Daily Practice of Vasudhārā—Tibetan
Deities › Vasudhārā | Practices › Wealth & Prosperity | Collections & Cycles › Rinchen Terdzö | Collections & Cycles › Khyentse Kabab | བོད་ཀྱི་བླ་མ། › འཇམ་དབྱངས་མཁྱེན་བརྩེའི་དབང་པོ།
Vasudhārā from Tsasum Gyutrul Drawa
Courtesy of Dzongsar Khyentse Rinpoche
Further information:
༄༅། །འཕགས་མ་ནོར་རྒྱུན་ཡབ་ཡུམ་གྱི་རྒྱུན་ཁྱེར་སྙིང་པོར་དྲིལ་བ་བཞུགས་སོ། །
ཨོཾ་སྭསྟི། འཕགས་མ་ནོར་རྒྱུན་མའི་སྒྲུབ་ཐབས་འདོད་རྒུའི་སྤྲིན་གྱི་ཏིང་ངེ་འཛིན་ཆེན་པོའི་སྙིང་པོ་ཡབ་ཡུམ་གཙོ་རྐྱང་གི་རྣལ་འབྱོར་ཉམས་སུ་བླང་བར་འདོད་ན།
དབང་ཐོབ་ཅིང་དམ་ཚིག་ལ་གནས་པས། གཞན་གྱི་དོན་དུ་སྙིང་རྗེ་ཆེན་པོས་ཡིད་རང་དབང་མེད་པར་བསྐྱོད་དེ། ཕན་བདེ་བླ་ན་མེད་པའི་སྡེ་བཞིའི་དཔལ་འབྱོར་ཕུན་སུམ་ཚོགས་པ་རང་དབང་བསྒྱུར་བར་འདོད་པའི་བསམ་པས།
མདུན་གྱི་ནམ་མཁར་སྐྱབས་ཡུལ་རྣམས་མངོན་སུམ་བཞུགས་པའི་སྤྱན་སྔར།
ན་མོ༔ བདག་དང་མཐའ་ཡས་སེམས་ཅན་ཀུན༔
དཀོན་མཆོག་རྩ་གསུམ་ལྷ་ཚོགས་ལ༔
གུས་པས་སྐྱབས་མཆི་སེམས་ཅན་དོན༔
བླ་མེད་བྱང་ཆུབ་བསྒྲུབ་པར་བགྱི༔
ལན་གསུམ་གྱིས་སྐྱབས་སེམས་དང་།
སེམས་ཅན་བདེ་དང་ལྡན་གྱུར་ཅིག༔
སྡུག་བསྔལ་ཀུན་དང་བྲལ་བར་ཤོག༔
བདེ་དང་རྟག་ཏུ་མི་འབྲལ་ཞིང༔
ཆོས་ཀུན་མཉམ་ཉིད་རྟོགས་པར་ཤོག༔
ཅེས་ཚད་མེད་བཞིས་བློ་སྦྱོང་།
ཛཿཧཱུྃ་བཾ་ཧོཿ
ཚོགས་ཞིང་རྣམས་རང་ལ་ཐིམ་པར་བསམ།
དངོས་གཞི་ལྷ་བསྐྱེད་པ་ནི།
ཨ༔ འཁོར་འདས་ཆོས་ཀུན་མཉམ་པ་ཉིད༔
ཟུང་འཇུག་འདུས་མ་བྱས་པའི་དབྱིངས༔
རིག་གདངས་བརྩེ་བའི་སྙིང་རྗེའི་རྩལ༔
རིན་ཆེན་སྤྲིན་གྱི་ཏིང་འཛིན་ལས༔
རྒྱུ་ཡི་ས་བོན་བཾ་སེར་པོ༔
གསེར་མདོག་ཉི་མ་ལྟ་བུར་ཤར༔
དེ་ལས་འོད་འཕྲོས་སྣོད་བཅུད་སྦྱངས༔
