ཀློང་ཆེན་སྙིང་གི་ཐིག་ལེ་ལས་བདེ་སྟོང་རླུང་གི་རྫོགས་རིམ་སྙན་རྒྱུད་ཤོག་དྲིལ་ཡིད་བཞིན་ནོར་བུ༔
འུྃཿ ཀློང་ཆེན་སྙིང་གི་ཐིག་ལེ་ལས་བདེ་སྟོང་རླུང་གི་རྫོགས་རིམ་སྙན་རྒྱུད་ཤོག་དྲིལ་ཡིད་བཞིན་ནོར་བུ་བཞུགས༔
ཀུན་བཟང་གདོད་མའི་ཀློང་ལ་ཕྱག་འཚལ་ལོ༔
མ་འོངས་དུས་ཀྱི་སེམས་ཅན་རྣམས༔
ཚེ་ཐུང་བསོད་ནམས་ལོངས་སྤྱོད་དབུལ༔
བསྒྲུབ་པའི་ལོང་མེད་སྙིང་རུས་ཆུང་༔
དེ་ཚེ་སྐུ་གསུམ་བཞུགས་སྟངས་ལ༔
བརྟེན་ནས་འོད་གསལ་རྫོགས་ཆེན་དོན༔
རྩོལ་མེད་ལྟ་བའི་ལོང་མེད་ན༔
གནད་ལ་བརྟེན་པའི་ཐབས་ཀྱི་ལམ༔
རླུང་སེམས་དབྱེར་མེད་ངེས་པའི་གནད༔
བདུན་ཕྲག་གསུམ་གྱིས་འཁོར་བ་ལ༔
མི་ལྡོག་ལམ་རྟགས་ཡོན་ཏན་ཀུན༔
མངོན་གྱུར་སྙན་བརྒྱུད་ཟབ་མོའི་ཆོས༔
རྡོ་རྗེ་སེམས་དཔའི་གསང་ལམ་ཆེ༔
འདི་ལས་གཞན་དུ་ངས་མ་བཤད༔
བདེན་རྫུན་ལག་ཏུ་ལོང་ལ་ལྟོས༔
གཅིག་ལས་གཉིས་སུ་སྤེལ་བས་ན༔
དམ་ཚིག་ཉམས་པས་དམྱལ་བར་ལྟུང་༔
ཁྱད་པར་ཁ་མཁས་ཁོང་གནག་ཅིང་༔
གཡོ་སྒྱུས་བླ་མའི་ངོ་སྲུང་བའི༔
དྲེད་པོ་ཆོས་ཀྱི་རྒྱུས་ཅན་ལ༔
གདམས་པ་འདི་ནི་རླུང་ཕྱོགས་ཙམ༔
བསྟན་ཀྱང་སྲོག་གི་གཤེད་མར་བྱེད༔
དེ་ཕྱིར་སྙིང་ལས་གཅེས་པར་ཟུངས༔ ས་མ་ཡ༔
དང་པོ་མལ་ནས་ཧར་ལངས་ཏེ༔
ལྟོ་སྟོང་རླུང་རིག་དྭངས་པའི་ཚེ༔
སྔོན་འགྲོ་སྤྱི་དང་ཁྱད་པར་དུ༔
བླ་མའི་རྣལ་འབྱོར་གནད་དུ་བསྣུན༔
མོས་གུས་གདུང་ཞིང་དབང་བཞི་བླང་༔
དངོས་གཞི་ལུས་གནད་དྲང་པོར་བསྲངས༔
རང་ཉིད་རིག་འཛིན་རྡོ་རྗེ་ཆོས༔
སྔོ་སྐྱ་ཞལ་གཅིག་ཕྱག་གཉིས་པ༔
བརྐྱང་བསྐུམ་འདོར་སྟབས་ཞི་མ་ཁྲོ༔
རྣལ་འབྱོར་དམར་མོ་གྲི་ཐོད་ཅན༔
དང་འཁྲིལ་རྡོར་དྲིལ་བསྣོལ་ཐབས་སྦྱོར༔
ཡབ་ཡུམ་གཉིས་སུ་མེད་པ་ཡི༔
སྐུ་དབུས་དྲང་པོར་རྩ་དབུ་མ༔
མཚན་ཉིད་བཞི་ལྡན་ཆོས་ཀྱི་སྐུ༔
གཡས་གཡོན་རོ་རྐྱང་ལོངས་སྤྲུལ་གཉིས༔
ལྟེ་འོག་དབུ་མའི་མར་སྣ་ལ༔
