Prayer to Khenpo Tsultrim Lodrö—Tibetan

༄༅། །མཁན་ཆེན་དམ་པ་ཚུལ་ཁྲིམས་བློ་གྲོས་མཆོག་གི་གསོལ་འདེབས་དད་པའི་མཛེས་རྒྱན་བཞུགས།

 

མདོ་སྔགས་ཆོས་ཀྱི་ཆུ་བོ་མ་ལུས་པ། །

མཁྱེན་པའི་རྒྱ་མཚོ་གཅིག་ཏུ་འཁྱིལ་བ་ཡི། །

འཇམ་དཔལ་དབྱངས་དངོས་མི་ཕམ་རྒྱ་མཚོ་ལ། །

གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །

 

མགོན་དེའི་ཐུགས་ཀའི་དམར་སེར་དྷཱི་ཡིག་གི །

འཕྲིན་ལས་འོད་ཟེར་གདུལ་བྱའི་དཔལ་དུ་ཤར། །

འབྲེལ་ཚད་དོན་ལྡན་ཡིད་བཞིན་ནོར་བུ་ཡི། །

བྱིན་རླབས་འོད་ཀྱིས་ཚེ་རབས་ཀུན་ཏུ་སྐྱོངས། །

 

རྣམ་དག་ཚུལ་ཁྲིམས་དཔག་བསམ་ལྗོན་པ་ལ། །

ཐོས་བསམ་སྒོམ་པའི་བློ་གྲོས་ཡལ་འདབ་རྒྱས། །

གངས་ལྗོངས་འཆི་མེད་ལྷ་ཡི་སྐྱེད་ཚལ་གྱི། །

ལྟོས་བཅས་འགྲོ་བའི་མགོན་དེར་གསོལ་བ་འདེབས། །

 

ཡོན་ཏན་ལང་ཚོ་གཞན་དང་མི་མཉམ་པའི། །

ཐུགས་བསྐྱེད་དུས་བབས་པདྨ་དཀར་པོ་ཁྱེད། །

མདོ་ཁམས་ཏྲེ་ཤོད་འཛིན་མའི་བསོད་ནམས་ཀྱིས། །

ཐུབ་བསྟན་སྨན་ལྗོངས་མཛེས་པའི་རྒྱན་དུ་འཁྲུངས། །

 

གསང་ཆེན་དབེན་པའི་རི་ངོགས་ཉམས་དགའ་བར། །

སྐྱབས་མཆོག་བླ་མ་འཇམ་པའི་རྡོ་རྗེའི་ཞབས། །

མཉེས་པ་གསུམ་གྱིས་བསྟེན་ནས་ཐུགས་དགོངས་ལོན། །

ཤེས་བྱའི་ཆོས་ལ་རྨོངས་པ་མཐའ་ནས་སངས། །

 

མགོན་དེའི་སྒྲིབ་མེད་མཁྱེན་པའི་ཡེ་ཤེས་ཀྱིས། །

འབྱུང་འགྱུར་བསྟན་འགྲོའི་དཔལ་དུ་ཡོངས་གཟིགས་ནས། །

སྔ་འགྱུར་བསྟན་པའི་བདག་པོ་བསམ་ཡས་པ། །

ཚུལ་ཁྲིམས་བློ་གྲོས་མཆོག་གི་མཚན་དེ་གསོལ། །

 

གངས་དཀར་རི་བོས་བསྐོར་བའི་རྒྱལ་ཁམས་ནས། །

བསླབ་གསུམ་ཡོན་ཏན་ཡོངས་སུ་རྫོགས་པ་ལས། །

འཕྲིན་ལས་དྲི་བསུང་གོ་ལའི་འགྲོས་དང་འབྲེལ། །

ཤར་ནུབ་རྒྱ་མཚོ་ཆེན་པོའི་མཐའ་ལས་བརྒལ། །

 

