བཤགས་པ།
༄༅། །བཤགས་པ།
ཨོཾ། རིག་འཛིན་བླ་མ་བདེ་གཤེགས་ཞི་ཁྲོ་དང་། །
དཔའ་བོ་མཁའ་འགྲོ་ཆོས་སྲུང་དམ་ཚིག་ཅན། །
དབང་སྐུར་མགོན་པོ་ཡེ་ཤེས་སྤྱན་མངའ་བ། །
ཀུན་མཁྱེན་གསལ་བའི་དགོངས་པ་བླ་ན་མེད། །
ཐུགས་རྗེ་དངོས་གྲུབ་བྱིན་རླབས་རྒྱ་མཚོའི་བདག །
བདག་གི་ནོངས་པ་བཤགས་ལ་དགོངས་སུ་གསོལ། །
ངང་ཉིད་ཡེ་ནས་སངས་རྒྱས་ཡིན་མོད་ཀྱང་། །
རྟོག་པའི་དབང་གིས་འཁོར་བ་འདིར་འཁྱམས་ནས། །
ལས་དང་ཉོན་མོངས་བཟོད་དཀས་ཡུན་རིང་མནར། །
རྒྱུན་རིང་ཤུགས་དྲག་རྟོག་པའི་རྦ་རླབས་གཡོ། །
སྡུག་བསྔལ་སྣ་ཚོགས་དབང་གིས་ཉམས་རེ་ཐག །
འདི་ལ་སྐྱབས་དང་སྐྱོབས་པར་མཛད་དུ་གསོལ། །
བདག་ནི་ཐོག་མ་མེད་ནས་ད་ལྟའི་བར། །
ཉོན་མོངས་འདོད་ཆགས་ཞེ་སྡང་གཏི་མུག་ཞིང་། །
ང་རྒྱལ་ཕྲག་དོག་འཁྲུལ་པའི་ཀུན་བསླང་ནས། །
སྲོག་གཅོད་མ་བྱིན་བླངས་དང་མི་ཚངས་སྤྱོད། །
རྫུན་ཚིག་ཕྲ་མ་ཚིག་རྩུབ་ངག་འཁྱལ་དང་། །
བསྣབ་སེམས་གནོད་སེམས་ལོག་པར་ལྟ་བ་དང་། །
མཚམས་མེད་ལྔ་དང་དེ་དང་ཉེ་བ་ལྔ། །
ལྕི་བཞི་ལོག་བརྒྱད་ཁ་ན་མ་ཐོ་བའི། །
སྡིག་པ་བགྱིད་དང་སྩལ་ཡི་རང་བའི། །
རང་བཞིན་མི་དགེ་སྡིག་པ་ཅི་མཆིས་པ། །
སྐྱབས་གནས་རྒྱ་མཚོའི་སྤྱན་སྔར་མཐོལ་ལོ་བཤགས། །
མི་གསང་མི་སྦེད་གནོང་འགྱོད་དྲག་པོས་བཤགས། །
ཕྱིན་ཆད་སྲོག་ལ་བབ་ཀྱང་མི་བགྱིད་དོ། །
ཕམ་པ་བཞི་དང་ལྷག་མ་བཅུ་གསུམ་དང་། །
སྤང་ལྟུང་སུམ་ཅུ་ལྟུང་བྱེད་དགུ་བཅུ་དང་། །
སོར་བཤགས་བཞི་དང་ཉེས་བྱས་བརྒྱད་བཅུ་གཉིས། །
དཀར་ནག་ཆོས་བརྒྱད་བླང་དོར་ཉམས་པ་དང་། །
རྩ་བའི་ལྟུང་བ་བཞི་དང་ཡན་ལག་གི །
ཉེས་བྱས་བཞི་དྲུག་ལ་སོགས་པའི། །
རྒྱལ་སྲས་བྱང་ཆུབ་སེམས་པའི་གནང་བཀག་གི །
མཚམས་ལས་འགལ་བའི་ཉེས་ལྟུང་ཅི་མཆིས་པ། །
མི་གསང་མི་སྦེད་གནོང་འགྱོད་དྲག་པོས་བཤགས། །
བརྟུལ་ཞུགས་ཉེར་ལྔ་རྩ་ལྟུང་བཅུ་བཞི་དང་། །
ཡན་ལག་སྦོམ་པོའི་ལྟུང་བ་རྣམ་པ་བརྒྱད། །
ཁྱད་པར་རྫོགས་པ་ཆེན་པོའི་དམ་ཚིག་ནི། །
ཉི་ཤུ་རྩ་བདུན་རྩ་བའི་ལྟུང་བ་དང་། །
ཡན་ལག་དམ་ཚིག་ཉི་ཤུ་རྩ་ལྔ་དང་། །
ལྷག་པའི་དམ་ཚིག་ཆེན་པོ་ཉི་ཤུ་སྟེ། །
བྱ་སྤྱོད་རྣལ་འབྱོར་བླ་ན་མེད་པ་ཡི། །
དམ་ཚིག་ཉམས་ཆག་མི་དགེ་སྡིག་པའི་ཚོགས། །
གནོང་འགྱོད་དྲག་པོས་མཐོལ་བཤགས་བཟོད་པར་སྩོལ། །
བདག་ནི་སེམས་ཅན་འཁྲུལ་བའི་རང་བཞིན་ལགས། །
མི་ཤེས་དབང་གིས་ཉེས་པ་ཅི་མཆིས་པ། །
དོན་དམ་ཡེ་ཤེས་མངའ་བའི་ལྷ་ལ་བཤགས། །
བརྩེ་བའི་དབང་གིས་བཟོད་པ་དང་དུ་བཞེས། །
དག་ཅིང་ཚངས་པའི་དགྱེས་པའི་ཞལ་རས་སྟོན། །
ཕྱིན་ཆད་མི་བགྱིད་དམ་བཅའ་ཁྱེད་ལ་འབུལ། །
རྩ་གསུམ་རྒྱ་མཚོའི་བྱིན་རླབས་རྨད་བྱུང་གིས། །
བདག་རྒྱུད་ཡོངས་སུ་དག་པར་བྱིན་གྱིས་རློབས། །
ཅེས་པ་འདི་ནི་གུ་ཎའི་མིང་གིས་བསྐུལ་བའི་ངོར། དུག་ལྔ་མེ་ལྕེ་དབྱིངས་སུ་འཁྱིལ་བའི་ཚ་ཟེར་ཅན་སྔགས་ཀྱི་རྣལ་འབྱོར་པ་ལས་འབྲེལ་རྩལ་གྱིས་བྲིས་པ་དགེའོ།། །།
