༁ྂ༔ ཌཱཀྐིའི་མན་ངག་གབ་ཏིག༔

༁ྂ༔ ཌཱཀྐིའི་མན་ངག་གབ་ཏིག་བཞུགས༔

༁ྂ༔ མཁའ་འགྲོའི་བྱེ་བྲག་བསམ་ཡས་རྣམས༔ རྡོ་རྗེ་ཕག་མོ་མཚོ་རྒྱལ་གྱི༔ ངོ་བོར་དྲིལ་ཏེ་སྒོམ་སྒྲུབ་བྱ༔

བཅོམ་ལྡན་རྡོ་རྗེ་ཕག་མོ་དང་༔

བདེ་ཆེན་མཚོ་རྒྱལ་ཞབས་པད་ལ༔

སྙིང་ནས་གུས་བཏུད་སྐྱབས་སུ་གཟུང་༔

རྣམ་གྲོལ་བྱང་ཆུབ་སེམས་མཆོག་བསྐྱེད༔

སྣང་སྲིད་སྣོད་བཅུད་ཐམས་ཅད་ཀུན༔

བདེ་སྟོང་དག་པ་ཆེན་པོའི་ཞིང་༔

ཕྱི་ནང་གསང་མཆོད་བླ་མེད་པ༔

མ་བཀོད་རང་ཤར་ལྷུན་གྱིས་གྲུབ༔

རང་སྣང་ཞིང་མཆོག་ཉམས་དགའི་དབུས༔

ཆུ་སྐྱེས་གེ་སར་ཉི་ཟླའི་སྟེང་༔

བདག་ཉིད་མཚོ་རྒྱལ་དཀར་དམར་མཛེས༔

ཞི་འཛུམ་གཞོན་ཚུལ་བདེ་བ་རྒྱས༔

གཅེར་མོ་རིན་ཆེན་རུས་རྒྱན་ཅན༔

གཡས་བསྐུམ་གཡོན་བརྐྱང་གར་གྱིས་བཞེངས༔

གུ་རུ་བདེ་ཆེན་རོལ་པའི་སྐུ༔

གསེར་གྱི་རྡོ་རྗེ་རྩེ་ལྔའི་ཚུལ༔

གཡས་ཀྱི་ཕྱག་གིས་ཐུགས་ཀར་འཛིན༔

ཚེ་འཛིན་ལྷ་ལྕམ་མནྡ་ར༔

ཚེ་བུམ་རྣམ་པ་གཡོན་ན་བསྣམས༔

དབུ་སྐྲ་མཐོན་མཐིང་ཐོར་ཚུགས་བཅིང་༔

ལྷག་མ་སྐུ་རྒྱབ་སིལ་བུར་འཕྱངས༔

རང་མདངས་འཇའ་འོད་གུར་ཁྱིམ་ཀློང་༔

ཡེ་ཤེས་འོད་སྐུར་ལྷང་ངེར་གསལ༔

ཙིཏྟ་རིན་ཆེན་འོད་འབར་དབུས༔

པད་ཉི་བམ་རོ་བརྩེགས་པའི་སྟེང་༔

རྡོ་རྗེ་ཕག་མོ་རཱ་གའི་མདོག༔

ཁྲོ་འཛུམ་སྤྱན་གསུམ་བདེ་བའི་ཉམས༔

རྣ་ལྟག་གཡས་སུ་ཕག་ཞལ་ངུར༔

གྲི་ཐོད་འཛིན་ཅིང་བརྐྱང་བསྐུམ་བཞེངས༔

ལྷན་སྐྱེས་བདེ་ཆེན་དག་པའི་སྐུ༔

དམ་ཡེ་གཉིས་སུ་མེད་པར་བསྒོམ༔

རང་བྱུང་བྷནྡྷའི་སྣོད་ཡངས་སུ༔

ཤ་ལྔ་བདུད་རྩི་ཆེན་པོ་ལྔ༔

སེམས་ཀྱི་ཡིད་བཞིན་སྤྲིན་ཚོགས་གཏིབས༔

མི་ཟད་རྒྱན་གྱི་འཁོར་ལོར་གྱུར༔

སྐུ་གསུམ་རབ་འབྱམས་ཞིང་རྣམས་དང་༔

གནས་ཡུལ་དུར་ཁྲོད་མཁའ་སྤྱོད་ནས༔

རྩ་གསུམ་དཔའ་བོ་མཁའ་འགྲོའི་ཚོགས༔

བདེ་བའི་གར་གྱིས་འདིར་བྱོན་འཚལ༔

ཟག་མེད་འདོད་འབྱུང་ལོངས་སྤྱོད་བཞེས༔

ཀུན་ཀྱང་བདེ་བའི་ངོ་བོར་ཞུ༔

རང་ལ་ཐིམ་པས་རྡོ་རྗེའི་སྐུ༔

མི་འགྱུར་བདེ་བ་ཆེན་པོའི་དངོས༔

རྒྱལ་བ་ཀུན་དང་རོ་གཅིག་པའི༔

ཡེ་ཤེས་ལྷུན་གྱིས་གྲུབ་པར་གྱུར༔

ཨོཾ་པདྨོ་ཡོ་གི་ནི་གུཧྱ་ཛྙཱ་ན་བཛྲ་ཝ་ར་ཧི་མ་ཧཱ་སུ་ཁ་སརྦ་སིདྡྷི་ཧཱུྃ༔

དེ་ཡིས་ཡེ་ཤེས་མཁའ་འགྲོ་མ༔ མྱུར་དུ་འགྲུབ་ངེས་ས་མ་ཡ༔