བླ་མ་ཡང་ཏིག་གི་གསོལ་འདེབས་ཁ་སྐོང་།

༄༅། །བླ་མ་ཡང་ཏིག་གི་གསོལ་འདེབས་ཁ་སྐོང་།

འཇམ་མགོན་འཕྲོར།

རིག་འཛིན་སྤྱི་རྗེ་པདྨ་བི་ཛ་ལ། །

གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །

འཁོར་འདས་གཉིས་འཛིན་རྟོག་པ་རང་གྲོལ་དུ། །

ད་ལྟ་ཉིད་དུ་འགྱུར་བར་བྱིན་གྱིས་རློབས། །

པདྨ་དྲི་མེད་ལེགས་པའི་བློ་གྲོས་ལ། །

གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །

གཞི་གྲོལ་རིག་པ་སྒྲིབ་མེད་མངོན་སུམ་དུ། །

ད་ལྟ་ཉིད་དུ་རྟོགས་པར་བྱིན་གྱིས་རློབས། །

སྤྲུལ་པའི་སྐུ་མཆོག་བློ་གྲོས་རྒྱ་མཚོ་ལ། །

གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །

འཆི་མེད་གཉུག་མ་མི་ཤིག་རྡོ་རྗེའི་རྫོང་། །

ད་ལྟ་ཉིད་དུ་ཟིན་པར་བྱིན་གྱིས་རློབས། །

ཅེས་པའང་དྷརྨ་མ་ཏིས་སོ།། །།