ཟབ་ལམ་སྤྱི་ཡི་སྔོན་འགྲོ་རིག་འཛིན་མྱུར་ལམ་བཞུགས་སོ༔
༁ྃཿ ཟབ་ལམ་སྤྱི་ཡི་སྔོན་འགྲོ་རིག་འཛིན་མྱུར་ལམ་བཞུགས་སོ༔
རྩ་བ་གསུམ་ལ་ཕྱག་འཚལ་ལོ༔
ཕྱི་རབས་སྐལ་ལྡན་དོན་ཕྱིར་དུ༔
ཟབ་ལམ་ཀུན་གྱི་སྔོན་འགྲོའི་ཆོས༔
ཉམསལེན་པདྨ་བདག་གིས་བཀོད༔
དབེན་པའི་ས་ཕྱོགས་ཉམས་དགའ་རུ༔
སྒོ་གསུམ་བག་ཕེབས་བདེ་བར་འདུག༔
དང་པོ་མི་རྟག་འཆི་བ་བསྒོམ༔
ཚེ་སྲོག་འདུས་བྱས་ཆུ་བུར་འདྲ༔
སྒྱུ་མའི་ལུས་ཀྱིས་རྐྱེན་མི་བཟོད༔
མ་ཤི་ཚེ་ཐར་སུ་ཡང་མེད༔
དེ་ཕྱིར་རང་ཡང་འཆི་བར་ངེས༔
ཚེ་ལ་ངེས་མེད་འཆི་བའི་རྐྱེན༔
ནམ་འོང་མི་ཤེས་དུས་མི་ཐེབས༔
ནམ་འཆི་ངེས་པ་ཅུད་ཟད་མེད༔
རང་དང་གཞན་དང་དགེ་བའི་ཐབས༔
གང་གིས་འཆི་བ་བཟློག་མི་ནུས༔
གྲོགས་མེད་ལག་སྟོང་ཕ་རོལ་འགྲོ༔
འདུས་པ་འབྲལ་ཞིང་བསགས་པ་ཟད༔
བརྩིགས་པ་ཞིག་ཅིང་མཐོ་རྣམས་ལྷུང་༔
འདི་སྣང་མདང་གི་རྨི་་ལམ་འདྲ༔
གནས་སྐབས་ཡུད་ཙམ་ཚེ་འདི་ལ༔
དགྲ་དང་འཕྲད་ཅིང་གཉེན་དང་བྲལ༔
འདོད་པ་ཐོག་ཏུ་མི་འགྲོ་ཞིང༔
མི་འདོད་སྣ་ཚོགས་ཐོག་ཏུ་འབབ༔
རྒ་དང་ན་དང་འཆི་བས་གདུང་༔
མི་ཡི་སྡུག་བསྔལ་འདི་འདྲ་ན༔
ངན་སོང་སྡུག་བསྔལ་ག་ལ་བཟོད༔
མི་དགེ་ཚེ་འདིའི་ཞེན་པ་སྤངས༔
ངེས་འབྱུང་བསམ་པས་དགེ་ལ་འབད༔
ཕྱི་བཤོལ་ལེ་ལོ་མེད་པར་བྱ༔
དེ་ནས་བླ་མ་རྡོ་རྗེ་སེམས༔
ཡུམ་བཅས་རང་གི་སྤྱི་བོར་བསྒོམ༔
རིགས་ཀུན་ཁྱབ་བདག་རྡོ་རྗེ་སེམས༔
དཀོན་མཆོག་གསུམ་གྱི་ངོ་བོ་ལ༔
བདག་གཞན་འགྲོ་དྲུག་སེམས་ཅན་རྣམས༔
བྱང་ཆུབ་བར་དུ་སྐྱབས་སུ་མཆི༔
རྒྱལ་བ་སྲས་བཅས་ཐམས་ཅད་ཀྱིས༔
བྱང་ཆུབ་མཆོག་ཏུ་ཐུགས་བསྐྱེད་ལྟར༔
བདག་གིས་བྱང་ཆུབ་སེམས་བསྐྱེད་ནས༔
ཕར་ཕྱིན་དྲུག་ལ་བསླབ་པར་བགྱི༔
བདག་ལུས་ལོངས་སྤྱོད་དགེ་རྩ་བཅས༔
མཎྜལ་གཅིག་ཏུ་རབ་བཀོད་དེ༔
ཀུན་བཟང་མཆོད་པའི་སྤྲིན་ལྟ་བུ༔
རྒྱལ་བ་སྲས་དང་བཅས་ལ་འབུལ༔
ཕྱོགས་དུས་སངས་རྒྱས་འདུས་པའི་དཔལ༔
བླ་མ་རྡོ་རྗེ་སེམས་དཔའ་ལ༔
གསོལ་བ་འདེབས་སོ་བྱིན་གྱིས་རློབས༔
ལས་ངན་སྡིག་སྒྲིབ་དག་པ་དང་༔
རྐྱེན་ངན་གྲོགས་སུ་འཆར་བ་དང་༔
ཉམས་རྟོགས་ཡེ་ཤེས་འཕེལ་བ་དང་༔
རང་གཞན་དོན་གཉིས་འགྲུབ་པ་རུ༔
ད་ལྟ་ཉིད་དུ་བྱིན་གྱིས་རློབས༔
མྱུར་བ་ཉིད་དུ་བྱིན་གྱིས་རློབས༔
བླ་མ་ཡབ་ཡུམ་སྦྱོར་མཚམས་ནས༔
བདུད་རྩི་འོ་རྒྱུན་ལྟ་བུ་བྱུང་༔
བདག་ལུས་ནད་གདོན་སྡིག་སྒྲིབ་བཀྲུས༔
ལུས་གང་བདེ་སྟོང་ཡེ་ཤེས་རྒྱས༔
དབང་དང་དངོས་གྲུབ་ཀུན་ཐོབ་བསམ༔
ཡི་གེ་བརྒྱ་པ་ཡང་ཡང་བཟླས༔
མཐར་ནི་གནས་གསུམ་འོད་ཟེར་གྱི༔
དབང་བླང་བླ་མ་རང་ལ་བསྡུ༔
རང་ཉིད་ལྷར་གསལ་འབྲུ་གཅིག་བཟླ༔
སྐྱེ་མེད་གནས་ལུགས་ངང་ལ་བཞག༔
སྒྲིབ་དག་བྱིན་རླབས་ཞུགས་པར་གྱུར༔
སྐབས་སུ་རང་སེམས་ཧྲཱིཿདམར་པོ༔
ཕཊ་ཅེས་སྦྱི་བོའི་གཙུག་ནས་བཏོན༔
བདེ་ཆེན་ཞིང་དུ་སོང་བར་བསྒོམ༔
མྱུར་ལམ་འཕོ་བའི་མཐར་ཐུག་ཡིན༔
འདི་འཕྲད་ཉམས་སུ་ལེན་པ་རྣམས༔
མྱུར་དུ་རིག་འཛིན་ས་ཐོབ་འགྱུར༔
ས་མ་ཡཿ རྒྱ་རྒྱ་རྒྱ༔
ལས་རབ་གླིང་པས་ཕ་ཝང་གསར་གདུགས་ཅན་ནས་བཏོན་པའི་ཤོག་སེར་ལས་དག་པར་ཕབ་པའོ།། །།
བླ་མའི་གནས་གསུམ་ཨོཾ་དཀར་ཨཱཿདམར་དང་། །
ཧཱུཾ་སྔོན་འོད་ཟེར་རིམ་དང་ཅིག་ཅར་བྱུང་། །
རང་གི་གནས་གསུམ་ཞུགས་པས་དབང་བཞི་ཐོབ། །
སྒྲིབ་བཞི་དག་ཅིང་ལམ་བཞི་བསྒོམ་ལ་དབང་། །
སྐུ་བཞིའི་གོ་འཕང་མྱུར་དུ་མངོན་གྱུར་བསམ། །
བླ་མ་ཡབ་ཡུམ་རང་ལ་གཉིས་མེད་ཐིམ། །
རང་ཉིད་རྡོར་སེམས་ཡབ་ཡུམ་དངོས་སུ་གྱུར། །
ཨ་ཨ་ཨཱཿ །
འདི་ཡང་ལས་རབ་གླིང་པས་བྲིས།། །།
