བོད་བརྒྱུད་ནང་བསྟན་གསུང་རབ་སྒྲ་བསྒྱུར་ཁང་།
ISSN 2753-4812
ISSN 2753-4812

རྫོགས་ཆེན་གདམས་པ།

English | བོད་ཡིག

༄༅། །རྫོགས་ཆེན་གདམས་པ།

རང་བྱུང་རིག་པ་དོན་གྱི་ལྷན་སྐྱེས་ནི། །
ཡེ་ནས་ཆོས་རྣམས་ཀུན་གྱི་གཤིས་ལུགས་ཡིན། །
རང་ཐོག་རང་བབ་རྩོལ་སྒྲུབ་བྲལ་བའི་ཚེ། །
རང་གནས་དོན་ལ་ཡ་མཚན་ལྟད་མོ་མཐོང་། །
རིག་པ་ཉག་གཅིག་གཟའ་གཏད་མེད་པ་ལ། །
བྱར་མེད་རང་བཞག་ནམ་མཁའི་དཀྱིལ་ལྟ་བུ། །
མ་བཅོས་ངང་དེར་བསྒོམ་དུ་མེད་པར་གནས། །
སྣ་ཚོགས་སྣང་བ་རང་བཞག་ཕན་གནོད་བྲལ། །
ཆོས་རྣམས་ཐམས་ཅད་གཞི་ལ་ལྷུན་གྱིས་རྫོགས། །
རྣལ་མ་དལ་བ་བག་ཡངས་ཟང་ཀ་མ། །
ཅོག་བཞག་བཞི་ཡི་དགོངས་པས་ཆོས་ཐམས་ཅད། །
མ་བཙལ་གཞིར་རྫོགས་ལྟ་སྒོམ་ཆོས་ལས་འདས། །
བློ་འདས་གདོད་མ་ཆོས་སྐུ་རང་ཤར་ལ། །
ཐེ་ཚོམ་རྣམ་རྟོག་དྲྭ་བས་སྒྲིབ་ཏུ་མེད། །
ཆོས་ཀུན་མཉམ་པ་ཉིད་དུ་རྫོགས་གྱུར་བ། །
རང་བྱུང་ཡེ་ཤེས་ཐིག་ལེ་ཉག་གཅིག་ངང་། །
རང་ས་ཟིན་པ་རྣལ་འབྱོར་ལམ་གྱི་མཆོག །
ལམ་དེར་ཉམས་ལེན་བྱེད་པའི་སྐལ་བཟང་ལ། །
རིག་འཛིན་བླ་མའི་ཚོགས་ཀྱིས་བྱིན་གྱིས་རློབས། །
ཡི་དམ་ཞི་ཁྲོའི་ལྷ་ཡིས་མགོན་མཛོད་ཅིག །
གནས་གསུམ་མཁའ་འགྲོ་སྲུང་མས་བར་ཆད་སོལ། །
ལམ་མཆོག་མཐར་ཕྱིན་དོན་གཉིས་ལྷུན་གྲུབ་ཤོག །

མེ་བྱ་ཟླ་ ༡༡ ཚེས་ ༡༨ ལའོ། །མངྒ་ལཾ།། །།

མི་ཕམ་རིན་པོ་ཆེ།

མི་ཕམ་རིན་པོ་ཆེ།

གནས་ཚུལ་འཕར་མ།

ཕབ་ལེན།

EPUB  PDF 
This website uses cookies to collect anonymous usage statistics and enhance the user experience.
Decline
Accept