Marpa, Mila & Gampopa Guru Yoga—Tibetan

Practices › Guru Yoga | Schools & Systems › Kagyü | Tibetan MastersSitu Pema Nyinjé Wangpo | Tibetan MastersMarpa Chökyi Lodrö | Tibetan MastersMilarepa | Tibetan Mastersསྒམ་པོ་པ་བསོད་ནམས་རིན་ཆེན།

English | བོད་ཡིག

Situ Pema Nyinjé Wangpo

Marpa, Milarepa & Gampopa

Further Information:
Download this text:

༄༅། །མར་མི་དྭགས་གསུམ་གྱི་བླ་མའི་རྣལ་འབྱོར་བཞུགས།

 

ཀྱེ་མ།   །གཟུང་འཛིན་མ་རིག་འཆིང་བའི་དྲྭ་བ་ལ།  །

འཐུམ་པའི་རང་གཞན་སེམས་ཅན་སྙིང་རེ་རྗེ།  །

ད་ནི་ངེས་དོན་སྙིང་པོའི་གསེང་ལམ་མཆོག  །

རང་བྱུང་ཡེ་ཤེས་གནས་ལ་འབད་པར་བྱ།  །

 

དངོས་ཀུན་ཆོས་རྣམས་སྟོང་ཉིད་ཆེན་པོའི་ངང་།  །

སྣང་བའི་རྩལ་ལས་མ་འགག་དཀྱིལ་འཁོར་ཤར།  །

མདུན་མཁར་ལྔ་ལྡན་འཇའ་འོད་འཐིབ་པའི་ཀློང་།  །

པད་ཉི་ཟླ་གདན་གསུམ་གསལ་དབུས་མ་ལ།   །

དགྱེས་མཛད་ཧེ་རུ་ཀ་དངོས་ལོ་ཙཱ་ཆེ།  །

ཆོས་ཀྱི་བློ་གྲོས་དགེ་བསྙེན་ཆ་ལུགས་ཅན།  །

རབ་བརྗིད་གཟི་འབར་ཟིལ་གནོན་ཕྱག་རྒྱ་མཛད།  །

 

གཡས་སུ་རྗེ་བཙུན་མི་ལ་ཐོས་པ་དགའ།  །

རས་དཀར་བླ་གོས་སེམས་ཉིད་ངལ་བསོས་ཚུལ།  །

རྡོ་རྗེའི་མགུར་དབྱངས་ཏམ་བུ་ར་བཞིན་སྒྲོག  །

 

གཡོན་དུ་ཟླ་འོད་གཞོན་ནུ་རབ་བྱུང་ཆས།  །

དབུ་ལ་སྒོམ་ཞུ་མཉམ་གཞག་ཕྱག་རྒྱ་ཅན། །

མི་རྟོག་ཏིང་འཛིན་ཟབ་མོའི་དོན་ལ་གནས། །

 

གཞན་ཡང་སྟེང་འོག་བར་མཚམས་ཐམས་ཅད་དུ། །

ཆོས་ལོངས་སྤྲུལ་དང་བཀའ་བརྒྱུད་བླ་མའི་ཚོགས།  །

ཡི་དམ་ཌཱ་ཀི་དཔའ་བོ་རྣལ་འབྱོར་མ།   །

དམ་ཅན་ཆོས་སྲུང་ལ་སོགས་སྐྱབས་གནས་རྣམས།   །

སྤྲིན་ལྟར་གཏིབ་བཞིན་རབ་ཏུ་གསལ་བར་གྱུར།  །

ཅེས་གསལ་བཏབ་ནས།

 

ཀྱེ་ཧོ།  དུས་གསུམ་རྒྱལ་ཀུན་གྱི་གོང་བུ།  །

གཅིག་བསྡུས་ཐུགས་རྗེ་ཡི་གཏེར་ཆེན།  །

བྱིན་རླབས་བུམ་བཟང་གི་བདག་ཉིད།  །

རྗེ་བཙུན་བླ་མ་རང་མཁྱེན་ནོ།  །

 

གཏན་མེད་འཁྲུལ་འབྱམས་ཀྱི་སེམས་ཅན།  །

ཆོས་མེད་དྲེད་པོ་ལ་གཟིགས་དང་།  །

ངན་སོང་འཁོར་བ་ཡི་འདམ་ལས།  །

ནུས་མཐུའི་ལྕགས་ཀྱུ་ཡིས་དྲོངས་ཤིག  །

 

བདག་སོགས་མཁའ་མཉམ་གྱི་འགྲོ་བ།   །

སྐྱབས་མེད་མགོན་བྲལ་ལ་དགོངས་མཛོད།

བདེ་ཆེན་ཐར་མཆོག་གི་ཞིང་དུ།  །

མྱུར་དུ་འདྲེན་པ་རང་བྱིན་རློབས།  །

ཅེས་གསོལ་འདེབས་རྒྱངས་འབོད་ཚུལ་དུ་ཚར་ཁ་ཤས་དང་།   མཐར།

སྣང་སྲིད་བླ་མའི་དཀྱིལ་འཁོར་དེ་ཐམས་ཅད།   །

འོད་ཞུ་གཙོར་ཐིམ་དེ་ཡང་རང་ལ་ཐིམ།

 

བླ་མ་རང་སེམས་དབྱེར་མེད་གཉུག་མའི་ངང་།   །

མ་བཅོས་སྤྲོས་པ་ཀུན་བྲལ་ཀློང་དུ་བཞག  །

 

མཐར་དགེ་བསྔོ་སོགས་བྱའོ།  །

 

ཅེས་པའང་སི་ཏུ་པས།  དད་དམ་ལྡན་པ་བུ་སློབ་དར་རྒྱས་ངོར་སྤེལ་བ་དགེའོ།   །