ཡུམ་བཀའ་བདེ་ཆེན་རྒྱལ་མོའི་དབང་གི་ཆོག་སྒྲིག་བདེ་ཆེན་བཅུད་འབེབ།
༄༅། །ཀློང་ཆེན་སྙིང་གི་ཐིག་ལེ་ལས། ཡུམ་བཀའ་བདེ་ཆེན་རྒྱལ་མོའི་དབང་གི་ཆོག་སྒྲིག་བདེ་ཆེན་བཅུད་འབེབ་ཅེས་བྱ་བ་བཞུགས་སོ། །
ཀུན་མཁྱེན་ཡེ་ཤེས་ཕུང་པོ་ཅན། །
སྲིད་པའི་འཁོར་ལོ་རྣམ་སྦྱོང་བ། །
དེ་རིང་བཤད་པའི་རིན་ཆེན་གཏེར། །
གཙོ་བོས་བདག་ལ་བཀའ་དྲིན་སྩོལ། །
ན་མོ༔ སྐྱེ་མེད་ཡེ་ཤེས་མཁའ་འགྲོའི་སྐུ༔
འགགས་མེད་རང་བྱུང་རྣལ་འབྱོར་མ༔
རྒྱལ་ཡུམ་རྡོ་རྗེ་ཕག་མོ་ལ༔
འདུ་འབྲལ་མེད་པར་སྐྱབས་སུ་མཆི༔
ཧོ༔ འདི་ནས་བྱང་ཆུབ་མ་ཐོབ་བར༔
ཡེ་ཤེས་མཁའ་འགྲོ་ཁྱོད་བསྒྲུབ་ནས༔
ཕྱོགས་རིས་བྲལ་བའི་སེམས་ཅན་རྣམས༔
བདེ་ཆེན་ས་ལ་འགོད་པར་བགྱི༔
ཧོཿ རྡོ་རྗེ་སློབ་དཔོན་སངས་རྒྱས་དཔལ༔
དུས་གསུམ་བཞུགས་ལ་ཕྱག་འཚལ་ལོ༔
མཆོག་གསུམ་བསྟེན་པའི་ཞིང་གྱུར་ལ༔
གཉིས་མེད་ཡིད་ཀྱིས་སྐྱབས་སུ་མཆི༔
དངོས་འབྱོར་ཡིད་ཀྱིས་རྣམ་སྤྲུལ་པའི༔
དག་པའི་མཆོད་པ་བཞེས་སུ་གསོལ༔
དངོས་གྲུབ་ཆུ་བོ་གཅོད་པའི་གེགས༔
ཉེས་བྱས་མ་ལུས་བཤགས་པར་བགྱི༔
ཕྱོགས་བཅུ་འཁོར་གསུམ་དག་པའི་ཆོས༔
མ་ཆགས་སྤྱོད་ལ་རྗེས་ཡི་རང་༔
དག་པའི་མཐའ་བཞི་དྲི་མ་མེད༔
རྫོགས་པའི་བྱང་ཆུབ་སེམས་བསྐྱེད་དོ༔
བདེ་གཤེགས་དབང་ཕྱུག་སེམས་ཅན་ལ༔
དགོས་པ་གསུམ་ཕྱིར་ལུས་འབུལ་ལོ༔
ཚེ་རབས་བགྲངས་པའི་ལས་རྣམས་ཀུན༔
བསྡུས་ཏེ་བྱང་ཆུབ་ཆེན་པོར་བསྔོ༔
བདེ་བར་གཤེགས་པ་ཁྱེད་ཅི་འདྲ། །
དེ་འདྲ་ཁོ་ནར་བདག་འགྱུར་ཤོག །
སྤྱོད་པ་རྨད་བྱུང་བསམ་ཡས་པ། །
འགྲོ་ལ་ཕན་ཕྱིར་བདག་གིས་སྤྱད། །
བྱང་ཆུབ་སེམས་མཆོག་དམ་པ་དང་། །
སྐུ་གསུང་ཐུགས་ཀྱི་ཕྱག་རྒྱ་ནི། །
སྲོག་གི་ཕྱིར་ཡང་མི་གཏོང་ན། །
རྡོ་རྗེ་རྒྱལ་པོས་བྱིན་བརླབ་མཛོད། །
ཨོཾ་ན་མ་སྟེ་ཧཱུྃ།
ཨོཾ་ན་མ་མི་ཧཱུྃ།
ཨོཾ་ན་མོ་ན་མ་ཧཱུྃ།
པྲ་ཏཱིཙྪ་བཛྲ་ཧོཿ
བྱང་ཆུབ་རྡོ་རྗེས་སངས་རྒྱས་ལ། །
མཆོད་ཆེན་ཇི་ལྟར་བསྩལ་པ་ལྟར། །
བདག་ཀྱང་ཡོངས་སུ་སྐྱོབ་པའི་ཕྱིར། །
ནམ་མཁའི་རྡོ་རྗེ་དེང་བདག་སྩོལ། །
ཨོཾ་པདྨོ་ཡོ་གི་ནཱི་ཏཱ་རེ་ཏུཏྟཱ་རེ་ཏུ་རེ་ཛྙཱ་ན་ཝཱ་རཱ་ཧཱི་ཧཱུྃཿ
བཅོམ་ལྡན་བདག་གིས་བཟུང་ལགས་ཀྱིས། །
བདག་ལ་ཉེ་བར་མཛད་དུ་གསོལ། །
དབང་བཞི་རྫོགས་པའི་དམ་ཚིག་ཏུ༔
རྡོ་རྗེ་སློབ་དཔོན་མི་སྤང་ཞིང་༔
མར་ངོའི་ཚེས་བཅུ་རྒྱུན་མི་གཅད༔
གཞོན་ནུ་མ་ལ་བསྙེན་བཀུར་བྱ༔
རྟག་ཏུ་བྱང་ཆུབ་སེམས་གཉིས་བསྒོམ༔
གཙོ་བོས་ཇི་ལྟར་བཀའ་བསྩལ་པ། །
དེ་དག་ཐམས་ཅད་བདག་གིས་བགྱི། །
ཁྱོད་ལ་བདག་ཀྱང་ཡོངས་སུ་འབུལ། །
སློབ་མར་བཟུང་ནས་སྤྱད་དུ་གསོལ། །
