Red Tārā Sādhana—Tibetan

༄༅། །སྒྲོལ་མ་དམར་མོའི་སྒྲུབ་ཐབས་ཁམས་གསུམ་མྱུར་འགུགས་ཞེས་བྱ་བ་བཞུགས་སོ།།

ན་མཿཏཱ་རཱ་བྷཊྚ་ར་ཀ་ཡ།

སྒྲོལ་མ་དམར་མོའི་སྒྲུབ་ཐབས་ཁམས་གསུམ་མྱུར་འགུགས་ཀྱི་སྒྲུབ་ཐབས་ནི།  རྗེས་གནང་ཐོབ་ཅིང་དམ་ཚིག་དང་སྡོམ་པ་ལྡན་པས་སྟན་བདེ་བ་ལ་འཁོད་དེ།  མདུན་མཁར་སྐྱབས་ཡུལ་བསྒོམ་ལ།

བདག་སོགས་འགྲོ་ཀུན་བྱང་ཆུབ་བར།  །

དཀོན་མཆོག་གསུམ་ལ་སྐྱབས་སུ་མཆི།  །

འགྲོ་ལ་ཕན་པ་བསྒྲུབ་པའི་ཕྱིར།  །

སྒྲོལ་མ་དམར་མོ་བསྒོམ་པར་བགྱི།

ལན་ཅི་ནུས་དང་།

སེམས་ཅན་བདེ་ལྡན་སྡུག་བསྔལ་བྲལ།  །

བདེ་ཐོབ་བཏང་སྙོམས་ལ་གནས་ཤོག  །

ཨོཾ་སྭཱ་བྷ་ཝས་སྦྱངས།

སྟོང་པའི་ངང་ལས་བྃ་ཡིག་དང་།  །

པདྨ་དམར་པོའི་ཟེའུ་འབྲུའི་སྟེང་།  །

ཨཱཿལས་ཟླ་བའི་གདན་སྟེང་དུ།  །

ཨུཏྤལ་དམར་པོ་ཧྲཱིཿདམར་མཚན།  །

འོད་འཕྲོས་འཕགས་མཆོད་སྡིག་སྒྲིབ་སྦྱངས།  །

ཚུར་འདུས་རང་ཉིད་སྒྲོལ་མ་དམར།  །

ཞལ་གཅིག་ཕྱག་གཉིས་སྤྱན་གསུམ་མ།  །

ཕྱག་གཡས་ལྕགས་ཀྱུ་གཡོན་ཞགས་པ།  །

བཅུ་དྲུག་ལོན་པའི་ན་ཚོད་ཅན།  །

དར་དང་རིན་ཆེན་རྒྱན་གྱིས་བརྒྱན།  །

སེམས་དཔའི་སྐྱིལ་མོ་ཀྲུང་གིས་བཞུགས།  །

གནས་གསུམ་ཨོཾ་ཨཱཿཧཱུྃ་རྣམས་དང་།  །

ཐུགས་ཀར་ཧྲཱིཿཡིག་དམར་པོ་ལས།  །

འོད་འཕྲོས་ཡེ་ཤེས་པ་སྤྱན་དྲངས།  །

ཛཿཧཱུྃ་བྃ་ཧོ་དབྱེར་མེད་ཐིམ།  །

འོད་འཕྲོས་དབང་ལྷ་མདུན་མཁར་བཞུགས།  །

དབང་བསྐུར་སྒྲིབ་དག་རིགས་ཀྱི་བདག  །

འོད་དཔག་མེད་པས་དབུར་བརྒྱན་གྱུར།  །

ལྷ་ཡི་གསལ་སྣང་ལ་སེམས་གཅིག་ཏུ་བཟུང་།

དེས་སྐྱོ་ན་བཟླས་པ་བྱ་བ་ནི།

ཐུགས་ཀར་ཨུཏྤལ་དམར་པོའི་སྟེང་།  །

ཟླ་བ་ལ་གནས་ཧྲཱིཿདམར་མཐར།  །

སྔགས་ཕྲེང་ཁ་དོག་དམར་པོས་བསྐོར།  །

འོད་འཕྲོས་རྒྱལ་བ་སྲས་བཅས་ཀྱི།  །

བྱིན་རླབས་ཐམས་ཅད་དབང་དུ་བྱས།  །

ཁམས་གསུམ་སྐྱེ་འགྲོ་ཐམས་ཅད་དང་།  །

གང་འདོད་དཔལ་འབྱོར་འོད་དམར་གྱི།  །

རྣམ་པར་བསྡུས་ནས་སྔགས་ཕྲེང་ལ།  །

ཐིམ་པས་དབང་དུ་བྱས་པར་བསམ།  །

ཨོཾ་ཏཱ་རེ་ཏུཏྟཱ་རེ་ཏུ་རེ་སཾ་ཏཱ་རེ་ཏཱ་ར་ཎི་ཧྲཱིཿསྭཱ་ཧཱ།

ཅི་རིགས་བཟླ།  ཐུན་བསྡུ་ཁར་ཡེ་ཤེས་བ་མདུན་གྱི་ནམ་མཁར་བཞུགས་པ་ལ་དམིགས་ཏེ།

ཨོཾ་ཨཱརྱ་ཏཱ་རེ་ས་པཱ་རི་ཝ་ར་ཨོཾ་བཛྲ་པཱུཥྤེ་ཨཱཿཧཱུྃ།

སོགས་ནས།

ཤབྡ་བར་གྱིས་མཆོད།

ལྷ་དང་ལྷ་མིན་ཅོད་པན་སོགས་ཀྱིས་བསྟོད།

སྒྲོལ་མས་བདག་སོགས་སེམས་ཅན་གྱི།  །

སྣང་སེམས་དབང་དུ་སྡུད་པར་མཛོད།  །

ཡེ་ཤེས་པ་རྣམས་དབྱིངས་སུ་གཤེགས།  །

རང་གི་གནས་གསུམ་ཨོཾ་ཨཱཿཧཱུྃ།  །

དཀར་དམར་མཐིང་གས་མཚན་པར་གྱུར།  །

ཅེས་བརྗོད་དགེ་བ་བསྔོ།  །

ཅེས་པའང་བསྟན་པའི་སྦྱིན་བདག་ཆེན་པོ་ལ་དཀར་སྲས་མོ་རིགས་ལྡན་མ་དབང་མོ་དང་།  སྒྲོན་མ་ཟུང་ནས་འདི་འདྲ་ཞིག་དགོས་ཞེས་གསུང་བསྐུལ་ངོར།  ཆོས་ཀྱི་བློ་གྲོས་པས་བླ་མ་གོང་མའི་གསུང་ལས་བཏུས་ནས་སྦྱར་བའོ།  །བྷ་ཝ་ཏུ།  དགེའོ།  དགེའོ།  དགེའོ།།   །།