Self-Liberating Meditation—Tibetan

Dzogchen | Tibetan Mastersདཔལ་སྤྲུལ་རིན་པོ་ཆེ།

English | Deutsch | Español | Français | 中文 | བོད་ཡིག

དཔལ་སྤྲུལ་རིན་པོ་ཆེ།

Dza Patrul Rinpoche

Further Information:

༄༅། །མཐར་ཐུག་རྫོགས་པ་ཆེན་པོའི་སངས་རྒྱས་པའི་ཐབས་ཟབ་མོ་བསྒོམ་པ་རང་གྲོལ་ཞེས་བྱ་བ་བཞུགས་སོ།།

ཨ་བུ་ཧྲལ་པོའི་སྙིང་གཏམ་ཚིགས་སུ་བཀོད་པ་ཨི་གོ་ཨི་གོ  ཨེ་མ་ཧོ། །རྣམ་དག་ཆོས་སྐུའི་ངང་ལས་མ་གཡོས་ཤིང༌། །འཁྲུལ་པའི་རྩ་བ་བཅད་ནས་ཡེ་སངས་རྒྱས། །ཀུན་བཟང་ཁྱེད་ཀྱི་དགོངས་པ་ཅི་ལྟ་བ། །ནོར་མེད་དེ་བཞིན་བདག་གིས་མྱུར་རྟོགས་ཤོག །བུ་སྐལ་ལྡན་བྱང་ཆུབ་ཐོབ་འདོད་ན། །སྤྲང་འཁྱམས་པོ་ཁྱི་རྒན་དཔལ་སྤྲུལ་གྱིས། །དོན་མ་ནོར་སྙིང་གཏམ་ཚིག་གསུམ་བཤད། །བུ་སྙིང་རུས་ཅན་རྣམས་ཉམས་ལེན་ཞུ། །སྟོང་ཉིད་ཆོས་སྐུ་ཞེས་བྱ་བ། །བླ་མ་གྲུབ་ཐོབ་ཐམས་ཅད་ཀྱི་ཐུགས་དམ། །དུས་གསུམ་སངས་རྒྱས་ཐམས་ཅད་ཀྱི་དགོངས་པ། ཡི་དམ་ཐམས་ཅད་ཀྱི་སྲོག་རྩ། མཁའ་འགྲོ་ཐམས་ཅད་ཀྱི་སྙིང་ཁྲག ཆོས་སྐྱོང་ཐམས་ཅད་ཀྱི་རྟེན་གནས། མདོ་རྒྱུད་ཐམས་ཅད་ཀྱི་སྙིང་ཁུ། གསང་སྔགས་རིག་སྔགས་ཐམས་ཅད་ཀྱི་ཡང་བཅུད། ཕྱག་རྫོགས་དབུ་གསུམ་གཅིག་ཏུ་བསྟན་པ། ཆོས་སྐུ་རང་སེམས་དབྱེར་མེད་ངོ་སྤྲད་པ། གཅིག་ཤེས་ཀུན་གྲོལ། གཅིག་ཆོག་རྒྱལ་པོ། ཆོས་ཉིད་ཀྱི་ཕྱག་རྒྱ་ཆེན་པོ། ནང་རྟོགས་ན་ནང་སངས་རྒྱས། ནུབ་རྟོགས་ན་ནུབ་སངས་རྒྱས་ཞེས་བྱ་བ། མིང་ཆེ་ལ་དོན་ཆེ་བ། འདི་ཉིད་ནི་རང་སེམས་སྟོང་པ་མ་བཅོས།རང་ཤར་ཐོག་ཏུ་བཞག་པ་རང་ལ་ཟེར་བ་ཡིན་ནོ། རྣལ་འབྱོར་ཕོ་མོ་རྣམས་ཀྱིས་ཡང་དག་པའི་ལྟ་བ་མ་ནོར་བ་ཞིག་རྟོགས་པར་བྱེད་ན་སེམས་མ་བཅོས་སྟོང་པའི་ངང་དུ་གསལ་ལྷང་ངེར་ཞོག སེམས་འདུག་ན་འདུག་པའི་ཐོག་ཏུ་མ་བཅོས་པར་ཞོག མ་དྲན་ན་མ་དྲན་པའི་ཐོག་ཏུ་མ་བཅོས་པར་ཞོག མདོར་ན་སེམས་མ་བཅོས་གང་ཤར་ཐོག་ཏུ་ཞོག བཅས་བཅོས་དགག་སྒྲུབ་གང་ཡང་མ་བྱེད། ཅི་བྱུང་ན་བྱུང་ཐོག་ཏུ་མ་བཅོས་པར་ཞོགརང་སེམས་ཚུར་ལ་མ་བཞག བལྟ་རྒྱུ་ཕར་ལ་མ་བཙལ། བལྟ་མཁན་བསམ་མཁན་སེམས་ཁོ་རང་ཐོག་ཏུ་མ་བཅོས་པར་ཞོག རང་སེམས་ཚུར་ལ་མ་བཞགསྒོམ་རྒྱུ་ཕར་ལ་མ་བཙལ། སྒོམ་བྱེད་མཁན་སེམས་ཁོ་རང་ཐོག་ཏུ་མ་བཅོས་པར་ཞོག རང་སེམས་བཙལ་བས་མི་རྙེད། སེམས་ཉིད་ཡེ་ནས་སྟོང༌། བཙལ་ཡང་མི་དགོས་བཙལ་མཁན་དེ་ཉིད་ཡིན། བཙལ་མཁན་ཁོ་རང་ཐོག་ཏུ་མ་ཡེངས་པར་ཞོག ཨི་ཤེས་མི་ཤེས་ལྟ་རྒྱུ། གདའ་འམ་མི་གདའ། ཡིན་ནམ་མ་ཡིན། གང་བྱུང་ན་ཡང་བསམ་མཁན་ཁོ་རང་ཐོག་ཏུ་མ་བཅོས་པར་ཞོག བཟང་ངན་ཡག་བཙོག་དགའ་སྡུག་ཅི་དྲན་བྱུང་ན་ཡང་སྤང་བླང་མི་བྱེད་པར་དྲན་མཁན་ཁོ་རང་ཐོག་ཏུ་མ་བཅོས་པར་ཞོགའདོད་མི་འདོད་ཅི་བྱུང་ན་ཡང་བྱུང་ཐོག་ཏུ་མ་བཅོས་པར་ཞོག ​དེ་ཡང་སྙན་རྒྱུད་ལས། གཞི་མ་བཅོས་ཕྱག་རྒྱ་ཆེན་པོ་ཡིན། ལམ་མ་བཅོས་དབུ་མ་ཆེན་པོ་ཡིན། འབྲས་བུ་མ་བཅོས་རྫོགས་པ་ཆེན་པོ་ཡིན། ​ཞེས་གསུངས་སོ། མ་བཅོས་པ་དེ་ཡི་གེགས་སེལ་ཅུང་ཟད་བྱེད་པ་ནི། སེམས་རྩུབ་མོ་མི་དྲན་དགུ་དྲན་བྱུང་བའི་དུས་སུ། ལུས་ངག་ཡིད་གསུམ་ལྷོད་ཤིག་གེ་ཞོག