The Sweet Song of Virtue and Auspiciousness—Tibetan

༄༅། །རྒྱལ་དབང་ཐམས་ཅད་མཁྱེན་གཟིགས་ཏཱ་ལའི་བླ་མ་སྐུ་ཕྲེང་བཅུ་བཞི་པར་ཞབས་བརྟན་དུ་གསོལ་བ་དགེ་ལེགས་ཤིས་པའི་དབྱངས་སྙན་ཞེས་བྱ་བ་བཞུགས་སོ། །

ཨོཾ་སྭསྟི།

གསེར་གྱི་ལྷུན་པོ་གུ་རྒུམ་ཆབ་ཀྱིས་བཀྲུས། །

འཆར་ཁའི་ཉི་གཞོན་འོད་ཟེར་བྱེ་བས་འཁྱུད། །

ཡེ་ཤེས་རལ་གྲིས་ཕྱག་སོར་རྩེར་བརྒྱན་པ། །

བླ་མ་འཇམ་པའི་དབྱངས་ཀྱིས་དགེ་ལེགས་སྩོལ། །

མཁྱེན་རབ་ཀུན་གསལ་སྒེག་མོའི་ངོས་ཡངས་པར། །

བརྩེ་ཆེན་ཐུགས་རྗེའི་འོད་དཀར་འཛུམ་པ་ལས། །

བཟང་པོའི་ཕྲིན་ལས་བདུད་རྩིས་ས་གསུམ་ཁྱབ། །

འཇམ་མགོན་རྒྱལ་བ་གཉིས་པས་ཤིས་པ་སྩོལ། །

རྗེ༵་བཙུན༵་ངག༵་གི་དབ༵ང་ཕྱུག་ཐུགས་རྗེའི་གཏེར། །

ཁ་བ་རི་པའི་ལྷ་གཅིག་པད་དཀར་འཆང་། །

སུམ་ལྡན་དགེ་བའི་བཤེས་ཀྱི་རྣམ་པར་སྟོན། །

རྒྱལ་དབང་ཐམས་ཅད་མཁྱེན་པར་ཞབས་བརྟན་གསོལ། །

ཀུན་མཁྱེན་ཉི་མའི་གཉེན་གྱི་ལུང་གིས་བསྔགས། །

སྡོམ་བརྩོན་བློ༵་བཟ༵ང་རྒྱལ་པོའི་ཚུལ་འཆང་ཉིད། །

སླར་ཡང་བ༵སྟན་པ་འཛི༵ན་པའི་ཁྱུ་མཆོག་ཆེ། །

འཇིགས་མེད་ཆོས་ཀྱི་ཁྲི་ལ་རྟག་བཞུགས་གསོལ། །

རྒྱ༵་མཚོ༵འི་གོས་ཅན་སྲིད་ཞིའི་རྒྱན་གཅིག་པུ། །

ལྷར་བཅས་འགྲོ་བའི་བླ་མ་སྤྱན་རས་གཟིགས། །

གསང་གསུམ་མི་གཡོ་འཕོ་འགྱུར་དང་བྲལ་བ། །

ཞབས་པད་རྡོ་རྗེའི་ཁྲི་ལ་རྟག་བཞུགས་གསོལ། །

སྲིད༵་གསུམ༵་དྲེགས་ལྡན་སྤྱི་བོའི་ཐོར་ཅོག་རྩེར། །

ཞབས་རྟེན་པདྨོ་བཀོད་དེ་རང་དབ༵ང་བ༵སྒྱུར། །

མ༵ཚུངས་མེད༵་དབང་དང་སྟོབས་བཅུའི་དཔལ་གྱིས་ཕྱུག །

ཕུན་ཚོགས་སྡེ་བཞིའི་མགོན་པོ་ཞབས་བརྟན་གསོལ། །

དོན་གཉིས་ལྷུན་གྲུབ་དཔ༵ལ་ཡོན་བཟ༵ང་པོ༵་ཡི། །

རྣམ་བཞིའི་ཕྲིན་ལས་ཟླ་ཉི་ནོར་བུ་དང་། །

བུམ་བཟང་དཔག་བསམ་ཤིང་ལྟར་བསྟན་དང་འགྲོའི། །

ཉེར་འཚོའི་གཞིར་གྱུར་བསྐལ་བརྒྱར་བཞུགས་གསོལ་འདེབས། །

དེ་ལྟར་གསོལ་བ་བཏབ་བཞིན་འགྲུབ་པ་ཡི། །

བདེན་པའི་བྱིན་མཐུ་མཆོག་གསུམ་རིན་ཆེན་དང་། །

བླ་མ་ཡི་དམ་མཁའ་འགྲོའི་ནུས་མཐུ་ཡིས། །

གངས་ཅན་བསྟན་འགྲོའི་གཙུག་ནོར་ཞབས་བརྟན་གསོལ། །

ཡུལ་རིས་རྒྱལ་ཁམས་དུས་ཀྱི་རྒུད་པ་ཞི། །

ལོ་ལེགས་འབྲུ་འཕེལ་དགེ་བ་བཅུ་ལ་སྤྱོད། །

བསྟན་དང་བསྟན་འཛིན་སྡེ་ཚོགས་དར་ཞིང་རྒྱས། །

ཐུགས་མཐུན་ཁྲིམས་གཙང་བསླབ་གསུམ་དབང་འབྱོར་ཤོག །

བསྟན་པའི་རྩ་ལག་བོད་ལྗོངས་སའི་ཐིག་ལེ། །

ཆོས་འཁོར་རྣམ་གསུམ་ཡུན་དུ་བརྟན་ཅིང་མཆོད། །

དགའ་བ་བརྒྱ་ལྡན་འཆི་མེད་ཕོ་བྲང་གི །

ཆབ་སྲིད་མི་ནུབ་འཛམ་གླིང་ཀུན་ཁྱབ་ཤོག །

ཅེས་པའང་འཇམ་དབྱངས་འཁོན་གྱི་གདུང་རིགས་དྲི་མ་མེད་པ་ཤྲཱི་ས་སྐྱ་པ་ཕུན་ཚོགས་ཕོ་བྲང་གི་གདུང་སྲས་རིན་པོ་ཆེ་ངག་དབང་ཀུན་དགའ་བསོད་ནམས་འཇིགས་བྲལ་ཕྱོགས་ལས་རྣམ་པར་རྒྱལ་བའི་སྡེའི་བཀའ་ལུང་གསེར་གྱི་ཅོད་པཎ་སྤྱི་བོའི་གཙུག་ཏུ་བཀོད་དེ། དུས་མཐའི་ཆོས་སྨྲ་བའི་གཟུགས་བརྙན་མཁྱེན་བརྩེའི་དབང་པོའི་སྤྲུལ་མིང་འཛིན་པ་འཇམ་དབྱངས་ཆོས་ཀྱི་བློ་གྲོས་པས་རྫོང་གསར་བཀྲ་ཤིས་ལྷ་རྩེའི་ཆོས་གྲྭའི་གཟིམ་བསྐྱིལ་དུ་གུས་ཤིང་དང་བའི་ཡིད་ཀྱིས་གསོལ་བ་བཏབ་བཞིན་བྲིས་པ་མཆོག་ཏུ་དགེ་ཞིང་བཀྲ་ཤིས་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ། །སརྦ་དཱ་མངྒ་ལཾ།། །།