རིན་ཆེན་བཀོད་པའི་ཞིང་ཁམས་དབུས༔
སྣ་ཚོགས་པད་ཟླའི་གདན་གྱི་སྟེང༔
བཾ་ཡིག་ཡོངས་གྱུར་སྐད་ཅིག་གིས༔
འཕགས་མ་ནོར་རྒྱུན་ལྷ་མོ་ནི༔
གསེར་མདོག་ཞལ་གཅིག་ཕྱག་གཉིས་པ༔
ཕྱག་གཡས་མཆོག་སྦྱིན་ཕྱག་རྒྱ་ཡིས༔
དགོས་འབྱུང་གང་བའི་འབྲས་བུ་དང༔
གཡོན་པས་སྐྱབས་སྦྱིན་འབྲས་སྙེ་ནི༔
འདོད་རྒུའི་ཆར་འབེབ་རབ་ཏུ་བསྣམས༔
སྣ་ཚོགས་དར་གྱི་ན་བཟའ་དང༔
རྣམ་མང་རིན་ཆེན་རྒྱན་གྱིས་བརྒྱན༔
མཆོག་ཏུ་སྒེག་ཅིང་འཛུམ་པའི་ཉམས༔
ཞབས་ཟུང་སེམས་མའི་སྐྱིལ་ཀྲུང་བཞུགས༔
རང་འོད་ཐབས་མཆོག་ཛམྦྷ་ལ༔
སེར་གསལ་ཞལ་གཅིག་ཕྱག་གཉིས་པ༔
ཕྱག་གཡས་ཡུམ་གྱི་མགུལ་ནས་འཁྱུད༔
བཱི་ཛ་པཱུ་རའི་འབྲས་བུ་བསྣམས༔
གཡོན་པས་ནོར་གྱི་རྒྱུན་སྩོལ་བའི༔
ནཻ་འུ་ལེ་ཡི་མགྲིན་པ་གཟུང༔
ཨུཏྤལ་དར་དང་རིན་ཆེན་བརྒྱན༔
སྒེག་ཅིང་རྗེས་ཆགས་གཏུམ་པའི་ཉམས༔
གནས་གསུམ་རྡོ་རྗེའི་འབྲུ་གསུམ་མཚན༔
སྐུ་གསུང་ཐུགས་སུ་ལྷུན་གྱིས་གྲུབ༔
བྱང་སེམས་བདུད་རྩིས་དབང་བསྐུར་བས༔
ཡེ་ཤེས་རིགས་ལྔའི་ཕྱག་རྒྱས་བཏབ༔
ཨོཾ་ཨཱཿཧཱུྃ༔
ཏྲཱཾ་ཧཱུྃ་ཨོཾ་ཧྲཱིཿཨཱ༔
ཨོཾ༔ བཅོམ་ལྡན་ལྷ་མོ་ནོར་རྒྱུན་མ༔
ཡབ་ཡུམ་སྤྲུལ་པ་འཁོར་དང་བཅས༔
སྔོན་གྱི་ཐུགས་དམ་རྗེས་དགོངས་ཏེ༔
གནས་འདིར་མྱུར་དུ་གཤེགས་སུ་གསོལ༔
ཨོཾ་ཤྲཱི་སརྦ་བཱ་སུ་དྷཱ་རི་ཛམྦྷ་ལ་ས་པ་རི་ཝཱ་ར་ཨེ་ཧྱ་ཧི༔ མ་ཧཱ་ཀ་རུ་ཎི་ཀ་དྲྀ་ཤྱ་ཧོ༔
ས་མ་ཡ་ཧོ༔ ས་མ་ཡ་སཏྭཾ༔
ཛཿཧཱུྃ་བཾ་ཧོ༔
ཨ་ཏི་པཱུ་ཧོ༔ པྲ་ཏཱིཙྪ་ཧོ༔
ཨོཾ༔ མཆོད་པའི་ཕྱག་རྒྱ་ཆེན་པོ་ནི༔
སེམས་ཀྱི་ཡིད་བཞིན་རིན་ཆེན་གཏེར༔
ཉེར་སྤྱོད་འདོད་ཡོན་བསམ་མི་ཁྱབ༔
ཀུན་ཏུ་བཟང་པོའི་སྤྲིན་གྱིས་མཆོད༔
ཨོཾ་ཤྲཱི་བཱ་སུ་དྷཱ་རི་ཛམྦྷ་ལ་ས་པ་རི་ཝཱ་ར་ཨརྒྷཾ་ཨ༔
པཱ་དྱཾ་པཾ༔
པུཥྤེ་ཏྲཱཾ༔
དྷཱུ་པེ་ཧཱུྃ༔
ཨཱ་ལོ་ཀེ་ཧྲཱི༔
གནྡྷེ་ཨཱ༔
ནཻ་བིདྱཱ་ཨཾ༔
ཤབྡ་ཧོ༔
རཱུ་པ༔ ཤབྡ༔ གནྡྷེ༔ ར་ས༔ སྤརྴེ༔ དྷརྨ་དྷཱ་ཏུ་ཧོ༔
