Gesar Sādhana—Tibetan

༄༅། །གེ་སར་སྐྱེས་བུ་དོན་འགྲུབ་ཀྱི་སྒྲུབ་ཐབས་གྲུབ་གཉིས་དཔྱིད་སྟེར་ལས་བཞི་ལྷུན་གྲུབ་ཅེས་བྱ་བ་བཞུགས་སོ། །

 

ན་མོ་པདྨ་བཛྲ་ཡེ། །

དཔལ་ལྡན་སངས་རྒྱས་པདྨ་སྐྱེས། །
ཀུན་མཁྱེན་ཡེ་ཤེས་མཛོད་འཛིན་པ། །
རྒྱལ་པོ་སྒྱུ་འཕྲུལ་ཆེ་བའི་མཆོག །
བླ་མ་གེ་སར་རྒྱལ་ལ་འདུད། །

དེ་ཡང་སྤྲུལ་པའི་གཏེར་སྟོན་འགྲོ་འདུལ་མཆོག་གྱུར་བདེ་ཆེན་གླིང་པའི་དགོངས་པའི་ཀློང་ནས་བརྡོལ་བའི་གེ་སར་སྐྱེས་བུའི་སྒྲུབ་ཐབས་འདི་ཉིད་ཉམས་སུ་ལེན་པར་འདོད་པས། གནས་དབེན་པར་སྒྲུབ་རྟེན་སྐུ་གསུང་ཐུགས་རྟེན་སྤྱི་དང་བྱེ་བྲག །གཏོར་མ་རིན་ཆེན་འབར་བ། སྨན་རཀ ཉེར་སྤྱོད་སོགས་འདོད་ཡོན་སྣ་ཚོགས་ཀྱི་མཆོད་པ་བཅས་དང་། གཤམ་གྱི་བྱ་བ་རྣམས་སོ་སོའི་མོས་པ་ལྟར་འདོར་ལེན་ནམ། ཁྱབ་གཞིས་གང་བྱེད་ཀྱི་ཡོ་བྱད་བདོགས་ལ།

 

ན་མོ༔ བདག་དང་མཁའ་མཉམ་སེམས་ཅན་མ་ལུས་ཀུན༔

སྐྱབས་ཀྱི་མཆོག་གྱུར་རྣམས་ལ་སྐྱབས་སུ་མཆི༔

སྨོན་དང་འཇུག་པའི་བྱང་ཆུབ་སེམས་བསྐྱེད་ནས༔

སྐུ་གསུམ་བླ་མའི་གོ་འཕང་བསྒྲུབ་པར་བགྱི༔

ཞེས་སྐྱབས་སུ་འགྲོ་ཞིང་སེམས་བསྐྱེད།

 

ཧཱུྃ༔ སྟོང་ཉིད་དབྱིངས་ལས་ཡེ་ཤེས་ཀུན་ཏུ་སྣང་༔

རྒྱུ་ཡི་ཏིང་འཛིན་ཧྲཱིཿལས་འོད་འཕྲོས་པས༔

སྣང་སྲིད་ཐམས་ཅད་པདྨ་དྲྭ་བའི་ཞིང་༔

ངོ་མཚར་བཀོད་པ་བསམ་ཡས་དཀྱིལ་འཁོར་དབུས༔

 

རིན་ཆེན་སེང་ཁྲི་པདྨ་ཉི་ཟླའི་སྟེང་༔

ཧྲཱིཿཡིག་ཡོངས་གྱུར་བདག་ཉིད་སྐད་ཅིག་གིས༔

མ་ཧཱ་གུ་རུ་ཨོ་རྒྱན་ཐོད་ཕྲེང་རྩལ༔

སྣང་སྲིད་ཟིལ་གནོན་དཀར་དམར་ཞི་ཁྲོའི་ཉམས༔

 

ཕྱག་གཡས་རྡོ་རྗེ་རྩེ་ལྔ་མཁའ་ལ་འཕྱར༔

གཡོན་པས་མཉམ་གཞག་བདེ་སྐྱོང་ཚེ་བུམ་བསྣམས༔

གསང་ཡུམ་སྦས་ཚུལ་ཁ་ཊྭཱྃ་གཡོན་ནས་འཁྲིལ༔

པད་ཞྭ་གསང་ཕོད་ཆོས་གོས་ཟ་བེར་གསོལ༔

 

ཞབས་གཉིས་རོལ་སྟབས་འཇའ་ཟེར་ཀློང་ན་འགྱིང་༔

སྤྱི་བོར་ལོངས་སྐུ་སྤྱན་རས་གཟིགས་དབང་དང་༔

རིགས་ཀྱི་བདག་པོ་ཚེ་དཔག་མེད་མགོན་བཞུགས༔

སྟེང་འོག་ཕྱོགས་མཚམས་རྣམ་འཕྲུལ་བཅུ་གཉིས་དང་༔

 

རྩ་གསུམ་ཆོས་སྲུང་རྒྱ་མཚོ་སྤྲིན་ལྟར་གཏིབས༔

དམ་ཡེ་དབྱེར་མེད་གདོད་ནས་ལྷུན་གྲུབ་པའི༔

རིགས་བདག་ཐུགས་ཀའི་ཧྲཱིཿལས་འོད་འཕྲོས་པས༔

སྲིད་ཞིའི་ཚེ་བཅུད་ཀུན་འདུས་རང་ལ་ཐིམ༔

 

འཕགས་མཆོག་འགྲོ་འདུལ་ཐུགས་རྗེའི་ཆོ་འཕྲུལ་གྱིས༔

རིགས་དྲུག་འགྲོ་བའི་སྡུག་བསྔལ་རྒྱུ་བཅས་སྦྱངས༔

རང་ཉིད་རིགས་འདུས་བླ་མའི་ཐུགས་ཀ་རུ༔

གསེར་གྱི་རྡོ་རྗེའི་ལྟེ་བར་ཧྲཱིཿཡིག་མཐར༔

 

སྔགས་ཀྱི་ཕྲེང་བས་བསྐོར་ལས་འོད་ཟེར་འཕྲོས༔

འཕགས་པ་མཆོད་ཅིང་སེམས་ཅན་དོན་ཀུན་བྱས༔

ཕྱི་སྣོད་དག་པ་རབ་འབྱམས་འོག་མིན་ཞིང་༔

ནང་བཅུད་སྣང་སྲིད་གཞིར་བཞེངས་ཕྱག་རྒྱའི་ལྷ༔

 