ངུར་སྨྲིག་རྒྱན་གྱིས་མཛེས་པའི་ཀུན་སྤྱོད་དག །

བསྟན་དང་འགྲོ་ལ་ཕན་པའི་ལྷག་བསམ་གཙང་། །

མདོ་སྔགས་ཤེས་བྱ་རིག་པའི་གནས་ལ་དབང་། །

ཐར་བའི་ལམ་སྟོན་མཆོག་དེར་གསོལ་བ་འདེབས། །

 

འཇིགས་རུང་ཁྲག་གི་ཡུར་ཆུ་བཞུར་ས་ན། །

སྡུག་བསྔལ་མཆི་མ་འཁྲིགས་པའི་སེམས་ཅན་གྱི། །

སྲོག་གི་གཤེད་དུ་བརྡར་བའི་རལ་གྲིའི་སོ། །

སྙིང་རྗེའི་ཕྱག་གིས་བཀག་པའི་གྲངས་མི་ཟིན། །

 

མཐོན་པོའི་གསེར་ཁྲིའི་ཁ་ན་ཁྱེད་ཉིད་མེད། །

འབྱོར་ཕྱུག་འདུ་ལོང་དབུས་ནས་ཁྱེད་མི་མཇལ། །

དམར་ནག་འདམ་རྫབ་གཡོ་བའི་ར་བ་ན། །

ཉམ་ཐག་འགྲོ་བ་འདྲེན་པའི་མགོན་དུ་རྟག །

 

ལྷ་ཡིས་གནང་བའི་ངུར་སྨྲིག་ན་བཟའི་གོས། །

འཚེ་མེད་དྲང་སྲོང་ཆེན་པོའི་ཆ་ལུགས་དེ། །

སྐྱབས་མེད་འགྲོ་བ་གང་ན་ཡོད་པའི་སར། །

མཐོང་བ་ཁྱེད་འདྲའི་སྐུ་ལ་ལྷག་ཏུ་མཛའ། །

 

རིང་པོའི་ལོ་ཟླའི་ཁྲོད་ཀྱི་ལུས་སེམས་ཀུན། །

སྙིང་རྗེ་ཉག་མ་གཅིག་གིས་གསོས་པ་ཡི། །

སེམས་དཔའ་ཁྱེད་ཀྱི་ཕྱག་གི་བརྐྱང་བསྐུམ་ཡན། །

མཐའ་དག་འགྲོ་བའི་དོན་དུ་མ་གྱུར་གང་། །

 

དག་པ་ལྷ་ཡི་ཞིང་ནས་ཕེབས་ཚུལ་སོགས། །

ལྐོག་གྱུར་སྐྱེས་རབས་མང་པོ་མི་ཤེས་ཀྱང་། །

མངོན་གྱུར་ཡོན་ཏན་དེ་ཡིས་དད་གུས་འཕེལ། །

མཚུངས་མེད་དྲིན་ཆེན་བླ་མར་གསོལ་བ་འདེབས། །

 

གངས་ཅན་བཅུ་ཕྲག་རིག་པའི་ཁང་བཟང་དེ། །

ཆར་དང་རླུང་གིས་འཐོར་ལ་ཉེ་བའི་དུས། །

འཆད་རྩོད་རྩོམ་པའི་ཐབས་ཀྱིས་འཛིན་མཁས་ཁྱེད། །

མཚུངས་མེད་དྲིན་ཆེན་བླ་མར་གསོལ་བ་འདེབས། །

 

ལུགས་གཉིས་མཛད་པ་གང་དང་གང་ལ་ཡང་། །

རང་འདོད་ཉེས་པ་ཕྲ་མོས་མ་གོས་པར། །

སུ་ཡིས་བརྟགས་ཀྱང་སྐྱོན་དང་བྲལ་བ་ཁྱེད། །

མཚུངས་མེད་དྲིན་ཆེན་བླ་མར་གསོལ་བ་འདེབས། །

 

ཆོས་ཀྱི་རྒྱལ་པོ་དག་པའི་ཞིང་དུ་ཕེབས། །

སྐལ་བཟང་སློབ་མའི་རེ་བའི་སེམས་ཀྱི་རྟེན། །

བསྟན་པའི་གཞི་མ་སྐྱོང་བའི་བརྒྱུད་འཛིན་ཁྱེད། །

མཚུངས་མེད་དྲིན་ཆེན་བླ་མར་གསོལ་བ་འདེབས། །

 

བླུན་རྨོངས་གཅན་གཟན་གཏུམ་པོའི་འཚོ་བ་བཞིན། །

ཤ་ཁྲག་ཟས་ལ་རྔམ་པའི་ཡུལ་ལྗོངས་འདིར། །

དཀར་ཟས་གཙང་མའི་སྲོལ་བཟང་སྤེལ་མཁན་ཁྱེད། །

མཚུངས་མེད་དྲིན་ཆེན་བླ་མར་གསོལ་བ་འདེབས། །

 

ཕྱི་ཡི་ལོངས་སྤྱོད་ཅི་ཙམ་འཕེལ་བ་བཞིན། །

ནང་གི་ངེས་འབྱུང་ཤུགས་ཀྱིས་སྲབ་པའི་དུས། །

འཁོར་བའི་རང་མཚང་གཏིང་ནས་རིག་པ་ཁྱེད། །

མཚུངས་མེད་དྲིན་ཆེན་བླ་མར་གསོལ་བ་འདེབས། །

 

ཐེག་ཆེན་ཆོས་ཀྱི་གྲལ་དུ་ཞུགས་ན་ཡང་། །

ཉམས་ལེན་གནད་ལ་སློབ་མཁན་ཉུང་བའི་དུས། །

བྱང་ཆུབ་སེམས་ཀྱིས་ཐུགས་རྒྱུད་གང་བ་ཁྱེད། །

མཚུངས་མེད་དྲིན་ཆེན་བླ་མར་གསོལ་བ་འདེབས། །

 

མདོ་སྔགས་ཆོས་ཚུལ་རྒྱ་མཚོའི་ལམ་གྱི་གསང་། །

བློ་ལས་འདས་པ་ཆོས་ཉིད་ཟབ་མོའི་དོན། །

མཁྱེན་པའི་ཉི་མ་སྙིང་ནས་ཤར་བ་ཁྱེད། །

མཚུངས་མེད་དྲིན་ཆེན་བླ་མར་གསོལ་བ་འདེབས། །

 

བསྐྱེད་རྫོགས་གདམས་པའི་ཟབ་གནད་མི་ཤེས་པར། །

དབང་ལུང་ཆོས་ཀྱི་ཐོབ་གྲངས་གསོག་པའི་དུས། །

ལྟ་སྒོམ་སྤྱོད་པའི་གནད་གསང་སྟོན་མཁན་ཁྱེད། །

མཚུངས་མེད་དྲིན་ཆེན་བླ་མར་གསོལ་བ་འདེབས། །

 

ཐེག་པའི་ཡང་རྩེ་འོད་གསལ་རྫོགས་པ་ཆེའི། །

རྩོལ་མེད་ལམ་གྱི་འཕྲིན་ལས་མྱུར་བའི་དུས། །

དོན་བརྒྱུད་བྱིན་རླབས་རྟོགས་པའི་འབྱུང་གནས་ཁྱེད། །

མཚུངས་མེད་དྲིན་ཆེན་བླ་མར་གསོལ་བ་འདེབས། །

 

ཟབ་དགུའི་གདམས་ངག་མང་དུ་གནང་ན་ཡང་། །

འདོད་འབྱུང་ནོར་བུ་འདྲ་བའི་བྱང་ཆུབ་སེམས། །

བདག་འཛིན་སེམས་ཀྱི་གཉེན་པོར་འགྲོ་དཀའ་བས། །

ད་དུང་ཐུགས་རྗེས་སྐྱོངས་ཤིག་བླ་མ་རྗེ། །

 