དེ་ཉིད་ངང་ནས་སེམས་མི་དྲན་དགུ་དྲན་དེ་ལ་ཕྱོགས་སྲུང་ཕྱོགས་འཚོ་གྱིས་ལ་ཡེངས་མ་ཤོར་བའི་ངང་སྡོད། སེམས་ཕྲ་མོ་དྲན་མགྱོགས་པ་རིག་ཙམ་མི་རིག་ཙམ་དེ་འདྲ་བྱུང་དུས། རིག་པ་ཧྲིལ་གྱིས་སྒྲིམ་ལ་གསལ་ལྷང་ངེར་ཞོག སེང་ངེར་ཡེ་རེ་སྡོད། སེམས་བྱིང་རྨུགས་འཐིབ་གསུམ་བྱུང་བའི་དུས། བདེ་གསལ་གྱི་ཉམས་ལ་མ་ཆགས་པར་བཅས་བཅོས་མི་བྱེད་པར་རང་སར་ཞོག་ལ་སྡོད། སེམས་དགའ་སྡུག་བྱུང་དུས་རེས་དགའ་དགའ། སྡུག་སྡུག་བྱེད་མཁན་ཁོ་རང་ཐོག་ཏུ་མ་ཡེངས་པརཞོག་ལ་སྡོད། དགའ་བྲོད་སྐྱིད་རྒྱག་བཀུར་སྟི་བྱུང་དུས། དགའ་བྲོད་བདུད་ཀྱི་དབང་དུ་སྣང་བ་མཐོ་ལིང་ངེ་འབྲེང་སྟེ་མ་བཏང་བར་མགོ་བོ་ཁུག སྣང་བ་ཕོབ་ལ་ལུས་སེམས་དལ་ཤིག་གེ་སྡོད། ན་ཚ་སྡུག་བསྔལ་རྐུ་འཕྲོག་ཚིག་ངན་སྨད་བརྡུང་རྐྱེན་ངན་མུ་གེ་དེ་རྣམས་བྱུང་དུས་སུ། མགོ་བོ་མ་ཁུག་ངོ་མདངས་མ་ཤོར་བ། མཆི་མ་མ་བཏང་ལ། ​དགའ་ཡ་ལེ་སྤྲོ་སེང་ངེར་འཛུམ་མུ་ལེ་སྡོད། སེམས་ཀྱི་མཚང་བསྟན་པ་ནི། སྒོམ་ཆེན་ཕོ་མོ་ལ་ལས། སེམས་ངོ་ཤེས་རྒྱུ་མ་རེད་བསམ་ནས་སྡུག་སྟེ་མཆི་མ་ཤར་ཤར་འབབ་ནས་འོང་སྟེ། སྡུག་མི་དགོས། མི་ཤེས་རྒྱུ་ཅི་ཡང་མེད། སེམས་ངོ་ཤེས་རྒྱུ་མ་རེད་བསམ་མཁན་ཁོ་རང་གི་ཐོག་ཏུ་ཞོག་དང་དེ་རང་ཡིན། སྒོམ་ཆེན་ལ་ལས་སེམས་ངོ་སྲུང་བ་ལ་དཀའ་མོ་གདའ་ཟེར་ཏེ། དཀའ་མོ་ཅི་ཡང་མེད། སྒོམ་མི་ཤེས་པའི་སྐྱོན་ཡིན། སྒོམ་བཙལ་ནི་མི་དགོས། ཉོ་ནི་མི་དགོས། བསྒྲུབ་ནི་མི་དགོས། འགྲོ་ནི་མི་དགོས། ལས་ནི་མི་དགོས། རང་གི་སེམས་ལ་གང་བྱུང་གང་ཤར་ངང་དུ་བཞག་པས་ཆོག རང་གི་སེམས་ནི་ཡེ་ནས་རང་ལ་ཡོད། བོར་རྒྱུ་རྙེད་རྒྱུ། ཡོད་རྒྱུ་མེད་རྒྱུ་ནི་ཅི་ཡང་མེད། ཡེ་ནས་ཡོད་པའི་སེམས་འདི་ནི་དྲན་དུས་དྲན། མི་དྲན་དུས་མི་དྲན་འདུག་འདུག་མི་འདི་ནི་རང་ཡིན། སེམས་ཁོ་རང་ཅི་དྲན་བྱུང་ན་ཡང་བྱུང་ཐོག་ཏུ་མ་བཅོས་པར་ལྷོད་དེ་མ་ཡེངས་པར་སྐྱོང་དང་ཆོག བདེ་མོ་སླ་མོ་ཤུགས་ལ་འོང་བ་ཡིན། ཆོས་ལ་དཀའ་སྣང་བྱུང་ན་རང་སྡིག་སྒྲིབ་ཆེ་བའི་རྟགས་ཡིན། སྒོམ་ཆེན་ལ་ལས། དགོས་པའི་སེམས་རང་ཐོག་ཏུ་མི་བཞག་ནས། མི་དགོས་པའི་སེམས་ཀྱི་ཕར་བལྟ་ཚུར་ཉུག་མང་པོ་བྱེད་པ་གདའ་སྟེ། ཕར་བལྟ་ཚུར་ཉུག་བྱས་པས་སེམས་མི་རིག་མི་རྙེད། དོན་མ་གོ་བའི་སྐྱོན་ཡིན། ཕར་ལྟ་ཚུར་ཉུག་ཅི་མི་དགོས། ཕར་ལྟ་ཚུར་ཉུག་བྱེད་མི་སེམས་ཁོ་རང་ཐོག་ཏུ་ཞོག་དང་དེ་རང་ཡིན། སྒོམ་ཆེན་ལ་ལས། སེམས་དྲན་ན་དྲན། མི་དྲན་ན་མི་དྲན་པའི་ཐོག་ཏུ་མི་བཞག་ནས། ལོག་གཅིག་ནས་ཡོང་བསམ་ནས་ཕར་བཙལ་ཚུར་ཉུག་བྱས་པས་སེམས་ངོ་མི་ཤེས་མི་རྟོགས། ཕར་བཙལ་ཚུར་ཉུག་བྱེད་མི་དགོས་སེམས་དྲན་ན་དྲན་མ་དྲན་ན་མ་དྲན་ཐོག་ཏུ་ཞོག་དང་དེ་རང་ཡིན། སྒོམ་ཆེན་ལ་ལས། རང་གི་སེམས་སྟོང་པ་ཉིད་ལ་རང་སེམས་ཡིད་མ་ཆེས་ནས། ཨི་ཡིན་མི་ཡིན་བསམ་ནས་ཐེ་ཚོམ་བྱེད་པ་ཡང་གདའ་སྟེ། དེ་ཡི་དོན་མ་གོ་བའི་སྐྱོན་ཡིན། ཐེ་ཚོམ་བྱེད་