Naturally Liberating Whatever You Meet—Tibetan

Schools & Systems › Dzogchen | Schools & Systems › Mahāmudrā | བོད་ཀྱི་བླ་མ།མཁན་པོ་གང་ཤར་དབང་པོ།

English | Español | 中文 | བོད་ཡིག

མཁན་པོ་གང་ཤར་དབང་པོ།

མཁན་པོ་གང་ཤར་དབང་པོ།

Further information:
Download this text:

༄༅། །དཔལ་ཁྲ་འགུ་བཤད་སྒྲུབ་དར་རྒྱས་གླིང་དུ་བསྩལ་བའི་སེམས་ཁྲིད་འཕྲད་ཚད་བསྡུས་པ་བཞུགས་སོ།།

ལས་དགེ་བ་བྱས་ན་འབྲས་བུ་བདེ་བ་འབྱུང་བ་དང་། ལས་མི་དགེ་བ་བྱས་ན་འབྲས་བུ་སྡུག་བསྔལ་འབྱུང་བ་བསླུ་བ་མེད་པ་ཡིན་པས་དགེ་སྡིག་གཉིས་གང་ལ་ཟེར་ངོས་ཟིན་དགོས། དེ་ལ་དང་པོར་ལུས་ངག་ཡིད་གསུམ་ངོ་སྤྲད་དགོས། དེ་ངོ་འཕྲོད་ནས་དགེ་སྡིག་གཉིས་ལུས་ངག་ཡིད་གསུམ་སུས་གཙོ་ཤེས་དགོས། གང་གཙོ་ཟེར་ན་སེམས་གཙོ་ཆེ་སྟེ། ལུས་ནི་དགེ་སྡིག་ཀུན་གྱི་གཡོག་པོ་ཡིན། །སེམས་ནི་ཀུན་ལ་དབང་སྒྱུར་རྒྱལ་པོ་འདྲ། །ཞེས་གསུངས་པ་ལྟར་ཡིན་པས། སེམས་དེ་རྒྱལ་པོ་ལྟ་བུ་དང་། ལུས་ངག་གཉིས་གཡོག་པོ་ལྟ་བུ་སྟེ། དེས་ན་སེམས་ཀྱིས་མ་དྲན་ན་ལུས་ཀྱིས་ལས་ཀ་ཡག་བཙོག་གཉིས་ཀ་བྱེད་མི་སྲིད། ངག་གིས་སྐད་ཆ་བཟང་ངན་གཉིས་ཀ་བཤད་མི་སྲིད་པས་རྩ་བ་སེམས་ལ་ཐུག་པ་དེ་ངོ་འཕྲོད་དགོས། དེ་ནས་སེམས་དེ་ཡོད་མེད་གཉིས་གང་རེད་བརྟགས། མཐའ་གཅིག་ཏུ་ཡོད་པ་ཡང་མ་ཡིན་ཏེ། ཁ་དོག་དཀར་སེར་དམར་ལྗང་ཅན་དང་། དབྱིབས་གྲུ་གསུམ་གྲུ་བཞི་ཅན་དུ་མཐོང་རྒྱུ་མེད། མཐའ་གཅིག་ཏུ་མེད་པ་ཡང་མ་ཡིན་ཏེ། ཀུན་ཤེས་ཀུན་རིག་གི་རྒྱལ་པོ་བསམ་བྱེད་དྲན་བྱེད་ཐམས་ཅད་མ་འགག་པ་ཡོད། དེས་ན་དཔལ་རང་བྱུང་ཞབས་ཀྱིས། ཡོད་པ་མ་ཡིན་རྒྱལ་བས་ཀྱང་མ་གཟིགས། །མེད་པ་མ་ཡིན་འཁོར་འདས་ཀུན་གྱི་གཞི། །ཞེས་གསུངས་པ་ལྟར་ཡིན། དེ་ཡན་ཆད་ཀྱིས་སྔོན་འགྲོ་རྫོགས། དངོས་གཞི་ནི་ལུས་སེམས་བདེ་ཐོ་ལེ་ཤིག་གེ། ཅི་ཡང་མི་བསམ་པར་རང་བབས་སུ་བཞག །མིག་ནམ་མཁའ་ལ་གྱེན་དུ་བལྟ། ཁ་ཅུང་ཟད་གདངས་ནས་དབུགས་རང་བབས་སུ་བཞག་ཙ་ན། ཅི་བསམ་འདི་བསམ། ཅི་དྲན་འདི་དྲན། ཅི་ཤར་འདི་ཤར། ཅི་དགའ་འདི་དགའ། ཅི་སྡུག་འདི་སྡུག་མེད་པའི་སེམས་ཉིད། གསལ་ལེ་ཝལ་ལེ་ཧྲིག་གེ་རྗེན་ནེ་བ་འདི་ཁམས་གསུམ་སེམས་ཅན་ཐམས་ཅད་ཀྱི་སེམས་ཀྱི་རང་བཞིན་འདྲེན་མཆོག་དཔལ་ལྡན་བླ་མའི་ཐུགས། དུས་གསུམ་སངས་རྒྱས་ཀྱི་དགོངས་པ། ཆོས་སྐུ་ཕྱག་རྒྱ་ཆེན་པོ་ཡང་ཟེར། འོད་གསལ་རྫོགས་པ་ཆེན་པོ་ཡང་ཟེར། ལམ་འབྲས་བུ་དང་བཅས་པ་ཡང་ཟེར། སྟོང་ཉིད་སྙིང་རྗེ་ཡང་ཟེར། མིང་འདོག་སྣ་ཚོགས་ཡོད་ན་ཡང་། མཛུབ་མོ་གཙུག་ས་དེ་ག་རེད། དེས་ན་དཔལ་རང་བྱུང་ཞབས་ཀྱིས། ཐམས་ཅད་བདེན་མིན་རྫུན་མིན་ཏེ། །ཆུ་ཟླ་བཞིན་དུ་མཁས་རྣམས་འདོད། །ཐ་མལ་ཤེས་པ་འདི་ཉིད་ལ། །ཆོས་དབྱིངས་རྒྱལ་བའི་སྙིང་པོ་ཟེར། །ཞེས་གསུངས་པ་ལྟར། ཐད་ཀར་གང་ཤར་བཟོ་བཅོས་མ་བྱས་པར་རང་བབས་སུ་བཞག །བསྐྱེད་རྫོགས་བཟླས་བསྒོམ་ཐམས་ཅད་ཀྱི་སྙིང་པོ་ཚང་འདུག །དེ་ལ་ཡེངས་མ་ཡེངས་གཉིས་ཀ་ཤན་འབྱེད་དགོས། མ་ཡེངས་རང་བབས་སུ་ཡོད་ན་ཕན་གནོད་གང་ཡང་མེད་པ་དེ་རིག་པ་ཡིན། ཅུང་ཟད་ཡེངས་འོང་ན། སེམས་ལ་དགའ་སྡུག་སྐྱེ་སྲིད། དེའི་སྟེང་ནས་ལས་དཀར་ནག་གི་ཆ་བསགས། དེས་འཁོར་བར་འཁྱམས། དེ་ལ་སེམས་རིག་ཤན་ཕྱེད་དགོས། སེམས་རྟོག་སྤྲིན་ཚོགས་ལྟ་བུ་དེ་འདག་དགོས། ནང་གི་རིག་པ་བརྟན་དགོས། དེ་ལ་ན་ཚ་ལམ་ཁྱེར། ཉོན་མོངས་ལམ་ཁྱེར། བར་དོ་ལམ་ཁྱེར། གཏི་མུག་ལམ་ཁྱེར་བཅས་དགོས། ལམ་ཁྱེར་ཐམས་ཅད་ཀྱི་སྙིང་པོ་ངོ་བོའི་སྟེང་དུ་རང་བབ་ཡིན། ད་སྐབས་ཉབ་ཉོབ་མང་པོ་དགོས་པ་མི་འདུག །ཅེས་པ་འདི་མཁས་གྲུབ་གཉིས་ལྡན་གང་ཤར་དབང་པོས་མེ་བྱ་ཟླ་ ༦ ཚེས་ ༧ ཁྲ་འགུ་བཀྲ་ཤིས་ཆོས་གླིང་གི་སློབ་གྲྭ་བཤད་སྒྲུབ་དར་རྒྱས་གླིང་གི་སློབ་ཚོགས་ཐུན་མོང་ལ་བཀའ་དྲིན་བསྩལ་བའོ། །མངྒ་ལཾ།། །།

Vajrayāna Buddhism places restrictions on the reading and practice of certain texts, which are intended only for those who have received the requisite empowerments, transmissions and instructions.

If you are unsure as to whether you are entitled to read or practice a particular text please consult a qualified lineage-holder.

OK
This website uses cookies to collect anonymous usage statistics and enhance the user experience.
Decline
Accept