སརྦ་པཱུ་ཛ་ག་ག་ན་མེ་གྷ་ས་མ་ཡེ་ཧཱུྃ༔
ཨོཾ༔ རིན་ཆེན་རྣམ་པར་བལྟ་བ་ཡི༔
ཡེ་ཤེས་གསེར་མདོག་ཡིད་འོང་སྐུ༔
མཚན་དཔེའི་སྒྱུ་འཕྲུལ་རོལ་པས་མཛེས༔
དཀྱིལ་འཁོར་དབང་ཕྱུག་མ་ལ་འདུད༔
བཟླས་པ་བྱ་བ་ནི།
རང་གི་ཐུགས་ཀའི་དཔལ་བེ་འུར༔
བརྟན་གཡོའི་དྭངས་མ་འོད་ལྔའི་ཀློང༔
མི་འགྱུར་ཐུགས་སྲོག་བཾ་ཡིག་མཐར༔
སྔགས་ཀྱི་ཕྲེང་བས་བསྐོར་བ་ལས༔
འོད་འཕྲོས་རྒྱལ་བ་སྲས་བཅས་མཆོད༔
འགྲོ་ཀུན་དབུལ་ཕོངས་སྡུག་བསྔལ་བསལ༔
འཁོར་འདས་འདོད་རྒུའི་དགེ་མཚན་ཀུན༔
ཉི་མ་འཆར་ཀའི་མདངས་ལྟར་བསྡུས༔
ནམ་མཁའི་མཛོད་ལ་དབང་བསྒྱུར་བའི༔
ཡིད་བཞིན་དངོས་གྲུབ་མཆོག་ཐོབ་གྱུར༔
ཨོཾ་བཱ་སུ་དྷཱ་རི་སྭཱ་ཧཱ༔
ཅི་ནུས་དང་།
ཨོཾ་ཛམྦྷ་ལ་ཛ་ལེནྡྲ་ཡ་སྭཱ་ཧཱ༔
ཞེས་པའང་ཅི་ནུས་བཟླས།
མཐར་བསྡུ་རིམ་ནི།
ཐུགས་ཀའི་ས་བོན་འོད་ཟེར་གྱིས༔
འཁོར་འདས་འོད་ཞུ་རང་ལ་འདུས༔
ཐུགས་སྲོག་ནཱ་ད་འོད་གསལ་དབྱིངས༔
མི་དམིགས་སྟོང་པའི་ངང་དུ་ཐིམ༔
ཞེས་བརྗོད་ཅིང་བསམ་ལ་མཉམ་པར་གཞག །
སླར་ཡང་རང་ཉིད་ལྷ་ཡི་སྐུ །
ཟུང་འཇུག་སྒྱུ་འཕྲུལ་དྲྭ་བ་ཆེ། །
སྣང་གྲགས་རྟོག་པའི་ཆོས་ཇི་སྙེད༔
འཕགས་མའི་གསང་གསུམ་རོལ་པར་ཤར༔
ཞེས་ཐུན་མཚམས་ཀྱི་ལྷ་སྐུར་ལྡངས་ལ།
དགེ་བ་འདི་ཡིས་མྱུར་དུ་བདག །
ནོར་རྒྱུན་ལྷ་མོ་འགྲུབ་གྱུར་ནས། །
འགྲོ་བ་གཅིག་ཀྱང་མ་ལུས་པ། །
དེ་ཡི་ས་ལ་འགོད་པར་ཤོག །
ཅེས་བསྔོ་སྨོན་དང་།
འབད་དང་རྩོལ་བས་མ་གོས་པ། །
ཡིད་བཞིན་ནོར་བུ་དཔག་བསམ་བཞིན། །
སེམས་ཅན་རེ་བ་སྐོང་མཛད་པ། །
བསམ་པ་འགྲུབ་པའི་བཀྲ་ཤིས་ཤོག །
ཅེས་སོགས་ཤིས་པ་བརྗོད་པ་ཇི་ལྟར་རིགས་པས་མཚམས་སྦྱར་ཏེ་སྤྱོད་ལམ་ལ་འཇུག་གོ །
ཞེས་པའང་མཚོ་སྐྱེས་བླ་མ་དགྱེས་པའི་འབངས་པདྨ་འོད་གསལ་མདོ་སྔགས་གླིང་པས་བྲིས་པ་དགེ་ལེགས་མཆོག་ཏུ་གྱུར་ཅིག །སརྦ་དཱ་མངྒ་ལཾ།། །།