སྒྲར་གྲགས་སྔགས་ལ་དྲན་རྟོག་འོད་གསལ་དབྱིངས༔

ཐུན་མོང་ལས་བཞིའི་ཕྲིན་ལས་ལྷུན་གྱིས་གྲུབ༔

མཆོག་ཏུ་མི་འགྱུར་བདེ་ཆེན་རྡོ་རྗེའི་ངང་༔

འཆི་མེད་སྐུ་གསུམ་གོ་འཕང་ཐོབ་པར་བསམ༔

ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔

ཞེས་རང་ཉིད་གུ་རུ་པདྨར་བསྒོམ་ལ་བཟླས་པ་བསྡུ་ལྡང་བཅས་བྱ།

 

ཨོཾ་སྭ་བྷཱ་ཝ་ཤུདྡྷ་སརྦ་དྷརྨཿསྭ་བྷཱ་ཝ་ཤུདྡྷོ་ཧཾ།

ཐམས་ཅད་སྟོང་ཉིད་ནམ་མཁའི་ངང་༔

བྷྲཱུྃ་ལས་རིན་ཆེན་སྣོད་ནང་དུ༔

ཨོཾ་ལས་ཕྱི་ནང་མཆོད་པའི་ཚོགས༔

སོ་སོའི་ལྷ་མོའི་རོལ་པར་བཅས༔

རབ་འབྱམས་ནམ་མཁའ་གང་བར་གྱུར༔

ཨོཾ་བཛྲ་ཨརྒྷཾ་པཱདྱཾ་པུཥྤེ་དྷཱུཔེ་ཨཱ་ལོ་ཀེ་གནྡྷེ་ནཻ་ཝ་དྱ་ཤཔྟ་ཨཱཿཧཱུྃ༔གིས་སྦྱང་སྤེལ་བསྒྱུར་གསུམ་བྱ།

 

གཏོར་གཞོང་རཏྣའི་སྣོད་ནང་དུ༔

གཏོར་མ་འདོད་ཡོན་ཕུང་པོར་གྱུར༔

ཨོཾ་ཨཱཿཧཱུྃ༔

ལན་གསུམ།

བྷཉྫ་འབར་བའི་སྣོད་ཡོངས་སུ༔

ཤ་ལྔ་བདུད་རྩིར་འོད་དུ་ཞུ༔

ཨོཾ་ཨཱཿཧཱུྃ༔

ལན་གསུམ།

གྲུ་གསུམ་བྷནྡྷའི་སྣོད་ནང་དུ༔

བསྟན་དགྲ་བསྒྲལ་བའི་ཁྲག་མཚོ་འཁྱིལ༔

ཨོཾ་ཨཱཿཧཱུྃ༔

ལན་གསུམ།

 

དངོས་གཞི་རྟེན་བསྐྱེད་ཅིང་བསྐུར་བརླབ་ནི།

མདུན་དུ་རིན་ཆེན་ཞལ་ཡས་ཁང་༔

བཀོད་ལེགས་ཉམས་དགའི་ནང་དབུས་སུ༔

ཆེ་མཐོ་རིན་ཆེན་ཁྲི་ཡི་སྟེང་༔

ཧཱུྃ་ལས་སྐྱེས་མཆོག་རིག་པ་འཛིན༔

སེང་ཆེན་ནོར་བུ་དགྲ་འདུལ་ནི༔

སྐུ་མདོག་དཀར་ལ་དམར་བའི་མདངས༔

དབུ་ལ་རིན་ཆེན་པྲོག་ཞུ་མཛེས༔

སྐུ་ལ་ཟ་འོག་བེར་ཆེན་གསོལ༔

ཕྱག་གཡས་གསེར་གྱི་འཁོར་ལོ་བསྣམས༔

གཡོན་པས་ཡིད་བཞིན་ནོར་བུ་འཛིན༔

ཕྱོགས་བཞི་བློན་པོ་རིན་ཆེན་བཞི༔

མཚམས་བཞིར་བཙུན་མོ་རིན་ཆེན་དང་༔

རྟ་མཆོག་རྐྱང་རྒོད་གླང་པོ་ཆེ༔

དམག་དཔོན་འདན་མ་བྱང་ཁྲ་སོགས༔

དགྲ་བླ་བཅུ་གསུམ་དཔའ་ཐུལ་དང་༔

ཡང་ཐུལ་འཁོར་ཚོགས་རྒྱ་མཚོས་བསྐོར༔

སྐུ་གསུང་ཐུགས་དང་ཡེ་ཤེས་ལྔ༔

བྱིན་རླབས་དབང་བསྐུར་རྫོགས་པར་བསྐྱེད༔

ཨོཾ་ཨཱཿཧཱུྃ༔ ཨོཾ་ཧཱུྃ་ཏྲཱྃ་ཧྲཱིཿཨཱཿ ཨ་བྷི་ཥིཉྩ་ཧཱུྃ༔

 

རང་གི་སྙིང་གནས་འོད་ཟེར་འཕྲོས་པས་སྐུ་གསུང་དབང་དྲག་འབར་བའི་ཞིང་ནས་རིག་འཛིན་དགྲ་བླའི་རྒྱལ་པོ་འཁོར་དང་བཅས་པ་བཛྲ་ས་མཱ་ཛཿ

 

སྤོས་རོལ་དབྱངས་དང་བཅས་པས།

ཧཱུྃ་ཧྲཱི༔ མཁའ་སྤྱོད་དག་པའི་ཞིང་ཁམས་ནས༔

རིག་འཛིན་ཐམས་ཅད་སྐུར་བཞེངས་ཤིག༔

དགྲ་ལྷའི་ཚུལ་དུ་སྤྱན་འདྲེན་ན༔

ཐུགས་དམ་བཞིན་དུ་གཤེགས་སུ་གསོལ༔

བཛྲ་ས་མཱ་ཡ་ཛཿ

སྤྱན་དྲངས་པ་ཉིད་ཛ་ཧཱུྃ་བྃ་ཧོཿས་གཉིས་མེད་དུ་བསྟིམ།

 

རང་སྣང་དག་པའི་གཞལ་ཡས་དབུས། །

རིན་ཆེན་ཁྲི་ལ་བཞུགས་སུ་གསོལ། །

ཏིཥྛ་ལྷན༔

 

རང་རིག་ཡེ་ཤེས་དབྱེར་མེད་ལྷ། །

དགྲ་ལྷའི་རྒྱལ་པོར་གུས་ཕྱག་འཚལ། །

ཨ་ཏི་པཱུ་ཧོཿ པྲ་ཏཱིཙྪ་ཧོཿ

 