རོ་རྐྱང་རྣམ་གཉིས་ཆུད་པ་ཡི༔
ཡར་སྣ་ལྟག་པ་ནས་གུག་སྟེ༔
སྣ་བུག་གཉིས་སུ་ཧ་རེ་ཟུག༔
དབུ་མའི་ཡར་སྣ་
འཁྱིལ༔ ༼ཁ་ཟླུམ་འཁྱིལ།༽
རོ་རྐྱང་གཉིས་ནས་ལས་ཀྱི་རླུང་༔
གཡས་གཡོན་རེས་མོས་བདུན་བདུན་འབུད༔
ཉོན་མོངས་ལྔ་དང་འབྱུང་བ་ལྔར༔
བརྟེན་པའི་རླུང་དུག་སངས་ཀྱིས་ཐོན༔
རྩ་སྦུགས་སྐྱོན་དང་བྲལ་བར་བསམ༔
དེ་ནས་ཧ་ཞེས་དབུགས་བཏང་ལ༔
ངལ་བསོ་ཤེས་པ་རྣལ་དུ་ཕབ༔ 
༼ཧ་སྤྲུགས་དང་འབེབས་ཆུང་།༽
དེ་ནས་སྙིང་གུར་སྨུག་པོའི་དབུས༔
ཀུན་བཟང་མཐིང་ག་མཉམ་གཞག་ཅན༔
ཆེ་ཆུང་སྲན་མ་ཙམ་པ་ལ༔
སྐྱེ་མཆེད་ཤིན་ཏུ་དངས་པར་གསལ༔
དེ་ཡི་ཐུགས་ཀར་འོད་ལྔའི་ཐིག༔
ཟླུམ་པོར་འཁྱིལ་བའི་ནང་ཁོངས་སུ༔
དངས་གསལ་སྐྱེ་མེད་སྲོག་
༼ཡིག་ཨཱཿ༽
གསལ་འཚེར་སྤུ་ཡིས་བྲིས་ལྟར་གསལ༔
དེ་ནས་སྦྱོར་བ་བཞི་ལྡན་གྱིས༔
གནད་དང་ལྡན་པས་རླུང་རྔུབས་ལ༔
རོ་རྐྱང་ལམ་བརྒྱུད་སྙིང་དབུས་སྐྱིལ༔
་བྱས་ཏེ༔ ༼༼འོག་རླུང་ཅུང་ཟད་རྔུབས་བྱས་ཏེ༔ ཞལ་ཤེས་རླུང་ལྟེ་བར། ཁ་སྦྱར་དམིགས་པ་སྙིང་གར་གཏོད། རླུང་རྔུབས་བཏང་གཉིས་ཀར་ཨཱ༔ ལ་བསྟིམ༔ མངྒ་ལཱ༎༽༽
རླུང་ཡིག་རིག་པ་གཅིག་ཏུ་དྲིལ༔
ཞལ་ཤེས་གནད་དང་ལྡན་པ་ཡིས༔
རླུང་ཁུག་བརྒྱའམ་བདུན་ཅུ་ཐམ༔
སུམ་ཅུ་ལ་སོགས་ཐུན་རེང་འབད༔
མན་ངག་གནད་དང་མི་ལྡན་ན༔
སྲོག་རྩར་ལས་ཀྱི་རླུང་ཞུགས་ནས༔
སྨྱོ་བའི་ཉེན་ཡོད་ཁེ་ཉེན་ཆེ༔
གནད་དུ་སོང་ན་སྲོག་ཐུར་གྱི༔
རླུང་གཉིས་གཅིག་ཏུ་འདྲེས་གྱུར་ནས༔
དབུ་མར་ཞུགས་གནས་ཐིམ་གསུམ་གྱི༔
རང་རྩལ་རྫོགས་པའི་རྟེན་འབྲེལ་ལས༔
བུམ་ཅན་རིལ་པ་ཞབས་ཚགས་ཅན༔
མངོན་དུ་སྣང་ཞིང་འོག་རླུང་ལ༔
བཤང་པའི་དྲི་མ་མི་འབྱུང་ཞིང་༔
དྲི་ཆུ་ཆུ་གཙང་ལྟར་འབབ་སོགས༔
ཐུན་མོང་ཡོན་ཏན་བསམ་ལས་འདས༔
ཁྱད་པར་ལྟེ་བའི་རྩ་མདུད་གྲོལ༔
དང་པོའི་ས་ཡི་རྟོགས་པ་འཆར༔
མངོན་སུམ་སྣང་བ་ལྷུག་པར་མཐོང་༔
འདི་ལ་ཐེ་ཚོམ་འགའ་ཡང་མེད༔ ས་མ་ཡ༔
