The Gaṇacakra Ritual—Tibetan

Practices › Tsok | Tibetan MastersSakya Paṇḍita Kunga Gyaltsen

English | བོད་ཡིག

Sakya Paṇḍita Kunga Gyaltsen

Detail from a thangka showing a tsok offering

༄༅། །ཚོགས་འཁོར་ཆོ་ག་བཞུགས། །

བླ་མ་དམ་པའི་ཞབས་ལ་གུས་པས་ཕྱག་འཚལ་ལོ། །སངས་རྒྱས་ཐམས་ཅད་གཅིག་བསྡུས་པའི། །བླ་མའི་ཞབས་ལ་ཕྱག་འཚལ་ནས། །བསོད་ནམས་དང་ནི་ཡེ་ཤེས་ཚོགས། །བསྒྲུབ་ཕྱིར་དེ་ཡི་ཆོ་ག་བཤད། །བཅོམ་ལྡན་འདས་དཔལ་དགྱེས་པ་རྡོ་རྗེའམ། འཁོར་ལོ་བདེ་མཆོག་ལ་སོགས་པའི་རྣལ་འབྱོར་བླ་ན་མེད་པའི་རྒྱུད་སྡེ་ལས་བྱུང་བའི་ཚོགས་ཀྱི་འཁོར་ལོ་བྱེད་པར་འདོད་ན་གསུམ་སྟེ། ཇི་ལྟར་བྱ་བའི་ཆོ་ག་དང༌། དེ་ལ་གཞན་གྱི་རྩོད་པ་སྤང་བ། ཆོ་གའི་རྣམ་གྲངས་ཀྱི་རབ་ཏུ་དབྱེ་བའོ། །དང་པོ་ལ་དྲུག་སྟེ། དུས། གནས། གྲོགས། ཡོ་བྱད། ཆོ་ག དགོས་པའོ། །དུས་ལ་རྒྱུན་གྱི་དུས་དང༌། ཁྱད་པར་གྱི་དུས་གཉིས་སོ། །རྒྱུན་གྱི་དུས་ནི་ཡར་ངོ་མར་ངོའི་ཚེས་བརྒྱད་དང༌། བཅུ་དང༌། བཅུ་བཞི་དང༌། བཅོ་ལྔ་སྟེ་བཞི་དང༌། མར་ངོ་ལའང་དེ་ལྟར་བཞི་སྟེ་བརྒྱད་དོ། །ཁྱད་པར་གྱི་དུས་ནི་དབང་བསྐུར་རབ་གནས་སྦྱིན་སྲེག་རྒྱུད་ཉན་བཤད་ལ་སོགས་པའི་དུས་རྣམས་སོ། །གཉིས་པ་གནས་ནི་གསུམ་ལས། ལས་དང་པོ་པས་རང་གི་ཁྱིམ་དང༌། གཙུག་ལག་ཁང་ལ་སོགས་པ་དབང་བསྐུར་བ་མ་ཐོབ་པས་དབེན་པའོ། །སེམས་བརྟན་པ་ཐོབ་ནས་དུར་ཁྲོད་དམ་རིའི་བྱ་སྐྱིབས་ལ་སོགས་པའོ། །བརྟན་པ་ཆེར་ཐོབ་ནས། ཡུལ་ཉི་ཤུ་རྩ་བཞི་ལ་སོགས་པའོ། །གསུམ་པ་གྲོགས་ནི། དབང་བསྐུར་བ་ཐོབ་ཅིང་དམ་ཚིག་མ་ཉམས་པའི་དཔའ་བོ་དང་རྣལ་འབྱོར་མའོ། །བཞི་པ་ཡོ་བྱད་ནི་ཅི་འབྱོར་པ་ཡིན་ན་ཡང༌། ཡེ་ཤེས་ཀྱི་མཁའ་འགྲོ་མ་སྡུད་པའི་རྫས་མེད་དུ་མི་རུང་བ་མ་ད་ན་དང་བ་ལའོ། །ལྔ་པ་ཆོ་ག་ལ་གསུམ། སྦྱོར་བ་དང༌། དངོས་གཞི་དང༌། རྗེས་སོ། །དང་པོ་ལ་དྲུག གནས་ཁང་བརྒྱན་པར་བྱ་བ་དང༌། ཕྱི་ནང་གི་མཆོད་པའི་ཡོ་བྱད་བཤམ་པ། རྡོ་རྗེ་སློབ་དཔོན་ནང་དུ་སྤྱན་དྲངས་ཏེ་བཞུགས་པ། བརྡ་དང་བརྡའི་ལན་བྱས་ཏེ་ནང་དུ་གཞུག་པ། ལྷའི་རྣལ་འབྱོར་ལ་གནས་པར་གསོལ་བ་གདབ་པ། ཡི་གེ་བརྒྱ་པ་བརྗོད་དེ་རྒྱུད་དག་པར་བྱ་བའོ། །དང་པོ་ནི་གནས་ཁང་ཕྱག་དར་དང༌། བའི་རྣམ་ལྔ་དང་དྲི་ཞིམ་པོའི་ཆུས་བྱུག བླ་རེ་དང་ལྡ་ལྡི་ལ་སོགས་པས་བརྒྱན། བྲིས་སྐུ་དགྲམ། བདག་བསྐྱེད་གཙོ་བོར་བྱེད་ན་དགྱེས་པའི་རྡོ་རྗེའམ། འཁོར་ལོ་བདེ་མཆོག་ལ་སོགས་པའི་ལྷ་གྲངས་དང་མཐུན་པའི་གདན་སྟག་གི་པགས་པའམ། དུར་ཁྲོད་ཀྱི་རས་སམ། དེ་མ་རྙེད་ན་གཞན་ཡང་རུང་བའི་གདན། དཀྱིལ་འཁོར་གྱི་བསྐོར་བའི་རིམ་པ་ལྟར་བཤམ། མདུན་བསྐྱེད་གཙོ་བོར་བྱེད་ན། བསྒྲུབ་པའི་མཎྜལ་དགྱེས་རྡོར་རམ། བདེ་མཆོག་གི་གཞུང་ལུགས་དང་མཐུན་པར་བཤམ། རྡོ་རྗེ་སློབ་དཔོན་གྱིས་གཙོ་བྱས་པའི་ཚོགས་པ་རྣམས་ཀྱི་གདན་རྒན་རིམ་ལྟར་བཤམ། བདག་བསྐྱེད་གཙོར་བྱེད་པ་བརྟག་གཉིས་ལས་བཤད། མདུན་བསྐྱེད་གཙོ་བོར་བྱེད་པ་སཾ་བུ་ཊ་ལ་སོགས་པ་ནས་བཤད། ལས་དང་པོ་པས་མདུན་བསྐྱེད་གཙོ་བོར་མཆོད་པ་འཇུག་པ་བདེ་གསུང༌། གཉིས་པ་ཕྱི་ནང་གི་མཆོད་པ་བཤམ་པ་ནི། དགྱེས་པ་རྡོ་རྗེ་བ་ཆུ་གསུམ་མམ་བཞི། བདེ་མཆོག་པ་མཆོད་ཡོན་ཞབས་བསིལ་གཉིས་སུ་བསྡུས་ནས་མཛད། ཆུ་དེ་རྣམས་མཆོད་ཡོན་གྱི་ཡན་ལག་ཡིན་པས། མཆོད་ཡོན་འབུལ་ཞེས་མཆོད་ཡོན་གྱི་མིང་དུ་བཏགས་པའང་ཡོད། ཆུ་བཞིར་བྱེད་ན་ཞབས་བསིལ་ལ་ག་པུར་གུར་གུམ་ལ་སོགས་པའི་དྲི་བཟང་གདབ། ཞལ་བསིལ་ལ་མངར་གསུམ། འཐོར་འཐུང་ལ་ཆུ་གཙང་མ་ཉིད། མཆོད་ཡོན་ལ་མེ་ཏོག་དཀར་པོ་གདབ། མེ་ཏོག་ལ་སོགས་པའི་མཆོད་པ་རྣམ་ལྔ་ཅི་འབྱོར་པའམ། གྲུབ་ན་རྒྱ་ཆེར་བཤམས། དགྱེས་རྡོར་བདེ་མཆོག་གི་གཞུང་ལུགས་དང་མཐུན་པའི། འཇིག་རྟེན་ལས་འདས་པའི་གཏོར་མ་གཅིག་དང༌། ཆོས་སྐྱོང་གིས་གཙོ་བྱས་པའི་འཇིག་རྟེན་པ་ལ་གཅིག གཞི་བདག་ལ་གཅིག རང་ལ་དགོས་པ་ཡོད་ན་གཏོར་མ་གཞན་ཡང་བཤམ་པར་བྱའོ། །འབྱོར་ན་མང་དུ་བཤམས་ཀྱང་ཆེས་བཟང༌། པདྨ་བྷཉྫ་ནར་མ་ད་ན་བླུགས་ཏེ། དཔྲལ་བ་རང་ལ་བསྟན་པ་རང་གི་མདུན་དུ་བཞག དམ་ཚིག་གི་རྡོ་རྗེ་དྲིལ་བུ་ཡང་གཡས་གཡོན་དུ་གོ་མ་ནོར་བར་བཞག གཞན་ཡང་ལོངས་སྤྱོད་པའི་ཡོ་བྱད་ཅི་འབྱོར་པའམ། གང་དགོས་པ་ཐམས་ཅད་སྟ་གོན་བྱ། གསུམ་པ་རྡོ་རྗེ་སློབ་དཔོན་བཞུགས་པ་ནི། རྡོ་རྗེ་སློབ་དཔོན་ལ་མཎྜལ་དང་མེ་ཏོག་ཅི་འབྱོར་བ་ཕུལ་ལ། སེམས་ཅན་ཐམས་ཅད་ཀྱི་དོན་དུ་འཇིག་རྟེན་དང་འཇིག་རྟེན་ལས་འདས་པ་ཐམས་ཅད་མཆོད་པའི་ཕྱིར་ཚོགས་ཀྱི་རྡོ་རྗེ་སློབ་དཔོན་མཛད་དུ་གསོལ། ཞེས་གསོལ་བ་གདབ། དེ་ནས་བདག་བསྐྱེད་གཙོ་བོར་མཆོད་ན། རྡོ་རྗེ་སློབ་དཔོན་དབུས་སུ་མདུན་བསྐྱེད་གཙོ་བོར་མཆོད་ན། ཚོགས་པའི་གྲལ་མགོར་གདན་བཤམས་པ་ལ་བཞུགས་པར་བྱའོ། །བཞི་པ་དབྱུག་སྔོན་ཅན་གྱི་ང་རྒྱལ་འཛིན་པའི་རྡོ་རྗེ་སློབ་མས་ལས་ཐམས་ཅད་པའི་བུམ་པ་དང་ལྡན་པ་སྒོ་དྲུང་དུ་བཞག་ལ་བརྡ་དང་བརྡའི་ལན་བྱས་ཏེ་མི་འཕྲོད་པ་རྣམས་ཕྱིར་བསྐྲད། འཕྲོད་པ་རྣམས་ནང་དུ་འཇུག་པའི་དོན་དུ་འདི་ལྟར་གསོལ་བ་གདབ་སྟེ། ཁྱོད་ཀྱི་དམ་ཚིག་ལ་ནི་ཁྲོ་བོ་སྔོན་པོ་མཛེས། །དངོས་གྲུབ་ཕྱག་ན་དབྱུག་ཏོ་རིན་ཆེན་བཅིངས་པ་འཛིན། །དཔལ་ལྡན་དཔའ་བོ་དཔའ་མོ་འདུ་བར་འཁོར་སྒྲོལ་ཁུམས། །མཁའ་མཛེས་རྣལ་འབྱོར་པ་ཡིས་ནང་དུ་བདག་ཐོངས་ཤིག །ཅེས་བརྗོད་དོ། །དེ་ནས་དབྱུག་སྔོན་ཅན་གྱིས་ལས་ཐམས་ཅད་པའི་བུམ་ཆུས་བསངས་ལ། འདི་སྐད་ཅེས་བརྗོད་དོ། །འདིར་ནི་ཆོས་རྣམས་བཟང་པོར་ལྟོས། །འདུ་བ་རྣམས་ནི་ཐེ་ཚོམ་མེད། །བྲམ་ཟེ་ཁྱི་དང་གདོལ་པ་ཡང༌། །རང་བཞིན་གཅིག་པ་ཉིད་དུ་ཟོ། །ཞེས་བྱ་བའི་ཚིགས་བཅད་བརྗོད་ལ། ནང་དུ་གཏང༌། འདིའི་ཆོ་ག་རྣམས་ཤེས་པ་དཀའ། བྱས་ནས་མ་རྫོགས་ན་ཆོ་ག་ཉམས་པར་འགྱུར་བས་མི་ཤེས་པ་རྣམས་ཀྱིས་ལྷའི་ང་རྒྱལ་དང་ལྡན་པས། བག་ཡོད་པར་བྱས་ལ་འཇུག་གོ །རྡོ་རྗེ་སློབ་དཔོན་གྱིས་གཙོ་བྱས་པའི་རྒན་རིམ་ལྟར་གྲལ་ལ་འཁོད་དོ། །ལྔ་པ་གསོལ་བ་གདབ་པ་ནི། ལས་ཀྱི་རྡོ་རྗེ་སློབ་མས་སྤྱིར་མཎྜལ་ཕུལ། སོ་སོའི་ཕྱག་ཏུ་མེ་ཏོག་བཞག་ལ། ཕྱག་འཚལ་ཐལ་མོ་སྦྱར་ལ། ངག་ཏུ། ཀུན་བཟང་རྣམ་འཕྲུལ་མཆོད་པའི་སྤྲིན་ཆེན་གྱིས། །དཔའ་བོ་རྣལ་འབྱོར་མ་རྣམས་མཆོད་པ་དང༌། །ཡོན་བདག་བགེགས་ཞི་ཚོགས་གཉིས་བསག་པའི་ཕྱིར། །གཉིས་མེད་ཏིང་འཛིན་དག་ལ་གནས་པར་གསོལ། །ཞེས་བྱ་བའམ། ཡང་ན་སོ་སོ་ནས་ལྷའི་རྣལ་འབྱོར་ལ་གནས་པར་ཞུ་ཞེས་བསྡུ་བའི་ཚིག་གིས་གསོལ་བ་གདབ། དེ་ནས་མེ་ཏོག་རྣམས་བསྡུས། བླ་མ་ལ་ཡོན་དུ་ཕུལ། བླ་མས་ཀྱང་བླ་མ་བརྒྱུད་པ་དང་ཡི་དམ་གྱི་ལྷ་ལ་དབུལ་ཏེ། མཎྜལ་གྱི་དབུས་སུ་སྤུང༌། དྲུག་པ་རྒྱུད་སྦྱང་བ་ནི། ཐམས་ཅད་ཀྱིས་དམ་ཚིག་གི་ཉེས་པ་བཤགས་པའི་ཕྱིར། སྤྱི་བོར་རྡོ་རྗེ་སེམས་དཔའ་མན་ངག་ལྟར་བསྒོམ། ཡི་གེ་བརྒྱ་པ་ཅི་རིགས་པར་བཟླས་ལ། ཨ་བྷི་དྷ་ན་ནས་འབྱུང་བའི་ཚིག་འདི་བརྗོད། བདག་ནི་མི་ཤེས་རྨོངས་པ་སྟེ། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་སྐྱབས་སུ་མཆི། །ཞེས་བརྗོད་དོ། །གཉིས་པ་དངོས་གཞི་ལ་ཚིམ་པ་དྲུག་སྟེ། རྣལ་འབྱོར་ཆེན་པོའི་རྒྱུད་ཐམས་ཅད་ཀྱི་དགོངས་པ་བསྡུས་པ། སཾ་བུ་ཊ་ལས་འབྱུང་བའི་ཚུལ་བཤད་ན། ཏིང་ངེ་འཛིན་གྱི་དཀྱིལ་འཁོར་མཆོད་པ་རྒྱས་པས་ཚིམ་པ། སྙིང་གར་ཡེ་ཤེས་ཀྱི་ལྷ་བདུད་རྩི་མྱངས་པས་ཚིམ་པ། ཕྱི་རོལ་གྱི་འབྱུང་པོའི་ཚོགས་གཏོར་མས་ཚིམ་པ། དམ་ཚིག་དང་ལྡན་པའི་དཔའ་བོ་དང་རྣལ་འབྱོར་མ་རྣམས་ནང་གི་སྦྱིན་སྲེག་གི་ཚིམ་པ། ཕྱི་ནང་གི་མཁའ་འགྲོ་མ་རྣམས་གླུ་གར་གྱིས་ཚིམ་པ། ལུས་ཀྱི་དཀྱིལ་འཁོར་ལྷན་ཅིག་སྐྱེས་པའི་ཡེ་ཤེས་ཀྱིས་ཚིམ་པའོ། །དང་པོ་ནི་དགྱེས་པའི་རྡོ་རྗེ་ལྟར་ན། ཚོགས་ཀྱི་ཞིང་སྤྱན་དྲང་བ་ནས་སྲུང་བའི་འཁོར་ལོའི་བར་མངོན་རྟོགས་རྒྱས་འབྲིང་ལྟར་བསྒོམས་ནས། དེ་ཁོ་ན་ཉིད་བཅུའི་བསྲུང་བའི་དེ་ཁོ་ན་ཉིད་དང༌། ཕྱིར་བཟློག་པའི་དེ་ཁོ་ན་ཉིད་བསྒྲུབ་པའི་ཕྱིར། ཨུཥྞཱི་ཥའི་སྔགས་ཅི་རིགས་བཟླས། འདི་ད་ལྟར་བར་ཆད་བསྲུང་བ། ཕྱིས་འཚང་རྒྱ་བ་ན་སྲོད་ལ་བདུད་འདུལ་བའི་རྟེན་འབྲེལ་ཡིན། བདེ་མཆོག་ལྟར་ན་སྲུང་འཁོར་བསྒོམ་པ་ཙམ་ལས་སྔགས་ཟློ་བ་སྐབས་འདིར་མི་མཛད་དེ། དེ་ནས་དགྱེས་རྡོར་བདེ་མཆོག་ལ་སོགས་པ་ཆོ་ག་གང་བྱེད་ཀྱང་རང་རང་གི་རིམ་པ་གཉིས་རིམ་པ་ལྟར་ཚར་བར་བསྒོམ། གཙོར་རང་རང་གི་རྩ་སྔགས། སྙིང་པོ། ཉེ་སྙིང༌། འཁོར་གྱི་ལྷ་རྣམས་དང་བཅས་པ་རྣམས་ཀྱི་སྔགས་ཅི་ནུས་པ་བཟླས། དེ་ལྟར་རིམ་པ་གཉིས་བཟླས་པ་དང་བཅས་པ་ནི། དེ་ལྟར་རྒྱུ་དུས་སུ་བསོད་ནམས་དང་ཡེ་ཤེས་ཀྱི་ཚོགས་སྒྲུབ་ཅིང༌། སངས་རྒྱས་ཀྱི་ཞིང་ཡོངས་སུ་དག་པ་དང༌། སེམས་ཅན་སྨིན་པར་བྱེད་པ། ལུས་ངག་ཡིད་གསུམ་གྱི་གནས་ངན་ལེན་སྦྱོང་ཞིང༌། སྐུ་གསུམ་མམ་བཞིའི་རྟེན་འབྲེལ་བསྒྲུབ་པ། འབྲས་བུའི་དུས་སུ་འོག་མིན་དུ་སངས་རྒྱས་ནས་ཞིང་ཁམས་དཔག་ཏུ་མེད་པར་སྤྲུལ་པའི་སྐུས་སེམས་ཅན་གྱི་དོན་མཛད་པའི་རྟེན་འབྲེལ་ཡིན། ཏིང་ངེ་འཛིན་གྱི་དཀྱིལ་འཁོར་དེ་ལྟར་བསྒོམས་པ་ལ། མཆོད་པ་རྒྱས་པས་ཚིམ་པ་ནི། དང་པོ་ཕྱི་མཆོད་དངོས་སུ་བཤམས་པ་དགྱེས་རྡོར་ལྟར་ན། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཧཱུྃ་ཕཊ་ཅེས་བརྗོད་ཅིང་རྡོ་རྗེའི་རྩེས་མ་ད་ན་གཏོར་ཞིང་བསང༌། བདེ་མཆོག་ལྟར་ན། སུམ་བྷ་ནིའི་སྔགས་ཀྱིས་བསང༌། དེ་ནས་སྭ་བྷཱའི་སྔགས་ཀྱིས་མཆོད་བྱ་མཆོད་བྱེད་མཆོད་པའི་ཡུལ་ཐམས་ཅད་སྟོང་པར་བསམ། སྟོང་པའི་ངང་ལས་མཆོད་པའི་ཡུལ་དང༌། མཆོད་པར་བྱེད་པ་པོ་བདག་ཉིད་གཉིས་ཀ སྔར་བཞིན་དུ་རྨི་ལམ་སྒྱུ་མ་ལྟ་བུའི་ལྷའི་སྐུར་བསམས་ལ། མཆོད་པ་ཐམས་ཅད་ཀྱང་འཇིག་རྟེན་དང་འཇིག་རྟེན་ལས་འདས་པའི་དགེ་བ་ལས་གྲུབ་པ། ངོ་བོ་བཟང་ཞིང་གཙང་བ། དྭངས་ཤིང་ཐོགས་པ་མེད་པ། ཡུལ་ནམ་མཁའི་མཐས་ཁྱབ་པ། དུས་འཁོར་བ་ཇི་སྲིད་གནས་པའི་བར་དུ་རྒྱུན་མི་འཆད་པར་བསམས་ལ། རྒྱུད་ལས་གསུངས་པའི་སྔགས་དང༌། ཏིང་ངེ་འཛིན་དང་ཕྱག་རྒྱས་དབུལ། རྒྱུད་ལས་མ་གསུངས་པའི་སྔགས་དང་ཕྱག་རྒྱ་ལ་སོགས་པ་བྱས་ཀྱང་ཆོ་ག་མ་དག་པའི་ཕྱིར་སངས་རྒྱས་དགྱེས་པའི་མཆོད་པར་མི་འགྲོ། སངས་རྒྱས་དགྱེས་པ་ལ་སངས་རྒྱས་ཀྱིས་གསུངས་པ་ཉིད་བྱེད་དགོས། དེ་བཞིན་དུ་ནང་བདུད་རྩིའི་མཆོད་པའང་གཏོར་མ་བཞིན་བྱིན་གྱིས་བརླབས་ལ་གཡོན་པའི་མཐེབ་སྲིན་གྱིས་གཏོར་ཞིང་ནང་མཆོད་ཀྱི་ཕུད་རྩ་བའི་བླ་མ་ལ་དབུལ། དེ་ནས་བླ་མ་བརྒྱུད་པ་རྣམས་ལ། དེ་ནས་ཡི་དམ་གྱི་ལྷ་ལ། དེ་ནས་ཆོས་སྐྱོང་དང་འབྱུང་པོ་ལ་སོགས་པ་ཕུད་ལ་དབང་བ་རྣམས་ལ་རང་རང་གི་སྔགས་ཀྱི་དབུལ། གཉིས་པ་སྙིང་གར་ཡེ་ཤེས་ཀྱི་ལྷ་བདུད་རྩི་མྱངས་པས་ཚིམ་པ་ནི། དེ་ནས་སྲིན་ལག་གིས། ལྕེ་རྩེ། སྨིན་མཚམས། སྤྱི་གཙུག་རྣམས་སུ་ཐིག་ལེ་རེ་བྱ། དེ་སྐད་དུ། རྣལ་འབྱོར་མ་ནི་ཐམས་ཅད་ལ། །མཐེ་བོའི་འཐོར་མས་སོ་སོར་དབུལ། །དེ་འོག་རང་གི་རྣམ་པ་ཡིས། །བདག་ཉིད་ལ་ནི་བསམ་པར་བྱ། །ལྕེ་རྩེ་ཐིག་ལེ་སྟེང་དུ་ཡང༌། །བློ་དང་ལྡན་པས་གནས་གསུམ་མཆོད། །ཅེས་གསུངས་པ་ལྟར་རོ། །དེ་ནས་དགྱེས་རྡོར་ལྟར་ན་དྲིལ་བུ་འཁྲོལ་ཞིང༌། ནམ་མཁར་རྗེ་བཙུན་བལྟས་ནས་ནི། །ཞེས་བྱ་བ་ལྷ་མོ་བརྒྱད་ཀྱི་མཆོད་པ་དང༌། ཁྱོད་ནི་རྣལ་འབྱོར་མ་ཚོགས་ཡོངས་སུ་བསྐོར་ཞེས་བྱ་བའི་བསྟོད་པ་དང༌། བསྟོད་པ་ཉི་ཤུ་པ་ལ་སོགས་པ་ཅི་ཤེས་པས་བསྟོད། བདེ་མཆོག་ལྟར་ན་ཕྱོགས་བཅུའི་སངས་རྒྱས་ཀྱི་བསྟོད་པའམ། སློབ་དཔོན་བྷུ་རི་པས་མཛད་པའམ། བཅོམ་ལྡན་འདས་ཀྱི་རྩ་སྔགས་རྐང་པ་བརྒྱད་པ་ལ་སོགས་པ་ཅི་ཤེས་པས་བསྟོད། དེ་དག་འདིར་ཡི་གེ་མངས་ཀྱིས་དོགས་ནས་མ་བྲིས། སློབ་དཔོན་རིན་པོ་ཆེས་མཛད་པའི་མཆོད་ཕྲེང་ལ་སོགས་པར་བལྟ་བར་བྱའོ། །གསུམ་པ་འབྱུང་པོའི་ཚོགས་གཏོར་མས་ཚིམ་པ་ནི། དབང་བསྐུར་མ་ཐོབ་པའི་འབྱུང་པོ་ལ་གཏོར་མ་གཏོང་ན་ཡོལ་བའི་ཕྱི་རོལ་དུ་གཏོང༌། དབང་བསྐུར་ཐོབ་པའི་འབྱུང་པོ་ལ་ཡོལ་བས་གཅད་མི་དགོས། འཇིག་རྟེན་ལས་འདས་པའི་གཏོར་མ་དགྱེས་རྡོར་དང་བདེ་མཆོག་རང་རང་གི་རྒྱུད་ནས་འབྱུང་བའི་གཏོར་མའི་ཆོ་གས་གཏང༌། འཇིག་རྟེན་པའི་གཏོར་མའི་ཕུད་ཆོས་སྐྱོང་ལ་དབུལ། དེའི་ཆོ་ག་རང་རང་གི་གཞུང་ནས་འབྱུང་བ་ལྟར་བྱ། དེའི་རྗེས་ལ་མཁའ་འགྲོ་སྤྱིའི་གཏོར་མས་འབྱུང་པོ་ཐམས་ཅད་ལ་སྦྱིན། གཞི་བདག་ལ་སོགས་པའི་གཏོར་མ་རྣམས་གང་ལ་གཏོང་བའི་མགྲོན་དེ་དམིགས་ཡུལ་དུ་བྱས་ནས། ཨོཾ་ཨ་ཀཱ་རོ་ལ་སོགས་པའི་སྔགས་ཀྱི་བཏང་བས་ཐམས་ཅད་མཉེས་ཤིང་ཚིམ་པར་འགྱུར་རོ། །གཏོར་མའི་ཆོ་ག་རྣམས་གཞུང་གཞན་དུ་ཤེས་པར་བྱའོ། །བཞི་པ་དམ་ཚིག་ཐོབ་པའི་དཔའ་བོ་དང༌། རྣལ་འབྱོར་མ་རྣམས་ལ་གྲུབ་ན་མེ་ཏོག་ལ་སོགས་པའི་མཆོད་པ་རྣམ་པ་ལྔས་ཀྱང་མཆོད། ཚོགས་ཀྱི་ཡོ་བྱད་ལ་ལུགས་གཉིས་ལས་རབ་ཏུ་བྱུང་བ་སྡོམ་བརྩོན་གྱི་ལུགས་ནི། མཆོད་པ་དང་གཏོར་མ་ལ་ཤ་དང་ཆང་ལ་སོགས་པ་འབུལ། སྡོམ་བརྩོན་རྣམས་ཀྱིས་ལྕེ་ལ་མྱང་བ་ཙམ་བྱ། གཞན་ཡང་བུ་རམ་དང་ཤིང་ཐོག་ལ་བསང་བ་ལ་སོགས་པ་གཏོར་མ་བྱིན་གྱིས་བརླབ་པ་ལྟར་བྱ། ཤ་ལྔ་བདུད་རྩི་ལྔར་བསམས་ཏེ་ཟོས་པས། རྩ་ལྟུང་བཅུ་གསུམ་པའི་ཉེས་པ་མི་འབྱུང༌། སངས་རྒྱས་དང་བྱང་ཆུབ་སེམས་དཔའ་དང་ཡེ་ཤེས་ཀྱི་མཁའ་འགྲོ་མ་རྣམས་ཀྱིས་བྱིན་གྱིས་བརླབ་པར་འགྱུར་ཏེ། གསང་བ་འདུས་པ་ལས། ཤ་རྣམས་ཐམས་ཅད་མེད་ན་ཡང༌། །ཐམས་ཅད་བསམས་པས་རྣམ་པར་བརྟག །རྡོ་རྗེའི་སྦྱོར་བས་ཟོས་པ་ཡིས། །སངས་རྒྱས་ཐམས་ཅད་བྱིན་གྱིས་རློབ། །ཅེས་བྱ་བ་དང༌། སཾ་བུ་ཊ་ལས་ཀྱང༌། ཤ་གང་ཡང་མེད་ན་རྣམ་པར་རྟོག་པ་ཤའི་རང་བཞིན་དུ་བྱས་ལ་འཇིག་རྟེན་པ་གང་ཟ་བ་དེ་བཟའ་བར་བྱའོ། །ཞེས་གསུངས་པ་ལྟར་རོ། །དེས་ན་རྒྱ་གར་གྱི་སློབ་དཔོན་ཀླུ་སྒྲུབ་ཡབ་སྲས། ཐོགས་མེད་སྐུ་མཆེད་ནས་བཟུང་སྟེ། ཇོ་བོ་ཆེན་པོ་རྗེ་དང༌། ཁོ་བོའི་མཁན་པོ་བསོད་སྙོམས་པ་ཆེན་པོ་ལ་སོགས་པ་རྣམས་ཀྱི་ཚོགས་ཀྱི་འཁོར་ལོའི་ལུགས་འདི་ཡིན་ནོ། །སྡོམ་བརྩོན་རྣམས་ཀྱིས་དབང་བསྐུར་ལ་སོགས་པའི་དུས་སུ་འདི་ལྟར་བྱས་ན་ལེགས་སོ། །རྣལ་འབྱོར་པ་རྣམས་ཀྱི་ཚོགས་ཀྱི་འཁོར་ལོའི་ལུགས་ནི། མ་ད་ན་དང་བ་ལ་ལ་སོགས་པ་དམ་ཚིག་གི་རྫས་ཅི་འཚོགས་པ་ལ་བསང་བ་ལ་སོགས་པ་བྱིན་རླབས་སྔར་དང་མཐུན་པ་བྱ། ཨོཾ་ཨཱཿཧཱུྃ་ཧ་ཧོ་ཧྲཱིཿཞེས་བརྗོད་ཅིང་བསང་གཏོར་བྱ། ཧས་ཁ་དོག་ཕུན་སུམ་ཚོགས་པ། ཧོས་དྲི་ཕུན་སུམ་ཚོགས་པ། ཧྲཱིཿས་ནུས་མཐུ་ཕུན་སུམ་ཚོགས་པར་བསམ། ཨོཾ་ཨཱཿཧཱུྃ་གིས་ཡེ་ཤེས་ཀྱི་བདུད་རྩིར་གནས་གྱུར་པར་བསམས་ལ། མ་ད་ན་ཅུང་ཟད་རེ་བླུགས་ལ། ཐམས་ཅད་སྣོད་གཅིག་ཏུ་འཐུང་བར་བསམ། དེ་ནས་ཕུད་བླ་མ་དང་དཀྱིལ་འཁོར་གྱི་གཙོ་བོ་ལ་དབུལ། དེ་ནས་གཏོར་མ་རྣམས་ལ་ཅི་འབྱོར་དབུལ། དེ་ནས་དབང་བསྐུར་གྱིས་དུས་སུ་བླ་མས་རང་དེ་བཞིན་གཤེགས་པའི་དཀྱིལ་འཁོར་དུ་བསྒྲུབས། མཉམ་གཞག་གི་དུས་སུ་རང་གིས་ལམ་རིམ་པ་གཉིས་ཀྱི་དེ་བཞིན་གཤེགས་པའི་དཀྱིལ་འཁོར་དུ་བསྒོམ་སྟེ། རབ་གནས་ཀྱི་ལྷ་ལ་མཆོད་པའི་ཚུལ་དུ་བསྒོམ། གཏོར་མའི་མགྲོན་འབྱུང་པོ་ཐམས་ཅད་ཀྱང་སངས་རྒྱས་སུ་བསྒོམས་ལ་མཆོད། དེ་ལྟར་མ་ཡིན་ན་རྒྱལ་པོས་འབངས་ལ་གུས་པ་བྱས་པའམ། དགེ་སློང་གིས་ཁྱིམ་པ་ལ་གུས་པ་བྱས་པ་ལྟར་ལྟུང་བ་འབྱུང་བར་བཤད། དེ་ལྟར་བྱས་པས་སངས་རྒྱས་ཀྱང་མཉེས། འབྱུང་པོ་ཡང་ཚིམ་པའི་རྟེན་འབྲེལ་ཡོད་གསུང༌། དེ་ནས་པདྨ་བྷཉྫ་ནར་མ་ད་ན་བླུགས་ལ་གཡོན་པའི་མཐེབ་སྲིན་གྱིས་བ་ལ་ཅུང་ཟད་བཟུང་ལ་པདྨའི་བསྐོར་བ་བྱ་སྟེ། གཡས་པས་པདྨ་བྷཉྫ་ན་བཟུང༌། གཡོན་པས་དེའི་སྟེང་ནས་ཅུང་ཟད་བཀབ་ལ་དབུལ། ལེན་པ་པོས་ཀྱང་པདྨའི་བསྐོར་བ་བྱས་ཏེ་དེ་བཞིན་དུ་བླང༌། དེའང་བརྟག་པ་གཉིས་པ་ལས། པདྨའི་ལག་པས་དབུལ་བ་དང༌། །དེ་ཉིད་ཀྱི་ནི་ལག་པས་བླང༌། །ཞེས་བྱ་བའི་དོན་ཡིན། འདྲེན་པ་པོས་ངག་ཏུ། འདིར་ནི་ཆོས་རྣམས་བཟང་པོར་ལྟོས། །འདུ་བ་རྣམས་ལ་ཐེ་ཚོམ་མེད། །བྲམ་ཟེ་ཁྱིམ་དང་གདོལ་པ་ཡང༌། །རང་བཞིན་གཅིག་པ་ཉིད་དུ་ཟོ། །ཞེས་བརྗོད། ལན་པ་པོས་ཀྱང༌། བདེ་གཤེགས་ཆོས་ལ་རིན་ཐང་མེད། །འདོད་ཆགས་ལ་སོགས་དྲི་མ་སྤངས། །གཟུང་དང་འཛིན་པ་དང་བྲལ་བ། །དེ་བཞིན་ཉིད་ལ་གུས་ཕྱག་འཚལ། །ཞེས་བརྗོད་ལ། དེ་དག་གི་དོན་ཡང་ཤེས་པར་བྱའོ། གཉི་ཀས་ཨ་ཧོ་སུ་ཁ་ཞེས་བརྗོད་ལ་བླང༌། ཚིགས་བཅད་འདི་གཉིས་སཾ་བུ་ཊའི་རྒྱུད་ན་བཞུགས། སཾ་སྐྲྀ་ཏའི་སྐད་མིན། པྲ་ཀྲྀ་ཏའི་སྐད་ཡིན། དེའི་སྟོབས་ཀྱིས་ལོ་ཙཱ་བས་མ་གོ་བར་བསྒྱུར་བས་ནོར་པ་བག་རེ་སྣང༌། འགྱུར་འདི་ནི་མ་ནོར་བ་ཡིན། དེ་ནས་ཕུད་སྔར་བཞིན་དུ་གཏོར་ལ་དཀྱིལ་འཁོར་ལ་མཆོད་པའི་བསམ་པས་ལོངས་སྤྱད། འཁོར་ལོ་བདེ་མཆོག་པ་ལག་པའི་མཆོད་པ་སྐབས་འདིར་བྱ། སྣོད་གཅིག་ཏུ་ལོངས་སྤྱོད་པ་བརྟག་གཉིས་ལས་བཤད། སྣོད་ཐ་དད་དུ་བྱེད་པ་སཾ་བུ་ཊའི་དགོངས་པ་ཡིན། ལས་ཀྱི་རྡོ་རྗེ་སློབ་མས་མ་ཐོབ་བར་དུ་སྣོད་གཞི་སྟེགས་མེད་པའི་ས་ལ་མི་གཞག རྡོ་རྗེ་སློབ་མས་ཐོབ་ནས་ས་ལ་བཞག་ཀྱང་ཉེས་པ་མེད། དང་པོ་བླངས་ནས་འགྲོ་བའི་བར་དུ་སྣོད་ཁ་མི་སྦུབ། སྟོང་པར་མི་གཞག བཟའ་བཏུང་བག་ཙམ་འཇོག་པ་རྟེན་འབྲེལ་ཡིན། ཚོགས་ཀྱི་འཁོར་ལོའི་ནང་དུ་རྩོད་པ་དང་ཤགས་འགྱེད་པ་མི་བྱ། སེམས་དགའ་བའི་གཏམ་དང་ཆོས་ཀྱི་འབེལ་གཏམ་ལ་སོགས་པ་བྱ། བླ་མའམ་གྲོགས་པོ་ལ་མ་ཞུས་པར་ཕྱིར་མི་འགྲོ། རབ་ཏུ་མྱོས་པའི་ཆང་མི་བཏུང༌། །ཐ་མལ་གྱི་འདུ་ཤེས་མི་བསྐྱེད། ཡི་དམ་ལྷའི་འདུ་ཤེས་མི་བརྗེད་པར་བྱའོ། །དམ་ཚིག་དང་ལྡན་པ་རྣམས་ལ་བཟང་བ་དང་ངན་པའི་རྣམ་རྟོག་མི་བྱ། བྱིན་གྱིས་བརླབས་པའི་རྫས་ལ་གཙང་བ་དང་མི་གཙང་བའི་རྣམ་རྟོག་མི་བྱ། འདི་དག་གི་ཕན་ཡོན་དང་ཉེས་དམིགས་ཚོགས་ཀྱི་འཁོར་ལོའི་གཞུང་དམ་ཚིག་ལྔ་པ་དང་ཐུན་མོང་མ་ཡིན་པའི་དོན་ལ་གདམས་པ་ལ་སོགས་པར་ཤེས་པར་བྱའོ། །གཞན་ཡང་ལས་དང་པོ་པས་ཚོགས་ཀྱི་འཁོར་ལོའི་དུས་དང༌། སེམས་བརྟན་པ་ཐོབ་པས་ཡུལ་ཉི་ཤུ་རྩ་བཞི་ལ་སོགས་པར་སྤྱོད་པའི་དུས་སུ་བརྡའི་སྐད་ཀྱིས་མ་སྨྲས་ན་ཡེ་ཤེས་ཀྱི་མཁའ་འགྲོ་མ་རྣམས་ཀྱི་བྱིན་གྱིས་མི་རློབ། ལས་ཀྱི་མཁའ་འགྲོ་མ་རྣམས་ཀྱི་བར་ཆད་འབྱུང་སྟེ། དེའང་བརྟག་པ་གཉིས་པ་ལས། རྡོ་རྗེ་སྙིང་པོ་སེམས་དཔའ་ཆེ། །གསང་བའི་སྐད་ནི་མཚར་ཆེ་བ། །ང་ཡིས་ཁྱོད་ལ་གང་བཤད་པ། །དེ་རྣམས་ཐམས་ཅད་གུས་པས་ཟུང༌། །ཀྱེ་རྡོ་རྗེ་འདིར་དབང་བསྐུར་གང༌། །གསང་བའི་སྐད་ཀྱི་མི་སྨྲ་བ། །དེ་ཡི་དམ་ཚིག་ཉམས་པར་ནི། །འགྱུར་བ་འདི་ལ་ཐེ་ཚོམ་མེད། །ཅེས་བྱ་བ་དང༌། རང་གི་དམ་ཚིག་རིགས་རྙེད་ནས། །གལ་ཏེ་ཚིག་འདི་མི་སྨྲ་ན། །གནས་བཞི་ལས་སྐྱེས་མཁའ་འགྲོ་མ། །དེ་ཡི་ཚེ་ན་ཁྲོ་བར་བྱེད། །ཅེས་གསུངས་ལ། བདེ་མཆོག་ལ་སོགས་པའི་རྒྱུད་ཐམས་ཅད་ནས་དེ་དང་འདྲ་བར་གསུངས་པས། བརྡའི་སྐད་ལ་བྱང་བར་བྱ་སྟེ། དེ་ཡང་ཆང་ལ་མ་ད་ན། ཤ་ལ་བ་ལ། ཟན་ལ་སོགས་པའི་བཟའ་བ་ལ་ཏྲི་པི་ཏ། ཚོད་མ་ལ་མ་ལ་ཏིན་དྷ་ན། ཐོད་པ་ལ་པདྨ་བྷཉྫ་ན། དེ་བཞིན་དུ་སྣོད་གཞན་ལ་ཡང་ཐོད་པར་བསྒོམས་ལ། པདྨ་བྷཉྫ་ནར་གདགས། ཅང་ཏེའུ་ལ་ཀྲི་པི་ཏ། དབང་བསྐུར་ཐོབ་ཅིང་དམ་ཚིག་དང་ལྡན་པ་ལ་ཀ་ལིཉྫ་ར། དབང་བསྐུར་མ་ཐོབ་ཅིང་དམ་ཚིག་དང་མི་ལྡན་པ་ལ་དུན་དྷུ་ར། འོང་པ་ལ་ཕྲེམ་ཁ་ན། འགྲོ་བ་ལ་ཁེ་ཊ་བ། རུས་པའི་རྒྱན་ལ་ནི་རཾ་ཤུ། དེ་ལ་སོགས་པའི་ངག་གི་བརྡ་དང༌། སྐྱེས་པ་ལ་ཌ། བུད་མེད་ལ་ཌི། ཞེས་བྱ་བ་ལ་སོགས་པའི་ཡི་གེའི་བརྡ་དང་དགྱེས་པ་རྡོ་རྗེའམ་འཁོར་ལོ་བདེ་མཆོག་ལས་གསུངས་པའི་བརྡ་རྣམས་ལ་བྱང་བར་བྱའོ། །བརྡ་མི་ཤེས་པར་ཚོགས་ཀྱི་འཁོར་ལོ་བྱེད་པ་དང༌། ཡུལ་ཉི་ཤུ་རྩ་བཞིར་འགྲོ་བ་ལ་བར་ཆད་འབྱུང་ལ། བརྡ་ཤེས་པ་རྣམས་ལ་དངོས་གྲུབ་མྱུར་དུ་འབྱུང་བར་རྒྱུད་ལས་གསུངས་སོ། །ལྔ་པ་གླུ་དང་གར་གྱིས་ཚིམ་པ་ནི། ཡེ་ཤེས་ཀྱི་མཁའ་འགྲོ་མ་བསྡུ་བ་དང༌། དེ་བཞིན་གཤེགས་པའི་དཀྱིལ་འཁོར་གྱི་དམིགས་པ་བརྟན་པ་དང་བདག་དང་ཚོགས་པ་རྣམས་བསྲུང་བར་བྱ་བའི་དོན་དུ་སྐྱེས་པ་གླུ་ལེན་པ་ན་སྣང་བ་མཐའ་ཡས། གར་བྱེད་པ་ན་རྣམ་པར་སྣང་མཛད་ཀྱི་ང་རྒྱལ་གྱིས་བྱའོ། །བུད་མེད་གླུ་ལེན་པ་ན་གོས་དཀར་མོ། གར་བྱེད་པ་ན་སངས་རྒྱས་སྤྱན་གྱི་ང་རྒྱལ་གྱིས་བྱ་སྟེ། བརྟག་གཉིས་ལས། རྡོ་རྗེ་ཆོས་དང་སངས་རྒྱས་སྤྱན། །རྣལ་འབྱོར་མ་དང་མ་མོ་ཡིས། །གླུ་དང་གར་ནི་འདི་དག་གིས། །ལེགས་པར་གླུ་བླང་གར་ཡང་བྱ། །འདི་ཉིད་ཀྱིས་ནི་ཚོགས་བསྲུང་ཞིང༌། །དེ་བཞིན་བདག་ཀྱང་བསྲུང་བ་ཉིད། །འདིས་ནི་འཇིག་རྟེན་དབང་དུ་བྱེད། །འདིས་ནི་སྔགས་ཀྱི་བཟླས་པ་ཉིད། །ཅེས་བྱ་བ་ལ་སོགས་པ་གསུངས་པ་ལྟར་རོ། །དམ་ཚིག་དང་ལྡན་པའི་དཔའ་བོ་དང་རྣལ་འབྱོར་མས། གླུ་དང་གར་བྱས་པའི་མཐར་ཡེ་ཤེས་ཀྱི་མཁའ་འགྲོ་མ་འདུ་བའི་རྟགས། སྒོག་པ་དང༌། བྱ་རྒོད་དང༌། ག་པུར་དང༌། ཙནྡན་ལ་སོགས་པའི་དྲི་དང༌། ངང་པ་དང༌། བུང་བ་དང༌། བ་ལངའཚེའི་སྒྲ་འབྱུང་བ་ལ་སོགས་པ་བརྟག་གཉིས་ལས་འབྱུང་བ་ལྟར་རོ། །དྲུག་པ་ལྷན་ཅིག་སྐྱེས་པའི་ཡེ་ཤེས་ཀྱི་ཚིམ་པ་ནི། རྣལ་འབྱོར་པ་རླུང་གི་ནུས་པ་དང་ལྡན་ཞིང་ཕོ་ཉའི་ལམ་བསྒོམས་པ་ཡིན་ན། ཕོ་ཉའི་ལམ་དངོས་བསྒོམ་པའང་ཡོད། རླུང་གི་ནུས་པ་དང་མི་ལྡན་ཞིང་ཕོ་ཉའི་ལམ་མི་བསྒོམ་པ་རྣམས་ཀྱིས། སྙིང་གར་མར་དང་མར་གྱི་ཉིང་ཁུའམ། མ་ད་ན་ཅུང་ཟད་གཏོར་ལ་ལེགས་པར་མཉེས་ཏེ། རང་ཧེ་རུ་ཀ་ཡབ་ཡུམ། སྤྱི་བོར་བླ་མ། སྣང་བ་ཐམས་ཅད་དེ་བཞིན་གཤེགས་པའི་དཀྱིལ་འཁོར་དུ་དྲན་པ་བྱ། བདེ་སྟོང་གི་ཏིང་ངེ་འཛིན་ལ་མཉམ་པར་གཞག་གོ །དེ་ཉིད་སློབ་དཔོན་ཌོཾ་བི་ཧེ་རུ་ཀས། མར་དང་མར་གྱི་ཉིང་ཁུ་ཡིས། །སྙིང་ག་རུ་ནི་བྱུག་པར་བྱ། །ཞེས་གསུངས་པ་ལྟར་རོ། །དངོས་གཞིའི་ཚིམ་པ་དྲུག་བཤད་ཟིན་ཏོ། །རྗེས་ཀྱི་ཆོ་ག་ལ་དྲུག་སྟེ། ཕྱི་རོལ་གྱི་འབྱུང་པོ་ལ་ཕྲིན་ལས་གཞོལ་བའི་ཕྱིར་ལྷག་མའི་གཏོར་མ་སྦྱིན་པ། ཡེ་ཤེས་ཀྱི་མཁའ་འགྲོ་མ་བསྡུས་ཏེ་དགེ་ཞིང་བཀྲ་ཤིས་པར་བྱ་བ། ཆོ་ག་ལྷག་ཆད་ཁ་བསྐང་བའི་ཕྱིར་ཡི་གེ་བརྒྱ་པ་བརྗོད་པ། ལས་བསགས་པ་འབྲས་བུ་དང་ལྡན་པར་བྱ་བའི་ཕྱིར་སྨོན་ལམ་གདབ་པ། མདུན་བསྐྱེད་ཀྱི་མགྲོན་གཤེགས་སུ་གསོལ་ཏེ། གཏོར་མ་གཏང་བ། བསྲུང་བ་བྱས་ཏེ་ལས་ཀྱི་རྗེས་མི་མངོན་པར་བྱ་བའོ། །དང་པོ་ནི་ལྷག་མ་མདུན་དུ་བཞག་པ་ལ། མ་ད་ན་ཅུང་ཟད་ཁར་འཐུངས་ཏེ་ལག་པར་འབར་བའི་ཕྱག་རྒྱ་བཅས་པའི་ནང་དུ་ངག་ཏུ་བྷྲཱུྃ་ཞེས་བྱ་བའམ། ཡང་ན་ཕཻཾ་ཞེས་བརྗོད་པ་དང་བསྟུན་ལ་གཏོར་མ་ལ་ཁ་ཕྲུ་བཏབ། དེ་ནས་ཡི་གེ་གསུམ་དང་ཨ་ཀཱ་རོའི་སྔགས་ཀྱི་བྱིན་གྱི་བརླབ། ཡང་ན་ཨོཾ་ཨུཙྪིཥྚ་བ་ལིཾ་ཏ་བྷཀྵ་སཱི་སྭཱ་ཧཱ་ཞེས་པའི་སྔགས་དེ་དག་ལན་གསུམ་མམ་བདུན་ལ་སོགས་པ་བརྗོད། དེས་ལྷག་མ་ལ་དབང་བའི་འབྱུང་པོ་ཐམས་ཅད་ཚིམ་པར་བསམ་མོ། །དེ་ནས་གཉིས་པ་ཡེ་ཤེས་ཀྱི་མཁའ་འགྲོ་མ་བསྡུས་ཤིང་བྱིན་གྱིས་རློབ་པ་དང་བཀྲ་ཤིས་པར་བྱ་བའི་ཕྱིར། རྡོ་རྗེ་དྲིལ་བུ་འཛིན་པས། ཀོལླ་ཨི་རེ་ཊེཋ་ཞེས་བྱ་བའི་རྡོ་རྗེའི་གླུ་དང༌། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །ཞེས་བྱ་བ་ལ་སོགས་པ་བཀྲ་ཤིས་ཀྱི་ཚིགས་བཅད་བརྗོད། སྐབས་འདིར་མིས་བྱས་པའི་གླུ་དང་བཀྲ་ཤིས་བྱས་ཀྱང་ཆོ་གར་མི་འགྱུར་བས། སངས་རྒྱས་ཀྱིས་གསུངས་པའི་གླུ་དང་བཀྲ་ཤིས་ཉིད་དགོས། ལྷག་མ་ནང་དུ་གཏོང་ན་གཏོར་མའི་སྔོན་དུ་གླུ་དང་བཀྲ་ཤིས་བརྗོད་ཀྱང་འགལ་བ་མེད། ཕུད་དང་ལྷག་མ་བསྲེས་ཏེ། ལམ་གྱི་བཞི་མདོ་ལ་སོགས་པའི་ཕྱི་རོལ་དུ་གཏོང་ན། སཾ་བུ་ཊ་ནས་འབྱུང་བ་བཞིན་རྐང་པ་གཡས་པའི་མཐེ་བོས་དཀྱིལ་འཁོར་བྲི་བ་དང༌། ཐོད་པ་ལྟག་སྤྲོད་ཀྱི་ཌ་མ་རུས་གཡས་དང་གཡོན་དུ་བསྐོར་ཞིང་བརྡུངས་ལ། ལས་གང་ལ་འཆོལ་བའི་མཁའ་འགྲོ་མའི་མིང་ནས་བཏོན་ལ། ཕྲེཾ་ཧཱུྃ་ཞེས་བརྗོད་དེ་དཔེར་ན་གཡོ་ལྡན་མ་ལ་ལས་འཆོལ་ན་གཡོ་ལྡན་མ་ཕྲེཾ་ཧཱུྃ་ཞེས་བརྗོད་པ་ལྟ་བུ་ཡིན། དེ་ལྟར་ཕྱི་རོལ་གྱི་གཏོར་མ་ཐོངས་པ་དང༌། ནང་དུ་ཡེ་ཤེས་ཀྱི་མཁའ་འགྲོ་མ་བསྡུས་ཕྱིར་རྡོ་རྗེའི་གླུ་དང༌། བཀྲ་ཤིས་ཀྱི་ཚིགས་བཅད་བརྗོད། གང་ལྟར་ཡང་གྲིབ་གནོན་གྱི་གདོན་བསྲུང་བའི་ཕྱིར་གཏོར་མ་ལ་མར་མེ་བཙུགས་ཏེ་གཏང་ངོ༌། །ཆོས་སྐྱོང་ལ་བསྟོད་ཅིང་ཕྲིན་ལས་བཅོལ་བ་དང༌། ཡོན་བདག་གིས་ཡོན་དབུལ་བ་དང༌། བཀྲ་ཤིས་པའི་ཆོ་ག་བྱེད་ན་ལྷག་མའི་གཏོར་མ་མ་བཏང་བའི་གོང་དུ་བྱའོ། །དམ་ཚིག་གསོ་བ་ལ་སོགས་པའི་ཆོ་ག་བྱེད་ན་ཡང་སྐབས་འདིའམ། ཡང་འཇིག་རྟེན་ལས་འདས་པའི་གཏོར་མ་བཞག གཞན་ཐམས་ཅད་བཏང་བའི་རྗེས་ལ་བྱའོ། །གསུམ་པ་ཡི་གེ་བརྒྱ་པ་བརྗོད་དེ། ཆོ་ག་ལྷག་ཆད་ཁ་བསྐང་བ་ནི། ལུས་རྡོ་རྗེ་ཐལ་མོ་སྙིང་གར་སྦྱར་ཏེ། སེམས་ཀྱིས་སྡིག་པ་ཐམས་ཅད་བཤགས་པ་དང༌། ཆོ་ག་ལྷག་ཆད་ཁ་བསྐང་བར་བསམས་ལ་ཡི་གེ་བརྒྱ་པ་བརྗོད་དེ། ངག་ཏུ། བདག་ནི་མི་ཤེས་རྨོངས་པ་སྟེ། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་བསྐྱབ་མཛོད་ཅིག །ཅེས་བྱ་བ་ལ་སོགས་པའི་ཚིགས་བཅད་དང༌། མ་འབྱོར་པ་དང་ཉམས་པ་དང༌། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་བ། །དེ་ནི་མགོན་པོས་བཟོད་པར་མཛོད། །ཅེས་པ་དང༌། གང་ཡང་བདག་ལས་དང་པོ་པའི་རྟེན་གྱི་གང་ཟག་ཏུ་གྱུར་པས། ཏིང་ངེ་འཛིན་མི་གསལ་བ་དང་བྱིང་བ་དང༌། རྒོད་པ་དང༌། ཆོ་ག་དང༌། ཡོ་བྱད་མ་ཚང་བ་དང༌། ལྷག་པ་དང༌། ཉམས་པ་དང༌། ཕྱིན་ཅི་ལོག་ཏུ་གྱུར་པ་ཐམས་ཅད་བཟོད་པ་ཆེན་པོ་མཛད་དུ་གསོལ་ཞེས་བརྗོད་དོ། །བཞི་པ་ལས་བསགས་པ་འབྲས་བུ་དང་ལྡན་པར་བྱ་བའི་ཕྱིར་སྨོན་ལམ་གདབ་པ་ནི། རྡོ་རྗེ་ཐལ་མོ་སྙིང་གར་སྦྱར་ལ། རིགས་སུ་སྐྱེ་དང་དམ་ཚིག་ཅན། །སྨྱོ་མེད་ཀྱེ་ཡི་རྡོ་རྗེ་སྟོན། །བླ་མ་ལ་གུས་སྙིང་རྗེར་ལྡན། །སྐྱེ་ཞིང་སྐྱེ་བར་འགྱུར་བར་ཤོག །ལག་པས་རྡོ་རྗེ་དྲིལ་བུ་འཁྲོལ། །ཟབ་མོའི་ཆོས་ནི་ཀློག་པ་དང༌། །བཙུན་མོའི་ཁུ་བ་མཉམ་ཟས་ཅན། །སྐྱེ་ཞིང་སྐྱེ་བར་འགྱུར་བར་ཤོག །ཅེས་དགྱེས་པའི་རྡོ་རྗེ་ལས་འབྱུང༌། བདེ་མཆོག་ལས། ལྷ་མོ་ཚད་མ་དམ་ཚིག་ཚད་མ་དང༌། །དེས་གསུངས་མཆོག་ཏུ་ཚད་མར་གྱུར་པ་སྟེ། །བདེན་པར་གྱུར་པ་འདིས་ཀྱང་ལྷ་མོ་རྣམས་ཀྱིས་ནི། །བདག་ནི་རྗེས་སུ་འཛིན་པའི་རྒྱུར་ནི་འགྱུར་བར་ཤོག །ཅེས་བྱ་བ་དང༌། སཾ་བུ་ཊ་ལས། སེམས་ཅན་ཐམས་ཅད་བདེ་གྱུར་ཅིག །སེམས་ཅན་ཐམས་ཅད་སྐྱོན་མེད་པར། །གང་གི་ལམ་གྱིས་གྲོལ་འགྱུར་བ། །དེས་ནི་སངས་རྒྱས་མྱུར་ཐོབ་ཤོག །ཅེས་བྱ་བ་ལ་སོགས་པ་རྒྱུད་ནས་འབྱུང་བའི་སྨོན་ལམ་དང༌། འཇམ་དཔལ་དཔའ་བོས་ཇི་ལྟར་མཁྱེན་པ་དང༌། །ལ་སོགས་པ་མདོ་ནས་འབྱུང་བའི་བསྔོ་བ་དང༌། གཞན་ཡང་གང་ཤེས་པའི་བསྔོ་བ་རྣམས་འཁོར་གསུམ་ཡོངས་སུ་དག་པའི་ཚུལ་གྱིས་དུག་མེད་པའི་བསྔོ་བ་རྒྱ་ཆེན་པོ་བྱའོ། །གནས་སྐབས་སུ་ཚེ་རིང་ནད་མེད། ཕུན་སུམ་ཚོགས་པ་དང་བཀྲ་ཤིས་པ་ལ་སོགས་པ་གང་འདོད་པའི་དོན་གསོལ་བ་གདབ་བོ། །ལྔ་པ་མདུན་བསྐྱེད་ཀྱི་མགྲོན་གཤེགས་སུ་གསོལ་བ་ནི། ཡི་གེ་བརྒྱ་པ་བརྗོད་པའི་མཐར། ཨོཾ་ཁྱོད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །ཞེས་མདུན་བསྐྱེད་ཀྱི་ཡེ་ཤེས་པ་གཤེགས་སུ་གསོལ། སྤྲུལ་པ་བདག་ལ་བསྡུའོ། །བདག་བསྐྱེད་ཀྱི་ཡེ་ཤེས་པ་གཤེགས་སུ་གསོལ་བ་རྣམས་རྣལ་འབྱོར་ཆེན་པོའི་ལུགས་ལ་མི་དགོས། དྲུག་པ་བདག་ཉིད་བསྲུང་སྟེ་ལས་ཀྱི་རྗེས་མི་མངོན་པར་བྱ་བ་ནི། དགྱེས་པ་རྡོ་རྗེ་ལྟར་ན་རང་ཐུན་མཚམས་ཀྱི་ཧེ་རུ་ཀ་དྲན་པར་བྱས་ཏེ། སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ། བདེ་མཆོག་ལྟར་ན། སུམ་བྷ་ནིའི་སྔགས་དང་བཅས་པས་སེ་གོལ་གྱི་སྒྲས། ཕྱོགས་མཚམས་བསྲུང་བ་དང༌། དཔའ་བོའི་གོ་ཆ་དང༌། དཔའ་མོའི་གོ་ཆ་དང༌། གོ་ཆ་ཆེན་པོ་རྣམས་ཀྱིས་བསྲུངས་ཏེ། རྐང་པ་བརྒྱད་པའི་སྔགས་ཀྱི་བྱིན་གྱིས་བརླབས་ལ་ལས་ཀྱི་རྗེས་མི་མངོན་པར་བསྡུས་ཏེ། ཅི་བདེར་གནས་སོ། །མཇུག་གི་ཆོ་ག་བཤད་ཟིན་ཏོ།། །།སྤྱི་དོན་དྲུག་པ་དགོས་པ་ནི། བསོད་ནམས་དང་ཡེ་ཤེས་ཀྱི་ཚོགས་ཐམས་ཅད་འདིར་འདུས་ཏེ། རྡོ་རྗེ་གུར་ལས། བསོད་ནམས་དང་ཡེ་ཤེས་ཀྱི་ཚོགས་རྒྱ་མཚོ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ་ཞེས་བྱ་བ་དང༌། འདིས་ནི་རྡོ་རྗེ་མཉེས་པར་འགྱུར་ཞེས་བྱ་བ་ལ་སོགས་པ་གསུངས་པས། སངས་རྒྱས་ཐམས་ཅད་མཉེས། བྱང་ཆུབ་སེམས་དཔའ་ས་བཅུ་ལ་གནས་པ་ཐམས་ཅད། ཉན་ཐོས་ཀྱི་གང་ཟག་བརྒྱད། རང་སངས་རྒྱས་དབང་པོ་རྣོ་རྟུལ་གཉིས། འཇིག་རྟེན་པའི་འདོད་པ་དང་གཟུགས་དང་གཟུགས་མེད་ཀྱི་ལྷ་ཐམས་ཅད། ཆོས་སྐྱོང་བའི་སྲུང་མ་ནས་བཟུང་སྟེ། དམྱལ་བ་ཡི་དྭགས་ཀྱི་བར་འཇིག་རྟེན་དང་འཇིག་རྟེན་ལས་འདས་པའི་མགྲོན་ཐམས་ཅད་མཉེས་ཤིང་ཚིམ་པར་བཤད་དོ། །ལུང་ཡི་གེ་མངས་པས་མ་བྲིས་པས་རྡོ་རྗེ་གུར་ཉིད་དུ་བལྟ་བར་བྱའོ། །འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་ཀྱང་འགྲུབ་སྟེ། བརྟག་གཉིས་ལས། གང་དུ་ཟོས་པས་འདོད་དོན་ཀུན། །སྒྲུབ་པ་ཅན་གྱི་དངོས་གྲུབ་འགྱུར། །ཞེས་བྱ་བ་དང༌། གཞན་ཡང་རྒྱུད་སྡེ་དཔག་ཏུ་མེད་པ་ལས་ཕན་ཡོན་གསུངས་པས་རྒྱུད་སྡེ་དེ་དག་ཉིད་དུ་བལྟ་བར་བྱའོ། །སྤྱི་དོན་གཉིས་པ་རྩོད་པ་སྤང་པ་ལ་གསུམ་སྟེ། ལྟ་བ་དང༌། སྒོམ་པ་དང༌། སྤྱོད་པ་ལ་རྩོད་པ་སྤང་བའོ། །དང་པོ་ནི་འཕགས་མ་ཉན་ཐོས་པ་དག ཐོག་མར་ཐེག་པ་ཆེན་པོའི་ལྟ་བ་ནོར་ཏེ། དེའི་རྒྱུ་མཚན་ནི་གཟུགས་ལ་སོགས་པ་ཚད་མར་གྲུབ་བཞིན་དུ། ཤེས་རབ་ཀྱི་ཕ་རོལ་ཏུ་ཕྱིན་པ་ལས། གཟུགས་མེད་ཚོར་བ་མེད་ཅེས་བྱ་བ་ནས། རྣམ་པ་ཐམས་ཅད་མཁྱེན་པའི་སངས་རྒྱས་མེད་ཅེས་བྱ་བ་ལ་སོགས་པ་ལུང་རིགས་དང་འགལ་བར་བཤད་པའི་ཕྱིར་དང༌། གཉིས་པ་སྒོམ་པ་ནོར་ཏེ་རང་ཉིད་ཀྱི་ལུས་ངག་ཡིད་གསུམ་སོ་སོ་སྐྱེ་བོ་ཡིན་བཞིན་དུ་སངས་རྒྱས་སུ་བསྒོམས་པ་ཙམ་གྱིས་སངས་རྒྱས་སུ་མི་འགྱུར་བའི་ཕྱིར་རོ། །གསུམ་པ་སྤྱོད་པ་ནོར་ཏེ་རབ་ཏུ་བྱུང་བ་ལུས་ངག་གི་ཀུན་སྤྱོད་གཙང་དགོས་པ་ལ། གཙང་བ་དང་མི་གཙང་བ་མཉམ་པའི་ཕྱིར་རོ་ཞེ་ན། དེའི་ལན་སོ་སོར་བཏབ་པ་ལ་གསུམ་ལས། ཐོག་མར་ལྟ་བ་སྟོང་པ་ཉིད་ལ་སྐྱོན་མེད་དེ། གཟུགས་ལ་སོགས་པ་སྣང་བ་འགོག་ན་ཁྱེད་བདེན་མོད། བདེན་པ་འགོག་པས་སྐྱོན་མེད་དོ། །འདིའི་ལན་ནི་རྒྱས་པར་མདོ་སྡེ་རྒྱན་ལ་སོགས་པ་ཐེག་པ་ཆེན་པོ་སངས་རྒྱས་ཀྱི་བཀར་བསྒྲུབ་པའི་སྐབས་སུ་བཤད་པ་ལྟར་ཤེས་པར་བྱའོ། །གཉིས་པ་བསྒོམ་པ་ལའང་སྐྱོན་མེད་དེ་ཁྱེད་ཀྱང་ཟད་པར་ས་ལ་སོགས་པ་བསྒོམས་པས་ས་ལ་སོགས་པའི་ཏིང་ངེ་འཛིན་འབྱུང་བ་ལྟར། འདིར་ཡང་ཡི་དམ་གྱི་ལྷ་བསྒོམས་པས། ཡི་དམ་གྱི་ལྷའི་ཏིང་ངེ་འཛིན་འབྱུང་བ་མཚུངས་སོ། །དེ་བཞིན་དུ་ཉན་ཐོས་ཀྱི་ཀེང་རུས་བསྒོམ་པ་ལ་སོགས་པ་ཐམས་ཅད་སྤྲོས་ཏེ་ཤེས་པར་བྱའོ། །གསུམ་པ་སྤྱོད་པ་ལ་རྩོད་པ་སྤང་བ་ལ་གསུམ། མཆོད་པར་བྱ་བའི་ཡུལ་ལ་རྩོད་པ་སྤང་བ། དུས་ལ་རྩོད་པ་སྤང་བ། ཡོ་བྱད་ལ་རྩོད་པ་སྤང་བའོ། །དང་པོ་ནི་ཉན་ཐོས་པ་ན་རེ། རང་ཉིད་མཆོད་པས་སངས་རྒྱས་མཆོད་པར་འགྱུར་བ་མི་འཐད་དེ། ལུས་མི་གཙང་བ་ལས་གྲུབ་ཅིང༌། སེམས་ཆགས་སྡང་ཅན་ཡིན་ནོ་ཞེ་ན། དེ་ལྟར་ན་ཁྱེད་ཀྱི་བྲིས་སྐུ་ཡང་མཆོད་པར་མི་འཐད་དེ། ལྷ་