མི་དགོས། རང་སེམས་ཡེ་ནས་སྟོང་པ་ཡིན་པས་སྟོང་པའི་ངང་དུ་ཞོག་དང་དེ་རང་ཡིན། ཐེ་ཚོམ་བྱུང་ན་ཐེ་ཚོམ་ཁོ་རང་ཐོག་ཏུ་ཞོག་དང་དེ་རང་ཡིན། སྒོམ་ཆེན་ལ་ལས། དྲན་མཁན་སེམས་ལ་མི་ལྟ་བར། དྲན་པའི་ཡུལ་རྒྱུ་ཟོག་ས་རྡོ་རྣམས་ལ་བལྟ་མི་ཡང་མང་པོ་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། གཉིས་འཛིན་གྱི་ལྟ་བ་ཡིན། དྲན་མཁན་ཁོ་རང་ཐོག་ཏུ་ཞོག་ལ་ལྟོས། སྒོམ་ཆེན་ལ་ལས། སྣང་སེམས་དབྱེར་མེད་དུ་མི་བཞག་ནས། སྣང་བ་རང་འདེད་ཅིང་འགྲོ་མི་ཡང་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། གཉིས་སྣང་གི་ལྟ་བ་ཡིན། སྣང་བ་ཕར་ལ་མ་འདེད། དངོས་པོ་ཚུལ་ལ་མ་བཀུག སྣང་སེམས་དབྱེར་མེད་དུ་ཞོག སྒོམ་ཆེན་ལ་ལས། རང་སར་མི་བཞག་ནས། བྱི་ལས་བྱི་བ་སྒུག་པ་ལྟར། རྣམ་རྟོག་ཅི་བྱུང་བལྟ་འདུག་མི་ཡང་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། དྲན་པ་སྔོན་བསུ་ཡིན། རྣམ་རྟོག་བྱུང་ན་བྱུང་མ་བྱུང་ན་མ་བྱུང་ཐོག་ཏུ་ཞོག སྒོམ་ཆེན་ལ་ལས།​ སེམས་རང་ཐོག་ཏུ་བཞག་མ་ཤེས་ནས། སྔ་མ་དྲན་པའི་རྗེས་སུ་ལྟ་ཞིང་འགྲོ་མི་ཡང་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། དྲན་པའི་རྗེས་གཅོད་ཡིན། དྲན་པའི་རྗེས་མི་གཅོད་པར་གཅོད་མཁན་ཁོ་རང་ཐོག་ཏུ་ཞོག སྒོམ་ཆེན་ལ་ལས། སེམས་ཅི་གནས་གང་ཤར་ཐོག་ཏུ་མི་བཞག་ནས། སྒོམ་བཟང་པོ་ཞིག་འདོད་ནས་སེམས་གན་བཅར་མདུན་ཚུག་9ཧྲིག་ཧྲིག་མང་པོ་བྱེད་པ་ཡང་གདའ་སྟེ། དེ་ནི་ཡང་དག་པའི་ལྟ་བ་མ་ཡིན།སེམས་བཅོས་མ་ཡིན་སེམས་བཟོ་བཅོས་གང་ཡང་མི་བྱེད་པ་རང་གནས་ཅི་བྱུང་གང་ཤར་ངང་དུ་ཞོག སྒོམ་ཆེན་ལ་ལས། གང་དྲན་མི་བཅུག་པར་ཤེད་ཕྱུང་ནས་སེམས་བཟུང་འདུག་མི་ཡང་གདའ་སྟེ། དེ་ནི་ཡང་དག་པའི་ལྟ་བ་མ་ཡིན་སེམས་བཀག་པ་ཡིན། སེམས་གནས་ན་གནས་ཐོག་ཞོག འགྱུ་ན་འགྱུ་ཐོག་ཞོག སྒོམ་ཆེན་ལ་ལས། ཁྱད་གསོད་ལྟར་སེམས་ཧང་ཧང་བྱེད་འདུག་མི་ཡང་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། སེམས་ཧང་ལྟས་ཡིན། སྟོང་པའི་ངང་དུ་གསལ་ལྷང་ངེར་ཞོག སྒོམ་ཆེན་ལ་ལས། སེམས་ཉིད་འདི་སྟོང་པ་ཡིན་བསམ་ནས་སྒོམ་པ་ཡང་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། སྟོང་པ་བཟོ་སྒོམ་ཡིན། ​སྟོང་པ་ཉིད་ཡིན་བསམ་མཁན་ཐོག་ཏུ་ཞོག སྒོམ་ཆེན་ལ་ལས། བདེ་ཤིག་གེ་སྟོང་སང་སང་གསལ་ཧྲིག་ཧྲིག་བྱུང་དུས་བལྟ་རྩུབ་ཟིང་ཟིང་ན་ཁ་ཁ། སྟོང་འཕྱང་འཕྱང༌། ལྟ་རྒྱུ་མེད་པ་དེ་འདྲ་བྱུང་དུས་མི་ལྟ་མཁན་ཡང་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། སྤང་བླང་ཡིན། སྤང་བླང་གང་ཡང་མི་བྱེད་པར་གང་བྱུང་ཐོག་ཏུ་ཞོག སྒོམ་ཆེན་ལ་ལས། བཟང་པོ་དྲན་བྱུང་དུས་ལྟ། ངན་པ་ཙོག་པོ་དྲན་བྱུང་དུས་མི་བལྟ་མཁན་ཡང་གདའ་སྟེ། ​དེ་ནི་ཡང་དག་པའི་ལྟ་བ་མ་ཡིན། བཟང་ལྟ་ངན་བསྐྱུར་ཡིན། བཟང་ལྟ་ངན་བསྐྱུར་མ་བྱེད་པར་བཟང་ངན་གང་དྲན་བྱུང་ན་ཡང་དེ་ཡི་ཐོག་ཏུ་མ་ཡེངས་པར་ཞོག