རང་གི་ཐུགས་ཀ་ནས་མཆོད་པའི་ལྷ་མོ་སྤྲོས་ཏེ།

ཧཱུྃ༔ ལྷ་མིའི་ལོངས་སྤྱོད་བསམ་ལས་འདས༔

ཕྱི་ཡི་མཆོད་པ་སྣ་ཚོགས་འབུལ༔

ཡེ་ཤེས་ལྔ་ལྡན་བདུད་རྩིའི་བཅུད༔

དཔའ་བོ་དགྱེས་པ་སྐྱེད་ཕྱིར་འབུལ༔

དམ་ཉམས་དགྲ་བོའི་དམར་ཆེན་པོ༔

གདུགས་པ་འདུལ་ཕྱིར་བཞེས་སུ་གསོལ༔

འདོད་ཡོན་གཏོར་མའི་ལོངས་སྤྱོད་འདི༔

འབུལ་ལོ་ཐུགས་དམ་བསྐང་གྱུར་ཅིག༔

ཐབས་ཤེས་སྦྱོར་བ་བདེ་བའི་མཆོག༔

གཟུང་འཛིན་དགྲ་བགེགས་བསྒྲལ་བས་མཆོད༔

ཨོཾ་བཛྲ་ཨརྒྷཾ་པཱདྱཾ་པུཥྤེ་དྷཱུཔེ་ཨཱ་ལོ་ཀེ་གནྡྷེ་ནཻ་ཝ་དྱ་ཤཔྟ་མ་ཧཱ་པཉྩ་ཨ་མྲྀ་ཏ་རཀྟ་བ་ལིངྟ་གུ་ཧྱ་སརྦ་པཱུ་ཛ་ཧོཿ

 

ལྷ་ཚོགས་ཡོན་ཏན་རྗེས་སུ་དྲན་པས།

ཧཱུྃ༔ ཆོས་ཀྱི་དབྱིངས་ལས་ལོངས་སྤྱོད་རྫོགས་པའི་སྐུ༔

སྤྲུལ་པའི་སྐུ་མཆོག་པདྨ་ཐོད་ཕྲེང་གི༔

རྣམ་རོལ་རིག་འཛིན་དྲག་པོའི་ཚུལ་འཛིན་པ༔

གེ་སར་རྒྱལ་པོ་ཁྱོད་ལ་ཕྱག་འཚལ་བསྟོད༔

 

རང་དོན་མངོན་གྱུར་འོད་གསལ་ཐུགས་ལས་འཁྲུང་༔

གཞན་དོན་སྨོན་ལམ་དབང་གིས་གཏེར་སྒོ་འབྱེད༔

བསྟན་པ་སྲུང་ཕྱིར་བདུད་དགྲ་ཆམ་ལ་ཕབ༔

ནོར་བུ་དགྲ་འདུལ་ཁྱོད་ལ་ཕྱག་འཚལ་བསྟོད༔

 

ཞི་རྒྱས་དབང་དྲག་ཆ་ལུགས་མ་ངེས་ཀྱང་༔

ཁམས་གསུམ་དབང་སྡུད་སྐུ་མདོག་དཀར་ལ་དམར༔

ལོངས་སྤྱོད་སྤེལ་ཕྱིར་འཁོར་ལོ་བསྒྱུར་བའི་ཆས༔

སང་ཆེན་རྒྱལ་པོ་ཁྱོད་ལ་ཕྱག་འཚལ་བསྟོད༔

 

ཕྲིན་ལས་བཞི་ཡིས་ཀུན་ལ་དབང་བསྒྱུར་ཕྱིར༔

གསེར་གྱི་འཁོར་ལོ་རྩིབས་སྟོང་གཡས་ན་བསྣམས༔

དགོས་འདོད་ཡིད་བཞིན་བསམ་འཕེལ་གཡོན་ན་འཛིན༔

དངོས་གྲུབ་ཀུན་སྩོལ་ཁྱོད་ལ་ཕྱག་འཚལ་བསྟོད༔

 

དཔའ་ཞིང་བརྟུལ་ཕོད་བློན་པོ་རིན་ཆེན་བཞི༔

མཛང་ལ་མཛེས་པ་མཚན་ལྡན་བཙུན་མོའི་ཚོགས༔

རྟ་མཆོག་རྩལ་ལྡན་གླང་པོ་དམག་དཔོན་སོགས༔

འཁོར་ཚོགས་རྒྱ་མཚོའི་ཚོགས་ལ་ཕྱག་འཚལ་བསྟོད༔

 

བསྙེན་དམིགས་ནི།

ཐུགས་ཀར་ཉི་སྟེང་ཧཱུྃ་ལ་སྔགས་ཕྲེང་བསྐོར༔

འོད་འཕྲོས་རྒྱལ་བ་མཆོད་ཅིང་བྱིན་རླབས་བསྡུས༔

ལས་བཞིའི་ཕྲིན་ལས་ཐམས་ཅད་ལྷུན་གྱིས་གྲུབ༔

འགྲོ་བའི་སྒྲིབ་སྦྱངས་ཐམས་ཅད་ལྷ་རུ་གྱུར༔

ཨོཾ་བཱི་དྱ་དྷ་ར་མ་ཎི་ཤ་ཏྲུྃ་དཱ་མ་ཀ་ཧཱུྃ་ཕཊ༔

ཞེས་རྩ་བའི་སྔགས་འདི་གཅིག་དང་དུ་མ་ཡོངས་གྲོལ་གྱི་ངང་ནས་བཟླས་པ་ཆུ་བོའི་རྒྱུན་བཞིན་དུ་བྱ།

 

ནོར་སྒྲུབ་ཀྱི་སྐབས། ཐོད་པ་མཚན་ལྡན་ནམ་གཡང་རྫས་སྣ་ཚོགས་བཤམས་ལ།

བདག་བསྐྱེད་ཐུགས་ཀའི་འོད་ཟེར་གྱིས་མདུན་བསྐྱེད་ལྷ་ཡི་ཐུགས་རྒྱུད་བསྐུལ་བས་འོད་ཟེར་བསམ་གྱིས་མི་ཁྱབ་པ་འཕྲོས། སྟོང་གསུམ་འཇིག་རྟེན་རབ་འབྱམས་ཀྱི་དཔལ་དང་ལོངས་སྤྱོད་ཐམས་ཅད་བསྡུས་ཏེ་དངོས་གྲུབ་འདོད་རྒུ་ཆར་བཞིན་དུ་འབེབས་པར་བསམ་པ།

ཨོཾ་བཱིདྱ་དྷ་ར་མ་ཎི་ཤ་ཏྲུཾ་བཱ་སུ་སིདྡྷི་ཧཱུྃ༔

ཅེས་བཟླས་ལ་མདའ་དར་གཡབ་ཅིང་།

 

ཧཱུྃ༔ བཀྲ་ཤིས་དཔལ་དང་ལྡན་པའི་ཞིང་ཁམས་འདིར༔

འདོད་རྒུ་ལྷུན་གྱིས་གྲུབ་པའི་གཞལ་ཡས་ཁང་༔

བསོད་ནམས་སྟོབས་ལྡན་རྒྱལ་བའི་ཕྲིན་ལས་པ༔

རིག་འཛིན་ནོར་བུ་དགྲ་འདུལ་འཁོར་དང་བཅས༔

ལོངས་སྤྱོད་ཕྱྭ་གཡང་འགུགས་པའི་དུས་ལ་བབ༔

རྒྱལ་བ་སྲས་བཅས་མཁྱེན་བརྩེའི་ཡེ་ཤེས་དང་༔

རིག་འཛིན་རྣམས་ཀྱི་བྱིན་རླབས་ཕྱྭ་གཡང་ཁུག༔

ས་ཆུ་མེ་རླུང་ཕྱི་སྣོད་འབྱུང་བའི་བཅུད༔

ནང་བཅུད་ལྷ་མིའི་ཚེ་བསོད་ཕྱྭ་གཡང་ཁུག༔

རྒྱ་གར་ཆོས་དང་རྒྱ་ནག་ཁྲིམས་ཀྱི་གཡང་༔

ཏ་ཟིག་ནོར་དང་གེ་སར་རྩལ་གཡང་ཁུག༔

གསེར་དངུལ་རིན་ཆེན་དར་ཟབ་སྨན་དང་འབྲུ༔

ཟས་ནོར་ལོངས་སྤྱོད་རྣམས་ཀྱི་ཕྱྭ་གཡང་ཁུག༔

རྟ་དྲིལ་ནོར་ལུག་ར་ལ་སོགས་པ་ཡི༔

རྐང་བཞི་ནོར་གྱི་ཕྱྭ་གཡང་ཐམས་ཅད་ཁུག༔

མི་ལ་ཚེ་དང་གོས་མདངས་ཟས་ཀྱི་བཅུད༔

འབྲུ་དོན་འཕེལ་བའི་ཕྱྭ་གཡང་རྒྱུས་མཛད་གསོལ༔

ཁུ་ཡེ་པུཥྚིཾ་ཀུ་རུ་སརྦ་སིདྡྷི་ཏིཥྛ་ཧཱུྃ༔

ཞེས་རྟེན་ལ་བསྟིམ་མོ། །

 

བསངས་ཀྱི་མཆོད་པ་བྱ་བར་སྤྲོ་ན་རིན་ཆེན་འབྲུ་སྨན་དར་ཟབ་སོགས་ཕྱེ་ཕུར་ལ་སྦྱར་བ་བཟང་ཞིང་མི་མེ་ལ་བསྲེག་གཞན་ཡང་ཕུད་སྣ་ཚོགས་བཏེག་ལ་ཚབ་གཙང་གིས་བྲན།

རྃ་ཡྃ་ཁྃ་གིས་བསངས་སྦྱངས།

བསང་རྫས་མཆོད་པའི་སྤྲིན་ཕུང་ཀུན་ཏུ་བཟང་པོའི་རྣམ་རོལ་འདོད་ཡོན་མི་ཟད་པ་འཆར་བའི་རང་བཞིན་དུ་གྱུར།

ཨོཾ་ཨཱཿཧཱུྃ༔

ལན་གསུམ་གྱིས་བརླབ།

ཀྱཻ༔ འཛམ་གླིང་གངས་ཅན་བོད་ཀྱི་ལྗོངས༔

ཡུལ་ལ་གཡང་ཆགས་ཤར་ཟླ་སྒང་༔

སྐྱིད་སོས་ཡག་པའི་སུམ་མདོ་ལ༔

དགྲ་ལྷ་སྐུ་གཅིག་སྐྱེས་པ་ནི༔

གེ་སར་སྐྱེས་བུ་དོན་གྲུབ་ཞེས༔

མཚན་དཀར་བ་དན་སྲིད་རྩེར་བསྒྲེང་༔

དབུ་ནག་བོད་ཀྱི་རྒྱལ་པོར་བསྐོས༔

ཀུན་ལ་མཚར་བའི་འབྲུག་མོ་སྨན༔

བཙུན་མོར་འོས་པ་ཁབ་ཏུ་བཞེས༔

མཆེད་གཅིག་རྒྱ་ཚ་ཞལ་དཀར་དེ༔

དགྲ་ལྷ་དེ་ཡི་དཔུང་གྲོགས་མཛོད༔

དཔའ་རྒོད་འདན་མ་བྱང་ཁྲ་སོགས༔

རྒྱལ་པོ་དེ་ཡི་བློན་པོར་བསྐོས༔

 