འདི་ནི་རྫོགས་རིམ་ཀུན་གྱི་བཅུད༔
དབུ་མར་ཡེ་ཤེས་རླུང་ཟིན་པས༔
གཏུམ་མོའི་ནང་ནས་ཡང་རྩེ་ཡིན༔
སེམས་ཉིད་ཆོས་སྐུར་གནས་དག་པས༔
འོད་གསལ་ཀུན་གྱི་རྒྱལ་པོར་འགྱུར༔
སྣང་བའི་རྫུན་ཕུགས་རྡིབ་པ་ཡིས༔
སྒྱུ་མ་མ་བཅོས་རང་ལ་ཤར༔
གང་ཤར་རྣམ་རྟོག་མ་ཡན་པ༔
རྨི་ལམ་ཀླུངས་ཚུད་སྤྲུལ་བསྒྱུར་ནུས༔
ཐ་མལ་རྣམ་རྟོག་ཡེ་ཤེས་སུ༔
འཕོས་པས་འཕོ་བའི་ཡང་རྩེ་ལ༔
སྒོ་གསུམ་རྡོ་རྗེ་གསུམ་ལྡན་གྱི༔
གྲོང་དུ་འཇུག་པས་གྲོང་འཇུག་མཆོག༔
གསང་སྔགས་ཀུན་གྱི་འབྲས་བུ་ཡིན༔ ས་མ་ཡ༔
བདེ་སྟོང་རླུང་གི་རྫོགས་རིམ་ལས༔ འབར་འཛག་དྲོད་ཀྱི་རྣལ་འབྱོར་ནི༔
རྩ་གསུམ་སྔ་མ་ཇི་བཞིན་ལ༔
དབུ་མའི་ཡར་སྣར་ཧེ་རུ་ཀ༔
དཀར་ཆ་ཧཾ་ཡིག་རང་བཞིན་ལ༔
མར་སྣར་དམར་ཆ་གནམ་ཞལ་མ༔
ཨ་ཤད་འོད་ཀྱི་རྣམ་པར་གསལ༔
རོ་རྐྱང་གཉིས་ནས་རླུང་རྔུབས་ཏེ༔
ལྟེ་བའི་གནམ་ཞལ་སྦར་བ་ལས༔
ཤེས་རབ་ཡེ་ཤེས་ལྷབ་ཀྱིས་འབར༔
དེ་ཡང་ངོ་བོ་བདེ་བ་ལ༔
རང་བཞིན་གསལ་ཞིང་རྣམ་པ་ཚ༔
རྩེ་མོ་རྣོ་ལ་འཁྱུག་པ་ཡིས༔
ལྟེ་བའི་རྩ་འཁོར་ཡོངས་གང་ཞིང་༔
བདེ་དྲོད་གློ་བུར་སྐྱེས་པར་བསམ༔
དེ་བཞིན་ཆོས་ཀྱི་འཁོར་ལོ་དང་༔
ལོངས་སྤྱོད་བདེ་ཆེན་འཁོར་ལོ་སོགས༔
སོ་སོའི་གནས་སུ་རླུང་ཁུག་ནི༔
ཉེར་གཅིག་བདུན་སོགས་གོང་དང་མཚུངས༔
དེ་ནས་སྤྱི་བོའི་ཧཾ་ཡིག་ལ༔
མེ་ལྕེས་རེག་པ་ཙམ་གྱིས་ནི༔
བདེ་བ་གཡོས་ཤིང་ཐིག་ལེ་ཞུ༔
ཞུན་གྱི་མར་མེ་འཐིགས་པ་ལྟར༔
སྤྱི་བོའི་རྩ་འདབ་ཐམས་ཅད་ཁེངས༔
རྩ་ཁམས་དཔའ་བོ་ཌཱཀྐི་ནི༔
ཏིལ་གང་ཕྱུར་བ་ལྟ་བུ་ལ༔
བདེ་སྟོང་བདུད་རྩིའི་མཆོད་པ་ཕུལ༔
ཚོགས་གཉིས་རྫོགས་ཤིང་སྒྲིབ་གཉིས་བྱང་༔
བུམ་དབང་མངོན་དུ་ཐོབ་བྱས་ཏེ༔
དགའ་བའི་ཡེ་ཤེས་སྐྱེས་པར་བསམ༔
དེ་བཞིན་མགྲིན་པ་སྙིང་ག་དང་༔
ལྟེ་བ་ལ་ཡང་གོང་བཞིན་དུ༔
རིག་པ་སྤྲེ་ཞིང་གསང་དབང་དང་༔
ཤེས་རབ་ཡེ་ཤེས་བཞི་པའི་དབང་༔
རིམ་བཞིན་མངོན་དུ་ཐོབ་བྱས་ཤིང་༔