སྒོམ་ཆེན་ལ་ལས། སེམས་བདེ་མོ་བྱུང་ན་དགའ། རྣམ་རྟོག་རྒོད་པོ་བྱུང་ན་རང་གི་སེམས་ལ་ཞེ་སྡང་བྱེད་པ་ཡང་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། གང་ཤར་གྱི་ངོ་བོ་སྐྱོང་མ་ཤེས་པའི་སྐྱོན་ཡིན། རྣམ་རྟོག་རྒོད་པོ་བྱུང་དུས་སེམས་གློད་གློད་ངང་ནས་རྒོད་པོ་ཁོ་རང་གི་ཐོག་ཞོག །སྒོམ་ཆེན་ལ་ལས་དགོས་མི་དགོས་མེད་པར། སྒྲིམ་ལྷོད་ཀྱང་མི་བྱེད་པར་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། བཅོས་མ་ཅུང་ཟད་ཕོག་འགྲོ་བ་ཡིན། སེམས་གནས་མ་ཤེས་པའི་སྐྱོན་ཡིན། དགོས་པའི་དུས་སུ་སྒྲིམ་ལྷོད་གྱིས། མི་དགོས་པའི་དུས་སུ་སྒྲིམ་གློད་མི་བྱ་བར་རང་བབས་སུ་གསལ་ལྷང་ངེར་ཞོག སྒོམ་ཆེན་ལ་ལས། ཟས་སྐོམ་ཞིམ་མངར་གྱི་རོ་དྲན་དུས་སུ་སྒོམ་མི་ཚུག་ནས་ཡར་ལངས་ནས་ཟས་སྐོམ་ཞིམ་མངར་ཅན་ཞིག་ཨེ་ཐོབ་མི་ཐོབ་བྱེད་ནས་ཟས་སྐོམ་ཞིམ་མངར་ལ་ལོངས་སྤྱོད་པ་གདའ་སྟེ། དེ་འདྲ་བྱས་ན་བསམ་གཏན་འཚོ་བ་ཟ་བའི་སྒོམ་ལེགས་པོ་ཞིག་མི་འོང༌། ཁ་ཞིམ་ལྟོ་སྐྱིད་ཀྱིས་སྒོམ་ཆེན་སྡུག་བྲེད་ཅན་ཅིག་འོང༌། དེ་ཕྱིར་ཟས་སྐོམ་ཞིམ་མངར་གྱི་རོ་ལ་མ་ཆགས་པར་བསམ་གཏན་གྱི་འཚོ་བ་ཟ་དགོས་པ་ཡིན། སྒོམ་ཆེན་ལ་ལས། སྐྱིད་རྒྱག་ལོངས་སྤྱོད་ཆེ་བསྟོད་དེ་འདྲ་བྱུང་དུས། སྒོམ་བྱེད་མི་ཚུག་པ་དགའ་དགའ་སྐྱིད་སྐྱིད་ཆེར་བྱེད། སྡུག་བསྔལ་རྐྱེན་ངན་ན་ཚ་སྨད་བཤའ་ཁ་མཆུ་དེ་འདྲ་བྱུང་དུས་སྒོམ་བྱེད་མི་ཐུབ་ནས། ཁ་ངོ་སྤྲིན་ནག་ལྟར་བསྡུས་ནས་ཁ་ཡིས་སྡུག་རབ་བཤད། མིག་ནས་མཆི་མ་བཏང་མཁན་ཡང་གདའ་སྟེ། དེ་འདྲ་བྱས་ན་དགའ་སྡུག་རོ་སྙོམས་ཐུབ་པའི་ཆོས་པ་ལེགས་པོ་ཞིག་མི་འོང༌། དགའ་སྡུག་ཆོས་བརྒྱད་ཀྱི་དབང་དུ་ཤོར་བའི་ཆོས་མེད་ཐ་མལ་སྡུག་བྲེད་གཅིག་འོང་བ་ཡིན། དེའི་ཕྱིར་དགའ་སྡུག་གང་ཡང་རོ་སྙོམས་ནས་ལམ་ཁྱེར་དགོས་པ་ཡིན་ནོ། སེམས་ཀྱི་རྣམ་ཐར་བཤད་པ་ནིི། །ཨེ་མ་ཧོཿ སེམས་ཉིད་ཡེ་ནས་དངོས་པོ་མེད། །བལྟས་པས་མི་མཐོང་སྟོང་པ་འགྱུར། །སྟོང་པ་མ་ཡིན་རིག་ཅིང་གསལ། །རིག་སྟོང་དབྱེར་མེད་མཁའ་ལྟར་ཁྱབ། །བཞག་ཀྱང་གཏད་མེད་ཟང་ཐལ་འགྲོ། །མ་བཞག་བཏང་་ཡང་རང་སར་འཁོར། །རྐང་ལག་མེད་ཀྱང་ཀུན་ཏུ་རྒྱུག །བཏང་ཡང་མི་འགྲོ་རང་སར་འཁོར། །མིག་ནི་མེད་ཀྱང་ཐམས་ཅད་རིག །རིག་པའི་སྣང་བ་སྟོང་པར་འགྲོ། །སེམས་ཀྱི་ངོ་བོ་འདི་ཞེས་མེད། མེད་ཀྱང་དྲན་རིག་སྣ་ཚོགས་འཆར། །ཡོད་པ་མ་ཡིན་སྟོང་པར་འགྲོ། །མེད་པ་མ་ཡིན་དྲན་རིག་སྣང༌། །སྣང་སྟོང་ཟུང་འཇུག་འོད་ཟེར་འབར། །སྟོང་གསལ་ཆོས་སྐུ་རང་མདངས་གསལ། །ཡེ་ཤེས་ལྔ་ལྡན་རབ་ཏུ་རྒྱས། །ཀ་དག་གནས་ལུགས་ལྷུན་གྲུབ་དང༌། །སྐུ་དང་ཞིང་ཁམས་འགག་མེད་འཆར། །འོད་གསལ་མ་བུ་གཅིག་ཏུ་འདྲེས། །སེམས་ཀྱི་གནས་ལུགས་དེ་འདྲ་བ། །རྟོགས་པར་འདུག་གམ་རྟོགས་ལྡན་རྣམས། །ཤེས་པར་འདུག་གམ་ཤེས་ཆེན་རྣམས། །ཉམས་ལེན་མཛོད་ཅིག་རྣལ་འབྱོར་རྣམས། ། 

༈ འཁྲུལ་པ་རང་གྲོལ་གྱི་གདམས་ངག་ནི། །དུག་སྨན་དུ་འགྱུར་བ་ལྟ་བུ་ནི། །སྟོང་པ་ཉིད་ལ་སེར་སྣ་མེད། འཁྲུལ་བའི་དབང་གིས་སེར་སྣ་ ལོང། །མ་འཁྲུལ་སེར་སྣ་ལངས་མཁན་ལྟོས། །ལྟོས་ཤིག་སྐྱོང་ལ་མ་ཡེངས་དང༌། །སེར་སྣ་སངས་ནས་སྟོང་པར་འགྱུར། །སྟོང་པའི་ངང་དུ་མ་ཡེངས་ཞོག །དེ་ནི་སེར་སྣ་རྣམ་དག་ཡིན། །སྦྱིན་པ་དེ་བས་གོང་ན་མེད། །དེ་རྟོགས་རྣལ་འབྱོར་ཨེ་མ་ཧོ། སྟོང་པ་ཉིད་ལ་ཆགས་ཞེན་མེད། །འཁྲུལ་པའི་དབང་གི་ཆགས་ཞེན་ལོང༌།། །མ་འཁྲུལ་ཆགས་ཞེན་ལངས་མཁན་ལྟོས། །ལྟོས་ཞིག་སྐྱོང་ལ་མ་ཡེངས་དང༌། །ཆགས་ཞེན་སངས་ནས་སྟོང་པར་འགྱུར། །སྟོང་ཉིད་ངང་དུ་མ་ཡེངས་ཞོག །དེ་ནི་ཆགས་ཞེན་རྣམ་དག་ཡིན། །ཚུལ་ཁྲིམས་དེ་བས་གོང་ན་མེད། །དེ་རྟོགས་རྣལ་འབྱོར་ཨེ་མ་ཧོ། །སྟོང་པ་ཉིད་ལ་ཁོང་ཁྲོ་མེད། །འཁྲུལ་པའི་དབང་གིས་ཁོང་ཁྲོ་ལོངས། །མ་འཁྲུལ་ཁོང་ཁྲོ་ལངས་མཁན་ལྟོས། །ལྟོས་ཤིག་སྐྱོངས་ལ་མ་ཡེངས་དང༌། །ཁོང་ཁྲོོ་སངས་ནས་སྟོང་པར་འགྱུར། །སྟོང་ཉིད་ངང་དུ་མ་ཡེངས་ཞོག །དེ་ནི་ཁོང་ཁྲོོ་རྣམ་དག་ཡིན། །བཟོད་པ་དེ་བས་གོང་ན་མེད། །དེ་རྟོགས་རྣལ་འབྱོར་ཨེ་མ་ཧོ། །སྟོང་པ་ཉིད་ལ་ལེ་ལོ་མེད། །འཁྲུལ་པའི་དབང་གིས་ལེ་ལོ་འབྱུང༌། །མ་འཁྲུལ་ལེ་ལོ་འབྱུང་མཁན་ལྟོས། །ལྟོས་ཤིག་སྐྱོང་དང་མ་ཡེངས་དང༌། །ལེ་ལོ་སངས་ནས་སྟོང་པར་འགྱུར༌། །སྟོང་ཉིད་ངང་དུ་མ་ཡེངས་ཞོག །དེ་ནི་ལེ་ལོ་རྣམ་དག་ཡིན། །བརྩོན་འགྲུས་དེ་བས་གོང་ན་མེད། །དེ་རྟོགས་རྣལ་འབྱོར་ཨེ་མ་ཧོ། །སྟོང་པ་ཉིད་ལ་གཡེང་བ་མེད། །འཁྲུལ་པའི་དབང་གིས་གཡེང་པ་འབྱུང༌། །མ་འཁྲུལ་གཡེངས་བ་འབྱུང་མཁན་ལྟོས། །ལྟོས་ཤིག་སྐྱོངས་ལ་མ་ཡེངས་དག །གཡེང་བ་སངས་ནས་སྟོང་ཉིད་འགྱུར། །སྟོང་ཉིད་ངང་ལ་མ་ཡེངས་ཞོག །དེ་ནི་རྣམ་གཡེངས་རྣམ་དག་ཡིན། །བསམ་གཏན་དེ་བས་གོང་ན་མེད། །དེ་རྟོགས་རྣལ་འབྱོར་ཨེ་མ་ཧོ། །སྟོང་པ་ཉིད་ལ་གཏི་མུག་མེད། །འཁྲུལ་པའི་དབང་གིས་གཏི་མུག་ལངས། །མ་འཁྲུལ་གཏི་མུག་འབྱུང་མཁན་ལྟོས། །ལྟོས་ཤིག་སྐྱོངས་ལ་མ་ཡེངས་དང༌། །གཏི་མུག་སངས་ནས་སྟོང་ཉིད་འགྱུར། །སྟོང་ཉིད་ངང་དུ་མ་ཡེངས་ཞོག །དེ་ནི་གཏི་མུག་རྣམ་དག་ཡིན། །ཤེས་རབ་དེ་བས་གོང་ན་མེད། །དེ་རྟོགས་རྣལ་འབྱོར་ཨེ་མ་ཧོ། །སྟོང་པ་ཉིད་ལ་རློམ་སེམས་མེད། །འཁྲུལ་པའི་དབང་གིས་རློམས་སེམས་ལངས། །མ་འཁྲུལ་རློམས་སེམས་ངོ་བོ་ལྟོས། །ལྟོས་ཤིག་སྐྱོངས་ལ་མ་ཡེངས་དང༌། །རློམས་སེམས་སངས་ན་སྟོང་ཉིད་འགྱུར། །སྟོང་ཉིད་ངང་དུ་མ་ཡེངས་ཞོག །དེ་ནི་རློམས་སེམས་རྣམ་དག་ཡིན། །ཆོག་ཤེས་དེ་བས་གོང་ན་མེད། །དེ་རྟོགས་རྣལ་འབྱོར་ཨེ་མ་ཧོ། ། 

༈ ཉོན་མོངས་རང་གྲོལ་གྱི་མན་ངག་ནི། །ཉོན་མོངས་ཡེ་ཤེས་སུ་བསྒྱུར་བས་ན། །ཡེངས་མེད་ངང་ལ་སྡུག་བསྔལ་མེད། །འཁྲུལ་པའི་དབང་གིས་སྡུག་བསྔལ་འབྱུང༌། །མ་ཡེངས་སྡུག་བསྔལ་ངོ་བོ་ལྟོས། །ལྟོས་ཤིག་མ་ཡེངས་སྐྱོངས་མཛོད་ལ། སྡུག་བསྔལ་མེད་ནས་སྟོང་པར་འགྱུར། །སྟོང་གསལ་ངང་དུ་མ་ཡེངས་ཞོག །དེ་ནི་སྡུག་བསྔལ་རྣམ་དག་ཡིན། །བདེ་ཆེན་ཆོས་སྐུ་དེ་ལ་ཟེར། །ཡེངས་མེད་ངང་དུ་ཉོན་མོངས་མེད། །ཡེངས་པའི་སྐྱོན་གྱིས་ཉོན་མོངས་ལོང། །མ་ཡེངས་ཉོན་མོངས་ངོ་བོ་ལྟོས། །ལྟོས་ཤིག་སྒོམས་ལ་མ་ཡེངས་དང༌། །ཉོན་མོངས་དེ་ནི་སྟོང་པར་འགྲོ། །སྟོང་པའི་ངང་དུ་མ་ཡེངས་ཞོག །དེ་ནི་ཉོན་མོངས་རྣམ་དག་ཡིན། །སྐྱེ་མེད་ཆོས་སྐུ་དེ་ལ་ཟེར། །ཡེངས་མེད་ངང་ལ་ཞེ་སྡང་མེད། །ཡེངས་པའི་སྐྱོན་གྱིས་ཞེ་སྡང་ལོང༌། །མ་ཡེངས་ཞེ་སྡང་ངོ་བོ་ལྟོས། །ལྟོས་ཤིག་སྒོམས་ལ་མ་ཡེངས་དག །ཞེ་སྡང་མེད་ནས་སྟོང་པར་འགྲོ། །སྟོང་གསལ་ངང་ལ་མ་ཡེངས་ཞོག །དེ་ནི་ཞེ་སྡང་རྣམ་དག་ཡིན། །མེ་ལོང་ཡེ་ཤེས་དེ་ལ་ཟེར། །ཡེངས་མེད་ངང་ལ་ང་རྒྱལ་མེད། །ཡེངས་པའི་སྐྱོན་གྱིས་ང་རྒྱལ་ལོང༌། །མ་ཡེངས་ང་རྒྱལ་ངོ་བོ་ལྟོས། །ལྟོས་ཤིག་སྒོམས་ལ་མ་ཡེངས་དང༌། །ང་རྒྱལ་མེད་ནས་སྟོང་གསལ་འགྲོ །སྟོང་གསལ་ངང་དུ་མ་ཡེངས་ཞོག །དེ་ནི་ང་རྒྱལ་རྣམ་དག་ཡིན། །མཉམ་ཉིད་ཡེ་ཤེས་དེ་ལ་ཟེར། །ཡེངས་མེད་ངང་ལ་འདོད་ཆགས་མེད། །ཡེངས་པའི་སྐྱོན་གྱིས་འདོད་ཆགས་ལོང། །མ་ཡེངས་འདོད་ཆགས་ངོ་བོ་ལྟོས། །ལྟོས་ཤིག་སྒོམས་ལ་མ་ཡེངས་དང༌། །འདོད་ཆགས་མེད་ནས་སྟོང་གསལ་འགྲོ། །སྟོང་གསལ་ངང་དུ་མ་ཡེངས་ཞོག །དེ་ནི་འདོད་ཆགས་རྣམ་དག་ཡིན། །སོར་རྟོག་ཡེ་ཤེས་དེ་ལ་ཟེར། །ཡེངས་མེད་ངང་ལ་ཕྲག་དོག་མེད། །ཡེངས་པའི་སྐྱོན་གྱིས་ཕྲག་དོག་ལོང། །མ་ཡེངས་ཕྲག་དོག་ངོ་བོ་ལྟོས། །ལྟོས་ཤིག་བསྒོམ་ལ་མ་ཡེངས་དང༌། །ཕྲག་དོག་མེད་ནས་སྟོང་པར་འགྲོ། །སྟོང་གསལ་ངང་ལ་མ་ཡེངས་ཞོག །དེ་ནི་ཕྲག་དོག་རྣམ་དག་ཡིན། །བྱ་གྲུབ་ཡེ་ཤེས་དེ་ལ་ཟེར། །ཡེངས་མེད་ངང་ལ་གཏི་མུག་མེད། །ཡེངས་པའི་སྐྱོན་གྱིས་གཏི་མུག་ལངས། །མ་ཡེངས་གཏི་མུག་ངོ་བོ་ལྟོས། །ལྟོས་ཤིག་བསྒོམ་ལ་མ་ཡེངས་དང༌། །གཏི་མུག་མེད་ནས་སྟོང་གསལ་འགྲོ །སྟོང་གསལ་ངང་དུ་མ་ཡེངས་ཞོག །དེ་ནི་གཏི་མུག་རྣམ་དག་ཡིན། །ཆོས་དབྱིངས་ཡེ་ཤེས་དེ་ལ་ཟེར། །ཡེངས་མེད་ངང་ལ་བྱིང་རྨུག་མེད། །ཡེངས་པའི་སྐྱོན་གྱིས་བྱིན་རྨུག་འཐིབ། །མ་ཡེངས་བྱིང་རྨུག་ངོ་བོ་ལྟོས། །ལྟོས་ཤིག་སྒོམས་ལ་མ་ཡེངས་དང༌། །བྱིང་རྨུགས་མེད་ནས་སྟོང་གསལ་འགྲོ །སྟོང་གསལ་ངང་དུ་མ་ཡེངས་ཞོག །དེ་ནི་བྱིང་རྨུག་རྣམ་དག་ཡིན། །སྟོང་གསལ་ཡེ་ཤེས་དེ་ལ་ཟེར། །ཡེངས་མེད་ངང་ལ་འཐོར་རྒོད་མེད། །ཡེངས་པའི་སྐྱོན་གྱིས་འཐོར་རྒོད་ལངས། །མ་ཡེངས་འཐོར་རྒོད་ངོ་བོ་ལྟོས། །ལྟོས་ཤིག་སྒོམ་ལ་མ་ཡེངས་དང༌། །འཐོར་རྒོད་མེད་ནས་སྟོང་གསལ་འགྲོ །སྟོང་གསལ་ངང་དུ་མ་ཡེངས་ཞོག །དེ་ནི་འཐོར་རྒོད་རྣམ་དག་ཡིན། །འགྱུར་མེད་ཡེ་ཤེས་དེ་ལ་ཟེར། །ཡེངས་མེད་ངང་དུ་དུག་གསུམ་མེད། །ཡེངས་པའི་སྐྱོན་གྱིས་དུག་གསུམ་ལོང། །མ་ཡེངས་དུག་གསུམ་ངོ་བོ་ལྟོས། །ལྟོས་ཤིག་བསྒོམ་ལ་མ་ཡེངས་དང༌། །དུག་གསུམ་མེད་ནས་སྟོང་གསལ་འགྲོ། །སྟོང་གསལ་ངང་དུ་མ་ཡེངས་ཞོག །དེ་ནི་དུག་གསུམ་རྣམ་དག་ཡིན། །སྐུ་གསུམ་ཡེ་ཤེས་དེ་ལ་ཟེར། །