ཀྱཻ༔ ཚོ་དྲུག་གླིང་རུའི་དཔོན་པོ་ལ༔

གསེར་པའི་ཉི་འབུམ་དར་ཡག་དང་༔

འོ་མ་བུའི་ཨ་ནུ་དཔལ་སེང་དང་༔

མུ་སྤྱང་རིན་ཆེན་དར་ལུ་སོགས༔

སྟོད་སྨད་བར་གསུམ་གཙོ་བོར་བརྗིད༔

སྒ་བདེ་ཆོས་སྐྱོང་བེར་ནག་སོགས༔

མཐུ་སྟོབས་རྩལ་ལྡན་སྐུ་སྲུང་མཛད༔

ནུ་བོ་རོང་ཚ་དམར་ལེབ་སོགས༔

ཕུ་ནུ་སུམ་ཅུ་འདུན་མ་གཅིག༔

འདུན་མའི་གཙོ་བོ་སྤྱི་དཔོན་རྗེ༔

གཡས་གཡོན་དབུས་གསུམ་དམག་གི་རུ༔

འདྲེན་པའི་དར་འཕན་ལ་སོགས་པའི༔

དམག་དཔོན་གསུམ་ནི་དགྲ་ལ་རྔམས༔

བཟང་ངན་ལས་ཀྱི་སྣ་འདྲེན་པ༔

ཨ་ཁུ་ཁྲོ་ཐུང་ཁྲ་ལག་སྤྱང་༔

ཧོར་གྱི་ཤན་པ་མེ་རུ་རྩེ༔

འཇང་གི་གཡུ་ལྷ་ཐོག་འགྱུར་དང་༔

ལྷོ་ཡི་དུང་སྐྱོང་སྟག་ལྷ་དཀར༔

བྱང་གི་ཨ་སྟག་ཀླུ་མོ་སོགས༔

ལས་བྱེད་ཕྱི་ནང་དཔལ་བརྟུལ་དང་༔

གླིང་གི་ལྷ་རྣམས་བྱེ་བའི་ཚོགས༔

ཕྱོགས་མཚམས་བདུད་དཔུང་བྲན་དུ་བསྐོལ༔

ཀུན་ཀྱང་སངས་རྒྱས་བསྟན་སྲུང་དང་༔

སྐྱེ་བོ་ཡོངས་ཀྱི་དགྲ་ལྷ་མཛད༔

རྒྱབ་བརྟེན་བླ་མ་ཡི་དམ་ལྷ༔

དཔའ་བོ་མཁའ་འགྲོ་ཆོས་སྐྱོང་དང་༔

སྡོང་ཟླ་དགྲ་ལྷ་ཝེར་མའི་ཚོགས༔

ཀུན་ཀྱང་རྩལ་ཆེན་ཕྲིན་ལས་མྱུར༔

ཡེ་ཤེས་གྲུབ་ཀྱང་ལས་ཀྱི་ཚུལ༔

སྐྱེ་བོའི་ཟོ་དོར་ཡིན་པའི་ཕྱིར༔

འདོད་ཡོན་གཏོར་མའི་མཆོད་པ་འབུལ༔

སྐྱེ་བོ་ཡོངས་ལ་མགོན་སྐྱོབ་མཛད༔

བསྟན་པའི་དགྲ་བོ་སྒྲོལ་བའི་ཕྱིར༔

རཀྟ་དམར་གྱི་མཆོད་པ་འབུལ༔

དགྲ་བགེགས་མྱུར་དུ་སོད་ལ་ཤོག༔

གསང་སྔགས་སྲུང་མ་ཡིན་པའི་ཕྱིར༔

དམ་རྫས་སྨན་གྱི་མཆོད་པ་འབུལ༔

གསང་སྔགས་བསྟན་པ་རྒྱས་པར་མཛོད༔

གུ་རུ་པདྨ་འབྱུང་གནས་ཀྱི༔

ཡང་སྤྲུལ་གྲུབ་ཐོབ་ཡིན་པའི་ཕྱིར༔

གསང་བའི་མཆོད་པ་སྣ་ཚོགས་འབུལ༔

ཟབ་གཏེར་བསྟན་པ་རྒྱས་པར་མཛོད༔

བདུད་རྩི་བསང་གི་མཆོད་པ་འབུལ༔

མི་ནད་ཕྱུགས་ནད་ཞི་བར་མཛོད༔

དག་བྱེད་ཁྲུས་ཀྱི་མཆོད་པ་འབུལ༔

མི་གཙང་ཉམས་གྲིབ་ཞི་བར་མཛོད༔

བདུད་རྩི་ཆང་གི་མཆོད་པ་འབུལ༔

ལོ་ཏོག་འབྲས་དྲུག་ལེགས་པར་མཛོད༔

བདུད་རྩི་དཀར་གསུམ་མཆོད་པ་འབུལ༔

མུར་ཐུད་ཟས་བཅུད་འཕེལ་བར་མཛོད༔

གསེར་དངུལ་དར་ཟབ་མཆོད་པ་འབུལ༔

གོས་དང་རྒྱན་རྣམས་ཕྱུགས་པར་མཛོད༔

གོ་མཚོན་སྣ་ཚོགས་མཆོད་པ་འབུལ༔

མི་མཐུན་གཡུལ་ལས་རྒྱལ་བར་མཛོད༔

བ་དན་རྒྱལ་མཚན་དཀོར་ནོར་འབུལ༔

སྙན་གྲགས་ཕྱོགས་བཅུར་རྒྱས་པར་མཛོད༔

རྒྱལ་སྲིད་སྣ་བདུན་མཆོད་པ་འབུལ༔

ཆོས་སྲིད་དཔལ་འབྱོར་མཐོ་བར་མཛོད༔

བཀྲ་ཤིས་རྫས་བརྒྱད་མཆོད་པ་འབུལ༔

ཚེ་རིང་ཆོས་འཕེལ་མཛད་དུ་གསོལ༔

བཀྲ་ཤིས་རྟགས་བརྒྱད་མཆོད་པ་འབུལ༔

འདོད་པའི་དོན་ཀུན་འགྲུབ་པར་མཛོད༔

རོལ་མོ་གླུ་དབྱངས་མཆོད་པ་འབུལ༔

གཏམ་སྙན་སྣ་ཚོགས་དངོས་གྲུབ་སྩོལ༔

 

ཀྱཻ༔ མེ་ཏོག་སིལ་མའི་ཆར་གྱིས་ནམ་མཁའ་གང་༔

ཉི་ཟླ་སྣང་གསལ་འོད་ཀྱིས་ཀུན་ཏུ་ཁྱབ༔

སྤྱན་གཟིགས་སྣ་ཚོགས་འབྱོར་པས་ས་གཞི་ཁེབས༔

འདི་དག་འབུལ་གྱིས་བཀྲ་ཤིས་བདེ་ལེགས་སྩོལ༔

ཅེས་མཆོད་ཅིང་ཕྲིན་ལས་གསོལ་ལོ། །

 

སྤྲོ་ན་གསེར་སྐྱེམས་གཏོར་མཆོད་སོགས་ཅི་འབྱོར་བཤམས་ཤིང་།

རྃ་ཡྃ་ཁྃ། ཨོཾ་ཨཱཿཧཱུྃ་ལན་གསུམ།

ཧྲཱིཿ རང་རིག་ཀ་དག་སྟོང་ཆེན་པདྨོའི་དབྱིངས། །

རང་གདངས་ལྷུན་གྲུབ་འོད་གསལ་གླིང་གི་དབུས། །

རང་རྩལ་ཟུང་འཇུག་ཡེ་ཤེས་ཐིག་ལེའི་སྐུ། །

རང་སྣང་གཉིས་འཛིན་སྒྲོལ་མཛད་དཔའ་བོའི་རྗེ། །

མ་སངས་རྒྱལ་པོ་གེ་སར་དམག་གི་དཔོན། །

གྲུབ་གཉིས་དངོས་གྲུབ་མ་ལུས་སྩོལ་བའི་ལྷ། །

སྐུ་དང་རྒྱན་འཁོར་མ་ངེས་ཅིར་ཡང་སྤྲུལ། །

འཇིག་རྟེན་ལྷ་དང་མི་དང་མི་མ་ཡིན། །

ཀུན་གྱིས་དད་ཅིང་ཀུན་ལ་དབང་དུ་བསྒྱུར། །

དོན་དམ་གཤེགས་བཞུགས་མཚན་མ་ལས་འདས་ཀྱང་། །

བརྩེ་བའི་ཐུགས་རྗེས་གདུང་བའི་གནས་འདིར་གཤེགས། །

དད་གསུམ་རིན་ཆེན་པདྨོའི་གདན་ལ་བཞུགས། །

མོས་བློས་ཡོངས་སྦྱར་དམ་ཚིག་བདུད་རྩིའི་རྫས། །

ཏིང་འཛིན་སྔགས་དང་ཕྱག་རྒྱའི་ཆོ་འཕྲུལ་ལས། །

ཉེར་སྤྱོད་འདོད་ཡོན་རབ་འབྱམས་སྤྲིན་དུ་གཏིབས། །

སྨན་གཏོར་རཀྟ་རི་རབ་མཚོ་ལྟར་བརྗིད། །

བདེ་སྟོང་རྡོ་རྗེ་བཙུན་མོའི་གླུ་གར་བཞད། །

མཚན་འཛིན་ཀུན་འཇོམས་སྣང་སྟོང་དཔུང་ཆེན་གཡོ། །

རྡོ་རྗེའི་གོ་མཚོན་ཡུལ་མཁར་རྒྱན་ཆས་ཕྱུགས། །

རྒྱལ་སྲིད་རིན་ཆེན་ཉེ་རྫས་ནོར་སྣ་ཚོགས། །

ལྷ་མིའི་འབྱོར་པ་ཀུན་བཟང་སྟོབས་ཀྱིས་སྤྲུལ། །

ཐིག་ལེ་ཆེན་པོ་འཁོར་འདས་མཉམ་བརྡལ་བ། །

འདོད་རྒུ་ལྷུན་གྱིས་གྲུབ་པའི་མཆོད་སྤྲིན་འདིས། །

རྩ་གསུམ་ཆོས་སྐྱོང་དགྲ་ལྷ་ཝེར་མའི་སྲོག །

གེ་སར་སྐྱེས་བུ་དོན་འགྲུབ་རྒྱལ་པོ་དང་། །

དགྱེས་ཡུམ་བློན་འབངས་དྲག་པོའི་དཔུང་དང་བཅས། །

མི་འབྲལ་རྩེ་གཅིག་འགྲོགས་པའི་དད་གུས་ཀྱིས། །

གསོལ་ལོ་མཆོད་དོ་ཐུགས་དམ་བསྐང་གྱུར་ཅིག །

ཉམས་ཆགས་འགལ་འཁྲུལ་ཆོས་ཀྱི་དབྱིངས་སུ་དག །

སྔོན་གྱི་ཐུགས་དམ་གཉན་པོ་རྗེས་དགོངས་ལ། །

རྒྱལ་བའི་བསྟན་སྲུང་བླ་མའི་སྐུ་ཚེ་བསྲིང་། །

དགེ་འདུན་སྡེ་རྒྱས་རྣལ་འབྱོར་ཚེ་དཔལ་སྤེལ། །

མཐའ་བཞིའི་དམག་དཔུང་གློ་བུར་གདུག་པའི་ཚལ། །

བརྟུལ་ཞུགས་རྡོ་རྗེའི་མེ་ཡིས་གཞོམ་པར་མཛོད། །

འཇིག་རྟེན་བཀྲ་ཤིས་ལས་མཚན་ཆོས་རྒྱུད་འཕེལ། །

ཆོས་མཐུན་བསམ་རྒུ་ལྷུན་གྱིས་འགྲུབ་པར་མཛོད། །

བདེ་སྟོང་རྡོ་རྗེ་གསང་བའི་དམ་ཚིག་གིས། །

རྟག་ཏུ་འདུ་བྲལ་མེད་པའི་ངང་ཉིད་ལས། །

མཐར་ཐུག་ཁྱེད་ཐུགས་གདོད་མའི་གཞི་དབྱིངས་སུ། །

འཆི་མེད་འཇའ་ལུས་རྡོ་རྗེའི་སྐུ་འགྲུབ་པར་མཛོད། །

ཅེས་རོལ་མོ་དང་བཅས་བྱ་བས་གྲུབ་བོ། །

 

ཚོགས་མཆོད་བྱེད་པར་སྤྲོ་ན། ཤ་ཆང་གི་དམ་རྫས་གཙོར་གྱུར་བའི་ཚོགས་གཏོར་བདུད་རྩིས་བྲན།

རྃ་ཡྃ་ཁྃ་གིས་བསངས་སྦྱངས།

རང་བྱུང་རིག་རྩལ་ཡེ་ཤེས་མེ་རླུང་ཆུས། །

ཚོགས་རྫས་དངོས་འཛིན་བག་ཆགས་བསྲེགས་གཏོར་བཀྲུས། །

ཆོས་དབྱིངས་བྷཉྫར་རིག་པའི་བདུད་རྩིར་བསྐྱིལ། །

རྣམ་པ་འདོད་ཡོན་མི་ཟད་གཏེར་དུ་གྱུར། །

ཨོཾ་ཨཱཿཧཱུཾ༔

ལན་གསུམ་གྱིས་བརླབ།

ཧཱུྃ་ཧྲི༔ ངོ་བོ་འོད་གསལ་དབྱིངས་ལས་མ་གཡོས་ཀྱང་། །

རང་བཞིན་ཐུགས་རྗེས་གཟུགས་ཀྱི་སྐུར་བཞེངས་པ། །

རྩ་གསུམ་ཀུན་འདུས་གེ་སར་དགྲ་ལྷའི་དཔུང་། །

འཁོར་བཅས་ཚོགས་ལ་སྤྱན་འདྲེན་གཤེགས་སུ་གསོལ། །

ཕྱི་ནང་གསང་བ་ཚོགས་ཀྱི་མཆོད་པ་འབུལ། །

བག་མེད་ཉམ་ཆག་སྡིག་སྒྲིབ་དབྱིངས་སུ་བཤགས། །

གཟུང་འཛིན་རུ་དྲ་བསྒྲལ་བའི་ཤ་ཁྲག་རུས། །

དགྱེས་པར་བཞེས་ལ་མཆོག་ཐུན་དངོས་གྲུབ་སྩོལ། །

ཨོཾ་ཨཱཿཧཱུྃ༔ གུ་རུ་དྷེ་ཝ་དྷ་ཀི་ནི་བཱིདྱ་དྷ་ར་མ་ཎི་ཤ་ཏྲཱུྃ་དཱ་མ་ཀ་ས་པ་རི་ཝ་ར་སརྦ་ག་ན་ཙ་ཀྲ་པཱུ་ཛ་ཧོཿ

ཞེས་ཚོགས་ཕུད་རིམ་པ་གསུམ་དུ་སྤྲོས་ལ་འབུལ་ལོ། །

 

སྤྲོ་ན་སྐོང་རྫས་རྣམས་ནམ་མཁའ་མཛོད་ཀྱི་སྔགས་རྒྱས་བརླབ།

ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུདྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ།