མཆོག་དགའ་ཁྱད་པར་ལྷན་སྐྱེས་ཀྱི༔
ཡེ་ཤེས་ཉམས་སུ་མྱོང་བར་བསམ༔
དེ་ནས་རྩ་གསུམ་འདུས་མདོ་རུ༔
དྭངས་མ་ཨ་ཤད་ལ་ཕོག་ཚ༔
སྣུམ་ཁོལ་བདུད་རྩི་བླུགས་པ་བཞིན༔
མེ་དང་བདུད་རྩི་གཉིས་མེད་འབར༔
རིག་པ་རྩལ་གྱི་དབང་ཆེན་ཐོབ༔
སྣང་སྲིད་ཐམས་ཅད་མེ་ཡིས་ཁེངས༔
སྣོད་དང་བཅུད་དུ་འཛིན་པ་ཡི༔
རྣམ་རྟོག་བག་ཆགས་ཐམས་ཅད་བསྲེག༔
མཐར་ནི་རང་ལུས་མེ་དང་བཅས༔
ཇེ་ཆུང་ཇེ་ཆུང་སྤྲོས་བྲལ་ངང་༔
བསྡུས་ལ་གསལ་སྟོང་ངང་དུ་བཞག༔
གེགས་སེལ་ཧ་སྦྲུགས་བརྡབ་ཆུང་དང་༔
ངལ་བསོ་ཤེས་རིག་རྣལ་དུ་དབབ༔
འདི་ལྟར་གནད་དུ་ཕེབས་གྱུར་ན༔
བདེ་དྲོད་མེ་འབར་གོས་མི་དགོས༔
འབྱུང་བ་ལྔ་ལ་རང་དབང་བསྒྱུར༔
མ་དག་ལས་ཀྱི་རླུང་དག་པས༔
སྤྱན་དང་མངོན་ཤེས་ལ་སོགས་ཐོབ༔
ཐུན་མོང་ཡོན་ཏན་བསམ་མི་ཁྱབ༔
མངོན་ཞེན་སྐྱེས་ན་རུ་ཏྲར་གོལ༔
ཅི་ཕྱིར་འབྲས་བུའི་ཡོན་ཏན་ནི༔
སྦངས་རྟོགས་མཐའ་རུ་ཕྱིན་པའི་དབྱིངས༔
ཆོས་ཟད་བློ་འདས་ཆེན་པོ་སྟེ༔
དེ་ཕྱིར་དེ་དག་ལམ་རྟགས་ཀྱི༔
ཡོན་ཏན་ཙམ་ལས་ས་ཟིན་མེད༔
སྤངས་ཐོབ་བྲལ་བའི་རྫོགས་ཆེན་ནི༔
ཆོས་རྣམས་ཀུན་གྱི་གྲོལ་སའོ༔ ས་མ་ཡ༔
འདི་ལྟར་སྲོག་རྩོལ་རླུང་གི་གནད༔
བརྒྱ་ཕྲག་འདུས་པའི་ཡང་ཟབ་བཅུད༔
སྙིང་མཛོད་སྨུག་པོ་ཀློང་གི་སྒྲོམ༔
སྐུ་གདུང་འབར་བའི་བརྡའ་རིས་ཅན༔
མཁའ་འགྲོའི་ཐུགས་གསང་ནམ་མཁའ་མཛོད༔
གཏེར་བཅུད་འདུས་པའི་ཕོ་བྲང་ནས༔
བརྡའ་ཚིག་རྡོ་རྗེའི་དབྱངས་སུ་བསྒྱུར༔
སྐལ་ལྡན་འགའ་ཡི་སྤྱོད་ཡུལ་ལས༔
གཞན་དུ་མ་ཡིན་དམ་ཚིག་རྒྱ༔
སྙིང་འདྲ་གཅིག་ལས་ཤོར་ར་རེ༔
འདི་དང་རྫོགས་ཆེན་མ་བུ་གསུམ༔
ཉམས་སུ་བླངས་ནས་མ་གྲོལ་ན༔
པདྨས་བསླུས་སོ་ཕྱི་རབས་རྣམས༔
ལས་འཕྲོ་ཅན་གྱི་དཔལ་དུ་ཤོག༔
སྐུའི་རྒྱ༔ གསུང་གི་རྒྱ༔ ཐུགས་ཀྱི་རྒྱ༔
དཔལ་སྔགས་ཀྱི་སྲུང་མས་དམ་ཉམས་བཀའ་རྐུན་ལོག་སྲེད་ཅན་གྱི་ལག་ཏུ་མ་བཏང་ཞིག༔ ན་རཀྐན༔
