Excellent Path of Definitive Meaning—Tibetan

Schools & Systems › Mahāmudrā | Literary Genres › Songs and Poems | བོད་ཀྱི་བླ་མ།འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

English | བོད་ཡིག

འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།

Buddha Vajradhara

༄༅། །ངེས་དོན་ཕྱག་རྒྱ་ཆེན་པོའི་རྟོགས་པ་མ་འཁྲུལ་བར་བརྗོད་པ་ངེས་དོན་ལམ་བཟང་ཞེས་བྱ་བ།

ཁྱབ་བདག་རྡོ་རྗེ་འཆང་དང་ཏེ་ལོ་པ། །
ན་རོ་མེ་ཏྲི་མར་མི་དྭགས་པོ་སོགས། །
བཀའ་བརྒྱུད་གྲུབ་ཐོབ་རྒྱ་མཚོའི་ཐུགས་རྗེས་གཟིགས། །
རང་སེམས་ཞེས་པ་མི་དྲན་དགུ་དྲན་གྱི། །
གྱ་གྱུ་རིག་རིག་ཝལ་ཝལ་འདི་ཉིད་ནི། །
མ་བརྟགས་ཉམས་དགའ་ཡོད་ཡོད་འདྲ་བས་བཅིང་། །
གཟུང་འཛིན་འཁྲུལ་རྟོག་སྤང་བླང་སྣ་ཚོགས་ཀྱི། །
རེ་དང་དོགས་པས་བཅིངས་ནས་སྲིད་པར་དུབ། །
བླ་མའི་དྲིན་གྱིས་འདི་ལ་དཔྱད་པ་ན། །
བྱུང་དང་གནས་དང་འགྲོ་བས་རྣམ་པར་སྟོང་། །
གཞི་རྩ་བྲལ་ཞིང་སེམས་ཉིད་སྟོང་པ་ཆེ། །
འཁོར་འདས་དངོས་པོ་ཀུན་གྱི་གནས་ལུགས་ཡིན། །
ཆོས་དབྱིངས་མཐའ་བྲལ་ཡངས་པ་ཆེན་པོ་སྟེ། །
རིག་དང་མ་རིག་འཁོར་འདས་ཞེས་སུ་གདགས། །
རྟོགས་ན་སངས་རྒྱས་མ་རྟོགས་སེམས་ཅན་ཏེ། །
དོན་ལ་འཁོར་འདས་གཉིས་སུ་གྲུབ་པ་མེད། །
འདི་མིང་ཆོས་དབྱིངས་བདེ་གཤེགས་སྙིང་པོ་དང་། །
སེམས་ཀྱི་རྡོ་རྗེ་རྣམ་མཆོག་སྟོང་ཉིད་སོགས། །
མཚན་གྱི་རྣམ་གྲངས་མང་ཡང་དོན་ལ་གཅིག །
དེ་ཉིད་རྟོགས་བྱེད་ལམ་གྱི་རིམ་པ་ནི། །
རང་རྒྱུད་སྨིན་ཅིང་བློ་སྦྱོང་ཚོགས་བསགས་དང་། །
སྒྲིབ་སྦྱོང་མོས་གུས་གནད་དུ་བསྣུན་པ་ལས། །
བླ་མའི་བྱིན་རླབས་བརྡ་ཐབས་ཙམ་དང་ནི། །
ཡང་ན་མ་གསུང་མ་བསྒོམ་སྐད་ཅིག་གིས། །
བླ་སློབ་ཆོས་ཉིད་གཅིག་ཏུ་འདྲེས་གྱུར་ན། །
རིག་པ་ཧར་སངས་བརྗོད་བྲལ་ཕྱག་རྒྱ་ཆེ། །
ཤེས་པས་མ་བསླད་གསལ་སྟོང་ཟུང་འཇུག་ནི། །
དུས་གསུམ་དུས་མེད་རྟག་ཏུ་ཉམས་སུ་མྱོང་། །
འཛིན་རྩོལ་བྲལ་ཞིང་ཡེངས་པར་མ་ཤོར་བ། །
བསྒོམ་འདོད་བློ་ཡི་སྤྲོས་པའི་གཟེབ་ལས་གྲོལ། །
ཚོགས་དྲུག་རྟོག་ཚོགས་རང་གྲོལ་རང་ཡལ་དུ། །
ཤར་ཙམ་ཉིད་ནས་གྲོལ་བར་ཆས་པ་དང་། །
གནས་འགྱུ་རིག་གསུམ་མཉམ་པ་ཆེན་པོར་ཤེས། །
རྣམ་རྟོག་གང་སྐྱེས་ཆོས་སྐུའི་རོལ་པར་འཆར། །
མཁྱེན་བརྩེ་ནུས་པའི་ཡོན་ཏན་དཔག་མེད་ཐོབ། །
རླུང་སེམས་སྣང་བ་དབྱེར་མེད་འདྲེས་པ་ན། །
ལམ་གྱི་ཕྱག་རྒྱ་ཆེན་པོ་ཚད་དུ་ཕྱིན། །
འབྲས་བུའི་ཕྱག་ཆེན་ལུས་སེམས་སྒྲིབ་པ་བྲལ། །
མཁའ་ལྟར་ཀུན་ཁྱབ་ཡན་ལག་བདུན་ལྡན་པ། །
སྐུ་དང་ཡེ་ཤེས་ཡོན་ཏན་རྒྱ་མཚོའི་མཛོད། །
དཔལ་ལྡན་རྡོ་རྗེ་འཆང་དབང་ཐོབ་པར་འགྱུར། །

ཅེས་པའང་ཡེ་ཤེས་རྡོ་རྗེས་བྲིས་པའོ།། །།

This website uses cookies to collect anonymous usage statistics and enhance the user experience.
Decline
Accept