བཟོ་བ་ཆགས་སྡང་ཅན། ཚོན་རྩི་ལ་སོགས་པ་འབྱུང་བ་མ་དག་པ་ལས་གྲུབ་པའི་ཕྱིར་རོ། །དེ་ལྟར་ཡིན་ཡང་སངས་རྒྱས་སུ་མོས་པ་བྱས་པས་བསོད་ནམས་ཐོབ་པར་མདོ་ལས་གསུངས་སོ་ཞེ་ན། དེ་ལྟར་ན་རང་གི་ལུས་ཀྱང་སངས་རྒྱས་སུ་བསྒོམས་ནས་མཆོད་པས་སངས་རྒྱས་མཆོད་པའི་བསོད་ནམས་ཐོབ་པར་མདོ་རྒྱུད་གཉིས་ཀ་ནས་གསུངས་ཏེ། བྱམས་པ་སེང་གེ་སྒྲའི་མདོ་ལས། གང་སངས་རྒྱས་མཆོད་པར་འདོད་པས་བདག་ཉིད་མཆོད་པར་བྱའོ། །སངས་རྒྱས་ཀྱི་རིང་བསྲེལ་མཆོད་པར་འདོད་པ་དེས། བདག་ཉིད་མཆོད་པར་བྱའོ། །ཞེས་བྱ་བ་དང༌། ངན་སོང་སྦྱོང་རྒྱུད་ལས། རྡོ་རྗེ་སེམས་དཔའི་གནས་འདུག་སྟེ། །ཐམས་ཅད་ཟོས་ཏེ་ཀུན་བྱས་ཀྱང༌། །འགྲུབ་འགྱུར་ཉེས་པས་མི་གོས་ན། །སྙིང་རྗེ་ལྡན་པས་སྨོས་ཅི་དགོས། །ཞེས་གསུངས་ལ། རྒྱུད་སྡེ་གཞན་ལས་ཀྱང་རྒྱས་པར་གསུངས་ཏེ། ཡི་གེ་མངས་ཀྱིས་དོགས་པས་མ་བྲིས་སོ། །གཉིས་པ་དུས་ལ་རྩོད་པ་སྤང་བ་ནི། །སངས་རྒྱས་མཆོད་པའི་དུས་སྔ་དྲོ་ཡིན་གྱི་མཚན་མོར་མཆོད་པ་མི་འཐད་ཅེ་ན། ཁྱེད་ཀྱང་ཚེས་བརྒྱད་ལ་སོགས་པ་དུས་བཟང་པོ་ལ་ལྷ་འདུ་བས་མཆོད་པའི་དུས་བཟང་བ་ལྟར། འདིར་ཡང་ཡེ་ཤེས་ཀྱི་མཁའ་འགྲོ་མ་འདུ་བའི་དུས་མཚན་མོ་ཡིན་པས་བཟང་སྟེ། རྡོ་རྗེ་མཁའ་འགྲོ་ལས། ཡུལ་འདི་རྣམས་ཀྱི་བུ་མོ་གང༌། །སྒྲུབ་པ་པོ་ལ་དངོས་གྲུབ་སྟེར། །རྟག་ཏུ་མཚན་མོར་འཕྱན་པ་དང༌། །རྟག་ཏུ་མཚན་མོར་འདུ་བར་བྱེད། །མཁའ་སྤྱོད་ཤིན་ཏུ་རྙེད་དཀའ་བའི། །དངོས་གྲུབ་ཆེན་པོ་སྟེར་བར་འགྱུར། །ཞེས་བྱ་བ་དང༌། གསང་བ་སྤྱི་རྒྱུད་ལས། ལྷ་ཡང་ཉི་མ་ནུབ་པ་ན། །ངེས་པར་བྱིན་གྱི་རླབས་ཀྱིས་འདུ། །ཉི་མ་ཤར་བར་མ་གྱུར་པར། །མཆོད་ནས་གཤེགས་སུ་གསོལ་བ་ཤིས། །ཞེས་གསུངས་པས་བྱིན་གྱིས་རློབ་པའི་དུས་མཚན་མོ་བཟང་བར་གསུངས་སོ། །གཞན་ཡང་ཉན་ཐོས་ཀྱི་ལྟུང་བ་ལ་དངོས་པོ་གཙོ་བ་དང་འདུ་ཤེས་གཙོ་བ་གཉིས་ཡོད་པ་ལས། དེ་ལའང་སྔ་དྲོ་དང་ཕྱི་དྲོ་དང༌། འབགས་པ་དང་མ་འབགས་པ་དང༌། གསོད་པ་དང་རྐུ་བ་ལ་སོགས་པའི་སེམས་ཀྱིས་དམིགས་པ་འབའ་ཞིག་ལ་འདུ་ཤེས་གཙོ་བ་ཡིན། དཔེར་ན་སྔ་དྲོའི་འདུ་ཤེས་ཀྱིས་ཕྱི་དྲོ་ཟས་ཟོས་ཀྱང་ལྟུང་བ་མེད། ཕྱི་དྲོའི་འདུ་ཤེས་ཀྱིས་སྔ་དྲོ་ཟོས་ཀྱང་ཉེས་པ་ཡོད། སྐྱེས་པའི་འདུ་ཤེས་ཀྱིས་བུད་མེད་ལ་རེག་ན་ལྟུང་བ་མེད། བུད་མེད་ཀྱི་འདུ་ཤེས་ཀྱིས་སྐྱེས་པ་ལ་རེག་ཀྱང་ལྟུང་བ་ཡོད། བུད་མེད་ཡིན་པར་ཤེས་ཀྱང་འདུ་ཤེས་བསྒྱུར་བས་ལྟུང་བ་མེད་པའི་སྐབས་ཀྱང་སྲིད་དེ། དཀོན་མཆོག་བརྩེགས་པའི་མདོ་ལས། བྱང་ཆུབ་སེམས་དཔའ་ཚོགས་ཅན་རབ་མཆོག་གིས། ཕྱི་རོལ་སའི་ཁམས་དང་ནང་གི་སའི་ཁམས་སུ་གཅིག་པའི་ཆོས་ཀྱི་སྒོ་དེས་བུད་མེད་ཀྱི་ལག་པ་ནས་བཟུང་སྟེ། ཁྲིའི་སྟེང་དུ་འདུག་པ་ལ་ཀུན་དགའ་བོ་མ་དད་པ་སྐྱེས། དེའི་ཚེ་བྱང་ཆུབ་སེམས་དཔས་རྫུ་འཕྲུལ་བསྟན་ནས། ཀུན་དགའ་བོའི་ལོག་པར་རྟོག་པ་ཞི་བར་བྱས། དེ་ལྟ་བུ་ལ་ལྟུང་བ་མེད་པར་གསུངས་སོ། །དེ་བཞིན་དུ་ནམ་མཁའ་ལྡིང་དུ་བསྒོམས་ཏེ་དུག་ཟོས་ཀྱང་ཉེས་པས་མི་གོས་ལ། ཁྱད་པར་དུ་བཅུད་ལེན་དུ་འགྲོ། བསྒོམ་མ་ཤེས་ན་འཆི་བ་ལྟར། དེ་བཞིན་གཤེགས་པའི་དཀྱིལ་འཁོར་དུ་བསྒོམ་ཤེས་ན་ཁ་ཟས་ཟོས་པ་སངས་རྒྱས་ཀྱི་རྒྱུར་འགྲོ། མ་ཤེས་ན་ངན་སོང་གི་རྒྱུར་འགྱུར་ཏེ། དེ་ཉིད་སློབ་དཔོན་ཨཱརྻ་དེ་བས། ནམ་མཁའ་ལྡིང་དུ་བསྒོམས་པ་ཡིས། །དུག་རྣམས་ཐམས་ཅད་ཟ་བར་བྱེད། །ཅེས་བྱ་བ་དང༌། ལྕགས་ཀྱི་གོང་བུ་ཆུང་ངུ་ཡང༌། །ཆུ་ཡི་གཏིང་དུ་འབྱིང་བར་འགྱུར། །ལྕགས་གོང་སྣོད་དུ་བྱས་ནས་ནི། །ཐམས་ཅད་སྒྲོལ་བའི་གྲུ་རུ་འགྱུར། །ཞེས་གསུངས་པ་ལྟར་རོ། །ཡོ་བྱད་ལ་རྩོད་པ་སྤང་བ་ལ་གཉིས་ལས། ཐོག་མར་བཟའ་བ་དང་བཏུང་བ་ལ་རྩོད་པ་སྤང་བ་ནི། ཉན་ཐོས་རྣམས་ན་རེ། སངས་རྒྱས་མཆོད་པའི་ཡོ་བྱད་དཀར་གསུམ་མངར་གསུམ་ལ་སོགས་པ་དག་པའི་ཡོ་བྱད་ཡིན་གྱི། ཤ་ཆང་ལ་སོགས་པ་མ་དག་པས་མཆོད་པར་མི་རིགས་སོ་ཞེ་ན། དགེ་སྦྱོང་དང་གཙང་སྦྲའི་རྣམ་པ་ཅན་གྱི་སངས་རྒྱས་མཆོད་པའི་རྫས་དཀར་གསུམ་དང་མངར་གསུམ་དང་ཆུ་ལ་སོགས་པ་ཡིན་མོད། ཡེ་ཤེས་ཀྱི་མཁའ་འགྲོ་མ་མཆོད་པ་ལ། ཤ་དང་ཆང་ལ་སོགས་པ་དགོས་པ་ཡིན་ཏེ། ཡེ་ཤེས་ཀྱི་མཁའ་འགྲོ་མ་སྡུད་པའི་རྟེན་འབྲེལ་ཡིན་པའི་ཕྱིར་རོ། །དཔེར་ན་ངང་པ་སྡུད་པ་ལ་ཆུའམ། བུང་བ་སྡུད་པ་ལ་མེ་ཏོག་གམ། ཤ་སྦྲང་སྡུད་པ་ལ་ཤ་དགོས་པ་ལྟ་བུའོ། །གཞན་ཡང་དངུལ་ཆུ་དང་རྡོ་ཆུ་ལ་སོགས་པ་མ་ཤེས་ན་ནད་དུ་འགྱུར་ལ། ཤེས་ན་ཚེ་ཉི་ཟླ་གནས་ཀྱི་བར་དུ་ཐུབ་པའི་བཅུད་ལེན་དུ་འགྱུར་རོ། །དེ་བཞིན་དུ་ཤ་ལྔ་བདུད་རྩི་ལྔ་ཡང་དེ་ཉིད་མ་ཤེས་ན་ངན་སོང་གི་རྒྱུར་འགྱུར་ལ། ཤེས་ན་སངས་རྒྱས་ཀྱི་རྒྱུར་འགྱུར་རོ། །གཞན་ཡང་འབྲས་བུ་གསུམ་པ་ལ་སོགས་པའི་བཅུད་ལེན་གྱིས། འཆི་བར་ཡང་མི་ནུས། ཚེ་ཉི་ཟླ་གནས་ཀྱི་བར་དུ་གནས་པར་ཡང་མི་ནུས། དེ་བཞིན་དུ་དཀར་གསུམ་ལ་སོགས་པ་ཟོས་པས་དམྱལ་བར་འགྲོ་བའི་རྫས་ཀྱང་མིན། སངས་རྒྱས་པའི་རྫས་ཀྱང་མ་ཡིན་ཏེ། སློབ་དཔོན་ཉི་མ་སྦས་པས། གང་ཞིག་གནོད་པར་བྱེད་ནུས་པས། །དེ་ཡི་ཕན་པར་བྱེད་ཀྱང་ནུས། །ཉི་མས་སྐེམ་བྱེད་ཆར་ཉིད་ཀྱང༌། །འབེབས་པར་ནུས་ཀྱིས་ཟླ་བས་མིན། །ཞེས་གསུངས་པ་ལྟར་རོ། །དེ་ན་ཤ་ལྔ་བདུད་རྩི་ལྔ་ཡང༌། རྙེད་སླ་ལ་ཁ་ན་མ་ཐོ་བ་མེད། ཡེ་ཤེས་ཀྱི་མཁའ་འགྲོ་མ་རྣམས་ཀྱིས་བྱིན་གྱིས་རློབ་ཅེས་ཡོན་ཏན་གསུམ་ལྡན་དུ་གསུངས་པ་ཡང་དེ་ཡིན་ནོ། །གཉིས་པ་སྣོད་དང་རྒྱན་ལ་རྩོད་པ་སྤང་བ་ནི། ཉན་ཐོས་ན་རེ་སྣོད་དང་ཉ་ཕྱིས་དང་དུང་ཆོས་ལ་སོགས་པ་བཟང༌། རྒྱན་ཡང་མུ་ཏིག་དང་བ་སོ་ལ་སོགས་པ་བཟང༌། སྲད་བུ་ཡང་དར་སྐུད་ལ་སོགས་པ་བཟང་ལ། ཁྱེད་ཅི་ནས་ཀྱང་སྣོད་ཐོད་པ། རྒྱན་མི་རུས། སྲད་བུ་མིའི་སྐྲ་ལ་སོགས་པ་མི་གཙང་བ་ཁོ་ན་ལ་བྱེད་པ་མི་འཐད་དོ་ཞེ་ན། དེ་ལ་འདི་འདྲིའོ། །མི་བཟང་ངམ། དུད་འགྲོ་བཟང༌། མི་ལུས་བསོད་ནམས་ལས་གྲུབ་པས་ཆེས་བཟང༌། དུད་འགྲོ་སྡིག་པ་ལས་གྲུབ་པས་ངན་ནོ་ཞེ་ན། དེ་ལྟར་ན་བསོད་ནམས་ལས་གྲུབ་པ་ངན་ན་སྐྲ་དང་རུས་པ་ངན་ལ། སྡིག་པ་ལས་གྲུབ་པའི་རུས་པ་བཟང་བའི་རྒྱུ་མཚན་ཅི་ཡིན། སེམས་རྣལ་དུ་ཕོབ་ལ་སོམས་ཤིག དེ་ཉིད་བདེ་མཆོག་ལ་སོགས་པའི་རྒྱུད་ནས། དུང་དང་ཉ་ཕྱིས་མུ་ཏིག་སོགས། །གསུམ་པར་རྒྱུ་ལས་བྱུང་ཡིན་ན། །ཆོས་ཀྱི་སྐུ་ཡི་ལུས་ཅན་གྱི། །ཐོད་པ་ལ་ནི་སུ་ཞིག་སྨོད། །དཔའ་བོ་ཐོད་པའི་ཕྲེང་བ་ཅན། །མཆོད་ཕྱིར་ཐོགས་དང་དག་བྱེད་ཀྱང༌། །དམ་པའི་ཆོས་ཀྱི་རིམ་པས་གསུངས། །ཞེས་གསུངས་པ་ལྟར་རོ། །དེས་ན་གསང་སྔགས་ཀྱི་ལྟ་བ་དང༌། བསྒོམ་པ་དང༌། སྤྱོད་པ་ཐམས་ཅད་དངོས་པོ་སྟོབས་ཞུགས་ཀྱི་རིགས་པས་གྲུབ་བོ་ཞེས་ཁོ་བོའི་བླ་མ་རྡོ་རྗེ་འཆང་ཆེན་པོ་ཉིད་གསུང་ངོ༌། །འདི་དག་གི་ལུང་རིགས་རྒྱས་པ། སློབ་དཔོན་འཕགས་པ་ཡབ་སྲས་ཀྱི་གཞུང་དང༌། སློབ་དཔོན་སངས་རྒྱས་ཡེ་ཤེས་ཞབས་ཀྱི་བདག་གྲུབ་པ་ལ་འཇུག་པ་དང༌། སློབ་དཔོན་ཞི་བ་འཚོའི་དེ་ཁོ་ན་ཉིད་གྲུབ་པ་ལ་སོགས་པ་གསང་སྔགས་ཀྱི་གྲུབ་མཐའ་རིགས་པས་བསྒྲུབས་པ་དེ་དག་ཏུ་བལྟ་བར་བྱའོ། །སྤྱི་དོན་གསུམ་པ་ཆོ་གའི་རབ་ཏུ་དབྱེ་བ་ལ་ལྔ་སྟེ། གང་ཟག་གི་དབྱེ་བ། དུས་ཀྱི་དབྱེ་བ། ལྷའི་རྣལ་འབྱོར་གྱིས་དབྱེ་བ། དགོས་པས་དབྱེ་བ། མཆོད་བྱས་དབྱེ་བའོ། །དང་པོ་ལ་གསུམ་སྟེ། དཔའ་བོ་དང་རྣལ་འབྱོར་མ་གཉིས་ཀ་ཚོགས་པ་ལ་ཚོགས་ཀྱི་འཁོར་ལོ། །རྐྱང་པ་སོ་སོ་ལ་དཔའ་བོའི་སྟོན་མོ་དང༌། དཔའ་མོའི་སྟོན་མོ། །གཉིས་པ་དབང་བསྐུར་རབ་གནས། སྦྱིན་སྲེག་ལ་སོགས་པའི་མཆོད་པ་ལ་ཙ་རུའི་བཟའ་བ། གསུམ་པ་དགྱེས་རྡོར་བདེ་མཆོག་ལ་སོགས་པའི་ལྷའི་རྣལ་འབྱོར་མི་འདྲ་བ་དུ་མ་འདུས་པ་ལ་མཛའ་བ་འདུས་པ། བཞི་པ་འཇིག་རྟེན་པའི་གནོད་པ་ཐམས་ཅད་ཞི་བར་བྱ་བའི་ཕྱིར་སངས་རྒྱས་ཀྱི་ཐུགས་རྗེ་བསྐུལ་བའི་དོན་དུ། དཀྱིལ་འཁོར་གྱི་ལྷ་ཐམས་ཅད་གར་མཁན་གྱི་ཚུལ་དུ་བཞུགས་པ་ལ། གླུ་དང་གར་གྱི་སྦྱོར་བས་ཁྲོ་བོའི་རྒྱལ་པོ་བཞད་གད་དང་སེམས་གར་མཁན་གྱི་ཚུལ་གྱིས་སངས་རྒྱས་ཀྱི་ཐུགས་གནད་དུ་བསྐུལ་ཏེ། སེམས་ཅན་གྱི་སྡུག་བསྔལ་ཞི་བར་མཛད་པ་ནི་སངས་རྒྱས་ཀྱི་གར། ལྔ་པ་མཆོད་བྱས་དབྱེ་བ་ནི་གཉིས་ལས། འཇིག་རྟེན་དང་འཇིག་རྟེན་ལས་འདས་པའི་མཁའ་འགྲོ་མ་རྣམས་ཀྱི་རྟེན་ཐོད་པ་དང་དགྲ་སྟ་ལ་སོགས་པའི་མཚན་མ་རྣམས་བྲིས་ཏེ། གཙོ་བོར་མཆོད་པ་ནི། རིགས་ལྡན་མ་མཆོད་པ། དཀྱིལ་འཁོར་གྱི་ཁང་བའི་ནང་དུ་དེ་དག་མཆོད་ཅིང༌། ཡོལ་བའི་ཕྱི་རོལ་དུ་གྲོང་བའི་ཆོས་ཀྱིས་མ་ཕོག་པའི་བུ་མོ་ལྔའམ་བདུན་ནམ། སུམ་ཅུ་རྩ་བདུན་ལ་སོགས་པ་ལྷ་གྲངས་དང་མཐུན་པ་བསགས་པ་ལ། བཟའ་བཏུང་དང་གོས་ལ་སོགས་པའི་བསྙེན་བཀུར་བྱེད་པ་ལ་གཞོན་ནུ་མའི་སྟོན་མོ་ཞེས་མིང་འདོགས་སོ། །དེ་དག་གིས་ནི་རྣལ་འབྱོར་བླ་ན་མེད་པའི་རྒྱུད་དང༌། གྲུབ་ཐོབ་རྣམས་ཀྱི་བསྟན་བཅོས་དང༌། བླ་མ་རྣམས་ཀྱི་མན་ངག་ལ་བརྟེན་ནས། ཆོས་ཀྱི་རྒྱལ་པོ་དཔལ་ལྡན་ས་སྐྱ་པ་ཆེན་པོའི་ཕྱག་ལེན་གྱི་རིམ་པ་བཤད་ཟིན་ཏོ།། །།དྲི་མེད་རྒྱུད་ལས་ཇི་ལྟར་གསུངས་པའི་དོན། །གྲུབ་པ་བརྙེས་པའི་བླ་མ་ལས་བརྒྱུད་པ། །རྡོ་རྗེ་འཆང་ཆེན་མི་ཡི་སྐུ་གཟུགས་ཅན། །ས་སྐྱར་བཞུགས་པ་དེ་ཡིས་བསྡུས་ཏེ་གསུངས། །དེ་ཡི་གསུང་རབ་ཅུང་ཟད་མི་གསལ་བ། །གསོལ་བ་འདེབས་པ་དག་གི་ངོར་བྱས་ནས། །དེ་ཡི་ཞབས་རྡུལ་གུས་པས་ལེན་པ་ཡི། །ཀུན་དགའི་མིང་ཅན་དེ་ཡིས་གསལ་བར་བྱས། །དགེ་བ་འདི་ཡིས་ནམ་མཁའི་མཐས་ཀླས་པའི། །ལུས་ཅན་རྣམས་ཀྱིས་བསོད་ནམས་ཡེ་ཤེས་ཚོགས། །མྱུར་དུ་བསྒྲུབ་ཏེ་ཚེ་འདི་ཁོ་ན་ལ། །རྡོ་རྗེ་འཛིན་པའི་ས་ལ་གནས་པར་ཤོག །རྣལ་འབྱོར་བླ་ན་མེད་པའི་ཚོགས་ཀྱི་འཁོར་ལོའི་ལག་ཏུ་བླང་བའི་རིམ་པ། ཆོས་ཀྱི་རྒྱལ་པོ་རྒྱལ་མཚན་གྱི་མཐས་རྣམ་པར་བརྒྱན་པས་མཛད་པ་ཅུང་ཟད་མི་གསལ་བ་དེ། གསོལ་བ་འདེབས་པ་དག་གི་ངོར། དཔལ་ལྡན་ས་སྐྱ་པཎྜི་ཏས་གསལ་བར་བྱས་པ་ཡིན་ནོ།།

Vajrayāna Buddhism places restrictions on the reading and practice of certain texts, which are intended only for those who have received the requisite empowerments, transmissions and instructions.

If you are unsure as to whether you are entitled to read or practice a particular text please consult a qualified lineage-holder.

OK