མཁན་སློབ་ཆོས་གསུམ་གྱི་གསོལ་འདེབས།

༄༅། །མཁན་སློབ་ཆོས་གསུམ་གྱི་གསོལ་འདེབས།

བླ་མ་སྐུ་གསུམ་སྐུ་ལྔ་མཚན་མཆོག་བརྒྱད། །

མཁན་སློབ་ཆོས་གསུམ་རྗེ་འབངས་ཉེར་ལྔའི་ཚོགས། །

ཁྱད་པར་རིག་འཛིན་རྒྱལ་བ་མཆོག་དབྱངས་ལ། །

གསོལ་བ་འདེབས་སོ་བྱིན་གྱིས་རླབས་ཏུ་གསོལ། །

སོ་ཐར་ཚུལ་ཁྲིམས་མཁན་ཆེན་རྗེ་དང་མཉམ། །

བྱང་སེམས་གཞན་ཕན་ཆོས་རྒྱལ་རྗེ་དང་མཉམ། །

གསང་ཆེན་གྲུབ་མཐའ་སློབ་དཔོན་རྗེ་དང་མཉམ། །

བདག་སོགས་སྐྱབས་གནས་རྗེ་དང་མཉམ་པར་ཤོག །

ཅེས་རྟེན་བཅས་པདྨའི་རིག་པ་འཛིན་པའི་ངོར། སྤྲེལ་ཟླའི་༥ཚེས་༢༥བཅུའི་ཚོགས་མཆོད་དང་འབྲེལ་པདྨ་ཕྲིན་ལས་སྙིང་པོས་དཔལ་གྱི་བསམ་ཡས་མཆིམ་ཕུར་སྦྱར་བ་དགེ་ལེགས་འཕེལ།། །།