བ་འདེབས།    །

ཁྱད་པར་བིཪྺའི་ཐུགས་བཅུད་གསུང་ངག་གི    །

རྟེན་གྱི་དཀྱིལ་འཁོར་དབང་བཞིས་སྨིན་མཛད་ནས།    །

སྐུ་བཞིའི་གོ་འཕང་མཆོག་ལ་འགོད་མཛད་པ།    །

བླ་མ་དགྱེས་མཛད་རྡོ་རྗེར་གསོལ་བ་འདེབས།    །

ངེས་འབྱུང་འཕགས་པའི་ཚུལ་ཁྲིམས་ཁང་བཟང་དུ།    །

ལྟ་སྤྱོད་རྣམ་པར་དག་པའི་སྐྱེས་བུ་ནི།    །

བྱང་ཕྱོགས་ཐུབ་པའི་རྒྱལ་ཚབ་ངོར་ཆེན་རྗེར།    །

མི་ཕྱེད་གུས་པ་ཆེན་པོས་གསོལ་བ་འདེབས།    །

དཔལ་ལྡན་བླ་མའི་ཐུགས་རྗེའི་བྱིན་རླབས་ཀྱི།    །

ཟླ་ཤེལ་བདུད་རྩི་གསར་པས་རེག་པའི་མོད།    །

སྐལ་བཟང་ཚེ་དང་བློ་ཡི་ཀུནྡ་བཞད།    །

མི་མཐུན་རྒུད་པ་ཀུན་ལས་བསྐྱབ་ཏུ་གསོལ།    །

འདི་ནས་བཟུང་སྟེ་ཚེ་རབས་ཐམས་ཅད་དུ།    །

དལ་འབྱོར་རྟེན་རྙེད་སྡོམ་གསུམ་རྣམ་པར་དག  །

རང་གཞན་དོན་གཉིས་རྒྱ་མཚོ་ལྷུན་གྱིས་གྲུབ།    །

བསྟན་པ་ཕྱོགས་བཅུར་སྤེལ་བའི་བཀྲ་ཤིས་ཤོག  །

ཅེས་པའང་ས་ཟླའི་ཚེས་ ༢༥ རྗེའི་དུས་དྲན་མཆོད་པར་ཉེ་བའི་སྔ་ཆར་ཆོས་ཀྱི་བློ་གྲོས་པས་རྡོ་རྗེ་གླིང་དུ་གསོལ་བ་བཏབ་པའོ།།    །།