འཛད་མེད་སིམ་བྱེད།
༄༅། །འཛད་མེད་སིམ་བྱེད།
ཨོཾ་ཨཱཿཧཱུྃ།
རིག་སྟོང་ཟུང་འཇུག་གདོད་མའི་སྐུ། །
ཆོས་སྐུའི་བླ་མ་ཀློང་ཆེན་པ། །
གསོལ་བ་འདེབས་སོ་ཐུགས་རྗེས་བཟུང༌། །
ལྟ་བ་རྟོགས་བར་བྱིན་གྱིས་རློབས། །
གསལ་སྟོང་དབྱེར་མེད་ལས་འབྲེལ་རྩལ། །
གསོལ་བ་འདེབས་སོ་ཐུགས་རྗེས་བཟུང༌། །
སྒོམ་པ་གོམས་པར་བྱིན་གྱིས་རློབས། །
སྒྱུ་འཕྲུལ་རོལ་མོ་ངག་གི་དབང༌། །
གསོལ་བ་འདེབས་སོ་ཐུགས་རྗེས་ཟུངས། །
སྤྱོད་པ་མཐར་ཕྱིན་བྱིན་གྱིས་རློབས། །
ངོ་བོ་སྟོང་པ་ཆོས་ཀྱི་སྐུ། །
རང་བཞིན་གསལ་བ་ལོངས་སྤྱོད་རྫོགས། །
ཐུགས་རྗེ་ཀུན་ཁྱབ་སྤྲུལ་པའི་སྐུ། །
སྐུ་གསུམ་བླ་མར་གསོལ་བ་འདེབས། །
བརྒྱུད་གསུམ་བླ་མས་ཐུགས་རྗེས་ཟུངས། །
གསོལ་བ་འདེབས་སོ་རིག་འཛིན་ཚོགས། །
བྱིན་གྱིས་རློབས་ཤིག་མཁའ་འགྲོ་རྣམས། །
རིག་པ་རྗེན་པ་རྣམ་རྟོག་བྲལ། །
ཀློང་གྲོལ་ཡངས་པ་ཆེན་པོ་ཉིད། །
མྱུར་དུ་རྟོགས་པར་བྱིན་གྱིས་རློབས། །
མ་བཅོས་བཏང་བཞག་བྲལ་བའི་དབྱིངས། །
གཉུག་མ་ལྷུན་མཉམ་ཆེན་པོའི་མལ། །
མ་བཅོས་སུམ་ལྡན་སྒོམ་པའི་ཀློང༌། །
མྱུར་དུ་ཕྱིན་པར་བྱིན་གྱིས་རློབས། །
ཆོས་ཉིད་ཕྱམ་གདལ་ཡངས་པའི་ཀློང༌། །
རང་གྲོལ་ཤར་གྲོལ་ཅེར་གྲོལ་ངང༌། །
གཉེན་པོའི་རྩོལ་བ་བྲལ་བའི་ཀློང༌། །
སྤྱོད་པ་མཐར་ཕྱིན་བྱིན་གྱིས་རློབས། །
ཡེ་ཤེས་དྲི་མ་མེད་པའི་དབྱིངས། །
གློ་བུར་མུན་པ་དབྱིངས་སུ་ཡལ། །
ཡེ་ནས་གཞི་རྫོགས་ཆོས་སྐུའི་ཀློང༌། །
སྐུ་གསུམ་ཡོངས་གྲོལ་བྱིན་གྱིས་རློབས། །
ཚུལ་འདི་དད་པའི་སྤྲིན་གཞོན་གྱིས། །
བསྐུལ་ངོར་ཉི་མཁའ་ཡངས་པའི་མཁར། །
ཐུགས་རྗེ་བདུད་རྩིའི་སྤྲིན་ཕུང་ལས། །
འཛད་མེད་སིམ་བྱེད་ཅུང་སྤྲོས་སོ།།