ཨོཾ་བཛྲ་སྤ་ར་ཎ་ཁྃ་གིས་སྤེལ།

ཧཱུྃ་ཧྲཱི༔ མི་འགྱུར་མི་ཤིག་འོད་གསལ་སྒྱུ་མའི་འཕྲུལ། །

རང་སྣང་སྣོད་བཅུད་རྣམ་དག་པདྨོའི་གཞིར། །

དགོས་འདོད་ཀུན་འབྱུང་ནོར་བུའི་གཞལ་མེད་ཁང་། །

ངོ་མཚར་ཕུན་ཚོགས་བཀོད་ལེགས་རྒྱ་ཆེའི་དབུས། །

ཕྱི་ནང་ཉེར་སྤྱོད་འདོད་པའི་ཡོན་ཏན་ལྔ། །

བཀྲ་ཤིས་རྫས་རྟགས་རིན་ཆེན་རྣམ་པ་བདུན། །

སྨན་གཏོར་རཀྟ་ཛ་གད་དཔའ་བོའི་ཕུད། །

བཅུ་དྲུག་བདེ་བའི་ལང་ཚོའི་གླུ་གར་བསྒྱུར། །

རི་རབ་གླིང་བཞི་ལྷ་ཀླུ་མི་ཡི་དཔལ། །

གོ་མཚོན་ཡུལ་མཁར་ཟས་གོས་རྐང་བཞིའི་ཕྱུགས། །

གཏུམ་རྔམས་དམག་གི་དཔུང་ཆེན་སྤྲིན་ལྟར་གཡོ། །

རྟེན་གཡབ་མདའ་དར་སྣ་ལྔ་གློག་ལྟར་འཁྱུགས། །

དྲག་པོའི་ཀི་བསྭོ་འབྲུག་སྒྲ་འུ་རུ་རུ། །

ཕ་རོལ་རྒོལ་འཇོམས་ཐོག་མདའ་ཤ་ར་ར། །

ཚེ་གཡང་དཔལ་གྱི་ཆར་པ་སི་ལི་ལི། །

འཇའ་འོད་བདུད་རྩིའི་ངད་ལྡང་ཐུ་ལུ་ལུ། །

འོད་དམར་དབང་གི་ཟེར་མདང་ཁྱུགས་སེ་ཁྱུག །

བདེ་དྲོད་རིག་པའི་རྩལ་སྣང་ཤིགས་སེ་ཤིག །

སྣང་སྟོང་སྒྱུ་མར་རོལ་པའི་ཡེ་ཤེས་ལས། །

སྣང་སྲིད་དག་པ་རབ་འབྱམས་འོག་མིན་ཞིང་། །

སྐུ་དང་ཡེ་ཤེས་རྨད་བྱུང་རྡོ་རྗེའི་སྤྲིན། །

འདོད་ཡོན་མི་ཟད་རྒྱན་གྱི་འཁོར་ལོ་ཆེས། །

རྩ་གསུམ་ཆོས་སྲུང་དགྲ་ལྷ་ཝེར་མའི་སྲོག །

འཛམ་གླིང་སེང་ཆེན་ནོར་བུ་དགྲ་འདུལ་དང་། །

དགྱེས་ཡུམ་རྣམ་ལྔ་ཕྱི་ནང་བློན་འཁོར་དཔུང་། །

མི་འབྲལ་རྩེ་གཅིག་འགྲོགས་པའི་དད་གུས་ཀྱིས། །

གསོལ་ལོ་མཆོད་དོ་ཐུགས་དམ་གཉེན་པོ་བསྐང་། །

བག་མེད་ཉམས་ཆག་འགལ་འཁྲུལ་དབྱིངས་སུ་དག །

བྱིན་རློབས་དབང་བསྐུར་རྡོ་རྗེའི་ཡེ་ཤེས་བསྐྱེད། །

མཆོག་དང་ཐུན་མོང་དངོས་གྲུབ་ཆར་ལྟར་ཕོབ། །

རྣལ་འབྱོར་གྲོགས་མཛོད་ལས་བཞིའི་ཕྲིན་ལས་སྤེལ། །

འགལ་རྐྱེན་ཀུན་སོལ་མཐུན་རྐྱེན་ཡིད་བཞིན་སྒྲུབས། །

ཚེ་བསོད་དཔལ་འབྱོར་སྙན་པའི་གྲགས་པ་སྤེལ། །

བདེ་སྟོང་རྡོ་རྗེ་གསང་བའི་དམ་ཚིག་གིས། །

རྟག་ཏུ་འདུ་འབྲལ་མེད་པའི་ངང་ཉིད་ལས། །

དངོས་གྲུབ་འདོད་རྒུའི་དཔལ་ཀུན་མྱུར་སྩོལ་ཅིག །

ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ། ཀུ་རུ་ཧཱུྂ། ཧ་ཧ་ཧ་ཧ་ཧོཿ བྷ་ག་ཝཱན། སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་ཝ་མ་ཧཱ་ས་མ་ཡ་སཏྭ་ཨཱཿ

ཞེས་དང་རྗེས་འབྲེལ་དུ་སྒོ་གསུམ་ཉམས་ཆག་ཐམས་ཅད་བཤགས་སྡོམས་ཀྱིས་ཡི་གེ་བརྒྱ་བ་བརྗོད་ལ་བདག་བློ་འདས་ཀྱི་བང་དུ་བསྐྱལ་ལོ།གང་ལྟར་ཚོགས་རྫས་རྣམས་ནང་གི་བསྲེག་བླུག་ཏུ་རོལ།

 

ལྷག་མ་ལ་བདུད་རྩི་ཕབ།

སརྦ་པཉྩ་ཨ་མྲྀ་ཏ་ཧཱུྃ་ཧ་ཧོ་ཧྲཱི༔ས་བརླབ།

བྷྱོ། རང་རྩལ་རོལ་པའི་ལྷག་སྡུད་ནི། །

མཁའ་འགྲོ་གིང་ལང་ཕོ་ཉའི་ཚོགས། །

བདེ་ཆེན་བདུད་རྩི་ཕམ་ཕབ་ལོང་། །

བར་ཆད་ཀུན་སོལ་མཐུན་རྐྱེན་སྒྲུབས། །

ཨོྃ་ཨུ་ཙྪིཥྚ་བ་ལིངྟ་ཁཱ་ཧི།

ཞེས་དང་ཐེག་པ་ཆེན་པོའི་སྨོན་ལམ་གྱིས་རྒྱས་གདབ་པོ། །དགྲ་ལ་དྲག་ཏུ་བསྐུལ་བའི་ཆོ་ག་ལོགས་སུ་ཤེས་པར་བྱའོ། །

 

རྗེས་རིམ་ནི།

མཆོད་པ་རྣམས་ཨོཾ་ཨཱཿཧཱུྃ་གིས་བརླབ།

ཨོཾ་གུ་རུ་མ་ཧཱ་སིདྷ་ས་པ་རི་ཝཱ་ར་ཨརྒྷཾ་པཱདྱཾ་པུཥྤེ་དྷཱུཔེ་ཨཱ་ལོ་ཀེ་གནྡྷེ་ནཻ་ཝ་དྱ་ཤཔྟ་པཉྩ་ཨ་མྲྀ་ཏ་རཀྟ་བ་ལིངྟ་གུ་ཧྱ་པཱུ་ཛ་ཧོཿས་མཆོད།

