Kurukullā Guru Yoga—Tibetan

༄༅། །རྗེ་བཙུན་རིག་བྱེད་མ་ལ་བསྟེན་པའི་བླ་མའི་རྣལ་འབྱོར་བཞུགས་སོ། །

དུས་འདི་ནས་བཟུང་བྱང་ཆུབ་སྙིང་པོའི་བར། །

རྗེ་བཙུན་འཕགས་མའི་ཞབས་ལ་སྐྱབས་སུ་མཆི། །

སྡུག་བསྔལ་རྒྱ་མཚོར་བྱིང་བའི་མཁའ་ཁྱབ་འགྲོ། །

བསྒྲལ་ཕྱིར་བྱང་ཆུབ་མཆོག་ཏུ་སེམས་བསྐྱེད་དོ། །

རང་སྣང་དག་པ་རབ་འབྱམས་ཞིང་གི་དབུས། །

ངོ་མཚར་སྤྲུལ་པའི་ཕོ་བྲང་ཉམས་དགའ་བར། །

རང་གི་སྤྱི་བོར་འདབ་སྟོང་པདྨའི་དབུས། །

སྐྱབས་གསུམ་ཀུན་འདུས་རྗེ་བཙུན་རིག་བྱེད་མ། །

དམར་གསལ་དར་དང་རིན་ཆེན་རྒྱན་ཆ་ཅན། །

མི་འཇིགས་ཕྱག་རྒྱ་མདའ་གཞུ་ཨུཏྤལ་འཛིན། །

རྡོ་རྗེའི་སྐྱིལ་ཀྲུང་ཡེ་ཤེས་འོད་ཟེར་འབར། །

སྲས་བཅས་རྒྱལ་ཀུན་འདུས་པའི་ངོ་བོར་བཞུགས། །

ཀྱེ་མ་བླ་མ་རྗེ་བཙུན་མ། །

ཁྱེད་ནི་རྒྱལ་བ་ཐམས་ཅད་ཀྱི། །

ཡུམ་གྱུར་ཡེ་ཤེས་སྒྱུ་མའི་སྐུ། །

འགྲོ་བ་ཀུན་གྱི་མགོན་གཅིག་པུ། །

ལྷག་པར་འདོད་པས་ཕོངས་པ་ཡི། །

བསྐམ་ཆགས་ཅན་ལ་གཉེར་གྱུར་པའི། །

སྔོན་གྱི་དམ་བཅའ་མ་བསྙེལ་བར། །

སྐལ་དམན་ཉམ་ཐག་བདག་ཅག་ལ། །

ཡེ་ཤེས་སྤྱན་གྱིས་གཟིགས་ནས་སུ། །

བརྩེ་བའི་ཕྱག་གིས་དབུགས་དབྱུང་སྩོལ། །

མྱུར་བ་ཉིད་དུ་བྱིན་གྱིས་རློབས། །

བདེ་ཆེན་དབང་གི་དངོས་གྲུབ་སྩོལ། །

ཞེས་སྙིང་ཁོང་རུས་པའི་གཏིང་ནས་གསོལ་བ་བཏབ་ལ།

བླ་མ་རྗེ་བཙུན་ཀུ་རུ་ཀུལླེ་མཁྱེན། །

ཞེས་དང་།

ཨོཾ་ཀུ་རུ་ཀུལླེ་ཧྲཱིཿཧཱུྃ་སྭཱ་ཧཱ།

ཞེས་ཅི་ནུས་བཟླས།

ལུས་ལོངས་སྤྱོད་ཐམས་ཅད་དང་སྣང་སྲིད་ཐམས་ཅད་བདེ་བ་ཆེན་པོ་དབང་གི་མཎྜལ་དུ་ཡིད་ཀྱི་ཡང་ཡང་ཕུལ་ལ་གསོལ་བ་བཏབ་ལ། མཐར།

རྗེ་བཙུན་དགྱེས་པ་ཆེན་པོས་འོད་དུ་ཞུ། །

རང་གི་སྤྱི་བོ་ནས་ཞུགས་སྙིང་དབུས་ཐིམ། །

ལུས་ཀུན་བདེ་ཆེན་བདུད་རྩིར་དམར་པོས་གང་། །

ཐུགས་ཡིད་དབྱེར་མེད་གཉུག་མའི་གཤིས་སུ་ཨཱཿ

སླར་ཡང་སྣང་སྲིད་ཐམས་ཅད་བླ་མ་རྗེ་བཙུན་མའི་ངོ་བོར་བལྟས་ལ་བསྔོ་སྨོན་བྱ་ཞིང་རྒྱུན་གྱི་སྤྱོད་ལམ་བྱའོ། །འདིས་ནི་བདེ་ཆེན་དབང་གི་དངོས་གྲུབ་ཐོབ་པར་འགྱུར་ཏེ། གཟུངས་འབུམ་ཕྲག་གཅིག་བཟླའོ། །ས་མ་ཡ༔

རབ་ཚེས་ལྕགས་ཡོས་དབོ་ཟླའི་ཚེས་འདོད་པའི་གྲངས་ལ་འཇམ་དཔལ་དགྱེས་པས་གང་ཤར་སྤེལ་བ་མངྒ་ལཾ།