Advice in a Single Statement—Tibetan

༄༅། །གདམས་ངག་ཚིག་གཅིག་མ་ནི།

  བླ་མ་ལ་ཕྱག་འཚལ་ལོ། འདིར་རྫོགས་པ་ཆེན་པོའི་སྐབས་ཀྱི་སེམས་ངོ་ཟེར་བ། སེམས་ཀྱི་གཤིས་རང་བབས་ཆོས་ཉིད་ཀྱི་ཐོག་ཏུ་མ་བཅོས་པར་བཞག་པ་སྟེ། མ་ཡེངས་སེམས་ཀྱི་རང་གིས་རང་ལ་བལྟ། ཞེས་ཁ་ནང་ལོག་གིས་ཤེས་པ་རང་གནས་ཐ་མལ་གྱི་ཤེས་པ་རྗེན་ལ་བུད་པ་ཞིག་འཆར་རྒྱུ་ཡོད་པ། ཟ་ཉལ་འགྲོ་འདུག་གི་དུས་ཐམས་ཅད་ན་མི་བརྗེད་པར་དྲན་པས་རྒྱང་འཚོ་བྱེད་ནས་མི་རྒན་གྱིས་བྱིས་པའི་རྩེད་མོ་མཐོང་བ་བཞིན། གྲོལ་སའི་ཆོས་སྐུ་ངོས་བཟུང་ནས། རྩལ་གྱི་རྣམ་རྟོག་ཤར་གྲོལ་རྗེས་མེད་ལམ་དུ་འཁྱེར་དགོས་སོ།། ཞེས་གདམས་ངག་ཚིག་གཅིག་མ་མཁན་ཆེན་ངག་དབང་དཔལ་བཟང་གིས་གསུངས་སོ།།