མཁའ་འགྲོ་སྙིང་ཐིག་ལས། བླ་མའི་རྣལ་འབྱོར་ཕྱི་ནང་གསང་གསུམ་སྐབས་ཀྱི་གསོལ་འདེབས།
༄༅། །མཁའ་འགྲོ་སྙིང་ཐིག་ལས། བླ་མའི་རྣལ་འབྱོར་ཕྱི་ནང་གསང་གསུམ་སྐབས་ཀྱི་གསོལ་འདེབས།
དངོས་མེད་མཐའ་བྲལ་ཀ་དག་ཆོས་ཀྱི་སྐུ། །
རང་རིག་གསལ་དྭངས་ལྷུན་གྲུབ་ལོངས་སྤྱོད་རྫོགས། །
ཀུན་ཁྱབ་ཤར་གྲོལ་སྣ་ཚོགས་སྤྲུལ་པའི་སྐུ། །
དུས་གསུམ་རང་རིག་བླ་མ་རྣམས་ལ་འདུད། །
དམིགས་མེད་ཆོས་དབྱིངས་དག་པའི་ཕོ་བྲང་དུ། །
ཀུན་བཟང་ཡབ་ཡུམ་ཉིད་ལ་གསོལ་བ་འདེབས། །
ངོ་བོ་ཀ་དག་རྟོགས་པར་བྱིན་གྱིས་རློབས། །
ལྷུན་གྲུབ་རང་གསལ་འོད་ཀྱི་གཞལ་ཡས་སུ། །
ལོངས་སྐུ་ཞི་ཁྲོའི་ཚོགས་ལ་གསོལ་བ་འདེབས། །
རིག་པ་སྐུ་རུ་སྨིན་པར་བྱིན་གྱིས་རློབས། །
ཐུགས་རྗེ་ཕྱོགས་རིས་མེད་པའི་ཕོ་བྲང་དུ། །
སྤྲུལ་སྐུ་རྡོ་རྗེ་འཆང་ལ་གསོལ་བ་འདེབས། །
སྣང་སེམས་འཛིན་པ་སྟོངས་པར་བྱིན་གྱིས་རློབས། །
དུར་ཁྲོད་མེ་རི་འབར་བའི་ཕོ་བྲང་དུ། །
དགའ་རབ་རྡོ་རྗེའི་སྐུ་ལ་གསོལ་བ་འདེབས། །
ཆོས་ཉིད་དོན་དང་མཇལ་བར་བྱིན་གྱིས་རློབས། །
དུར་ཁྲོད་སོ་ས་གླིང་གི་ཕོ་བྲང་དུ། །
ཤྲཱི་སིང་ཧ་ཉིད་ལ་གསོལ་བ་འདེབས། །
བདེ་ཆེན་འདུ་འབྲལ་མེད་པར་བྱིན་གྱིས་རློབས། །
དཔལ་རི་པདྨ་འོད་ཀྱི་ཕོ་བྲང་དུ། །
ཨོ་རྒྱན་པདྨའི་སྐུ་ལ་གསོལ་བ་འདེབས། །
འཆི་མེད་རིག་འཛིན་འགྲུབ་པར་བྱིན་གྱིས་རློབས། །
གཞོ་སྟོད་ཏེ་སྒྲོ་བྲག་གི་ཕོ་བྲང་དུ། །
ཡེ་ཤེས་མཁའ་འགྲོ་མ་ལ་གསོལ་བ་འདེབས། །
ཆོས་ཉིད་མངོན་སུམ་མཐོང་བར་བྱིན་གྱིས་རློབས། །
མཁའ་སྤྱོད་རིག་འཛིན་དག་པའི་ཕོ་བྲང་དུ། །
པདྨ་ལས་འབྲེལ་རྩལ་ལ་གསོལ་བ་འདེབས། །
ཟབ་དོན་དགོངས་པ་རྟོགས་པར་བྱིན་གྱིས་རློབས། །
བྱར་ཡུལ་གྲོ་ས་ལུང་གི་དགོན་པ་རུ། །
རྒྱལ་སྲས་ལེགས་ལྡན་པ་ལ་གསོལ་བ་འདེབས། །
བདག་གཞན་དོན་གཉིས་འགྲུབ་པར་བྱིན་གྱིས་རློབས། །
ལ་རྒྱབ་ལྷུན་གྲུབ་སྟེང་གི་གདན་ས་རུ། །
རང་བྱུང་རྡོ་རྗེའི་ཞབས་ལ་གསོལ་བ་འདེབས། །
འགྲོ་དོན་ལྷུན་གྱིས་འགྲུབ་པར་བྱིན་གྱིས་རློབས། །
རྣམ་དག་ལྷུན་གྱིས་གྲུབ་པའི་གཞལ་ཡས་སུ། །