གོམས་པའི་དབང་གིས་གང་སར་རྒྱུག་པ་ཡི། །

རྟ་རྒོད་ལོང་བ་འདྲ་བའི་རྣམ་རྟོག་འདི། །

མཉམ་པར་བཞག་ཀྱང་བཀོལ་དུ་མི་བཏུབ་པས།

བྱིན་རླབས་ཞགས་པས་ཆོངས་ཤིག་བླ་མ་རྗེ། །

 

ཐེ་ཚོམ་མུན་པ་མཐའ་ནས་སངས་བ་ཡི། །

ཉ་གང་ཟླ་བ་འདྲ་བའི་རྟོགས་པ་ཞིག །

མྱུར་དུ་སེམས་ཀྱི་ནམ་མཁར་ཤར་བ་ལ། །

བཙན་ཐབས་དགོངས་པ་སྤོར་ཅིག་བླ་མ་རྗེ། །

 

བར་ཆད་འཕྲང་ལས་བཟུར་ཐབས་མི་ཤེས་པའི། །

ལམ་ཁའི་སྲིན་བུ་འདྲ་བའི་རྨོངས་པ་བདག །

འགལ་རྐྱེན་ལོག་པའི་ལམ་དུ་འགྲོ་སྲིད་ན། །

བརྩེ་བའི་ཕྱག་གིས་སྐྱོབས་ཤིག་བླ་མ་རྗེ། །

 

ནམ་འོང་འདིར་འོང་ཆ་འཇོག་མེད་པ་ཡི། །

ནམ་མཁའི་ཐོག་དང་འདྲ་བའི་འཆི་བདག་བདུད། །

ཉམ་ཆུང་སྲོག་གི་གཤེད་དུ་བབ་པའི་ཉིན། །

འདྲེན་པའི་དེད་དཔོན་མཛོད་ཅིག་བླ་མ་རྗེ། །

 

འདི་དང་ཕྱི་མ་བར་དོའི་གནས་སྐབས་དང་། །

སྐྱིད་སྡུག་ལེགས་ཉེས་ལས་བསྐོས་གར་བབས་ཀྱང་། །

མགོན་པོ་གང་ལས་སྐྱབས་གཞན་མི་འདུག་པས། །

འབྲལ་མེད་ཐུགས་རྗེས་གཟིགས་ཤིག་བླ་མ་རྗེ། །

 

མཁྱེན་རྟོགས་འོད་ཀྱིས་མཛེས་པའི་ཟླ་བ་དེ། །

གང་དུ་སོང་ཡང་ཀུན་གྱི་གཙུག་གི་རྒྱན། །

ང་ཅག་ལྟོས་བཅས་སྐྱེ་འགྲོའི་སྐྱབས་གནས་སུ། །

བསྐལ་བ་རྒྱ་མཚོའི་བར་དུ་ཞབས་བརྟན་ཤོག །

 

བྱིས་པས་ཐོག་མའི་ཤེས་བྱ་སློབ་ཚུལ་ནས། །

རྒན་པོས་ཕྱི་མའི་འགྲོ་ཆས་སྒྲུབ་ཚུལ་སོགས། །

ལུགས་གཉིས་བླང་དོར་སྟོན་པའི་དེད་དཔོན་ཁྱེད། །

དུས་མཐའི་འགྲོ་བའི་སྒྲོན་མེར་ཞབས་བརྟན་ཤོག །

 

ངན་སྤྱོད་སྣ་དགུས་མ་མོ་འཁྲུགས་པ་ལས། །

བཅོས་མེད་ནད་ཀྱིས་འཛམ་གླིང་ཕོངས་བའི་དུས། །

འབད་པ་བརྒྱ་ཡིས་འགོག་པའི་ལྷག་བསམ་ཅན། །

མགོན་མེད་སྐྱེ་བོའི་གཉེན་དུ་ཞབས་བརྟན་ཤོག །

 

འདྲ་མིན་སྐད་དང་ཡིག་རིགས་འདྲེས་པ་ལས། །

ལུགས་གཉིས་སྲོལ་ཁའི་རྨང་རྡོ་བཤིག་པས་ན། །

རང་སྐད་གཙང་མའི་ཆུ་རྒྱུན་མཐུད་པའི་མགོན། །

བཅུ་ཕྲག་རིག་པའི་བདག་པོར་ཞབས་བརྟན་ཤོག །

 