 

ཧྲཱིཿ ཕྱི་ལྟར་བདུད་འདུལ་དཔའ་བོའི་སྐུ༔

ནང་ལྟར་འདོད་རྒུ་གཏེར་གྱི་བདག༔

གསང་བ་གྲུབ་པའི་རིག་འཛིན་རྗེ༔

གེ་སར་རྒྱལ་ལ་ཕྱག་འཚལ་བསྟོད༔

ཅེས་པས་བསྟོད།

 

མ་རྙེད་ཡོངས་སུ་མ་ཚང་དང་། །

གང་ཡང་ནུས་པ་མ་མཆིས་པ། །

འདིར་ནི་བགྱི་བ་གང་ནོངས་པ། །

དེ་ཀུན་ཁྱོད་ཀྱིས་བཟོད་མཛད་རིགས། །

ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ། ཀུ་རུ་ཧཱུྂ། ཧ་ཧ་ཧ་ཧ་ཧོཿ བྷ་ག་ཝཱན། སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་ཝ་མ་ཧཱ་ས་མ་ཡ་སཏྭ་ཨཱཿ

ཡི་གེ་བརྒྱ་པ་ལན་གསུམ་གྱིས་བཤགས།

 

རྟེན་ལ་བསྟིམ་པར་མོས་པས།

ཨོཾ། འདིར་ནི་རྟེན་དང་ལྷན་ཅིག་ཏུ། །

འགྲོ་བའི་དོན་དུ་བཞུགས་ནས་ཀྱང༌། །

ནད་མེད་ཚེ་དང་དབང་ཕྱུག་དང༌། །

མཆོག་རྣམས་ལེགས་པར་སྩལ་དུ་གསོལ། །

ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ།

 

དང་། ཡང་ན།

གསང་གསུམ་བྱིན་རླབས་འོད་ཟེར་ཚུལ། །

གནས་གསུམ་ཐིམ་པས་སྒྲིབ་བྱང་ཞིང་། །

སྐུ་གསུམ་ཡེ་ཤེས་རྒྱུད་ལ་བཞག །

འོད་ཞུ་རང་རིག་ངང་དུ་ཐིམ། །

 

ཞེས་དང་གང་ལྟར།

བློ་འདས་ཆོས་སྐུ་སྐྱེས་བུའི་དོན། །

མངོན་གྱུར་རྫོགས་པ་ཆེན་པོར་ཨ།

 

ཧོཾཿ དགེ་འདིས་བདག་སོགས་འགྲོ་ཀུན་གྱིས། །

རྩ་གསུམ་སྐྱེས་བུའི་གོ་འཕང་མཆོག །

ཚེ་འདི་ཉིད་ལ་མྱུར་ཐོབ་ནས། །

ཁམས་གསུམ་འཁོར་བ་དོང་སྤྲུགས་ཤོག །

ཅེས་སྨོན་ལམ་དང་།

 

ལྷ་དབང་ལྷ་ཡི་ལོངས་སྤྱོད་ཆེན་པོས་བརྗིད། །

མི་དབང་མི་ཡི་འབྱོར་བ་ཆེན་པོས་མཐོ། །

ཀླུ་དབང་ཀླུ་ཡི་ནོར་བུ་ཆེན་པོས་ཕྱུག །

འཇིག་རྟེན་ཆེན་པོ་གསུམ་གྱི་བཀྲ་ཤིས་ཤོག །

 

གེ་སར་མངོན་ཤེས་རྫུ་འཕྲུལ་འགྲན་ཟླ་མེད། །

ཞལ་ལུ་དཔའ་རྒོད་སྙིང་སྟོབས་འགྲན་ཟླ་མེད། །

ཁྲོ་ཐུང་འཕྲུལ་དང་བཀྲ་ལག་འགྲན་ཟླ་མེད། །

འགྲན་མེད་མི་ཕོ་གསུམ་གྱི་བཀྲ་ཤིས་ཤོག །

 

རྒྱ་བཟས་རྒྱ་ཡི་རྟེན་མཆོག་ཐབས་ཀྱིས་དྲངས། །

བལ་བཟས་བལ་པོའི་མཆོད་སྡོངས་གྲོགས་སུ་ཐོབ། །

འབྲུག་མོས་འབྲུག་ལྟར་གྲགས་པའི་གཏམ་རྒྱུད་བཞག །

ཡ་མཚན་བུད་མེད་གསུམ་གྱི་བཀྲ་ཤིས་ཤོག །

ཅེས་འོད་གསལ་སྤྲུལ་པའི་རྡོ་རྗེའི་ཤིས་བརྗོད་དག་སྣང་མ་འདིས་མཇུག་བསྡུས་ཏེ་རོལ་མོ་བྱའོ། །

 

རའུ་སྒྲུང་མཁན་ཨརྨྱེ་གཞོན་ནུས་རིང་མོ་ནས་བསྐུལ་བའི་ངོར། ༈ མཆོག་གྱུར་གླིང་པས་མདོ་ཁམས་བྱང་རྒྱུད་ཤར་ཟླ་དལ་གྱིས་འབབས་པའི་འགྲམ་སྐྱེས་བུ་ཆེན་པོ་འཁྲུངས་པའི་ཡུལ། ཕུ་ནུ་སུམ་ཅུའི་སྲས་མཁར་གྱི་ཞོལ། འདུ་ར་སྟག་ཐང་ཁྲ་མོར་རབ་བྱུང་བཅོ་ལྔ་པའི་མགོ་བོ་ཡོས་ལོ་སྤྲེལ་ཟླ་བའི་དམར་ཕྱོགས་མཁའ་འགྲོ་འདུ་བའི་དུས་ཆེན་ཉིན་གཏན་ལ་ཕབ་པ་ཉིད་ཉེ་ཆར་གྲུབ་པའི་རྣལ་འབྱོར་ཤེས་རབ་རྡོ་རྗེའི་གསུང་བསྐུལ་མཛད་པས་གཞུང་རྩ་བར་གོང་འོག་གསལ་བྱེད་ཁ་སྐོངས་ཕྲན་བུ་དང་ཚོགས་བསྐང་ཉིད་རྡོ་རྗེའི་གསུང་བྱིན་རླབས་ཅན་རྣམས་ནས་བཏུས་ཏེ་གཏེར་ཆེན་མཆོག་གི་མཚན་གྱི་ཅོད་པན་འཆང་བ་པདྨ་ཀུན་ཁྱབ་ཡེ་ཤེས་སྙིང་པོས་བྲིས་པ་སརྦ་མངྒ་ལཾ།། །།