དར་མ་རྡོ་རྗེའི་ཞབས་ལ་གསོལ་བ་འདེབས། །
འཁྲུལ་པ་རང་སར་དག་པར་བྱིན་གྱིས་རློབས། །
གར་བཞུགས་དག་པ་ཆོས་ཀྱི་ཕོ་བྲང་ན། །
ནམ་མཁའ་རྡོ་རྗེའི་ཞབས་ལ་གསོལ་བ་འདེབས། །
ཆོས་ཉིད་བདེན་པ་མཐོང་བར་བྱིན་གྱིས་རློབས། །
བསྐྱེད་རྫོགས་བརྟན་པ་ཐོབ་པའི་ཕོ་བྲང་ན། །
ཚུལ་ཁྲིམས་འབུམ་པའི་ཞབས་ལ་གསོལ་བ་འདེབས། །
སྐུ་ལྔ་ལྷུན་གྱིས་འགྲུབ་པར་བྱིན་གྱིས་རློབས། །
སྣང་སྲིད་སྒྱུ་མར་རྟོགས་པའི་ཕོ་བྲང་ན། །
དྷརྨ་ལཀྵའི་ཞབས་ལ་གསོབ་འདེབས། །
ཨ་འཐས་འཁྲུལ་པ་ཞིག་པར་བྱིན་གྱིས་རློབས། །
བཀའ་དང་དམ་ཚིག་དག་པའི་ཕོ་བྲང་ན། །
བུདྡྷ་ཤྲཱིའི་ཞབས་ལ་གསོལ་བ་འདེབས། །
ལོག་རྟོག་དྲི་མ་དག་པར་བྱིན་གྱིས་རློབས། །
སྤྱི་གཙུག་བདེ་བ་ཆེན་པོའི་གཞལ་ཡས་སུ། །
རྩ་བའི་བླ་མའི་ཞབས་ལ་གསོལ་བ་འདེབས། །
ཟབ་དོན་སྙིང་པོ་ལོན་པར་བྱིན་གྱིས་རློབས། །
རང་ལུས་རྣམ་པར་དག་པའི་ཕོ་བྲང་དུ། །
ཞི་ཁྲོ་ཌཱཀྐིའི་ཚོགས་ལ་གསོལ་བ་འདེབས། །
རང་སྣང་རང་ངོ་ཤེས་པར་བྱིན་གྱིས་རློབས། །
ལྡང་ལྷ་ཁྲ་མོ་བྲག་གི་དབེན་གནས་སུ། །
མཁའ་འགྲོ་སྙིང་ཐིག་ཉིད་ལ་གསོལ་བ་འདེབས། །
གདོས་བཅས་འོད་ལུས་འགྲུབ་པར་བྱིན་གྱིས་རློབས། །
བཀའ་དང་བསྟན་པ་བསྲུང་བའི་ཕོ་བྲང་ན། །
བཀའ་བདག་གཏེར་སྲུང་རྣམས་ལ་གསོལ་བ་འདེབས། །
རྐྱེན་སྣང་བར་ཆད་ཞི་བར་བྱིན་གྱིས་རློབས། །
ཆོས་ཉིད་མངོན་སུམ་མཐོང་བར་བྱིན་གྱིས་རློབས། །
རིག་པ་ཚད་ལ་ཕེབས་པར་བྱིན་གྱིས་རློབས། །
ཉམས་སྣང་གོང་དུ་འཕེལ་བར་བྱིན་གྱིས་རློབས། །
ཆོས་ཉིད་ཟད་སར་འཁྱོལ་བར་བྱིན་གྱིས་རློབས། །
བདེན་པ་མངོན་དུ་མཐོང་བར་བྱིན་གྱིས་རློབས། །
གྷར་དམ་པའི་སྒྲུབ་གནས་ཤུག་ཚར་དཔལ་གྱི་དགོན་པར་བདག་འཕགས་པ་དབོན་པོ་དར་མ་བཟང་པོས། འགྲོ་བ་རྣམས་བདེ་ཆེན་རྟོགས་པའི་སེམས་བསྐྱེད་དང་ལྡན་པས་སྙིང་ཏིག་གི་ཡིག་ཆ་ཆ་ཚང་བར་བཞེངས་པ་འདིའི་དགེ་བས་སངས་རྒྱས་ཀྱི་བསྟན་པ་དར་ཞིང་རྒྱས་ཏེ་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་མྱུར་དུ་སྐེམས་པར་ཤོག་ཅིག །དགེའོ།། །།