གངས་ལྗོངས་མདོ་སྔགས་ཆོས་ཀྱི་དགའ་ཚལ་དེ། །

ཟུངས་ཟད་ནད་པ་བཞིན་དུ་གྱུར་དུས་འདིར། །

སྣ་ཚོགས་ཐབས་ཀྱིས་འབད་པའི་བསྟན་འཛིན་མཆོག །

ཐུབ་བསྟན་མཛེས་པའི་རྒྱན་དུ་ཞབས་བརྟན་ཤོག །

 

གནའ་དེང་རིག་པའི་མཐའ་རྒྱ་མ་ཆོད་པར། །

ཐོས་ཆུང་ལོག་པར་སྨྲ་བ་མང་བའི་དུས། །

ཡིན་མིན་དྲང་ཤན་འབྱེད་ལ་ཚངས་པའི་ཐིག །

ལེགས་བཤད་རྒྱ་མཚོའི་གཏེར་དུ་ཞབས་བརྟན་ཤོག །

 

འཇམ་དཔལ་དབྱངས་དངོས་བློ་གྲོས་མཚུངས་མེད་རྗེའི། །

ཐུགས་བསྐྱེད་མཛད་འཕྲིན་ནམ་མཁའི་མཐའ་དང་མཉམ། །

འཕྲིན་ལས་གང་སར་སྤེལ་བའི་བྱེད་པོ་ཁྱེད། །

བསྟན་དང་འགྲོ་བའི་དཔལ་དུ་ཞབས་བརྟན་ཤོག །

 

བདག་སོགས་ཆོས་མེད་འཁོར་བའི་སེམས་ཅན་ལ། །

བླང་དོར་ལམ་གྱི་སྣང་བ་གསལ་བ་ཡི། །

སྤྱི་བོའི་གཙུག་གི་ཉི་མ་ཁྱེད་ཡིན་པས། །

ཐར་འདོད་དད་པའི་རྟེན་དུ་ཞབས་བརྟན་ཤོག །

 

བསླུ་མེད་རིན་ཆེན་གསུམ་གྱི་བདེན་པ་དང་། །

རྩ་གསུམ་དམ་ཅན་སྲུང་མའི་བྱིན་རླབས་ཀྱིས། །

མཚུངས་མེད་བླ་མའི་ཞབས་པད་ཡུན་བརྟན་ཞིང་། །

མཛད་འཕྲིན་སྣང་བས་ཞིང་འདི་མཛེས་གྱུར་ཅིག །

 

ཅེས་པ་འདི་ཆོས་རྗེ་བླ་མ་བཀའ་དྲིན་ཅན་གྱི་ཉེ་གནས་དམ་པ་བསོད་དོན་སོགས་དབེན་གནས་བླ་མ་ལུང་གི་སྒྲུབ་སྡེར་བཞུགས་པའི་གྲྭ་འཁོར་དག་གི་ཐུགས་བཞེད་ལྟར། བཅུ་ཕྲག་རིག་པའི་མངའ་བདག་མཁན་ཆེན་དམ་པ་མཆོག་ཉིད་སྐུ་ཚེ་ཡུན་དུ་བརྟན་ཞིང་། མཛད་འཕྲིན་ཕྱོགས་མཐར་རྒྱས་པའི་ཤིས་སྨོན་དུ་དད་ཅིང་གུས་པའི་བློས་བླ་རུང་ཆོས་སྡེ་ཆེན་པོའི་སྐྱབས་འོག་པ་འཆི་མེད་རིག་འཛིན་གྱིས་བྱང་པ་རྡོ་རྗེ་བྲག་གི་དགོན་གནས་སུ་སྨྲས་པ་བཞིན་མཁན་མཆོག་གྲུབ་ལ་ཡི་གེར་ཕབ་ཏུ་བཅུག་པ་དགེ།