༈ ངེས་ཤེས་བསྐྱེད་པའི་དོན་དུ་སེམས་ཀྱི་འོང་ལུགས་བཤད་པ་ནི། །སྒོམ་ཆེན་གྱི་སེམས་ལ་ཐང་རེ་ཅི་ཡང་མི་བསམ་པ། །སྟོང་ཧོང་ངེ་འདུག་པ་འོང༌། །དེ་འདྲ་བྱུང་དུས་བཅས་བཅོས་མི་བྱེད་པར་རང་ཐོག་ཏུ་ལྷང་ངེར་ཞོག །ཐང་རེ་གསལ་ལྷང་ངེ༌། །བདེ་འབོལ་ལེ་འདུག་པའི་དུས་འོང༌། །དེ་འདྲ་བྱུང་དུས་སེམས་དེ་གསལ་ལྷང་ངེར་ཞོག །ཐང་རེ་སེམས་ནག་ཐམ་ཐམ་སྟོང་ཧང་ཧང་གསལ་མི་ཐུབ་པའི་དུས་འོང༌། དེ་འདྲ་བྱུང་དུས་རིག་པ་གསལ་གྱིས་བཏོན་ལ་རྗེན་ཧུ་རེར་ཞོག །ཐང་རེ་སེམས་ལ་སྡུག་ཧང་གིས་འོང༌། །དེ་འདྲ་བྱུང་དུས་སྤྲོ་སེང་ངེར་ལྷོད་ཤིག་གེ་དགའ་ཡ་ལེ་སྡོད། །ཐང་རེ་ཡུད་ཙམ་འདུག་ཅིང་ཡུན་རིང་མི་འདུག་པ་ཞ་བི་ཞི་བི་དྲན་འགྲོ་བ་འདྲ་འོང༌། །དེ་འདྲ་བྱུང་དུས་སེམས་ཁ་བསྒྲིམ་ལ་ཁོང་ལྷོད་ལ་ཞོག །ཐང་རེ་སེམས་རིག་ཙམ་མི་རིག་ཙམ་དེ་འདྲ་འོང༌། །དེ་འདྲ་བྱུང་དུས་སེམས་མར་ལོག་ནང་ནས་སྤུ་བཏོན་པ་ལྟར་གསལ་ཧྲིག་གིས་ཕྱུང་ནས་མ་ཡེངས་པར་ཧུ་རེ་ཞོག །ཐང་རེ་མི་དྲན་དགུ་དྲན་བྱེད་ནས་ཡར་འཕྱོང་མར་འཕྱོང་བྱེད་ཅིང་ཡུད་ཙམ་འདུག་མི་ཐུབ་པ་ཡང་འོང༌། །དེ་འདྲ་བྱུང་དུས་ལུས་ལྷོད་སེམས་ལྷོད་ཀྱི་ངང་ནས་ཡེངས་མ་ཤོར་བར་ཕྱོགས་འཚོ་ཕྱོགས་སྐྱོང་གྱིས་ལ་ཞོག ཐང་རེ་བསྒོམ་སྙིང་མི་འདོད་པ་སྙིང་ན་བ་འདུག་མི་ཚུགས་པ་དེ་འདྲ་ཡང་འོང༌། དེ་འདྲ་བྱུང་དུས་བླ་མ་ལ་གསོལ་བ་ལྷང་ལྷང་བཏབ་ཅིང་སྣང་བ་བདེ་ལྷང་ངེ་སྐྱིད་ལྷང་ངེ་ཞོག ཐང་རེ་བདེ་བདེ་ལྡན་ལྡན་གསལ་བ་དང་དགའ་ལྷག་ལྷག བྲོ་འཁྲབ་འདོད་པ་ཡང་འོང༌། དེ་འདྲ་བྱུང་དུས་རང་སེམས་ལ་འཛིན་པ་མ་ཞུགས་པར་ལྷོད་མེར་རེ་སྡོད། སེམས་ཀྱི་འོང་ལུགས་དེ་རྣམས་ནི་ལས་དང་པོ་པ་གནས་ལུགས་གཏན་མ་འབེབས་པའི་དུས་འོང་བ་ཡིན། གཏན་ལ་འབེབས་ཐུབ་པ་རྣམས་ལ་དེ་འདྲ་འོང་རྒྱུ་མེད། དེ་ཡང་ཟུར་ཙམ་བཤད་པར་བྱ་སྟེ། གནས་ལུགས་གཏན་ལ་འབེབས་པའི་དུས། ལྟ་ཡང་མི་དགོས་འོད་གསལ་རང་བཞིན་འཆར། ​བསྒོམ་ཡང་མི་དགོས་སེམས་ཉིད་རང་ས་ཟིན། ཡེངས་ཀྱང་མི་ཡེངས་སེམས་ཉིད་རང་ཚོད་ཟིན། །འགྱུར་ཡང་མི་འགྱུར་དྲན་རིག་མཁའ་ལྟར་ཁྱབ། །བཅས་བཅོས་མི་དགོས་འོད་གསལ་ངང་དུ་གནས། །རང་སེམས་ཡེངས་མེད་ཆོས་སྐུ་དང༌། སངས་རྒྱས་དགོངས་པའི་ཆོས་སྐུ་དང༌། །དབྱེར་མེད་འོད་གསལ་ངང་ནས་འདྲེས། །ཡེངས་མེད་རང་ས་ཟིན་ནས་ཀྱང༌། །སྟོང་ཉིད་ཆོས་སྐུའི་ངང་ཉིད་ལས། །ལྷུན་གྲུབ་འོད་གསལ་ཤར་བའི་དུས། །རང་སེམས་སངས་རྒྱས་དབྱེར་མི་འབྱེད། །སྐུ་དང་ཞིང་ཁམས་འབྲལ་མེད་འབྱུང༌། །རེ་དོགས་བདག་འཛིན་དགའ་སྡུག་མེད། །སྤང་བླང་ཐེ་ཚོམ་སྣ་ཚོགས་བྲལ། །སེམས་གཏན་ལ་ཕབ་ན་དེ་ལྟར་འབྱུང༌། །

༈ སྤྱོད་ལམ་རྣམ་བཞི་ཁྱེར་ཚུལ་ནི། །སྒོམ་ཆེན་འགྲོ་བའི་དུས་སུ་ནི། །སྨྱོ་འཕྱོང་རྒྱུག་འཕྱོང་མི་བྱེད་པར། །ལུས་སེམས་དལ་བའི་ངང་ཉིད་ ལས། །རང་སེམས་གཡེལ་མེད་སྲུང་བཞིན་འགྲོ། །སྒོམ་ཆེན་འདུག་པའི་དུས་སུ་ནི། །བསམ་བློ་བགྲང་ཕྲེང་མི་བཏང་བར། །ལུས་གནད་དྲང་པོར་བསྲང་ནས་ཀྱང༌། །རང་སེམས་གཅེར་བུ་ཕུད་ནས་སྡོད། །སྒོམ་ཆེན་ཉལ་བའི་དུས་སུ་ནི། །གཏི་མུག་རོ་བཞིན་མི་ཉལ་བ། །ཡེངས་མེད་འོད་གསལ་ངང་དུ་བསྲེ། །སྒོམ་ཆེན་བཟའ་བཏུང་ཟ་བའི་དུས། །བཟའ་བཏུང་བདུད་རྩིར་བྱིན་གྱིས་རློབས། །རང་ལུས་མཁའ་འགྲོའི་༼ཞི་ཁྲོའི༽་ལྷ་ཚོགས་ བསྒོམ། །སེམས་ཉིད་ཡེངས་མེད་ངང་ལ་བཟའ། །འགྲོ་འདུག་ཉལ་བ་ཅི་བྱེད་ཀྱང༌། །སྟོང་ཉིད་དབྱེར་མེད་ངང་ནས་གྱིས། །རང་སེམས་སངས་རྒྱས་དབྱེར་མེད་པ། །འཆི་ཁ་མི་འགྱོད་པ་ཞིག་འདོད་ན། །འདི་ལྟ་བུ་ཞིག་ཉམས་ལེན་དགོས་པ་ཡིན། ། མཚན་ཉིད་ལྡན་པའི་བླ་མ་བསྟེན་ཤེས་དགོས། །གཅིག་པུར་རི་ཁྲོད་ཐུབ་པའི་སྡུག་བསྲན་ཞིག་ནི་དགོས། །ཟས་གོས་ཞེན་པ་བཅད་པའི་དཀའ་སྤྱད་ཞིག་ནི་དགོས། །གང་ཡང་གཉིས་སྣང་བྲལ་པའི་ལྟ་བ་ཞིག་དགོས། །ཡེངས་མེད་འོད་གསལ་འཁོར་ཡུག་སྒོམ་པ་ཞིག་ནི་དགོས། །བྱ་རྩོལ་སྤང་བླང་བྲལ་བའི་སྤྱོད་པ་ཞིག་ནི་དགོས། །རང་སེམས་སངས་རྒྱས་དབྱེར་མེད་འབྲས་བུ་ཞིག་ནི་དགོས། །ཆགས་འཛིན་ངོས་ལྐོག་མེད་པའི་དམ་ཚིག་ཞིག་ནི་དགོས། །ཀུན་ལ་འདོད་པའི་རློམ་སེམས་མེད་པ་ཞིག་ནི་དགོས། །དགོས་རབ་ཉམས་ལེན་མཛོད་ཅིག་སྐལ་ལྡན་ཆོས་མཛད་རྣམས། 

༈ ཡང་སྒོམ་གྱི་གྲོགས་གོ་ཆ་བཟང་པོ་ཞིག་འདོད་ན་འདི་ལྟར་མཛོད། །གཡོག་འཁོར་མང་པོའི་དཔོན་པོ་བྱེད་པ་སྤངས། །རྒྱུ་ཟོག་མང་པོའི་བདག་པོ་བྱེད་པ་སྤང། །རྟ་ནོར་མང་མོའི་འཚོ་སྐྱོང་བྱེད་པ་སྤངས། །ཉེ་བ་མང་པོའི་མགོ་འདྲེན་བྱེད་པ་སྤང། །དགྲ་གཉེན་གཉིས་ལ་ཆགས་སྡང་བྱེད་པ་ སྤངས། །ལས་ཀ་སོ་ནམ་བཟོ་རིགས་བྱེད་པ་སྤངས། །ལོངས་སྤྱོད་ཁེ་གྲགས་འཚོ་སྐྱོང་བྱེད་པ་སྤངས། །ཆེ་ཐབས་གྲགས་ཐབས་མི་ཐབས་བྱེད་པ་སྤང། །དེ་རྣམས་མ་སྤང་སེམས་ཉིད་གཡེང་བས་ཁྱེར། །དེ་རྣམས་སྤང་ན་སེམས་ཉིད་བཙན་ས་ཟིན། །སེམས་ཉིད་བཙན་ས་ཟིན་ན་སངས་རྒྱས་ དངོས། །དེང་སང་དུས་ཀྱི་གནས་སྐབས་ལ། །བླ་མ་སློབ་མཁས་སློབ་མ་བསྒོམ་མཁས་ཀྱི། །རང་སེམས་འདི་ནི་རྟོགས་མི་མང་པོ་གདའ། །ཡང་དག་དོན་ནི་རྟོགས་མི་མང་པོ་གདའ། །སེམས་ཉིད་སྟོང་གསལ་ངོ་བོ་ནི། །མི་གཅིག་ལ་འཆར་རྒྱུ་ཀུན་ལ་འཆར། །དེ་ཤེས་མི་ཀུན་ལ་དྲིས་དང་གསལ་བ་ཡིན། །མཁས་པ་མང་པོར་དྲིས་དང་ཤེས་ནས་འོང༌། །ཐེ་ཚོམ་མེད་པར་གྱིས་ལ་བསྒོམ། 

༈ ཡང་སྒོམ་ཆེན་ལ་ཞལ་གདམས་གནད་ཆེ་བ་ཞིག་ཡོད་དེ་བཤད་པར་བྱ། །དེང་སང་དུས་ཀྱི་གནས་སྐབས་ལ། །བླ་མ་སློབ་མ་ལ་ལ་ཡིས། །བླ་མས་སློབ་ཉེས་སློབ་མས་སྒོམ་ཉེས་ཀྱིས། །མི་ལོ་བདུན་ཅུ་བརྒྱད་ཅུ་བསྒོམ་ན་ཡང༌། །ཉམས་རྟོགས་མ་སྐྱེས་མི་འོང་མང་པོ་གདའ། །ཡང་དག་དོན་ནི་མ་རྟོགས་མང་པོ་དགའ། མིན་པ་ཡིན་སྣང་བྱེད་མི་མང་པོ་གདའ། །མི་ཤེས་བླུན་བསྒོམས་བྱེད་པ་མང་པོ་གདའ། །དོན་མེད་བརྩོན་འགྲུས་བྱེད་པ་མང་པོ་གདའ། །བླ་མ་སློབ་མཁས་སློབ་མ་བསྒོམ་མཁས་ཀྱིས། །རང་ཆེ་མ་བྱེད་མཁས་པ་རྣམས་ལ་དྲིས། །རང་བཟོ་མ་བྱེད་རང་སེམས་ཕུ་ཐག་ཆོད། །རང་མགོ་མ་བསྐོར་ཐེ་ཚོམ་མེད་པར་མཛོད། །རྫོགས་སོ༎ སླར་སྨྲས་པ། ཨ་ཧོ། རང་སེམས་གཞི་ཡི་གནས་ལུགས་སྤྲོས་བྲལ་ལས། །ལྟ་བ། འགག་མེད་ཐུགས་རྗེའི་དཀྱིལ་འཁོར་ལྷ་ཚོགས་བཞེངས། །སྒོམ། སྣ་ཚོགས་ཁྲོ་བོ་ཁྲོ་མོའི་ཟློས་གར་བསྒྱུར། །སྤྱོད་པ། མཁའ་ཁྱབ་འགྲོ་ཀུན་འདྲེན་པའི་དཔལ་དུ་ཤོག། །།

• Download this text: EPUB MOBI PDF